ពលរដ្ឋប៉ះពាល់នៅព្រលានយន្តហោះថ្មីខេត្តកណ្ដាលទាមទារពន្លឿនសងសំណងដីស្រែ
2023.10.01
ទិដ្ឋភាពពលរដ្ឋនៅក្បែរពលានយន្តហោះថ្មី ស្រុកកណ្ដាលស្ទឹង តវ៉ារកដំណោះស្រាយ កាលពីថ្ងៃទី៤ កក្កដា ២០២១។
រូប៖ ពលរដ្ឋផ្ដល់ឱ្យ
ពលរដ្ឋមួយចំនួនដែលបានរើចេញពីតំបន់ព្រលានយន្តហោះថ្មី ស្ថិតនៅឃុំបឹងខ្យាង និងឃុំកណ្តោក ស្រុកកណ្ដាលស្ទឹង ខេត្តកណ្តាល និងឃុំពត់សរ ស្រុកបាទី ខេត្តតាកែវ បន្តទាមទារឱ្យក្រុមហ៊ុនអូស៊ីអាយស៊ី OCIC របស់ឧកញ៉ា ពុង ឃាវសែ ដែលទទួលសាងសង់ព្រលានយន្តហោះថ្មី ផ្ដល់សំណងលើដីស្រែរបស់ពួកគាត់ឱ្យបានសមរម្យ។ មន្ត្រីសង្គមស៊ីវិលស្នើដល់រដ្ឋាភិបាលជួយអន្តរាគមន៍ដល់ក្រុមហ៊ុនផ្ដល់តម្លៃដីស្រែសមស្របតាមតម្លៃទីផ្សារដល់ពលរដ្ឋ។
កម្មករជាង ១រយនាក់ដែលទទួលម៉ៅការសាងសង់ជម្រកសម្រាប់ពលរដ្ឋដែលមកទាំងទីលំនៅថ្មី កំពុងសាងសង់ផ្ទះជាច្រើនខ្នង ដែលមិនទាន់សាងសង់រួចរាល់នៅឡើយ។ ការសាងសង់ផ្ទះនេះ ស្ថិតក្នុងឃុំអំពៅព្រៃ ស្រុកកណ្ដាលស្ទឹង ខេត្តកណ្ដាល។ ផ្ទះដែលកំពុងសាងសងទាំងនោះ គឺជាកម្មសិទ្ធិរបស់ពលរដ្ឋមួយចំនួនដែលរើមកពីទីតាំងព្រលានយន្តហោះអន្តរជាតិភ្នំពេញថ្មី។
នៅខាងចុង នៃខ្នងផ្ទះទាំងនោះ មានផ្ទះមួយដែលទើបនឹងចាក់គ្រឹះសាងសង់នៅឡើយ គឺជាកម្មសិទ្ធិ របស់លោក អៀប សុធី ដែលជាពលរដ្ឋម្នាក់ធ្លាប់រស់នៅក្នុង ភូមិកំពង់តាឡុង ឃុំបឹងខ្យាង ស្រុកកណ្ដាលស្ទឹង អស់រយៈពេលជិត៣០ ឆ្នាំ រហូតដល់គម្រោងអភិវឌ្ឍន៍ព្រលានយន្តហោះភ្នំពេញអន្តរជាតិថ្មី បង្ខំឱ្យលោកចាកចេញ និងទទួលសំណងនេះ។
លោក អៀប សុធី បានផ្លាស់ទីលំនៅមកទីតាំងថ្មីទើបបាន ៣ខែ ក្រោយលោកបង្ខំទទួលយកការដោះដូរមួយចំនួនពីក្រុមហ៊ុនដូចជាដីផ្ទះ និងសំណងជាទឹកប្រាក់ចំនួន ៣ម៉ឺន ៧ ពាន់ដុល្លារ។ លោក អៀប សុធី បានឱ្យដឹងថានេះជាការទទួលយកដោយបង្ខំដោយសារតែលោកបាត់បង់ផ្ទះដែលមានតម្លៃជាង៥ម៉ឺនដុល្លារ ផលដំណាំ និងដីស្រែជាងមួយហិកតារ។
លោក អៀប សុធី បន្ថែមថា ដីស្រែរបស់លោកដែលលក់នៅទីផ្សារមួយម៉ែត្រការ៉េ តម្លៃ៥០ដុល្លារ ការ៉េ ប៉ុន្តែខាងក្រុមហ៊ុននៅតែឱ្យ ៨ដុល្លារក្នុងមួយម៉ែត្រការ៉េតែប៉ុណ្ណោះ។ លោកបន្ថែមថា តម្លៃដែលក្រុមហ៊ុនផ្ដល់ជូន មិនអាចឱ្យលោកមានលទ្ធភាពទៅទិញដីស្រែ នៅតំបន់ថ្មីសម្រាប់ប្រកបមុខរបបចិញ្ចឹមជីវិតនោះឡើយ។
លោក អៀប សុធី៖ «បើនិយាយទៅខ្ញុំកំពុងតែគិតជាមួយគ្រួសារ ព្រមទាំងប្រជាពលរដ្ឋក្នុងភូមិថានៅនោះយើងមានដីស្រែចម្ការ ប្រកបរបរចិញ្ចឹមជីវិតដល់មកនេះ ការលក់ដូរក៏មិនអាចលក់ដូរបានទីពីរស្រែចម្ការយើង ក៏អត់មានធ្វើអនាគតខ្ញុំមិនដឹងជាពឹងអីទេ»។
លោក អៀប សុធី បានស្នើដល់រដ្ឋាភិបាលថ្មីជួយអន្តរាគមន៍ទៅខាងក្រុមហ៊ុនឱ្យផ្ដល់សំណងសមរម្យចំពោះរូបលោក និងពលរដ្ឋប្រមាណ១០ភាគរយដែលមិនទាន់អាចទទួលយកតម្លៃដែលក្រុមហ៊ុនកំណត់ឱ្យ។ លោក អៀប សុធី បារម្ភថា បើក្រុមហ៊ុននៅតែអូសបន្លាយមិនព្រមផ្ដល់ដំណោះស្រាយនោះ គ្រួសារលោកនឹងខ្ចីបុលលុយធនាគារដើម្បីបញ្ចប់ការសាងសង់ផ្ទះ ស្របពេលដែលលោកកំពុងគ្មានការងារធ្វើផងនោះ។
លោក អៀប សុធី៖ «អ៊ីចឹងនៅពេលដែលខ្ញុំខ្ចីធនាគារមកធ្វើផ្ទះបង្ហើយហ្នឹង ខ្ញុំបារម្ភៗ ត្រង់ថា ទីមួយខ្ញុំអត់មានស្រែចម្ការធ្វើ អ្វីដែលខ្ញុំចង់បានស្រែចម្ការមកប្រកបមុខរបរដើម្បីសងដល់ធនាគារ»។
កន្លងមកតំណាងពលរដ្ឋជាង ៥រយគ្រួសារ(៥៣៨) ដែលរងផលប៉ះពាល់ពីគម្រោងសាងសង់ព្រលានយន្តហោះអន្តរជាតិភ្នំពេញថ្មី នៅខេត្តកណ្ដាល បានឡើងមកដាក់លិខិតតាមស្ថាប័នរដ្ឋនានាស្នើដល់រដ្ឋាភិបាលឱ្យជួយអន្តរាគមន៍ ដល់ក្រុមហ៊ុនផ្ដល់សំណងសមរម្យជូនពួកគាត់។ ចំណែពលរដ្ឋម្នាក់ទៀត លោកស្រី ឡូញ វណ្ណា លើកឡើងថា គ្រួសារលោកស្រីបានបាត់បង់ដីស្រែជាង ១.៥០០ ម៉ែត្រការ៉េដែលក្រុមហ៊ុនមិនទាន់ផ្ដល់សំណង។ លោកស្រី ឡូញ វណ្ណា ទទូចថា ក្រុមហ៊ុនដែលមានលុយរាប់លានដុល្លារ សាងសង់ប្រលានយន្តហោះ ត្រូវតែផ្ដល់សំណងសមរម្យជូនពលរដ្ឋដែលត្រូវការដីសម្រាប់ធ្វើស្រែចិញ្ចឹមជីវិត។
លោកស្រី ឡូញ វណ្ណា៖ «ដឹងស្រាប់ហើយយកទៅទិញកន្លែងណាបាននៅជិតផ្ទះ ទាល់តែនៅឆ្ងាយពីផ្ទះ រាប់គីឡូដីបានអាចទៅទិញបានអា ៨ដុល្លារនោះ បើនៅក្បែរៗប្រលាននេះគេដាក់ឡើងដល់៧០ ៨០ ទិញអត់បានទេ ឱ្យតែខុសពីរបងព្រលានដីថ្លៃម៉ង គេដាក់៧០ ៨០ មានទៅដល់១០០ ទៀតឱ្យតែដីជាប់ផ្លូវសុទ្ធតែ១០០ជាង»។
ហ្វេសប៊ុក (Facebook) អចលនវត្ថុមួយដែលមានឈ្មោះថា (Advance Real Estate) កាលថ្ងៃទី២៩ ខែសីហា វាយតម្លៃថា តម្លៃដីជិតព្រលានយន្តហោះថ្មីស្ថិតក្នុងសង្កាត់ក្រាំងយ៉ូវ ស្រុកស្អាង មានតម្លៃ ៦៨ដុល្លារក្នុងមួយម៉ែត្រការ៉េ។
ទោះជាយ៉ាងណា អភិបាលខេត្តកណ្ដាល លោក គង់ សោភ័ណ្ឌ បានឱ្យដឹងថាអាជ្ញាធរខេត្តកណ្ដាលបានព្យាយាមស្វែងរកដំណោះស្រាយជូនដល់ពលរដ្ឋរួចហើយ ហើយខាងក្រុមហ៊ុនបានកំណត់តម្លៃដី៨ដុល្លារក្នុងមួយម៉ែត្រការ៉េមុនគម្រោងសាងសង់។ ទន្ទឹមនឹងនេះ អភិបាលខេត្តកណ្ដាល លោក គង់ សោភ័ណ្ឌ មិនបានចាប់អារម្មណ៍ចំពោះពលរដ្ឋដែលស្នើឡើងដើម្បីស្វែងរកដំណោះស្រាយនោះទេ តែលោកបែរជាអំពាវនាវឱ្យពលរដ្ឋទទួលយកសំណងទៅតាមតម្លៃទៅតាមក្រុមហ៊ុនកំណត់ទៅវិញ។
លោក គង់ សោភ័ណ្ឌ៖ «ការដោះដូរនេះ បងប្អូននេះគឺបងប្អូនបានទទួលយកស្ទើរតែទាំងស្រុងហើយ តម្លៃនេះបើយើងនិយាយពីមុនការអភិវឌ្ឍន៍ហៅដោះស្រាយជូនបងប្អូន តម្លៃដីធ្លីមុនការដែលយើងធ្វើប្រលាន គឺវាសក្ដិសមតម្លៃដែលនៅទីនោះគឺប្រមាណប្រហាក់ប្រហែលហ្នឹងឯង»។
ទាក់ទងនឹងបញ្ហានេះ អ្នកសម្របសម្រួលគម្រោងធុរកិច្ច និងសិទ្ធិមនុស្សរបស់មជ្ឈមណ្ឌលសិទ្ធិមនុស្សកម្ពុជា (CCHR) លោក វណ្ណ សុផាត មានប្រសាសន៍ថាខាងភាគីក្រុមហ៊ុនបានកេងចំណេញលើពលរដ្ឋមូលដ្ឋាន ព្រោះក្រុមហ៊ុនបានឱ្យតម្លៃដីផ្ទះ និងដីស្រែចម្ការទាបជាងតម្លៃទីផ្សារតាំងពីដំបូង។ លោក វណ្ណ សុផាត លើកឡើងទៀតថារដ្ឋគួរតែអន្តរាគមន៍ដើម្បីឱ្យភាគីក្រុមហ៊ុនផ្ដល់សំណងបន្ថែមដល់ពលរដ្ឋឱ្យសមស្របតាមច្បាប់អស្សាមិករណ៍។
លោក វណ្ណ សុផាត៖ «យើងឃើញថាមានភាពអយុត្តិធម៌សម្រាប់ប្រជាពលរដ្ឋដែលគាត់រងប៉ះពាល់ និងបាត់បង់ដីធ្លី យើងប្រៀបធៀបទៅតម្លៃថាកំណត់មុនអស្សាមិករណ៍ គឺជាតម្លៃមួយទាប ១ដុល្លារក្នុងមួយម៉ែត្រការ៉េ តែបច្ចុប្បន្នទីផ្សារពី៨០ ទៅជាង១០០ដុល្លារក្នុងមួយម៉ែត្រការ៉េ អ៊ចឹងយើងថាមានភាពខុសគ្នាឆ្ងាយណាស់»។
ក្រុមហ៊ុនសាជីវកម្មវិនិយោគក្រៅប្រទេសកម្ពុជា ហៅកាត់ អូ.ស៊ី.អាយ.ស៊ី(OCIC) របស់ លោក ពុង ឃាវសែ ដែលជាអ្នកជំនួញស្និទ្ធនឹងអតីតលោកនាយករដ្ឋមន្ត្រី ហ៊ុន សែន ទទួលបានសិទ្ធិសាងសង់ព្រលានយន្តហោះខ្នាតអន្តរជាតិមួយនេះ។ ប៉ុន្តែ គម្រោងអភិវឌ្ឍន៍ខ្នាតយក្សនេះ បានបង្កប់នូវទឹកភ្នែករបស់កសិករជាច្រើនគ្រួសារ ដោយសារការកាត់ដី តាមអនុក្រឹត្យថ្ងៃទី៣ ខែមិថុនា ឆ្នាំ២០២០ របស់រដ្ឋាភិបាល ក្នុងទំហំប្រហែលជិតបីពាន់ហិកតារនោះ (២.៦០០)នោះ ជាន់លើដីស្រែរបស់ពលរដ្ឋ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- រដ្ឋាភិបាលកាត់ដីគម្របព្រៃឈើនៅខេត្តព្រះសីហនុជិត៣០ហិកតារឲ្យប្រពន្ធលោក នេត សាវឿន
- សម្ព័ន្ធភាពចាក់ស្រេះរវាងគ្រួសារអ្នកកាន់អំណាច និងគ្រួសារអ្នកជំនួញ «អាចបង្កផលប៉ះពាល់ប្រយោជន៍ជាតិធ្ងន់ធ្ងរ»
- គ្រួសារថា អាជ្ញាធរបង្ខំឱ្យលោក កង សារ៉ន សុំទោសជាថ្នូរទទួលបានសេរីភាពឡើងវិញ
- លោក ហ៊ុន សែន កាត់ដីឧទ្យានជាតិគិរីរម្យជាង ២រយហិកតារទៀតឱ្យក្រុមហ៊ុនស្និទ្ធនឹងលោក
- ពលរដ្ឋនៅសង្កាត់ព្រែកជ្រៃ ព្រំដែនកម្ពុជា-វៀតណាមព្រួយបារម្ភពីការបាត់បង់ទឹកដីទៅវៀតណាម