ពលរដ្ឋ​នៅ​ក្រចេះ​ទាមទារ​ឲ្យ​ក្រុមហ៊ុន​អភិវឌ្ឍ​ឲ្យ​ឆ្ងាយ​ពី​មូលដ្ឋាន

ប្រជាពលរដ្ឋ​និង​សហគមន៍​ឃុំ​អូរគ្រៀង ស្រុក​សំបូរ ខេត្ត​ក្រចេះ បាន​បង្ហាញ​ភាព​ដាច់​ខាត​របស់​ពួក​ខ្លួន​ក្នុង​ការ​ទាមទារ​ឲ្យ​បញ្ឈប់​ក្រុមហ៊ុន​ដែល​កំពុង​អភិវឌ្ឍ​នៅ​ក្នុង​មូលដ្ឋាន​ឬ​យ៉ាង​ហោច​ឲ្យ​អភិវឌ្ឍ​ទៅ​ឆ្ងាយ​ពី​ដី​ស្រែ​និង​ដី​សហគមន៍។
ដោយ ឱ ភារិទ្ធ
2010-01-29
អ៊ីម៉ែល
មតិ
Share
បោះពុម្ព

អាជ្ញាធរ​ខេត្ត​បាន​អញ្ជើញ​ប្រជាពលរដ្ឋ​និង​តំណាង​សហគមន៍​មួយ​ចំនួន​ដើម្បី​សម្រប​សម្រួល​ឲ្យ​បញ្ឈប់​ការ​តវា ដោយ​ចង់​ប្រើ​ហិង្សា​ទៅ​លើ​ក្រុមហ៊ុន​អភិវឌ្ឍន៍​នៅ​ឃុំ​អូរគ្រៀង។ ប៉ុន្តែ​លោក ម៉ោញ សំ តំណាង​សហគមន៍​អូរព្រះ ឃុំ​អូរគ្រៀង បាន​បញ្ជាក់​ក្រោយ​ពេល​ពិគ្រោះ​យោបល់​គ្នា​កាល​ពី​ព្រឹក​ថ្ងៃ​៣០ មករា ថា រឿង​ទាំង​នោះ​អាស្រ័យ​នៅ​លើ​ក្រុមហ៊ុន​តែ​ប៉ុណ្ណោះ។

លោក ម៉ោញ សំ បាន​ឲ្យ​ដឹង​ដូច្នេះ ៖ «ស្មុគស្មាញ​ដូច​ថា មាន​គោ​ក្របី​អី​លែង​ទៅ​វា​ប៉ះពាល់ ហើយ​ដល់​មាន​ការ​តវ៉ា​ពី​ម្សិល​ហ្នឹង គេ​ហៅ​ប្រជាជន​ទៅ​ខេត្ត​នោះ គេ​ថា ថ្ងៃ​មុខ​ថ្ងៃ​ក្រោយ​កុំ​ឲ្យ​គំនុំ​ទៅ​ដុត​អាត្រាក់​អី​ទៀត។ តវ៉ា​ម្ដង​រួច​ទៅ​ហើយ ចេញ​ហើយ​ឥឡូវ​ចូល​មក​ទៀត ប្រជាជន​តវ៉ា​ទៀត។ ប្រជាជន​ខឹង​ថា បើ​ចេញ​ក៏​ចេញ បើ​មិន​ចេញ​គេ​ដុត។ គ្រាន់​តែ​គំនុំ​ទេ មិន​ទាន់​បាន​ដុត​ទេ...»

លោក បៀវ រ៉ុន ប្រជាពលរដ្ឋ​បាន​សំណូមពរ​ឲ្យ​ក្រុមហ៊ុន​អភិវឌ្ឍន៍​ទៅ​ឲ្យ​ឆ្ងាយ​ប្រមាណ​ពី​៣​ទៅ​៤​គីឡូម៉ែត្រ​ពី​ដី​ស្រែ​របស់​ប្រជាពលរដ្ឋ។

លោក បៀវ រ៉ុន ឲ្យ​ដឹង​ថា ៖ «ចៀស​វាង​ការ​ជម្លោះ​ពី​គោ​ស៊ី​ដំណាំ​ដាំ​ដុះ​របស់​ក្រុមហ៊ុន។ ភូមិ​ចាស់​ពី​បុរាណ​មាន​ក្របី​ឈ្មោល​មួយ​ដេញ​វ័ធ ក្រុមហ៊ុន​មិន​ដឹង​ជា​ថ្ងៃ​នេះ ឬ​ថ្ងៃ​ស្អែក​ទេ គេ​ថា បាញ់​ក្របី​ហ្នឹង​ស៊ី​ហើយ ក្រុមហ៊ុន​គេ​បាញ់​ស៊ី​ហើយ​បើ​ម្ចាស់​មិន​ចាប់។ វា​ជិត​ពេក​៣០០-​៤០០​ម៉ែត្រ​ពី​ស្រែ​ទៅ រួច​គ្នា​លែង​ទៅ​ណា? ក្របី​ត្រូវ​ការ​ទឹក មនុស្ស​ក៏​ត្រូវការ​ទឹក»

ក្រុមហ៊ុន​ដែល​ប្រជាពលរដ្ឋ​បាន​តវា​ទាមទារ​ឲ្យ​ខិត​ព្រំ​ឆ្ងាយ​ពី​ប្រជាពលរដ្ឋ​នេះ គឺ​ក្រុមហ៊ុន Central First FIRST របស់​កូរ៉េ​ដែល​តំណាង​ក្រុមហ៊ុន​នោះ​បាន​អះអាង​ថា ក្នុង​គោលការណ៍​ស្នើ​សុំ​ជាង​មួយ​ម៉ឺន​ហិកតា​ក្រុមហ៊ុន​បាន​កាត់​ដី​ដែល​ប៉ះពាល់​ជូន​សហគមន៍​ជាង​៣​ពាន់​ហិកតា​ហើយ។ ប៉ុន្តែ​តំណាង​សហគមន៍​៤​ភូមិ​បាន​អះអាង​ថា នៅ​តែ​ប៉ះពាល់​ដី​ប្រមាណ​ជាង​៤​ពាន់​ហិកតា​ទៀត​ដដែល។

លោក ខាំ ភឿន អភិបាល​ខេត្ត​បាន​អះអាង​ថា លោក​នឹង​ជួប​ដោះស្រាយ​ទាំង​សង​ខាង​ឲ្យ​បាន​ល្អ ៖ «យើង​និយាយ​គ្នា​ទាំង​សង​ខាង ឲ្យ​យល់​គ្នា​ទាំង​សង​ខាង​មុន​នឹង​ចាប់​ផ្ដើម​ធ្វើ​អី។ និយាយ​រួម​គាត់​(ប្រជាជន)​ចង់​បាន​អ៊ីចឹង​ហើយ ប៉ុន្តែ​ធំ​ពេក​ក៏​មិន​កើត ឲ្យ​គាត់​តូច​ពេក​ក៏​មិន​គ្រាន់...»

កាល​ពី​ថ្ងៃ​ទី​២៦ មករា ក្រុមហ៊ុន Central First បាន​បញ្ឈប់​ការ​សាងសង់​ការដ្ឋាន​របស់​ខ្លួន​តាម​ការ​តវ៉ា​របស់​ប្រជាពលរដ្ឋ​ចំនួន​ពីរ​ថ្ងៃ​ជាប់ៗ​គ្នា។ ពេល​នេះ​តំណាង​សហគមន៍​និង​ប្រជាពលរដ្ឋ​អះអាង​ថា នឹង​មាន​ធ្វើ​បាតុកម្ម​ដ៏​ធំ​មួយ​ប្រឆាំង​ទៅ​នឹង​ការ​វិល​ត្រឡប់​មក​សាងសង់​ការដ្ឋាន​នៅ​លើ​ដី​ដែល​ប៉ះពាល់​នោះ​ទៀត៕

ព័ត៌មាន (0)
Share
គេហទំព័រ​ទាំងមូល