ពលរដ្ឋមានជម្លោះដីធ្លីបឹងតាមោកតវ៉ាមិនឱ្យអាជ្ញាធរខណ្ឌព្រែកព្នៅរុះរើស្ពានសហគមន៍
2023.05.11
ទិដ្ឋភាពអាជ្ញាធរខណ្ឌព្រែកព្នៅ ចុះរុះរើស្ពានពលរដ្ឋឆ្លងបេះត្រកួន នៅក្បែរតំបន់បឹងតាមោក ភូមិសំរោងត្បូង សង្កាត់សំរោង ខណ្ឌព្រែកព្នៅ កាលពីថ្ងៃទី១០ ឧសភា ២០២៣។
រូប៖ ពលរដ្ឋផ្ដល់
ប្រជាពលរដ្ឋមានជម្លោះដីធ្លីនៅក្បែរតំបន់បឹងតាមោក ភូមិសំរោងត្បូង សង្កាត់សំរោង ខណ្ឌព្រែកព្នៅប្រមាណ១៥០នាក់ ប្រមូលផ្ដុំតវ៉ាមិនឱ្យអាជ្ញាធរខណ្ឌព្រែកព្នៅរុះរើស្ពាន ដែលពលរដ្ឋសាងសង់សម្រាប់ឆ្លងទៅក្នុងបឹងដើម្បីបេះត្រកួន រាវខ្យង និងរកត្រីផ្គត់ផ្គង់ជីវភាពគ្រួសារ ។ មន្ត្រីសង្គមស៊ីវិល ជំរុញដល់ក្រសួងពាក់ព័ន្ធពន្លឿននីតិវិធីដោះស្រាយវិវាទដីធ្លី និងបញ្ឈប់ការធ្វើទុក្ខបុកម្នេញលើប្រជាពលរដ្ឋដើម្បីឱ្យពួកគាត់មានលទ្ធភាពរកចំណូលផ្គត់ផ្គង់ជីវភាព។
ប្រជាពលរដ្ឋមានជម្លោះដីធ្លីប្រមាណ១៥០នាក់ តំណាងឱ្យប្រជាពលរដ្ឋជាង២រយគ្រួសារ (២៥០) ស្នើឱ្យអាជ្ញាធរខណ្ឌព្រែកព្នៅឈប់រុះរើស្ពានសហគមន៍ និងដោះស្រាយបញ្ហាដីធ្លីជូនពលរដ្ឋ។
តំណាងពលរដ្ឋនៅបឹងតាមោក លោកស្រី ប្រាក់ សុភា ប្រាប់វិទ្យុអាស៊ីសេរីនៅថ្ងៃទី១០ ឧសភា ថា លោកស្រីរស់នៅរងទុក្ខដោយសារការរំលោភយកដីហើយ គ្រាន់តែលោកស្រី និងពលរដ្ឋសាងសង់ស្ពានទុកសម្រាប់ធ្វើដំណើរ និងឆ្លងទៅរក ត្រី ខ្យង ព្រលិត ត្រកួនដើម្បីចិញ្ចឹមជីវិតក៏អាជ្ញាធរគំរាមកំហែងប្រើអំពើហិង្សា និងបំផ្លាញស្ពានមិនឱ្យពលរដ្ឋសាងសង់បន្តដែរ។ លោកស្រីបន្តថា មូលហេតុដែលលោកស្រី និងប្រជាពលរដ្ឋសាងសង់ស្ពានឫស្សីប្រវែង៨០ម៉ែត្រនេះពីព្រោះក្រុមហ៊ុនអចលនទ្រព្យ លក់បុរី និងផ្ទះល្វែង បានធ្វើរបងព័ន្ធជុំវិញផ្ទះលោកស្រីដែលធ្វើឱ្យលោកស្រីពុំមានផ្លូវដើរ ហើយជាពិសេសនៅមានមេឃភ្លៀងម្ដងៗធ្វើឱ្យពួកគាត់ពិបាកធ្វើដំណើរ ។
លោកស្រី ប្រាក់ សុភា៖ «ស្នើដល់នាយករដ្ឋមន្ត្រីមេត្តាបើភ្នែកសហគមន៍រងគ្រោះក៏ដូចជាបណ្ឌិតបេក្ខភាពថ្មីមេត្តា លោកថយបន្តិចមើលពលរដ្ឋផងព្រោះអីសន្តិភាពសូមកុំឱ្យមាន ប៉ុល ពត សម័យសន្តិភាពសូមកុំឱ្យមាន ប៉ុល ពត សម័យអភិវឌ្ឍន៍សូមកុំឱ្យធ្វើការអភិវឌ្ឍន៍លើទឹកភ្នែកពលរដ្ឋ ពីព្រោះជិតការបោះឆ្នោតកាន់តែកៀក ហើយអ៊ីចឹងកុំឱ្យពលរដ្ឋកាន់តែអស់ទំនុកចិត្តអាមុនជិតបោះឆ្នោតអង្វរបោះឆ្នោតហើយសំពោង»។
ស្រដៀងគ្នានេះដែរពលរដ្ឋម្នាក់ទៀតរស់នៅក្បែរបឹងតាមោក លោកស្រី សឿន ស្រីសុត ថ្លែងថា លោកស្រីខកចិត្តនៅពេលដែលអាជ្ញាធរការពារផលប្រយោជន៍ក្រុមហ៊ុនឯកជន ហើយបែរជាប្រើហិង្សា លើលោកស្រីធ្វើឱ្យលោកស្រីរងរបួសដៃនិងជើង ក្នុងពេលលោកស្រី និងអ្នកភូមិផ្សេងទៀត ព្យាយាមតវ៉ាប្រឆាំងមិនឲ្យអាជ្ញាធររុះរើស្ពាន កាលពីថ្ងៃទី៩ ឧសភា។ ។ លោកស្រីបន្តថា នេះគឺជារឿងអយុត្តិធម៌សម្រាប់ពលរដ្ឋស្លូតត្រង់ដែលអ្នកមានអំណាចបុណ្យស័ក្ដិរំលោភយកដីធ្វើជាកម្មសិទ្ធិឯកជន ហើយព្រមទាំងបិទផ្លូវមិនឱ្យពលរដ្ឋធ្វើដំណើរទៀត។
លោកស្រី សឿន ស្រីសុត៖ «ខ្ញុំមិនដឹងថាបេះដូងអភិបាលខណ្ឌ ឬបេះដូងអភិបាលក្រុង ឃួង ស្រេង ខ្ញុំមិនដឹងថាបេះដូងគាត់សាងពីអី គាត់ធ្វើបាបប្រជាពលរដ្ឋ គាត់មិនដែលជួយពលរដ្ឋសូម្បី១រយលុយខ្មែរតែគាត់ធ្វើទុក្ខបុកម្នេញពួកខ្ញុំខ្លាំងមែនទែន ពួកខ្ញុំរងការឈឺចាប់ខ្លាំងណាស់ពីព្រោះដោយសារការរំលោភបំពានផ្ទៃបឹងគាត់លុបអភិវឌ្ឍន៍អស់ កន្លែងពួកខ្ញុំបាត់បង់ចំណូលអស់ហើយ តែហេតុអីគាត់មករំលោភបំពានដីពួកខ្ញុំទៀត រាល់ថ្ងៃគាត់ត្រៀមខ្លួនបណ្ដេញចេញទាំងបង្ខំដោយការដោះដូរដីទៅទីតាំងថ្មីកន្លែងថ្មី ដែលពួកខ្ញុំមិនអាចរស់នៅបាន»។
ការលើកឡើងរបស់ប្រជាពលរដ្ឋនេះធ្វើឡើងបន្ទាប់ពីអាជ្ញាធរប្រមាណ ៤០នាក់បានយករណាយន្តកាត់រុះរើស្ពានឫស្សីប្រវែង ៨០ម៉ែត្ររបស់ប្រជាពលរដ្ឋដែលសាងសង់សម្រាប់ធ្វើដំណើរ និងអាជ្ញាធរមួយចំនួនទៀតបានប្រើហិង្សារុញច្រានធ្វើឱ្យស្រ្តី១០នាក់រងរបួសកាលពីថ្ងៃទី០៩ ឧសភា ដោយសារតែពលរដ្ឋ នាំគ្នាតវ៉ាប្រឆាំងសកម្មភាពរបស់អាជ្ញាធរ។ ។ ក្រៅពីប្រើអំពើហិង្សាលើស្ត្រីក្រុមអាជ្ញាធរថែមទាំងជេរប្រមាថ និងចោទប្រកាន់ពលរដ្ឋរំលោភយកដីរដ្ឋដើម្បីសាងសង់ស្ពានទៀតផង ប៉ុន្តែពលរដ្ឋអះអាងថាពួកគាត់សាងសង់នៅលើដីរបស់ពួកគាត់នោះទេ។
បើទោះបីជាប្រជាពលរដ្ឋមានជម្លោះដីធ្លីនៅបឹងតាមោកប្រឈមនឹងការបណ្ដាញចេញទាំងបង្ខំពីសំណាក់អាជ្ញាធរយ៉ាងណាក៏ដោយ ក៏រដ្ឋាភិបាល នៅតែបន្តកាត់ឆ្វៀល និងដោះដូរ ទៅស្ថាប័នរដ្ឋ ក្រុមហ៊ុនឯកជន និងមនុស្សមួយក្រុម ដែល ជាអ្នកមានលុយមានអំណាចជាពិសេសក្រុមគ្រួសារមន្ត្រីជាន់ខ្ពស់របស់រដ្ឋាភិបាល លោក ហ៊ុន សែន ដើម្បីឱ្យពួកគេកសាងអគារ បុរី វីឡា ខុនដូ និងធ្វើជាកម្មសិទ្ធិឯកជនជាដើម ។
វិទ្យុអាស៊ីសេរីមិនអាចទាក់ទង អភិបាលខណ្ឌព្រែកព្នៅ លោក ឃឹម សំអាន និង អភិបាលរាជធានីភ្នំពេញ លោក ឃួង ស្រេង ដើម្បីសុំការស្រាយបំភ្លឺបាននៅឡើយទេ នៅថ្ងៃទី១០ ឧសភា។
ជុំវិញរឿងនេះនាយកទទួលបន្ទុកកិច្ចការទូទៅនៃអង្គការលីកាដូ (LICADHO) លោក អំ សំអាត មានប្រសាសន៍ថា ក្រសួងពាក់ព័ន្ធគួរតែចុះទៅត្រួតពិនិត្យ និងពន្លឿនដោះស្រាយបញ្ហាដីធ្លីជូនពលរដ្ឋចៀសវាងការប្រើហិង្សាលើពលរដ្ឋ។ លោកបន្តថា អាជ្ញាធរមានកាតព្វកិច្ចការពារប្រជាពលរដ្ឋពីការរំលោភបំពានសិទ្ធិពីអ្នកមានអំណាច មិនមែនការពារផលប្រយោជន៍ឱ្យក្រុមហ៊ុនឯកជននោះទេ។
លោក អំ សំអាត៖ «គ្រាន់តែសំណូមពរទេថាអាជ្ញាធរមានបទពិសោធច្រើនហើយនៅក្នុងបញ្ហាដីធ្លី ហើយយើងក៏ឃើញមានបញ្ហាកើតច្រើនហើយរឿងដីធ្លីទាំងអស់ហ្នឹងជាពិសេសរឿងអំពើហិង្សា ការចាប់ខ្លួនការធ្វើទុក្ខបុកម្នេញផ្សេងៗ អ៊ីចឹងចំណុចនេះហើយដែលទាមទារឱ្យឃើញគិតគូរពិចារណាដោះស្រាយឱ្យបានឆាប់រហ័សក្នុងការចៀសនៅរាល់អំពើហិង្សា ឬក៏អំពើផ្សេងៗដែលកើតឡើងអំពីបញ្ហាដីធ្លីនោះ»។
ស្ទើរតែក្លាយជាទម្លាប់ទៅហើយនៅពេលពលរដ្ឋមានវិវាទដីធ្លីស្នើឱ្យក្រសួងពាក់ព័ន្ធ ឬស្វែងរកកិច្ចអន្តរាគមន៍ពីលោកនាយករដ្ឋមន្ត្រី ហ៊ុន សែន ពួកអាជ្ញាធរទាំងនោះតែងតែលាបពណ៌ពលរដ្ឋវិញថា ជាក្រុមប្រឆាំង ឬជាអ្នករំលោភយកដីរដ្ឋធ្វើជាកម្មសិទ្ធិផ្ទាល់ខ្លួន ហើយអ្នកខ្លះទៀតមានពាក្យបណ្ដឹងនៅតុលាការជាដើម។
កន្លងមកប្រជាពលរដ្ឋតែងធ្វើពិធីតាមបែបសាសនាដើម្បីសុំឱ្យវត្ថុស័ក្ដិសិទ្ធិជួយការពារដីរបស់ពួកគេ ពីព្រោះតែពួកគេអស់ជំនឿលើអាជ្ញាធរ និងក្រសួងពាក់ព័ន្ធដែលមិនជួយដោះស្រាយបញ្ហាដីធ្លីឱ្យពលរដ្ឋថែមទាំងបណ្ដែតបណ្ដោយឱ្យក្រុមហ៊ុនឯកជនឈូសឆាយបូមខ្សាច់ដើម្បីយកផ្ទៃបឹងតាមោក យកសាងសង់បុរី ខុនដូ បានតាមអំពើចិត្ត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សាលាដំបូងរាជធានីភ្នំពេញ តម្កល់សាលក្រមកំបាំងមុខទៅលើប្រធានសហជីព លោក ម៉ម រិទ្ធី ឱ្យជាប់ពន្ធនាគារ ១៨ខែ
- ពលរដ្ឋ និងអ្នកការពារសិទ្ធិមនុស្សធ្វើធម្មយាត្រាពីក្រុងកំពតមកភ្នំពេញ ដើម្បីលើកកម្ពស់ការគោរពសិទ្ធិមនុស្ស
- លោក ហ៊ុន សែន តែងតាំងលោក ហៃ វណ្ណា និងសកម្មជន ១៨នាក់ទៀតជាទីប្រឹក្សា និងជំនួយការ
- យុវជនរិះគន់ការផ្ដល់គ្រឿងឥស្សរិយយសឱ្យចៅប្រុសលោក ហ៊ុន សែន ដែលធ្លាប់ប្រកាសលក់កាំភ្លើងលើបណ្ដាញសង្គម
- លោក ហ៊ុន សែន ទៅមជ្ឈិមបូព៌ា «ទំនងចង់ទៅដើរទាក់ទាញវិនិយោគទុន ខណៈរដ្ឋាភិបាលកូន កំពុងជួបបញ្ហាសេដ្ឋកិច្ច»