យុវជន​ថា យុទ្ធនាការ​ជិះ​កង់​របស់​ពួកគេ​រង​ការ​គំរាម​ពី​អាជ្ញាធរ​ក្រុងភ្នំពេញ

ដោយ សុជីវី
2020.06.14
យុវជន​ជិះកង់ កោះកុងក្រៅ ៩២២ សកម្មភាពអាជ្ញាធរ​ក្រុងភ្នំពេញ​ហាមឃាត់​យុវជន​ធ្វើ​យុទ្ធនាការ​ជិះ​កង់​ផ្សព្វផ្សាយ​ពី​សក្ដានុពល​កោះកុង​ក្រៅ​ នៅ​ព្រឹក​ ថ្ងៃ​ទី១៤ ខែ​មិថុនា ឆ្នាំ​២០២០។
Screenshot from Facebook Name Long Kunthea

ក្រុម​យុវជន​ខកចិត្ត​ចំពោះ​អាជ្ញាធរ​ក្រុងភ្នំពេញ​ដែល​បាន​ប្រើ​អំណាច​បំពាន​សិទ្ធិ​សេរីភាព គំរាមកំហែង និង​ហាមឃាត់​ពួកគេ​មិន​ឱ្យ​ធ្វើ​យុទ្ធនាការ​ជិះ​កង់​ផ្សព្វផ្សាយ​ពី​សក្ដានុពល​កោះកុង​ក្រៅ​ជា​ថ្មី​ទៀត នៅ​ព្រឹក​ថ្ងៃ​ទី១៤ ខែ​មិថុនា។ ពួកគេ​ថា យុទ្ធនាការ​នេះ​ក្នុង​បំណង​ពញ្ញាក់​ស្មារតី​ពលរដ្ឋ​ខ្មែរ​ឱ្យ​ចូល​រួមគ្នា​ការពារ​កោះកុង​ក្រៅ។

ក្រុម​យុវជន​ឱ្យ​ដឹង​នៅ​ថ្ងៃ​ទី១៤ ឧសភា​ថា អាជ្ញាធរ​ក្រុង​ភ្នំពេញ​ហាក់​មាន​ចេតនា​លាក់បាំង មិន​ចង់​ឱ្យ​ពួកគេ​ផ្សព្វផ្សាយ​ឱ្យ​ទូលំទូលាយ ពី​សក្កានុពល​កោះកុង​ក្រៅ​ដោយ​បានជា​ព្យាយាម​រារាំង គំរាមកំហែង និង​រាយ​បណ្ដាក់​គ្នា​ដូច​ខ្យង តាម​ឃ្លាំមើល​ពួកគេ​កំពុង​ធ្វើ​យុទ្ធនាការ​ជិះ​កង់។ យុទ្ធនាការ​នេះ ក្រុម​យុវជន មាន​គ្នា ៧​នាក់ ជិះ​កង់ ៣​គ្រឿង និងម៉ូតូ ២​គ្រឿង ធ្វើដំណើរ​ចាប់ពី​រង្វង់​មូល​ព្រហ្ម​មុខ​បួន ស្ពាន​ជ្រោយចង្វា​ត្រើយ​ខាងកើត ឆ្ពោះ​ទៅ​សង្កាត់​កោះដាច់ ខ័ណ្ឌ​ជ្រោយចង្វា រាជធានី​ភ្នំពេញ មាន​ចម្ងាយ​ប្រមាណ ២០ គីឡូម៉ែត្រ​។ ក្រុម​យុវជន​អះអាង​ថា អាជ្ញាធរ​បាន​ដកហូត​ទង់ជាតិ ថែមទាំង​ចោទ​ពួកគេ​ថា ជិះ​កង់​គ្មាន​ច្បាប់។

អ្នក​ចូលរួម​ធ្វើ​យុទ្ធនាការ អ្នកនាង ឈឿន ដារ៉ាវី ឱ្យ​ដឹង​ថា ក្រុម​យុវជន​ជិះ​កង់ តែ ៣​គ្រឿង​ប៉ុណ្ណោះ បែរជា​សមត្ថកិច្ច​ចម្រុះ​ពង្រាយ ច្រើន​ស្អេកស្កះ​មក​សួរនាំ និង​គំរាម​ចាប់ខ្លួន​ទៀត​ផង ប្រសិនបើ​ពួកគេ​មិន​បំបែក​គ្នា​ទេ​។ ដារ៉ាវី បន្ថែម​ថា សមត្ថកិច្ច​ខ្លះ​បាន​និយាយ​ខ្លាំងៗ សួរដេញដោល និង​ចោទ​ពួកគេ​ថា ផ្សព្វផ្សាយ​មិន​សុំច្បាប់​អនុញ្ញាត​។ ចំណែក​ក្រុម​យុវជន បាន​អាន​ច្បាប់​ស្ដីពី​សិទ្ធិ​ធ្វើ​បាតុកម្ម​ដោយ​សន្តិវិធី ឱ្យ​សមត្ថកិច្ច​ទាំងនោះ​ជ្រាប​៖ «កង់​តែ​បី​គ្នា​តែ​ប៉ុន្មាន​នាក់ ហើយ​ហួសហេតុ​គាត់​លើកគ្នា​មក ហើយ​ធ្វើការ សម្លុត​គំរាម​ពួក​ខ្ញុំ​ហ្នឹង គ្រប់​រូបភាព ជិះ​តាម​ហែហម ពុំ​មាន​អី​ណា​។ និយាយ​ទៅ​ដូចជា​ដដែលៗ ពួក​ខ្ញុំ​ធ្វើ​ស៊ាំ​ភ្នែក​ទៅ​ហើយ មាន​តែង​ស្លៀក​ស៊ីវិល តាម​ពួក​យើង​។ រហូត​មក​ដល់​កោះដាច់​ហ្នឹង មក​ធ្វើ​បន្លំ​អង្គុយ​ជិត​ពួក​យើង ចង់​ដឹង​ពួក​យើង​យ៉ាងម៉េច​?»

យុវជន​ម្នាក់ទៀត គឺ​លោក សួន ចំរើន ថ្លែង​ថា សមត្ថកិច្ច​ចម្រុះ​ប្រដាប់​ដោយ​កាំភ្លើង និង​ខ្នោះដៃ មាន​ចេតនា​បំភិតបំភ័យ​ក្រុម​យុវជន ប៉ុន្តែ​ពួកគេ​មិន​រាថយ​នោះ​ទេ​។ លោក​បញ្ជាក់​ថា លទ្ធផល​យុទ្ធនាការ​នេះ ពួកគេ​បាន​ផ្សព្វផ្សាយ​ប្រាប់​ពលរដ្ឋ​តាម​ផ្លូវ និង​ផ្សព្វផ្សាយ​តាម​បណ្ដាញ​សង្គម ដើម្បី​ឱ្យ​ពលរដ្ឋ​ជ្រាប​ពី​សក្ដានុពល​កោះ​ក្រុង​ក្រៅ ក្នុង​ខេត្ត​កោះកុង​៖ «អាជ្ញាធរ​ហាក់​ដូចជា បំពាន​សិទ្ធិ​យើង​បិទបាំង​នូវ​សេរីភាព ក្នុង​ការ​ធ្វើ​សកម្មភាព​ជិះ​កង់ ផ្សព្វផ្សាយ​ពី​កោះកុង​ក្រៅ។ សកម្មភាព​ពួកគាត់ ធ្វើ​ឱ្យ​យើង​ភិតភ័យ​មែន ប៉ុន្តែ​ពួក​យើង​មាន​ស្មារតី​តស៊ូ ដោយ​ពួក​យើង​មាន​ឆន្ទៈ និង​គោលដៅ​ច្បាស់លាស់​ថា យើង​ធ្វើ​នេះ​គឺ អត់​ខុសច្បាប់​ទេ»

អាស៊ីសេរី​បាន​ព្យាយាម​ទាក់ទង អភិបាលខណ្ឌ​ជ្រោយចង្វា លោក ឃ្លាំង ហួត អ្នកនាំពាក្យ​សាលាក្រុង លោក ម៉េត មាសភក្តី ស្នងការ​រាជធានី​ភ្នំពេញ លោក ស ថេត អភិបាលក្រុង​ភ្នំពេញ លោក ឃួង ស្រេង និង​អ្នកនាំពាក្យ​អគ្គស្នងការ​នគរបាល​ជាតិ ប៉ុន្តែ​ពួក​លោក​មិន​ទទួល​ទូរស័ព្ទ និង​ខ្លះ​ទៀត​ចុច​ផ្ដាច់​ទូរស័ព្ទ នៅ​ថ្ងៃ​ទី១៤ មិថុនា។

ក្នុង​យុទ្ធនាការ​ផ្សព្វផ្សាយ​ពី​កោះកុង​ក្រៅ​នោះ ក្រុម​យុវជន​បាន​សរសេរ​បដា​បង្ហាញ​ទស្សន​ថា កោះកុង​ក្រៅ​ជា​របស់​យើង​ទាំងអស់​គ្នា ខ្ញុំ​ស្រឡាញ់​កោះកុង​ក្រៅ យើង​រួមគ្នា​ថែរក្សា​កោះកុង​ក្រៅ។

នាយករង​ទទួលបន្ទុក​ផ្នែក​ឃ្លាំមើល​សិទ្ធិមនុស្ស នៃ​អង្គការ​សិទ្ធិមនុស្ស​លីកាដូ លោក អំ សំអាត ចាត់​ទុក​ការរារាំង​នេះ ជា​ការ​រឹតត្បិត​សិទ្ធិ​សេរីភាព ពលរដ្ឋ​ស្នេហា​បរិស្ថាន និង​ផ្សព្វផ្សាយ​ពី​សក្ដានុពល​កោះកុង​ក្រៅ។ លោក​បញ្ជាក់​ថា សកម្មភាព​របស់​ក្រុម​យុវជន គ្រាន់​ជា​ការ​ផ្សព្វផ្សាយ​ឱ្យ​ពលរដ្ឋ​ស្គាល់​ពី​តម្លៃ​កោះកុង​ក្រៅ ពុំ​មែន​ជា​ទង្វើ​ខុសច្បាប់​នោះ​ទេ​៖ «វា​អត់​មាន​ពាក់ព័ន្ធ​បទល្មើស និង​ខុស​អី​ហ្នឹង​ច្បាប់​ទេ ហើយ​ការ​ជិះ​កង់​ទៀតសោត បើ​គាត់​ជិះ​តែ ២​ទៅ ៣​នាក់ វា​អត់​មានអី​ទេ​។ ខ្ញុំ​គិត​ថា នេះ​មកពី​អាជ្ញាធរ​ហ្នឹង​គាត់​ព្រួយបារម្ភ ហើយ​ខ្លាច​ហួសហេតុ​ពេក​។ កុំ​ឱ្យ​តែ​បដា​ហ្នឹង​វា​ពាក់ព័ន្ធ ការ​ញុះញង់ និង​ពាក់ព័ន្ធ​បទល្មើស​អី តែ​បដា​គ្រាន់តែ​ថា ស្រឡាញ់​កោះកុង រួមគ្នា ថែរក្សា​កោះកុង​ក្រៅ វា​អត់​មានអី​ដែល​ថា ខុស​ច្បាប់​ផង»

ក្រុម​យុវជន​បន្ថែម​ថា អាជ្ញាធរ​មិនបាន​ដកហូត​កង់​របស់​ពួកគេ​ទេ ប៉ុន្តែ​សមត្ថកិច្ច​ស្លៀកពាក់​ស៊ីវិល តាមដាន​ពួកគេ​គ្រប់​សកម្មភាព រហូតដល់​ពួកគេ​ធ្វើដំណើរ​ដល់​គោលដៅ និង​ត្រឡប់​ទៅ​រាជធានី​ភ្នំពេញ នៅ​រសៀល​ថ្ងៃ​ដដែល​នេះ។

កោះកុង​ក្រៅ មាន​ទំហំ ១០៣​គីឡូម៉ែត្រ​ក្រឡា ឈរ​កណ្ដាល​សមុទ្រ មាន​ចម្ងាយ ៣០គីឡូម៉ែត្រ​ពី​ក្រុង​ខេមរភូមិន្ទ​។ ក្រុម​យុវជន​ថា កោះ​នេះ​មាន​សក្ដានុពល​ធនធានធម្មជាតិ​សំបូរ​បែប​ដូចជា ព្រៃឈើ ទឹកជ្រោះ ជ្រលង​ភ្នំ ឆ្នេរ​ខ្សាច់​ស្រស់​ស្អាត និង​គ្រប​ដណ្ដប់​លើ​រុក្ខា​ជាតិ​ចម្រុះ​ពណ៌ ថែមទាំង​មាន​សត្វព្រៃ​កម្រ​រស់នៅ​ផង​ដែរ។ បច្ចុប្បន្ន​កោះ​នេះ មាន​ពលរដ្ឋ​ប្រមាណ ៦០គ្រួសារ រស់​នៅ​តាម​បណ្ដោយ​ឆ្នេរ ហើយ​ពលរដ្ឋ​ទាំងនោះ ភាគច្រើន​ប្រកប​មុខរបរ​នេសាទ​សមុទ្រ។

នេះ​ជា​យុទ្ធនាការ​ជិះកង់​ផ្សព្វផ្សាយ​ពី​កោះកុង​ក្រៅ​លើក​ទី​២​ របស់​ក្រុម​យុវជន​ការពារ​បរិ​ស្ថាន​នេះ បន្ទាប់ពី​យុទ្ធនាការ​ជិះ​កង់​លើក​ទី​១ ពី​ខេត្ត​កោះកុង មក​រាជធានី​ភ្នំពេញ​ កាល​ពី​ពេល​ថ្មីៗ​ នេះ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។