ប្រជាពលរដ្ឋជនជាតិដើមភាគតិចចំនួន ៥នាក់ ត្រូវបានតំណាងអយ្យការអមសាលាដំបូងខេត្តព្រះវិហារចេញដីកាកោះហៅចូលបំភ្លឺជុំវិញការចោទប្រកាន់ពីបទ «គំរាមកំហែងថា នឹងសម្លាប់ និងគំរាមកំហែងថា នឹងធ្វើឱ្យខូចខាត»។ ពលរដ្ឋថា ការចោទប្រកាន់នេះ ជារឿងអយុត្តិធម៌បំផុត។
តំណាងពលរដ្ឋទាំង ៥រូប ដែលរងការចោទប្រកាន់នេះធ្វើឡើង ក្រោយពីពួកគេ បាននាំគ្នាទៅតវ៉ាដីធ្លីរបស់ខ្លួនជាមួយក្រុមហ៊ុនស្ករអំពៅចិនឈ្មោះ ឡាន ហ្វេង ដែលរំលោភយកដីពួកគេជិត ១០ឆ្នាំ ហើយបានលក់ឱ្យឈ្មួញបន្តធ្វើចម្ការដាំដំឡូង និងពោតជាដើម ទាំងគ្មានការអនុញ្ញាតពីពួកគាត់។ ពលរដ្ឋបន្តថា ការទាមទាររបស់ពួកគាត់ចំនួន ៣ថ្ងៃគឺ ថ្ងៃទី៤ ថ្ងៃទី១២ និង ១៣ ខែកុម្ភៈ ឆ្នាំ២០២២ កន្លងមក មិនមានការប្រើអំពើហិង្សា ឬធ្វើឱ្យខូចខាតដូចការចោទប្រកាន់នោះទេ។
លោក ស៊ុត សាវន ដែលសាលាដំបូងខេត្តព្រះវិហារចេញដីកាកោះហៅចូលមកបំភ្លឺជុំវិញការចោទប្រកាន់ពីបទ «គំរាមកំហែងថា នឹងសម្លាប់ និងគំរាមកំហែងថា នឹងធ្វើឱ្យខូចខាត» នៅព្រឹកថ្ងៃទី១ ខែមិថុនានេះ ប្រាប់វិទ្យុអាស៊ីសេរីថា ការកោះហៅនេះជារឿងអយុត្តិធម៌ ខណៈដែលពួកគាត់មិនបានប្រព្រឹត្តដូចការចោទប្រកាន់។ លោកបន្តថា នៅព្រឹកនេះ តំណាងអយ្យការបានសាកសួរជុំវិញ«ការគំរាមកំហែងនឹងសម្លាប់» ហើយលោកឆ្លើយថា កន្លងមកប្រជាពលរដ្ឋគ្រាន់តែទៅទាមទារឱ្យក្រុមហ៊ុនបញ្ឈប់សកម្មភាពភ្ជួរដីដោយឈ្មួញផ្សេង ដោយសារតែដីទាំងនោះមិនទាន់មានដំណោះស្រាយនៅឡើយ ប៉ុន្តែក្រុមហ៊ុនបានដាក់ពាក្យបណ្ដឹងមកតុលាការថា ប្រជាពលរដ្ឋមានការគំរាមកំហែង និងសម្លាប់ទៅវិញ ព្រោះវាមិនមែនជាការពិត៖ « គេសួរថា យើងគំរាមហើយសម្លាប់ដោយសារគេចោទប្រកាន់មកលើយើង។ មួយទៀត ដូចចន្លោះថ្ងៃទី១៣ [ ខែកុម្ភៈ ] យើងបានចូលរួមទៅមើលបងប្អូន [ តាមទាមទារឱ្យក្រុមហ៊ុន ] ហើយក៏បានថតគេអ៊ីចឹង ! ហើយបានទៅមើលអីផ្សេងៗ ហើយយើងអត់បានធ្វើអី អត់បាននិយាយអី ហើយអត់បានគំរាមកំហែងនឹងសម្លាប់ទេ » ។
លោកបន្តថា មកដល់ពេលនេះមានប្រជាពលរដ្ឋជាង ២៥០គ្រួសារស្ថិតនៅភូមិចំនួន៣ គឺភូមិបុស្សធំ ភូមិប្រមេរ និងភូមិស្រែព្រាង ដែលកំពុងមានជម្លោះដីធ្លីជាមួយនឹងក្រុមហ៊ុនស្ករអំពៅចិនឈ្មោះ ឡាន ហ្វេង។ លោកបន្តថា ប្រជាពលរដ្ឋបានចេញតវ៉ា និងដាក់ញត្តិជាច្រើនលើកមកហើយ ប៉ុន្តែមិនមានដំណោះស្រាយនោះទេ រហូតមកដល់ពេលនេះ បែរជាតំណាង ៥រូប ត្រូវរងបទចោទប្រកាន់យ៉ាងធ្ងន់ធ្ងរ។
តំណាងទាំងប្រាំរូបដែលចូលបំភ្លឺនៅសាលាដំបូង នៅថ្ងៃទី១ ខែមិថុនា ព្រឹកនេះមានលោក ថោង ស៊ុត លោក ស៊ុត សាវន លោក ថាប់ សុខឃី លោក ងន ហ៊ីម និងលោកស្រី រឿន ខាន់។
ចំណែកពលរដ្ឋម្នាក់ទៀតតំណាងឱ្យពលរដ្ឋជិត ១០០នាក់ មកគាំទ្រតំណាងរបស់ខ្លួននៅក្រៅរបងសាលាដំបូងខេត្តព្រះវិហារ គឺលោកស្រី ខៀវ ហែម ប្រាប់វិទ្យុអាស៊ីសេរីថា តុលាការគួរតែទម្លាក់ការចោទប្រកាន់មកលើតំណាងពួកគាត់ទាំង៥នាក់ ព្រោះអ្វីដែលក្រុមហ៊ុនប្ដឹងពេលនេះមិនមានមូលដ្ឋាន ដែលជឿទុកចិត្តនោះទេ។ លោកសង្ឃឹមថា តុលាការនឹងកាត់ក្ដីដោយយុត្តិធម៌ មិនត្រូវលំអៀងទៅរកអ្នកមានអំណាចនោះទេ៖ « ខ្ញុំសូមឱ្យស្នងការក៏ដោយ ខាងតុលាការក៏ដោយ ខាងព្រះរាជអាជ្ញា និងរាជរដ្ឋាភិបាល កុំចោទប្រកាន់លើជនជាតិពួកខ្ញុំទៀត តំណាងប៉ុន្មាននាក់នេះទៀត ទម្លាក់ចូលពីថ្ងៃនេះទៅ ចុះបំភ្លឺហើយ » ។
វិទ្យុអាស៊ីសេរីមិនអាចសុំអធិប្បាយជុំវិញរឿងនេះបានពីលោក វុធ សាវី តំណាងអយ្យការអមសាលាដំបូង ខេត្តព្រះវិហារ ដោយទូរស័ព្ទចូលតែគ្មានអ្នកទទួល។
ចំណែកមេធាវីការពារក្ដីឱ្យតំណាងប្រជាសហគមន៍ជនជាតិដើមទាំង ៥រូប មកពីអង្គការលីកាដូ អ្នកស្រី សាម សុគន្ធា ប្រាប់វិទ្យុអាស៊ីសេរីដឹងថា ក្រោយពីការសាកសួរតំណាងទាំង ៥រូប រួចមក ឃើញថា ពួកគាត់មានមូលដ្ឋានរឹងមាំ មិនដូចការចោទប្រកាន់នោះទេ ដូច្នេះសង្ឃឹមថា តុលាការនឹងទម្លាក់ការសាកសួរមកលើកូនក្ដីរបស់អ្នកស្រី៖ « ចំពោះការសួរបំភ្លឺកូនក្ដីរបស់ខ្ញុំព្រឹកមិញនៅអយ្យការអមសាលាដំបូងខេត្តព្រះវិហារខ្ញុំឃើញថា មិនមានកូនក្ដីខ្ញុំមិនបានប្រព្រឹត្តជាបទល្មើសអ្វីទេ។ អ្នកដែលប្ដឹងគាត់មកនឹងប្ដឹងដោយគ្មានមូលដ្ឋានច្បាស់លាស់ ហើយខ្ញុំជឿជាក់ថា នៅពេលខាងមុខព្រះរាជអាជ្ញានៃអយ្យការអមសាលាដំបូងខេត្តព្រះវិហារនឹងមិនធ្វើការចោទប្រកាន់ពួកគាត់ទេ » ។
ប្រជាសហគមន៍ជនជាតិដើមភាគតិចឱ្យដឹងថា ជម្លោះដីធ្លីនេះបានកើតឡើងតាំងពីឆ្នាំ២០១២ លើផ្ទៃដី ៦.០០០ហិកតារ ដែលពួកគាត់អះអាងថា ជាកម្មសិទ្ធិរបស់ពលរដ្ឋជាជនជាតិដើមភាគតិច ចំនួន ២៥០គ្រួសារ។ ក្រុមហ៊ុន ឡាន ហ្វេង គឺជាក្រុមហ៊ុនបុត្រសម្ព័ន្ធមួយក្នុងចំណោមក្រុមហ៊ុនចំនួន៤ ផ្សេងទៀតរបស់ក្រុមហ៊ុនមេឈ្មោះ ហេង ហ្វូ (Heng Fu) ដែលទទួលសិទ្ធិវិនិយោគពីរដ្ឋាភិបាលលើផ្ទៃដី ៤២.០០០ហិកតារ តាំងពីឆ្នាំ២០១១ សម្រាប់វិនិយោគដាំអំពៅ និងកៅស៊ូ។ ពលរដ្ឋចោទថា ក្រុមហ៊ុនចិនមួយនេះបានរំលោភយកដីធ្លីពួកដោយមិនមានការផ្ដល់សំណងមួយសមរម្យនោះទេ ធ្វើឱ្យពលរដ្ឋកាន់តែជួបការលំបាក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។