យុវជនខ្មែរក្រោមនៅខេត្តព្រះត្រពាំងម្នាក់ចូលបំភ្លឺករណីចែកចាយព័ត៌មានលើបណ្ដាញសង្គមហ្វេសប៊ុកតាមការកោះហៅរបស់អាជ្ញាធរវៀតណាម និងម្នាក់ទៀត ត្រូវអាជ្ញាធរមូលដ្ឋានខេត្តនេះព្រមានឲ្យលុបរូបសញ្ញាកាន់ទុក្ខមានទង់ជាតិកម្ពុជាក្រោម នៅលើប្រូហ្វាល (Profile) ហ្វេសប៊ុករបស់ខ្លួនចេញវិញ។ សមាគមខ្មែរក្រោមថា អ្វីដែលអាជ្ញាធរវៀតណាមធ្វើនេះជាការគំរាមកំហែង និងបំបិទសិទ្ធិសេរីរបស់ពលរដ្ឋខ្មែរក្រោម។
អាជ្ញាធរវៀតណាមនៅស្រុកផ្នោដាច់ខេត្តព្រះត្រពាំង បានចំណាយពេលសាកសួរយុវជន តោ ហ្វាង ចឿង ជិត ៥ម៉ោង។ ក្រោយអាជ្ញាធរវៀតណាមសាកសួរចប់នៅល្ងាចថ្ងៃទី៨ ខែមិថុនា យុវជន តោ ហ្វាង ចឿង ឱ្យអាស៊ីសេរីដឹងថា អាជ្ញាធរវៀតណាម ចោទប្រកាន់លោកថា បានបង្ហោះព័ត៌មានក្លែងក្លាយ និងបង្គាប់ឱ្យលោកត្រូវទៅបង់ប្រាក់ពិន័យទៅឱ្យអាជ្ញាធរខេត្តព្រះត្រពាំង។ លោក តោ ហ្វាង ចឿង បន្តថា លោកអាចប្រឈមនឹងពិន័យជាប្រាក់ពី ១០លាន ទៅ ២០លានដុង ឬគិតជាប្រាក់ដុល្លារពី ៥០០ដុល្លារទៅ ១.០០០ដុល្លារ។ ប៉ុន្តែ លោកមិនយល់ព្រមទទួលកំហុសនេះទេ ហើយយល់ថា ការចោទប្រកាន់របស់អាជ្ញាធរវៀតណាមនេះ ជាការគំរាមកំហែង និងបំបិទសិទ្ធិសេរីលោក៖ «គេសរសេរហ្នឹងគ្រាន់តែប្រាប់ថា ទឹកដីកម្ពុជាក្រោមជាទឹកដីរបស់ខ្មែរពិតៗ ទេតើ។ គេថា យើងបំផុសព័ត៌មានក្លែងក្លាយ ព័ត៌មានមិនពិត ខ្ញុំមិនទទួលយកទេគេចោទខ្ញុំអយុត្តិធម៌ពេកណា » ។
យុវជន តោ ហ្វាង ចឿង ដែលប្រើហ្វេសប៊ុកឈ្មោះ (To Hoang Chuong) បានបង្ហោះព័ត៌មានកាលពីថ្ងៃទី៣១ ខែឧសភា ដែលបានស្រាវជ្រាវតាមប្រព័ន្ធអ៊ីនធើណិតឯកសារទាក់ទងនឹងលិខិតរបស់មេដឹកនាំវៀតណាម លោក ហូ ជីមិញ កាលពីឆ្នាំ១៩៨៤ ដែលមានខ្លឹមសារថា ដែនដីកម្ពុជាក្រោម ស្ថិតនៅក្រោមការគ្រប់គ្រង និងជាកម្មសិទ្ធិរបស់ខ្មែរក្រោម។ ចំណែក ជនជាតិវៀតណាម ដែលរស់នៅលើទឹកដីនេះ គ្រាន់ជាអ្នកស្នាក់អាស្រ័យ និងគ្មានសិទ្ធិសម្រេចអ្វីនោះទេ។
យុវជន តោ ហ្វាង ចឿង ឱ្យដឹងថា អាជ្ញាធរវៀតណាម ប្រាប់លោកថា បើមិនយល់ព្រមទទួលកំហុសអាចរកមេធាវីប្ដឹងទាស់នឹងការសម្រេចនេះ។ យុវជនរូបនេះ នឹងជជែកជាមួយសាច់ញាតិ ឬសមាគមខ្មែរក្រោមក្រោម ដើម្បីគួរធ្វើយ៉ាងណាបន្តទៀត។
រីឯយុវជនខ្មែរក្រោមម្នាក់ទៀត គឺយុវជន ថាច់ ថុង រស់នៅខេត្តព្រះត្រពាំងដែរនោះ កាលពីថ្ងៃទី៤ ខែមិថុនា ត្រូវអាជ្ញាធរមូលដ្ឋានបញ្ជាឱ្យលុបរូបសញ្ញាកាន់ទុក្ខមានទង់ជាតិកម្ពុជាក្រោម នៅលើប្រូហ្វាល (Profile) ហ្វេសប៊ុករបស់ខ្លួនចេញ បើមិនដូច្នេះទេនឹងត្រូវចាប់ខ្លួន។ អាជ្ញាធរវៀតណាម ចោទថា ការដាក់សញ្ញាកាន់ទុក្ខនេះ ជាសកម្មភាពប្រឆាំងរដ្ឋាភិបាលវៀតណាម ។
អគ្គលេខាធិការសមាគមខ្មែរក្រោម ដើម្បីសិទ្ធិមនុស្ស និងអភិវឌ្ឍន៍ លោក សឺន ជុំជួន ឱ្យដឹងថា នៅរយៈពេលចុងក្រោយនេះអាជ្ញាធរវៀតណាម បានតាមដាន និងមានវិធានការជាបន្តបន្ទាប់ លើការបង្ហោះព័ត៌មានរបស់ពលរដ្ឋកម្ពុជាក្រោម។ លោកថា ការរឹតបន្តឹងបែបនេះ នឹងធ្វើឱ្យពលរដ្ឋខ្មែរក្រោមផ្សេងទៀត លែងហ៊ានបញ្ចេញមតិ ឬបង្ហោះព័ត៌មានតាមបណ្ដាញសង្គម៖ «ប្រហែលជាមានទាមទារការតវ៉ាខ្លាំងឡើងកាលណាវៀតណាមនៅតែមានការរឹតបន្តឹងទៅលើសេរីភាពនៃការបញ្ចេញមតិបែបនេះអ៊ីចឹងមានន័យ អង្គការសមាគមខ្មែរក្រោមទាំងសហព័ន្ធខ្មែរក្រោមនៅក្រៅប្រទេសក្ដីគេមិនអាចនៅស្ងៀមបានទេ»។
លោក សឺន ជុំជួន ថា ការបញ្ចេញមតិរបស់ពលរដ្ឋខ្មែរក្រោម គឺស្របតាមគោលការណ៍សិទ្ធិមនុស្សនៃអង្គការសហប្រជាជាតិ។ នៅរយៈពេលចុងក្រោមនេះ យុវជនខ្មែរក្រោមនៅខេត្តព្រះត្រពាំង ចំនួនបីនាក់ រងការគំរាមកំហែង និងធ្វើទុក្ខបុកម្នេញ ពីអាជ្ញាធរវៀតណាម ទាក់ទងករណីបង្ហោះព័ត៌មាន និងប្រើប្រាស់ហ្វេសប៊ុក។ កាលពីថ្ងៃទី២ ខែមិថុនា អាជ្ញាធរខេត្ត ព្រះត្រពាំង ពិន័យលុយយុវជន ថាច់ កឿង ជាទឹកប្រាក់ជាង ៧លានដុង ឬប្រមាណ ៣រយដុល្លារ ករណីបង្ហោះវីដេអូ រឿងអាជ្ញាធរវៀតណាមចែកអង្ករក្លែងក្លាយឱ្យពលរដ្ឋខ្មែរក្រោម។
លោក សឺន ជុំជួន ថា សមាគមលោកនឹងធ្វើរបាយការណ៍នៃការធ្វើទុក្ខបុកម្នេញ ទៅអង្គការសិទ្ធិមនុស្សអន្តរជាតិ និង អង្គការសហប្រជាជាតិទទួលផ្នែក សិទ្ធិមនុស្សឱ្យដឹងពីរឿងនេះ ដើម្បីធ្វើអន្តរាគមន៍ជួយការពារសិទ្ធិពលរដ្ឋខ្មែរក្រោម៕