មជ្ឈមណ្ឌលឯកសារកម្ពុជាដាក់ឱ្យប្រើប្រាស់គេហទំព័រស្ដីពីប្រវត្តិសាស្ត្រខ្មែរក្រហម
2017.09.08
រូបទំព័រដើមនៃគេហទំព័រស្ដីពីប្រវត្តិសាស្ត្រខ្មែរក្រហម បង្កើតឡើងដោយមជ្ឈមណ្ឌលឯកសារកម្ពុជា (DCAM) ដែលត្រូវបានដាក់ឲ្យដំណើរការនៅថ្ងៃទី៨ ខែកញ្ញា ឆ្នាំ២០១៧។ Screenshot
Screenshot
មជ្ឈមណ្ឌលឯកសារកម្ពុជា ដែលជាប័ណ្ណសារស្ដីពីរបបខ្មែរក្រហមធំជាងគេបង្អស់ បានសម្ពាធដាក់ឱ្យប្រើប្រាស់គេហទំព័រស្ដីពីប្រវត្តិសាស្ត្រខ្មែរក្រហម ចាប់ពីថ្ងៃទី៨ ខែកញ្ញា នេះតទៅ។ គេហទំព័រទើបបង្កើតថ្មីនេះ គឺមធ្យោបាយថ្មីទាក់ទាញយុវជនកម្ពុជា ឱ្យសិក្សាស្រាវជ្រាវអំពីប្រវត្តិសាស្ត្រស្ដីពីរបបកម្ពុជាប្រជាធិបតេយ្យ ឬហៅថា ខ្មែរក្រហម ចាប់ពីឆ្នាំ១៩៧៥-១៩៧៩។
គេហទំព័រស្ដីពីប្រវត្តិក្នុងសម័យប្រល័យពូជសាសន៍ខ្មែរក្រហម គឺគេបានដាក់បញ្ចូលឯកសារច្រើនបែប ដូចជាឯកសារវីដេអូ សំឡេង និងរូបថតកម្រនឹងបានឃើញ ព្រមទាំងសាក្សីរស់ដែលធ្លាប់ឆ្លងកាត់របបដែលកន្លងផុតជិត ៤០ឆ្នាំនេះ។ គេអាចអានឯកសារទាំងនេះបានដោយងាយស្រួលតាមរយៈកុំព្យូទ័រ ទូរស័ព្ទចល័ត ឬឧបករណ៍បច្ចេកវិទ្យាទំនើបៗ ផ្សេងមួយចំនួនទៀត។
មជ្ឈមណ្ឌលឯកសារកម្ពុជា សង្ឃឹមថា ការបង្កើតគេហទំព័រថ្មីនេះ ដែលមានអាសយដ្ឋាន www.khmerrougehistory.org និងតាមទំព័រហ្វេសប៊ុក (Facebook) ឈ្មោះ Genocide Education in Cambodia នឹងអាចរក្សាប្រវត្តិសាស្ត្រកើតឡើងក្នុងសម័យខ្មែរក្រហមឱ្យមានជីវិតបន្ត និងទប់ស្កាត់កុំឱ្យរបបមួយនេះវិលមកបំផ្លាញប្រទេសកម្ពុជា ទៀត។
នៅក្នុងកម្មវិធីសម្ពោធដែលធ្វើឡើងនៅវិទ្យាស្ថានជាតិអប់រំ ប្រធានផ្នែកស្រាវជ្រាវនៃមជ្ឈមណ្ឌលឯកសារកម្ពុជា អ្នកស្រី សូ ហ្វារីណា បានរៀបរាប់ថា ក្នុងគេហទំព័រថ្មីនេះ គឺចែកចេញជា ៦ផ្នែកសំខាន់ៗ ដូចជា ផ្នែកប្រវត្តិសាស្ត្រខ្មែរក្រហម សាច់រឿងរបស់អ្នកឆ្លងកាត់ខ្មែរក្រហម សង្ខេបចំណុចសំខាន់ៗអំពីអ្នកទោសក្នុងគុកទួលស្លែង ប៉ុល ពត និងការរៀបការទាំងបង្ខំក្នុងប្រវត្តិខ្មែរក្រហម អ្នកអានអាចផ្ដល់ព័ត៌មានបន្ថែមអំពីខ្មែរក្រហម ការលើកឡើងអំពីក្ដីកង្វល់ និងចោទជាសំណួរអំពីការប្រើប្រាស់គេហទំព័រថ្មីនេះ និងសំណួរពីបញ្ហាទូទៅ។ លោកស្រីបន្តថា គេហទំព័របង្កលក្ខណៈកាន់តែងាយសម្រាប់សិស្សានុសិស្ស៖ «តាមពិតទៅ មុននឹងក្លាយជាវ៉ឹបសាយហ្នឹង គឺយើងបានសិក្សាស្រាវជ្រាវច្រើន មានន័យថា យើងបានចម្រាញ់ចេញពីសៀវភៅច្រើន អ៊ីចឹងបើយើងប្រៀបធៀបជាមួយសៀវភៅៗ ផ្ដោតសំខាន់តែប្រធានបទតែមួយ ប៉ុន្តែវ៉ឹបសាយនេះ មានសម្បូរបែប»។
មជ្ឈមណ្ឌលឯកសារកម្ពុជា បានបញ្ជាក់ថា របបសម័យខ្មែរក្រហមរយៈពេលជាង ៣ឆ្នាំ បានសម្លាប់ពលរដ្ឋកម្ពុជា ជាង ១,៧លាននាក់ ហើយដែលអ្នកបានឆ្លងកាត់ និងមានជីវិតរស់នៅមកដល់សព្វថ្ងៃមានប្រមាណ ៧០ភាគរយ។
និស្សិតឆ្នាំទីពីរនៃដេប៉ាតឺម៉ង់ប្រព័ន្ធផ្សព្វផ្សាយ និងសារគមនាគមន៍ (DMC) កញ្ញា ហេង សុបរមី ថ្លែងថា កន្លងមកកញ្ញាមានការលំបាកក្នុងការស្វែងរកឯកសារនៅពេលចង់ដឹងអំពីសម័យខ្មែរក្រហម។ កញ្ញាថា សិស្សវិទ្យាល័យគួរតែនាំគ្នាយល់ដឹងឱ្យច្បាស់អំពីរបបនេះ ព្រោះបរទេសភាគច្រើនអាចស្គាល់ប្រទេសកម្ពុជា បាន គឺតាមរយៈភាពល្បីល្បាញប្រាសាទអង្គរវត្ត និងរបបខ្មែរក្រហមនេះឯង៖ «ខ្ញុំយល់ថា វាល្អ ព្រោះវាជាបណ្ដុំឯកសារនៅទីហ្នឹងស្រាប់ ព្រោះតាមធម្មតាដូចខ្ញុំអ្នកជំនាន់ក្រោយអ៊ីចឹង ឮតៗគ្នា បើយើងចង់កាន់តែច្បាស់ ត្រូវរកឯកសារនៅកន្លែងច្រើន។ មើលតាមសៀវភៅពិបាក ជួនកាលយើងមើលហើយ យើងមានចម្ងល់ត្រង់ណាមួយ យើងពិបាកខលទៅសួរម្ចាស់សៀវភៅនោះ»។
កញ្ញាក៏សង្ឃឹមថា គេហទំព័រថ្មីនេះ នឹងបង្ហាញឱ្យអស់នូវរាល់រឿងរ៉ាវដែលកើតឡើងក្នុងសម័យខ្មែរក្រហម ព្រោះកញ្ញាថា មានឯកសារខ្លះបានសរសេរលាក់នូវចំណុចទាំងនោះ។
ចំណែកនិស្សិតឈ្មោះ សោម លាភ ដែលកំពុងសិក្សាផ្នែកច្បាប់នៃសាកលវិទ្យាល័យភូមិន្ទភ្នំពេញ ក៏យល់ឃើញថា ការសង្ខេបនូវចំណុចសំខាន់ពាក់ព័ន្ធនឹងសម័យខ្មែរក្រហមដែលបង្ហោះលើគេហទំព័ររបស់មជ្ឈមណ្ឌលឯកសារកម្ពុជានេះ គឺជាប្រភពគួរឱ្យទុកចិត្តបានច្រើនជាងឯកសាររបស់អ្នកនិពន្ធខ្លះដែលហាក់ខ្វះភស្តុតាងគ្រប់គ្រាន់៖ «លំបាកនិយាយទៅ ដោយសារឯកសារអត់សូវមាន ហើយសម្រាប់អ្នកនិពន្ធយើងអត់សូវទុកចិត្ត ព្រោះតែងនិយាយខុសៗគ្នា»។
ទោះជាយ៉ាងណា អ្នកស្រី សូ ហ្វារីណា ប្រធានផ្នែកស្រាវជ្រាវនៃមជ្ឈមណ្ឌលឯកសារកម្ពុជា បញ្ជាក់ថា ថ្វីត្បិតនៅក្នុងគេហទំព័រថ្មីនេះ បានចម្រាញ់ចំណុចសំខាន់ៗចេញពីប្រភពឯកសារជាច្រើនក្ដី ប៉ុន្តែមិនអាចរៀបរាប់ឱ្យបានគ្រប់រឿងរ៉ាវ និងគ្រប់ចំណុចដែលកើតឡើងក្នុងសម័យខ្មែរក្រហមឡើយ ប៉ុន្តែលោកស្រីថា នឹងខិតខំស្វែងរកចំណុចខ្វះខាតទាំងនោះមកបំពេញ។
មជ្ឈមណ្ឌលឯកសារកម្ពុជា បានរៀបចំបង្កើតគេហទំព័រស្ដីពីប្រវត្តិសាស្ត្រខ្មែរក្រហមនេះ ក្នុងឆ្នាំ២០១៥ ក្រោមការឧបត្ថម្ភថវិកាពីកិច្ចសហប្រតិបត្តិការអាល្លឺម៉ង់ និងទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិ (USAID)៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សភាអឺរ៉ុប ជំរុញឱ្យសើរើប្រព័ន្ធអនុគ្រោះពន្ធ EBA នៅសល់៨០% និងដាក់ទណ្ឌកម្មជាក់លាក់លើរដ្ឋាភិបាលកម្ពុជា
- សមត្ថកិច្ចថៃចាប់បញ្ជូនជនភៀសខ្លួនខ្មែរជិត១០នាក់ទៅកម្ពុជា
- UNHCR អំពាវនាវដល់កម្ពុជា និងថៃ ឱ្យគោរពតាមច្បាប់ស្ដីពីការមិនចាប់បញ្ជូនជនភៀសខ្លួនត្រឡប់ទៅឱ្យរងទុក្ខបុកម្នេញនៅប្រទេសកំណើត
- បទសម្ភាសន៍លោក សុខ ឥសាន ស្ដីពីគម្រោងរដ្ឋាភិបាលបង្កើតច្បាប់ប្រឆាំងភេរវកម្ម ដើម្បីទប់ទល់លោក សម រង្ស៊ី
- ជនភៀសខ្លួនខ្មែរ ៦នាក់ ដែលបញ្ជូនពីថៃ ត្រូវបានឃុំខ្លួននៅពន្ធនាគារផ្សេងគ្នា អំពីបទក្បត់ជាតិ