ប្រតិបត្តិការក្ដៅបង្ក្រាបបទល្មើសនេសាទ
2011.06.06
អាជ្ញាធរបឹងទន្លេសាបប្រទេសកម្ពុជាកំពុងតែបន្តការរុះរើសម្រាស់ចំនួនជាង ២០កន្លែង នៅក្នុងបឹងទន្លេសាប នៅស្រុកស្ទង់ ខេត្តកំពង់ធំ និងបន្តការរុះរើសម្រាស់នៅក្នុងឡូនេសាទលេខ៤ នៅខេត្តកំពង់ធំ នៅថ្ងៃទី៦ ខែមិថុនា ឆ្នាំ២០១១ ដោយប្រើប្រាស់កម្លាំងអន្តរាគមន៍ជាង ១០០នាក់ និងសាឡង់ជាច្រើនគ្រឿង ប៉ុន្តែគេនៅមិនបានចាប់ខ្លួនជនសង្ស័យណាមួយនៅឡើយទេ គឺការស៊ើបអង្កេត និងចាប់ផ្ដើមជាក្រោយ ដើម្បីចាប់ខ្លួនជនល្មើស។
ប្រតិបត្តិការនេះបានចាប់ផ្ដើមនៅថ្ងៃទី៥ ខែមិថុនា ឆ្នាំ២០១១ នៅគ្រាដែលឱសានវាទរយៈពេល ១៥ថ្ងៃ បានឈានដល់ទីបញ្ចប់នាពេលថ្មីៗ នេះ។ ការរុះរើសម្រាស់កំពុងតែបន្តនៅខេត្តកំពង់ឆ្នាំង ខេត្តពោធិ៍សាត់ ខេត្តកំពង់ធំ និងខេត្តសៀមរាប ជាគោលដៅសំខាន់។
អគ្គលេខាធិការនៃអាជ្ញាធរបឹងទន្លេសាបកម្ពុជា លោក ចាន់ យុត្ថា បានមានប្រសាសន៍នៅថ្ងៃទី៦ ខែមិថុនា ឆ្នាំ២០១១ ថាមានឧបសគ្គមួយចំនួន គឺសាឡង់មិនអាចចូលដល់គោលដៅក៏ដោយ ដោយសារទឹករាក់។ លោកបន្តថា ៖ "នេះគឺជាវិធានការណ៍ដើម្បីនិរន្តរភាពនៃបឹងទន្លេសាបរបស់យើង។ មិនមែនតែធនធានជលផលទេ គឺបញ្ហាគោករាក់ និងប្រព័ន្ធអេកូឡូស៊ីនៅតំបន់បឹងទន្លេសាប ក៏ដូចជាបញ្ហាព្រៃលិចទឹក។ អ៊ីចឹងសម្រាស់ហ្នឹង អត់យកពីណាមកទេ គឺកាប់ព្រៃលិចទឹកទៅធ្វើសម្រាស់"។
លោកបានមានប្រសាសន៍ថា ខេត្តកំពង់ឆ្នាំងបានធូរស្រាលហើយ។ នៅខេត្តពោធិ៍សាត់ គេបានរុះរើសម្រាស់បានចំនួន ១៣កន្លែង។ អាជ្ញាធរបឹងទន្លេសាបកំពុងតែបន្តការរុះរើសម្រាស់នៅបឹងទន្លេសាប នៅក្នុងខេត្តសៀមរាប។ គេបានប៉ាន់ស្មានថា មានសម្រាស់នៅសល់ចំនួនរវាង ៥០កន្លែង ទៅ៦០កន្លែងទៀត។
តំណាងប្រជានេសាទនៅបឹងទន្លេសាប លោក កែ សុធី បានមានប្រសាសន៍ថា លោកពេញចិត្តចំពោះប្រតិបត្តិការក្ដៅបែបនេះ ៖ "ធ្វើម៉េច ធ្វើឲ្យអស់ជាបន្ទាន់ ព្រោះថាឥឡូវនេះ បើយើងពិនិត្យបទល្មើសនៅតាមសហគមន៍អត់មានទេ។ បើសិនជាមានដូចជាសម្រាស់តូចតាចជាលក្ខណៈគ្រួសារទេ។ ប៉ុន្តែសំខាន់ មានផែនការប៉ុណ្ណេះហើយ គឺថាអនុវត្តឲ្យខាងតែបាន ជាសំខាន់គឺបទល្មើសនៅទន្លេសាប"។
ប្រតិបត្តិការនេះដឹកនាំដោយរដ្ឋមន្ត្រីក្រសួងធនធានទឹក និងឧតុនិយម លោក លឹម គានហោ និងជាប្រធានអាជ្ញាធរបឹងទន្លេសាប ប្រទេសកម្ពុជា ដែលបានចាប់ផ្ដើម គឺផ្អែកលើបទបញ្ជាលេខ១ របស់លោកនាយករដ្ឋមន្ត្រី ហ៊ុន សែន ចុះថ្ងៃទី២២ ខែឧសភា ឆ្នាំ២០១១។
ប្រតិបត្តិការនេះកំពុងតែអនុវត្តនៅគ្រាដែលរដ្ឋបាលជលផលប្រទេសកម្ពុជាបានប្រកាសរដូវបិតនេសាទ ចាប់ពីថ្ងៃទី១ ខែមិថុនា ឆ្នាំ២០១១ ដល់ខែកញ្ញា ឬខែតុលា ឆ្នាំ២០១១។
ប្រធានអាជ្ញាធរបឹងទន្លេសាប លោក លឹម គានហោ បានព្រមានឲ្យដឹងកាលពីពេលថ្មីៗនេះថា បឹងទន្លេសាបប្រឈមមុខនិងការគោករាក់អស់មច្ឆាជាតិ នៅក្នុងរយៈពេល ២ឬ៣ ឆ្នាំខាងមុខនេះ និងខូចប្រព័ន្ធជីវៈចម្រុះ នៅបឹងទន្លេសាប បើសិនណារដ្ឋាភិបាលមិនចាត់វិធានការភ្លាមៗទេ៕
អត្ថបទពេញនិយម
RFA
- មន្ត្រីជាន់ខ្ពស់ និងឧកញ៉ា សុំលោក ហ៊ុន សែន ឱ្យជួយរកយុត្តិធម៌ដោយមិនពឹងតុលាការ
- សភាកម្ពុជាប្រតិកម្មទៅនឹងការសម្រេចរបស់សភាអឺរ៉ុបរឿងដកប្រព័ន្ធអនុគ្រោះពន្ធEBA បន្ថែម
- កម្ពុជារកចំណូលបាន ១.៤ពាន់លានដុល្លារ ពីកំណើនភ្ញៀវទេសចរបរទេសក្នុងឆ្នាំ២០២២
- លោក ហ៊ុន សែន មិនគាំទ្រដីកាតុលាការ ICC ដើម្បីចាប់ខ្លួនមេដឹកនាំរុស្ស៊ី
- ពិធីមង្គលការរបស់ពលករខ្មែរនៅប្រទេសថៃ
អត្ថបទពេញនិយម
ព័ត៌មានថ្មីៗ
- អ្នកឃ្លាំមើល ថា លោក ហ៊ុន សែន ទំនងលែងទុកចិត្តអ្នកណាក្រៅពីកូនរបស់ខ្លួនហើយ
- លោក ស ខេង ចង់ឱ្យមានការធ្វើតេស្ដរកគ្រឿងញៀនលើពលរដ្ឋចាប់ពីអាយុ១៣ឆ្នាំដល់ក្រោម៤៥ឆ្នាំ
- អាជ្ញាធរក្រុងភ្នំពេញ ចាប់ខ្លួនមន្ត្រីគណបក្សភ្លើងទៀន៣នាក់
- អ្នកជំនាញថា ចិនមិនអាចជំនួសទីផ្សារសហភាពអឺរ៉ុប និងអាមេរិកក្នុងការទទួលទិញទំនិញកម្ពុជា
- ចិនបញ្ជូនកងទ័ពជាង២០០នាក់មកធ្វើសមយុទ្ធនាគមាសឆ្នាំ២០២៣ជាមួយកម្ពុជា