មន្ត្រី​តុលាការ​ខេត្ត​ព្រះវិហារ​ថា អ្នកភូមិ​១៤​នាក់​នឹង​ត្រូវ​ដោះលែង​ឱ្យ​នៅ​ក្រៅ​ឃុំ​ជា​បន្តបន្ទាប់

ដោយ ស្ងួន អមរា
2019-04-27
អ៊ីម៉ែល
មតិ
Share
បោះពុម្ព
ពលរដ្ឋ​ពីរ​នាក់​ជាប់​ខ្នោះ រស់នៅ​ស្រុក​ជាំក្សាន្ត ខេត្ត​ព្រះវិហារ មាន​ជម្លោះ​ដីធ្លី​ជា​មួយ​ក្រុមហ៊ុន មេត្រីភាព។ រូបថត៖ អាដហុក
ពលរដ្ឋ​ពីរ​នាក់​ជាប់​ខ្នោះ រស់នៅ​ស្រុក​ជាំក្សាន្ត ខេត្ត​ព្រះវិហារ មាន​ជម្លោះ​ដីធ្លី​ជា​មួយ​ក្រុមហ៊ុន មេត្រីភាព។ រូបថត៖ អាដហុក
រូបថត៖ សមាគម អាដហុក (ADHOC)

អ្នកភូមិ​១៤​ដែល​ជាប់ឃុំ​ក្នុង​ពន្ធនាគារ ដោយសារ​រឿង​វិវាទ​ដីធ្លី​ជាមួយ​ក្រុមហ៊ុន​មេត្រីភាព នៅ​ខេត្ត​ព្រះវិហារ នឹង​ត្រូវ​តុលាការ​ដោះលែង​ជា​បន្តបន្ទាប់ ក្រោយពី​មានការ​ស្នើសុំ​នៅ​ក្រៅ​ឃុំ។ ចំណែក​សង្គម​ស៊ីវិល​ដែល​ឃ្លាំមើល​ផ្នែក​សិទ្ធិមនុស្ស​យល់​ថា ស្ថាប័ន​តុលាការ គួរ​ដោះលែង​ពួកគេ​ទាំងអស់ រួម​ទាំង​តំណាង​ពលរដ្ឋ​ម្នាក់ទៀត ដែល​ទើប​ត្រូវ​ចាប់​ឃុំ​ថ្មីៗ​នេះ​ផង ដោយ​មិន​គួរ​ប្រើ​យន្តការ​ដោះលែង​ពលរដ្ឋ​ម្ដងម្នាក់​នោះ​ទេ។

ព្រះរាជអាជ្ញា​នៃ​សាលាដំបូង​ខេត្ត​ព្រះវិហារ លោក ទី សុវិនថាល់ ឱ្យ​អាស៊ីសេរី​ដឹង​ថា ស្ថាប័ន​តុលាការ​នឹង​ដោះលែង កូនប្រុស​របស់​លោក ស៊ុំ ម៉ឺន គឺ​លោក ម៉ឺន មៀន មុនគេ ព្រោះ​គាត់​កំពុង​ឈឺ​ធ្ងន់ ចំណែក​អ្នកភូមិ​១៣​ទៀត ហើយ​តំណាង​ពលរដ្ឋ​ម្នាក់ នឹង​ដោះលែង​ឱ្យ​ក្រៅ​ឃុំ​ជា​បន្តបន្ទាប់។

លោក ទី សុវិនថាល់ បញ្ជាក់​ថា ការ​ដោះលែង​អ្នក​ភូមិ​ឱ្យ​នៅ​ក្រៅ​ឃុំ គឺ​មិន​អាច​បាន​ភ្លាមៗ​នោះ​ទេ ព្រោះ​នីតិវិធី​ក្នុង​រឿង​ទាំងអស់​នេះ ត្រូវ​ចំណាយ​ពេល​យ៉ាងតិច ២​ឬ​៣​ថ្ងៃ ក្រោយពី​ខាង​តុលាការ​ទទួល​បាន​ពាក្យ​ស្នើ​សុំ​ឱ្យ​នៅ​ក្រៅ​ឃុំ​ពី​មេធាវី៖ «ប្រហែលជា​មិន​យូរ សំខាន់​ចៅក្រម​ធ្វើ​ទាន់​ឬ​មិនទាន់ បើ​ថា ធ្វើ​ទាន់​ក្នុង​ថ្ងៃ​ហ្នឹង​មានអី​។ មិនមែន​ភ្លាមៗ​ទេ ប៉ុន្តែ​មិន​អាច​យូរ​ដល់​៤-១០​ថ្ងៃ​ទៀត​ទេ បើ​មាន​ពាក្យ​ដាក់​ឱ្យ​នៅ​ក្រៅ​ឃុំ​ទាំងអស់។ ខ្ញុំ​យល់ថា​ធ្វើ​ជា​បន្តបន្ទាប់​មិន​អាច​ទាំងអស់​ទេ។ សំខាន់​គឺ​កូន​ស៊ុំ ម៉ឺន មុន មើល​ទៅ ពីព្រោះ​បច្ចុប្បន្ន​កូន ស៊ុំ ម៉ឺន មាន​ជំងឺ​។ ធ្វើ​ហ្នឹង​មុន​ឱ្យ​បាន​លឿន»

ការ​អូសបន្លាយ​ពេលវេលា​ហើយ​មិន​ព្រម​ដោះលែង​អ្នកភូមិ ១៣​នាក់​ឱ្យ​នៅ​ក្រៅ​ឃុំ​ជាង​៣​ខែ​មក​នេះ លោក ទី សុវិនថាល់ ដាក់​បន្ទុក​រឿង​នេះ ទៅ​ប្រជាពលរដ្ឋ​ដែល​មិន​ព្រម​សហការ​ជាមួយ​អាជ្ញាធរ និង​ស្ថាប័ន​តុលាការ ៖ «តាម​ពិត​ទៅ គឺ​មេធាវី​រៀបចំ​ដាក់​ឱ្យ​នៅ​ក្រៅ​ឃុំ​យូរហើយ ក៏ប៉ុន្តែ​មក​ពី​យើង​រក ស៊ុំ ម៉ឺន អត់​ឃើញ រួច​ចេះតែ​ចោទប្រកាន់​ខាង​អាជ្ញាធរ​រំលោភ​សិទ្ធិ​ទៅ​វិញ មកពី​ខ្លួន​គាត់ ក្រុម​របស់​ពួកគាត់​មិន​សហការ​ជាមួយ​ខាង​តុលាការ ឱ្យ​តុលាការ​ធ្វើ​ម៉េច បើ​មាន​បទល្មើស​ទៅ​ហើយ​។ សហការ​គ្នា​ទៅ បទល្មើស​ប៉ុនៗ​ហ្នឹង គេ​អាច​ឱ្យ​ក្រៅ​ឃុំ​បាន​តើ»

អ្នក​សម្របសម្រួល​សមាគម​អាដហុក (Adhoc) ព្រះវិហារ លោក ឡោ ចាន់ ថា ការលើកឡើង​របស់​មន្ត្រី​តុលាការ​រូប​នេះ មិន​ឆ្លុះបញ្ចាំង​ពី​ការពិត​នោះ​ទេ​។ លោក ឡោ ចាន់ ឱ្យ​ដឹង​ថា ក្រោយពី​មានការ​ចាប់ និង​ឃុំខ្លួន​ពលរដ្ឋ​កាលពី​ខែ​មករា សាច់ញាតិ​អ្នក​ជាប់ឃុំ បាន​រក​ជំនួយ​ផ្នែក​ច្បាប់​ពី​សមាគម​អាដហុក និង​មជ្ឈមណ្ឌល​អប់រំ​ច្បាប់​សហគមន៍ ដើម្បី​ជួយ​ផ្ដល់​មេធាវី​ដល់​ពួកគេ។ លោក ឡោ ចាន់ បញ្ជាក់​ថា មេធាវី​សមាគម​អាដហុក ដែល​ការពារ​ក្ដី​ឱ្យ​កូនប្រុស​លោក ស៊ុំ ម៉ឺន បាន​ដាក់​ស្នើសុំ​នៅ​ក្រៅ​ឃុំ នៅ​សាលាដំបូង​ខេត្ត​ព្រះវិហារ រហូត​ទៅ​សាលាឧទ្ធរណ៍ ប៉ុន្តែ​ខាង​តុលាការ​នៅតែ​មិន​អនុញ្ញាត​ឱ្យ លោក ម៉ឺន មៀន នៅ​ក្រៅ​ឃុំ។

លោក ឡោ ចាន់ យល់ថា បើ​តុលាការ​ខេត្ត​ព្រះវិហារ សម្រេច​ឱ្យ​អ្នកភូមិ​១៤​នាក់​ឱ្យ​នៅ​ក្រៅ​ឃុំ​ហើយ គួរតែ​ដោះលែង​ពួកគេ​ទាំងអស់ មិន​គួរ​ដោះលែង​ម្ដង​ម្នាក់ៗ​ដូច្នេះ​ទេ។ មន្ត្រី​ឃ្លាំមើល​សិទ្ធិមនុស្ស​រូប​នេះ បារម្ភ​ថា យន្តការ​ដោះលែង​បែបនេះ គឺ​អ្នកភូមិ​មួយ​ចំនួន​បាន​នៅ​ក្រៅ​ឃុំ ចំណែក​អ្នកភូមិ​មួយ​ចំនួន​ទៀត​អាច​នៅ​បន្ត​ជាប់ឃុំ៖ «គឺ​ស្នើសុំ​ឱ្យ​លោក​ព្រះរាជអាជ្ញា​និង​ចៅក្រម​ស៊ើបសួរ​ហ្នឹង មេត្តា​ដោះលែង​អ្នក​ទាំងអស់​គ្នា។ មួយវិញទៀត ថ្មីៗ​មានការ​ចាប់ខ្លួន​លោក ឡយ លីហួរ ក៏​ស្នើសុំ​ឱ្យ​ដោះលែង​បណ្ដោះអាសន្ន​ដែរ ដើម្បី​ឱ្យ​គាត់​ធ្វើ​ការងារ​ពាក់ព័ន្ធ​ដីធ្លី​ជាមួយ​អាជ្ញាធរ​ស្រុក​ខេត្ត​តទៅទៀត​។ ហើយ​បើសិនជា​គាត់​មិនបាន​ចេញទៅ​ទេ ការងារ​ហ្នឹង ប្រាកដ​ជា​មាន​ស្ទះ​មួយ​ចំនួន​ហើយ ពីព្រោះ​លោក ឡយ លីហួរ បាន​សហការ​ជាមួយ​អាជ្ញាធរ ស្រុក​ខេត្ត​កន្លងមក ទោះ​មានការ​សហការ​ល្អ​ហើយ រហូតដល់​ធ្វើ​ស្ថិតិ​ប្រជាពលរដ្ឋ​ដែល​ស្នាក់​តំបន់​អស់ហ្នឹង​ថែម​ទៀត​ផង»

លោក ម៉ឺន មៀន និង​ឪពុក​របស់​លោក គឺ លោក ស៊ុំ ម៉ឺន ត្រូវ​បាន​អាជ្ញាធរ​ចាប់ខ្លួន កាលពី​ថ្ងៃ​ទី​២០ មករា នៅ​ពេល​ពួកគេ​បើក​គោយន្ត​ដឹក​ឥវ៉ាន់​លក់ដូរ​សំដៅ​ទៅ​ផ្ទះ ដោយ​ធ្វើដំណើរ​តាម​ផ្លូវ​ឆ្លងកាត់​រនាំង​ក្រុមហ៊ុន​មេត្រីភាព។ ភរិយា​របស់​លោក ស៊ុំ ម៉ឺន ថា ក្នុង​ពេល​ចាប់ខ្លួន​នោះ អាជ្ញាធរ​ដែល​មាន​កម្លាំង​ទាហាន​ចូលរួម​ផង បាន​យក​ស្វ័យ​កាំភ្លើង​វាយ​ធ្វើបាប​ប្ដី​និង​កូនប្រុស​គាត់។

ម្ដាយ​លោក ម៉ឺន មៀន គឺ​លោកស្រី ភឹម ម៉ៅ ប្រាប់​អាស៊ីសេរី​ថា កូនប្រុស​គាត់​នឹង​ចេញពី​ពន្ធនាគារ​នៅ​ថ្ងៃ​ទី​ច័ន្ទ សប្ដាហ៍​ក្រោយ ក្រោយ​ពី​លោកស្រី​បាន​ជួប​អភិបាលខេត្ត​ព្រះវិហារ លោក អ៊ុន ចាន់ដា នៅ​ថ្ងៃទី២៦ មេសា​។ លោកស្រី ភឹម ម៉ៅ ថា រូប​គាត់ មាន​ការ​សប្បាយចិត្ត ក្រោយពី​ឮ​ដំណឹង​ថា​តុលាការ​ដោះលែង​កូនប្រុស​គាត់​ឱ្យ​វិល​មក​ជួបជុំ​ក្រុម​គ្រួសារ​វិញ៖ «ខ្ញុំ​អរគុណ​លោកគ្រូ ជួយ​ខ្នះខ្នែង ហើយ​ខាង​អភិបាលខេត្ត ដើម្បី​ដោះលែង​កូន​ខ្ញុំ​មក បាន​ន័យ​ថា​គេ​ដោះលែង​មក​វិញ​ហើយ​ណា៎។ ខ្ញុំ​អរគុណ រក​អ្វី​ប្រៀប​ពុំ​បានទេ ដែល​កូន​បាន​ចេញ​មក ព្រោះ​អី​យើង​អស់​អី​អា​លីង​ហើយ។ បើ​បាន​កូន​ចេញ​មក​ហើយ គឺថា​បាន​ជីវិត​យើង​មកវិញ។ ចាស៎​! ថ្ងៃ​ច័ន្ទ ថ្ងៃនេះ​គាត់​ថា​ធ្វើ​ក្រដាស​អត់​ទាន់​។ ថ្ងៃ​ច័ន្ទ​គាត់​ថា ឱ្យ​ឡើង​ទៅ​យក​វិញ​ចុះ»

ក្នុង​វិវាទ​ដីធ្លី​រវាង​ពលរដ្ឋ​ជា​៣៣០​គ្រួសារ​ជាមួយ​នឹង​ក្រុមហ៊ុន​មេត្រីភាព​របស់​ឧកញ៉ា អាន ម៉ារឌី មាន​ពលរដ្ឋ​១៤​នាក់​ត្រូវ​បាន​អាជ្ញាធរ​ចាប់ និង​ឃុំខ្លួន​បណ្ដោះអាសន្ន​នៅ​ពន្ធនាគារ​ខេត្ត​ព្រះវិហារ។ ក្រៅ​ពី​នេះ​ពលរដ្ឋ​ថា កង​អន្តរាគមន៍​វីរ​យោធា​លេខ​២៦១ ឬ​ហៅថា ក្រុម​កងកម្លាំង​ទាហាន​កងពល​លេខ​៦​ដែល​ឈរជើង​ការពារ​ដី​ឱ្យ​ក្រុមហ៊ុន បាន​ឈូស​កម្ទេច​ផលដំណាំ និង​ដុត​ផ្ទះ​ពលរដ្ឋ​អស់​ជាច្រើន​ខ្នង។

អង្គការ​សង្គម​ស៊ីវិល​ផ្នែក​សិទ្ធិមនុស្ស ស្នើ​ដល់​អាជ្ញាធរ​ខេត្ត​ព្រះវិហារ ពន្លឿន​ដំណោះស្រាយ​ឱ្យ​ឆាប់ ដើម្បី​បញ្ចប់​ទំនាស់​ដីធ្លី​រវាង​ប្រជាពលរដ្ឋ និង​ភាគី​ក្រុមហ៊ុន​មេត្រីភាព ក្រោយពី​ដោះលែង​អ្នកភូមិ​១៤​នាក់​និង​តំណាង​ពលរដ្ឋ​ម្នាក់ ដែល​ជាប់ឃុំ​ក្នុង​ពន្ធនាគារ ឱ្យ​មាន​សេរីភាព​វិញ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល