អង្គបុរជំនុំជម្រះនៃសាលាក្តីខ្មែរក្រហម បើកសវនាការរយៈពេលបីថ្ងៃ គឺពីថ្ងៃទី២៧ ដល់ថ្ងៃទី២៩ វិច្ឆិកានៃសំណុំរឿង០០៣ ប្រឆាំងលោក មាស មុត អតីតមេដឹកនាំខ្មែរក្រហម។
សវនាការថ្ងៃទី១ បានប្រព្រឹត្តទៅដោយសាធារណៈ ពិនិត្យមើលអង្គហេតុពាក់ព័ន្ធនានា និងប្រវត្តិនីតិវិធីនៃសំណុំរឿង០០៣ ព្រមទាំងសេចក្ដីលំអិតនៃបណ្ដឹងឧទ្ធរណ៍។
សហចៅក្រមស៊ើបអង្កេតជាតិ និងសហចៅក្រមស៊ើបអង្កេតអន្តរជាតិ ខ្វែងយោបល់គ្នា រឿងកាត់ទោស ឬមិនកាត់ទោស អតីតកម្មាភិបាលខ្មែរក្រហមលោក មាស មុត។ ការខ្វែងយោបល់គ្នានេះ តម្រូវឱ្យខាងចៅក្រមខាងភាគីជាតិ ចេញដីកាដំណោះស្រាយមួយ ចំណែកឯចៅក្រមខាងភាគីអន្តរជាតិ ចេញដីកាដំណោះស្រាយមួយដាច់ដោយឡែក ដោយមានសម្អាងហេតុរៀងៗខ្លួន។
ខាងសហចៅក្រមស៊ើបអង្កេតជាតិសម្អាងថា លោក មាស មុត មិនស្ថិតក្នុងយុត្តាធិការបុគ្គលរបស់សាលាក្តីខ្មែរក្រហមនេះទេ។ មានន័យថាលោក មាស មុត មិនមែនស្ថិតក្នុងចំណោមមេដឹកនាំជាន់ខ្ពស់ ឬ ជាជនម្នាក់ដែលទទួលខុសត្រូវបំផុត ចំពោះបទឧក្រិដ្ឋដែលកើតឡើងនៅក្នុងសម័យខ្មែរក្រហមនោះឡើយ។
ប៉ុន្តែ សហចៅក្រមស៊ើបអង្កេតអន្តរជាតិ យល់ផ្សេងពីនេះ ដោយលើកហេតុផលថាលោក មាស មុត ដែលអតីតមេបញ្ជាការកងទ័ពជើងទឹកក្នុងរបបកម្ពុជាប្រជាធិបតេយ្យ ខ្មែរក្រហម ពិតជាស្ថិតក្នុងយុត្តាធិការបុគ្គលរបស់សាលាក្តីនេះ ដោយសារមានភស្តុតាងគ្រប់គ្រាន់បញ្ជាក់ថា លោក មាស មុត ស្ថិតក្នុងចំណោមជនដែលទទួលខុសត្រូវខ្ពស់បំផុតក្នុងរបបខ្មែរក្រហម។ សហចៅក្រមស៊ើបអង្កេតអន្តរជាតិ បន្តថា ភស្តុតាងទាំងនេះគ្រប់គ្រាន់ដើម្បីចោទប្រកាន់លើលោក មាស មុត និងបញ្ជូនទៅកាត់ទោស ចំពោះបទចោទនៃអំពើប្រល័យពូជសាសន៍លើជនជាតិវៀតណាម ឧក្រិដ្ឋកម្មប្រឆាំងមនុស្សជាតិ ឧក្រិដ្ឋកម្មសង្គ្រាម និង អំពើមនុស្សឃាតគិតទុកជាមុន យោងតាមច្បាប់កម្ពុជា។
ដីកាដំណោះស្រាយ ដែលដាច់ដោយឡែកពីគ្នានេះ គឺជាសេចក្តីសម្រេចចុងក្រោយរបស់សហចៅក្រមស៊ើបអង្កេត នៅពេលបញ្ចប់ដំណើរការស៊ើបសួរ ដែលអាចជាដីកាលើកលែងការចោទប្រកាន់ ឬ ដីកាបញ្ជូនរឿងទៅជំនុំជម្រះ។ សហចៅក្រមស៊ើបអង្កេតជាតិ សម្រេចយកដីកាលើកលែងការចោទប្រកាន់ ចំពោះលោក មាស មុត ប៉ុន្តែសហចៅក្រមស៊ើបអង្កេតអន្តរជាតិ សម្រេចយកដីកាបញ្ជូនរឿងទៅជំនុំជម្រះ។
ការខ្វែងយោបល់គ្នានេះ នឹងត្រូវសម្រេចដោយអង្គបុរេជំនុំជម្រះ ដែលជាស្ថាប័នសាលាឧទ្ធរណ៍មួយ ដើម្បីដោះស្រាយលើបណ្ដឹងនេះ។ ក្រោយសម្រេចសេចក្ដីលើការខ្វែងយោបល់គ្នារួច អង្គបុរេជំនុំជម្រះ នឹងចេញដីកាដំណោះស្រាយមួយដែរ ថាតើបញ្ជូន ឬមិនបញ្ជូនរឿងនេះទៅជំនុំជម្រះបន្តទៀត។
សេចក្ដីប្រកាសព័ត៌មានរបស់សាលាក្តីខ្មែរក្រហមអោយដឹងថា អង្គបុរេជំនុំជម្រះនឹងបន្តសវនាការបញ្ចប់នៅថ្ងៃសុក្រ ទី២៩ វិច្ឆិកា នេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។