ប្រជាពលរដ្ឋរាប់រយគ្រួសារ នៅក្រុងប៉ោយប៉េត ស្នើសុំអាជ្ញាធរផ្ដល់ដីដែលពួកគាត់បានកាប់ឆ្ការតាមព្រំដែនកម្ពុជា-ថៃ ជាកម្មសិទ្ធិផ្ទាល់ខ្លួន
2022.12.25
ច្រកព្រំដែនអន្តរជាតិប៉ោយប៉ែត នៃប្រទេសកម្ពុជា ថៃ។
ប្រជាពលរដ្ឋជាង៧រយ(៧០០)គ្រួសារ នៅសង្កាត់ប៉ោយប៉ែត ក្រុងប៉ោយប៉ែត ស្នើសុំអាជ្ញាធរផ្ដល់ដីដែលពួកគាត់បានកាប់ឆ្ការក្នុងពេលថ្មីៗនេះ នៅតំបន់សរវាងព្រំដែនកម្ពុជា-ថៃ ឱ្យជាកម្មសិទ្ធិរបស់ពួកគាត់។ មន្ត្រីអង្គការសង្គមស៊ីវិល យល់ឃើញថា អាជ្ញាធរ គួរតែផ្ដល់ដីទាំងនេះ ដល់ក្រុមប្រជាពលរដ្ឋធ្វើជាកម្មសិទ្ធិទៅតាមពាក្យសន្យា ព្រោះពួកគេបានចំណាយកម្លាំង និងប្រឈមហានិភ័យក្នុងការកាប់ឆ្ការព្រៃជាប់ព្រំដែននេះ។
ប្រជាពលរដ្ឋជាង៧០០គ្រួសារ នៅភូមិទំនប់ក៥ និងភូមិព្រៃគុក សង្កាត់ប៉ោយប៉ែត ក្រុងប៉ោយប៉ែត ស្នើសុំអាជ្ញាធរផ្ដល់ដីដែលពួកគេទើបតែបានកាប់ឆ្ការនៅតំបន់សជាប់ព្រំប្រទល់កម្ពុជា-ថៃ ធ្វើជាកម្មសិទ្ធិផ្ទាល់ខ្លួន។
ប្រជាពលរដ្ឋរស់នៅភូមិទំនប់ក៥ ម្នាក់គឺ លោក ឈួង ធា ប្រាប់វិទ្យុអាស៊ីសេរីថា ប្រជាពលរដ្ឋរាប់រយគ្រួសារបានចាប់ផ្ដើមកាប់ឆ្ការព្រៃនៅតំបន់ស ជាប់ព្រំប្រទល់ជាមួយនឹងប្រទេសថៃនៅថ្ងៃទី១៩ ខែធ្នូ បន្ទាប់ពីមានមន្ត្រីយោធាមកពីអង្គភាព៩១១ ប្រាប់ប្រជាពលរដ្ឋឱ្យទៅកាប់ឆ្ការដីព្រៃនៅតំបន់នោះ ធ្វើជាកម្មសិទ្ធិផ្ទាល់ខ្លួន។ លោកបន្ថែមថា ប្រជាពលរដ្ឋថៃ ខាងខេត្តស្រះកែវ ក៏ត្រូវបានអាជ្ញាធរថៃឱ្យកាប់ឆ្ការព្រៃតំបន់សធ្វើជាកម្មសិទ្ធិដែរ ហើយខាងអាជ្ញាធរកម្ពុជាបានចុះទៅឃាត់ ប៉ុន្តែពួកគេនៅតែបន្តកាប់ឆ្ការ ដូចនេះ អាជ្ញាធរកម្ពុជាក៏បានប្រាប់ប្រជាពលរដ្ឋឲ្យទៅកាប់ឆ្ការព្រៃនៅតំបន់នោះដែរ ប៉ុន្តែនៅពេលដែលបានកាប់ឆ្ការព្រៃហើយ បែរជាមន្ត្រីយោធាទាំងនោះដកបង្គោលព្រំរបស់ប្រជាពលរដ្ឋចោលទាំងអស់ និងហាមប្រជាពលរដ្ឋមិនឱ្យចូលទៅដីដែលបានកាប់ឆ្ការ ហើយប្រាប់ថាដីទាំងនោះគឺជាកម្មសិទ្ធិរបស់មន្ត្រីធំៗទៅវិញ៖
«សូមឱ្យគាត់ជួយគិតគូរប្រជាជនយើង ខ្មែរដែលគាត់អត់ដីនៅតាមច្រកមាត់អូ មានតែខ្ទម អត់មានដីពិតប្រាកដដូចជាអាជ្ញាធរភូមិ ធ្វើឱ្យស្នាក់នៅបណ្ដោះអាសន្នសិនអញ្ចឹង។ ជួយមើលប្រជាពលរដ្ឋយើងផង ព្រោះអត់មានដី ពលរដ្ឋរស់នៅតំបន់យើងហ្នឹងរស់បានតែទៅធ្វើការនៅថៃ»។
លោក ឈួង ធា បន្ថែមថា ប្រជាពលរដ្ឋបានកាប់ឆ្ការព្រៃ តាមតំបន់ព្រំប្រទល់ថៃ ជាង២ពាន់ម៉ែត្រ ចាប់ពីចំណុចវត្តពុទ្ធិភូមិជាយដែន រហូតដល់ផ្លូវប៉ុស្តិ៍ព្រៃគុក ។ លោកថា ដោយសារគ្រួសាររបស់លោកមិនមានដីសម្រាប់សាងសង់លំនៅឋាន លោកក៏បានប្រថុយជីវិតកាប់ឆ្ការដីព្រៃនៅតំបន់នោះ ដែលមានគ្រាប់មីនបានទំហំជាង១០ម៉ែត្រ គុណនឹង៦០ម៉ែត្រផងដែរ។
ប្រជាពលរដ្ឋរស់នៅភូមិទំនប់ក៥ ម្នាក់ទៀតប្រាប់វិទ្យុអាស៊ីសេរី ដោយសុំមិនឱ្យបញ្ចេញឈ្មោះថា មន្ត្រីយោធាមកពីកង៩១១ ដែលមានឈ្មោះហៅក្រៅថា ផៃ ចិន និងវណ្ណា បានដើរប្រាប់ប្រជាពលរដ្ឋថា ថ្នាក់លើអនុញ្ញាតឱ្យប្រជាពលរដ្ឋកាប់ឆ្ការដីព្រៃនៅតំបន់ស ដោយគ្រួសារនីមួយៗមានសិទ្ធិកាន់កាប់ដីធ្លីតាមទំហំដែលខ្លួនកាប់ឆ្ការបាន។ លោកបន្ថែមថា គ្រួសាររបស់លោកបានឈប់សម្រាកពីការងារ ដើម្បីទៅកាប់ឆ្ការដីព្រៃទាំងប្រថុយជីវិត ប៉ុន្តែក្រោយពេលកាប់រួចរាល់បែរជាមន្ត្រីយោធា ប្រាប់ថាដីទាំងនេះជារបស់មន្ត្រីថ្នាក់លើទៅវិញ។
វិទ្យុអាស៊ីសេរីនៅពុំទាន់អាចទាក់ទង មេបញ្ជាការកង៩១១ ប្រចាំក្រុងប៉ោយប៉ែត លោក សូ ចាន់រី ដើម្បីបកស្រាយជុំវិញរឿងនេះទេ នៅថ្ងៃទី២៤ ខែធ្នូ ដោយទូរស័ព្ទចូលតែពុំមានអ្នកទទួល។
ជុំវិញរឿងនេះ អ្នកនាំពាក្យសមាគមការពារសិទ្ធិមនុស្ស លោក ស៊ឹង សែនករុណា យល់ឃើញថា កន្លងមកមន្ត្រីដែលមានតួនាទីធំៗ តែងប្រើប្រាស់ប្រជាពលរដ្ឋកាប់ឆ្ការដីព្រៃដែលជាទ្រព្យសម្បត្តិរបស់រដ្ឋ ហើយបន្ទាប់មកក៏យកដីទាំងនោះធ្វើជាកម្មសិទ្ធិផ្ទាល់ខ្លួន។ លោកយល់ឃើញថា អាជ្ញាធរគួរផ្ដល់ដីដែលប្រជាពលរដ្ឋបានកាប់ឆ្ការទាំងនោះ ដោយផ្ដល់ជាប្លង់កម្មសិទ្ធិទៅដល់ពួកគាត់ ជាជាងផ្ដល់ទៅឱ្យមន្ត្រីដែលមានតួនាទីធំៗ ព្រោះក្រុមប្រជាពលរដ្ឋទាំងនោះភាគច្រើនមានជីវភាពក្រីក្រ ហើយបានចំណាយកម្លាំង ប្រថុយនឹងគ្រោះថ្នាក់ដល់ជីវិតដើម្បីកាប់ឆ្ការដីព្រៃក្នុងតំបន់សទាំងនោះ៖
«ប្រជាពលរដ្ឋលោកអត់ដី លោកប្រថុយប្រថានជីវិតទៅកាប់ឆ្ការហ្នឹង សុទ្ធតែដីដែលមានមីនមានអីផង វាគ្រោះថ្នាក់ដល់អាយុជីវិតណាស់ ហេតុអីបានជាមិនពិនិត្យមើលប្រគល់ទៅឱ្យប្រជាពលរដ្ឋ បែរជាទៅឱ្យអ្នកដែលមានអំណាច មានតួនាទីទៅវិញ។ អញ្ចឹងបើសិនជារកឃើញ ការផ្ដល់ដីដោយរបៀបនេះ គួរតែមានការពិនិត្យឱ្យបានត្រឹមត្រូវឡើងវិញ គួរតែផ្ដល់លទ្ធភាពឱ្យប្រជាពលរដ្ឋ ជាជាងឱ្យអ្នកមានឥទ្ធិពល មានអំណាច មានតួនាទីអីទាំងអស់ហ្នឹង ព្រោះពួកគាត់សុទ្ធតែមានសិទ្ធិរស់រានមានជីវិតបានហើយ ប្រជាពលរដ្ឋមានភាពខ្វះខាតអីទាំងអស់ហ្នឹង គួរតែពិនិត្យផ្ដល់ដីឱ្យពួកគាត់»។
ជុំវិញបញ្ហានេះ អ្នកនាំពាក្យខេត្តបន្ទាយមានជ័យ លោក សេក សុខុម ប្រាប់វិទ្យុអាស៊ីសេរីថា អាជ្ញាធរខេត្តមិនទាន់បានដឹងពីបញ្ហាប្រជាពលរដ្ឋកាប់ឆ្ការដីព្រៃនៅតំបន់សនោះនៅឡើយទេ។
កន្លងមក អង្គការសង្គមស៊ីវិលជាតិ និងអន្តរជាតិ រកឃើញថា អាជ្ញាធរដែលមានអំណាច ប្រើប្រាស់ប្រជាពលរដ្ឋដើម្បីឱ្យទៅកាប់ឆ្ការទន្ទ្រានយកដីព្រៃ ឬឈរឈ្មោះដើម្បីទទួលបានដីសម្បទាន ប៉ុន្តែបន្ទាប់ពីទទួលបានដីទាំងនោះពីរដ្ឋាភិបាលហើយ ក្រុមអាជ្ញាធរបែរជាធ្វើទុក្ខបុកម្នេញ និងបណ្ដេញប្រជាពលរដ្ឋស្លូតត្រង់ចេញពីដីទាំងនោះទៅវិញ។ ក្រុមប្រជាពលរដ្ឋ ដែលខិតខំកាប់ឆ្ការព្រៃទាំងនោះ អះអាងថា ពួកគាត់ នឹងនាំគ្នាតវ៉ា ប្រសិនបើអាជ្ញាធរ មិនព្រមប្រគល់ដីជូនពួកគាត់តាមការសន្យានោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- លោក ឃួង ស្រេង ពីមន្ត្រីខណ្ឌតូចតាចទៅជាអភិបាលក្រុងភ្នំពេញដោយសារស្នាដៃបម្រើគ្រួសារត្រកូលហ៊ុន
- លោក ហេង សិទ្ធី ត្រូវបានចាប់ខ្លួនដល់រុស្សីក្រោយស្នើឱ្យលោក ហ៊ុន ម៉ាណែត ចុះចេញពីតំណែង
- លោក ហ៊ុន ម៉ានី ស្នើឲ្យនាយករដ្ឋមន្ត្រី លោក ហ៊ុន ម៉ាណែត ដកប្រធានមន្ទីរបរិស្ថានចំនួន៤ ខេត្ត នៅជុំវិញតំបន់ព្រៃឡង់
- មន្ត្រីបក្សកាន់អំណាចព្យាយាមលាងជម្រះលោក ហ៊ុន សែន ពាក់ព័ន្ធឃាតកម្មលើលោក លិម គិមយ៉ា
- លោក សម រង្ស៊ី អំពាវនាវឱ្យកងកម្លាំងប្រដាប់អាវុធ និងអ្នកនយោបាយរួមគ្នាផ្លាស់ប្ដូររបបត្រកូល ហ៊ុន