ជនជាតិ​ដើម​ភាគតិច​ខេត្ត​មណ្ឌលគិរី ជិត ២​រយ​នាក់​ផ្ដិត​មេដៃ​ប្រឆាំង​ការ​លក់​ដី​ព្រៃ​អភិរក្ស

ដោយ សេក បណ្ឌិត
2019-07-24
អ៊ីម៉ែល
មតិ
Share
បោះពុម្ព
ទេសភាព​តំបន់​ដែន​ជម្រក​សត្វ​ព្រៃ​កែវសីមា។
ទេសភាព​តំបន់​ដែន​ជម្រក​សត្វ​ព្រៃ​កែវសីមា។
Photo: RFA

ជនជាតិ​ដើម​ភាគតិច​ព្នង ជិត ២​រយ​គ្រួសារ មក​ពី​ឃុំ​ចំនួន​២ ក្នុងស្រុក​កែវសីមា និង​ស្រុក​អូររាំង ខេត្ត​មណ្ឌលគិរី បាន​ផ្តិត​មេដៃ​ប្រកាស​ជំហរ ប្រឆាំង​ការ​លក់​ដី​ព្រៃ​អភិរក្ស​ជាច្រើន​ពាន់​ហិកតារ ទៅ​​ឱ្យ​ក្រុមហ៊ុន​ចិន ពី​សំណាក់​បុគ្គល​មាន​ឥទ្ធិពល។ សហគមន៍​ថា មន្ត្រី​យោធា​ម្នាក់​បាន​បង្ខំ​ឱ្យ​ពលរដ្ឋ​ផ្តិត​មេដៃ​គាំទ្រ ការ​លក់​ដី​ព្រៃ​អភិរក្ស​របស់​ពួកគេ ក៏ប៉ុន្តែ​ពលរដ្ឋ​បដិសេធ។

ក្រុម​សហគមន៍​ជនជាតិ​ដើម​ភាគតិច​ព្នង (ពូនង) រាប់រយ​គ្រួសារ រស់នៅ​ភូមិ​រកា​ថ្មី ឃុំ​ចុង​ផ្លាស់​ស្រុក​កែវ សីមា និង​ភូមិ​ពូទុង ឃុំ​សែន​មនោរម្យ ស្រុក​អូររាំង បង្ហាញ​ក្តី​កង្វល់​ជាច្រើន​ទាក់ទង​នឹង​ការ​ឃុបឃិត​លក់​ដី​ព្រៃ​អភិរក្ស ឋិត​ក្នុង​ដែន​ជម្រក​សត្វព្រៃ​កែវសីមា ទ្រង់ទ្រាយ​ធំ ពី​សំណាក់​មន្ត្រី​យោធា​ស័ក្ដិ ៣​ម្នាក់ ឈ្មោះ ស្រេន ផ្លូន។

សហគមន៍​រក​ឃើញ​ថា មន្ត្រី​យោធា​រូប​នេះ បាន​ទទួល​ប្រាក់​កក់​ជាច្រើន​ពាន់​ដុល្លារ​ពី​ជនជាតិ​ចិន ជា​​ថ្នូរ​​ទិញ​​ដី​​ព្រៃ​​អភិរក្ស ធ្វើ​អាជីវកម្ម នៅ​តំបន់​ជម្រក​សត្វ​ដំរី​រស់នៅ និង​ព្រៃ​ជំនឿ​ដែល​ជនជាតិ​ដើម​​​ភាគតិច​ថែរក្សា​បែប​ប្រពៃណី។

តំណាង​ជនជាតិ​ដើម​ភាគតិច​រស់នៅ​ភូមិ​រកា ឃុំ​ចុង​ផ្លាស់​លោក សាំង សារី ឱ្យ​ដឹង​នៅ​ថ្ងៃទី២៤ កក្កដា​ថា មូលហេតុ​ដែល​ពួកគេ​បង្ខំចិត្ត​ផ្តិត​មេដៃ ដាក់​ញត្តិ​ដោយសារ​អ្នកភូមិ​ភ័យ​ព្រួយ​ពី​ជោគ​វាសនា ព្រៃ​អភិរក្ស​ជាច្រើន​ពាន់​ហិកតារ ឋិត​ក្នុង​ដែន​ជម្រក​សត្វ​ព្រែ​កែវ សីមា ត្រូវ​បាត់បង់ និង​គ្រប់គ្រង​ដោយ​ក្រុមហ៊ុន​ចិន​។ អ្នកភូមិ​ថា នៅ​រយៈពេល​ប៉ុន្មាន​ខែ​ចុង​ក្រោយនេះ មាន​ឈ្មួញ​ជនជាតិ​ចិន​ជាច្រើន​នាក់ កំពុង​រក​មធ្យោបាយ​ឃុបឃិត​ជាមួយ​អាជ្ញាធរ និង​អ្នក​មាន​អំណាច ច្បាម​យក​ដី​ព្រៃ​អាស្រ័យ​ផល និង​ព្រៃ​អភិរក្ស ធ្វើ​អាជីវកម្ម​រ៉ែ និង​កាប់​ឈើ​៖ «លក់​ទាំងអស់​ដី ១០​គីឡូ បួន​ជ្រុង​លក់​ទាំងអស់​ដី​ហ្នឹង តែ​គេ​ឱ្យ​លុយ​ពាក់​កណ្ដាល​នៅសល់ ពាក្យ​កណ្ដាល​ទៀត​។ ដី​ហ្នឹង​គេ​ឱ្យ​មក​ចែកចាយ​គ្នា​អស់ហើយ ដី​ហ្នឹង​មិន​ដឹង​ចែក​ទៅ​ខាង​ណាខ្លះ​ទេ​? អ្នក​មាន​អំណាច​លក់​តាម​ចិត្ត​អ៊ីចឹង ពលរដ្ឋ​មាន​កន្លែង​ណា​រស់នៅ​។ អនុផល​ព្រៃឈើ​របស់​ជនជាតិ​ដើម​ភាគតិច មានតែ​ប៉ុណ្ណឹង​ហើយ ដែល​រក​តិចៗ​ហ្នឹង​ចិញ្ចឹមជីវិត»

បុរស​ដដែល​បន្ថែម​ថា ព្រៃ​អភិរក្ស​ដែល​កំពុង​ប្រឈម ការ​បំពារបំពាន ឋិត​នៅ​ចំណុច​ភ្នំ​ចុងរាំង ជាប់​ព្រំប្រទល់​ស្រុក​កែវសីមា និង​ស្រុក​អូររាំង ដែល​ជា​កន្លែង​សត្វ​ដំរី​ព្រៃ​រស់នៅ និង​ចិញ្ចឹមជីវិត​។ លោក​ថា បច្ចុប្បន្ន​អាជ្ញាធរ​បាន​ឈូស​ឆាយ​ផ្លូវ​ឆ្លងកាត់​តំបន់​នោះ​មួយ​ខ្សែ ប៉ះចំ​រណ្ដៅ​ជ័រទឹក​របស់​អ្នកស្រុក បាត់បង់​អស់​រាប់​រយ​ដើម។ ដោយឡែក​ក្រុមហ៊ុន​ចិន​មួយ​ចំនួន បាន​បើក​ការដ្ឋាន​នៅ​ក្បែរ​នោះ ទំនង​ត្រៀម​ធ្វើ​អាជីវកម្ម​រ៉ែ និង​ព្រៃឈើ​៖ «គាត់​ឱ្យ​ពលរដ្ឋ​ផ្ដិត​មេដៃ​ឱ្យ​គាត់ តែ​ពលរដ្ឋ​អត់​ផ្ដិត​ទេ​។ ដល់ពេល​គាត់​លក់​អស់​ទៅ គ្នា​បាន​អី​ទៀត​? ហើយ​យក​ចិន​មក​ដាក់​ព្រោងព្រាត​គ្រប់កន្លែង​អស់ហើយ ធ្វើ​ម៉េច​? តំបន់​ហ្នឹង​ចិន ធ្វើ​រ៉ែ​មាស​អស់ហើយ ឥឡូវ​ហ្នឹង​គ្រប​ច្រក​អស់ហើយ ច្រក​ណា​ក៏​មាន​។ ដល់​អ៊ីចឹង​ពលរដ្ឋ​ភ័យភិត ថ្ងៃមុន​ខាង​ក្រុមហ៊ុន ចង់​ជីក​មា​សយ​សម​ដីស្រែ​តាម​ភូមិ​។ ពួក​ខ្ញុំ​ថា អត់​ឱ្យ​មក​ទេ តែ​ជីក​ដី​តាម​ស្រែ​ពួក​ខ្ញុំ​មាន​ដី​ណា​ធ្វើស្រែ»

កាលពី​អំឡុង​ខែ​ឧសភា និង​ខែ​មិថុនា ឆ្នាំ​២០១៩ ពលរដ្ឋ​ជាច្រើន​គ្រួសារ​បាន​ដាក់​ពាក្យ​ប្តឹង​សុំ​ឱ្យ​អាជ្ញាធរ​ខេត្ត ទប់ស្កាត់​សកម្មភាព​កាប់​ដើម​ច្បោះ​របស់​អ្នកស្រុក អស់​រាប់​រយ​ដើម ពី​សំណាក់​បុគ្គល​មានអំណាច​មួយ​ចំនួន និង​ស្នើ​ឱ្យ​អាជ្ញាធរ​ពាក់ព័ន្ធ អភិរក្ស​ព្រៃឈើ​ដែល​សល់​ចុងក្រោយ​ឱ្យ​គង់វង្ស ក៏ប៉ុន្តែ​កម្មវត្ថុ​នេះ មិន​ត្រូវ​បាន​អាជ្ញាធរ​ចេញមុខ​ដោះស្រាយ​ទេ។

អាស៊ីសេរី​មិនទាន់​អាច​ទាក់ទង មន្ត្រី​យោធា​ស័ក្តិ ៣ លោក ស្រេន ផ្លូន ដើម្បី​សុំ​ការ​បំភ្លឺ​ជុំវិញ​ការចោទប្រកាន់​នេះ​បាន​ថា​យ៉ាងណា​នៅឡើយ​ទេ នៅ​ថ្ងៃទី២៤ កក្កដា។

រីឯ​អ្នកនាំពាក្យ​ក្រសួងបរិស្ថាន លោក នេត្រ ភត្ត្រា និង​អ្នកនាំពាក្យ​សាលាខេត្ត​មណ្ឌលគិរី លោក សុក សេ​រ៉ា ក៏​មិន​អាច​ទាក់ទង​បាន​ដែរ​នៅ​ថ្ងៃ​ដដែល​នេះ។

មេឃុំ​ចុងផ្លាស់ លោក លាដ លឹមគុណ ឱ្យ​ដឹង​ថា អាជ្ញាធរ​ឃុំ​មិន​ទាន់​ទទួល​ដំណឹង ការទិញ​លក់​ដី​ព្រៃ​អភិរក្ស ជាច្រើន​ពាន់​ហិកតារ​នៅឡើយ​ទេ​។ លោក​ថា អាជ្ញាធរ​ឃុំ​ក៏​ពុំ​ទាន់​ទទួល​បាន​ញត្តិ​ជា​ផ្លូវការ​ណាមួយ ពី​ក្រុម​ពលរដ្ឋ​នៅឡើយ​ដែរ​មក​ទល់​ពេល​នេះ​៖ «ខ្ញុំ​អត់​បាន​ដឹង​សោះ ការ​លក់​ដី​ព្រៃ​ហ្នឹង អត់​ដឹង​ដឹង​សោះ»

សមាជិក​សហគមន៍​ជនជាតិ​ដើម​ភាគតិច​ព្នង ខេត្ត​មណ្ឌលគិរី លោក ក្រើង តុលា ថា ថ្លែង​ថា កន្លងទៅ​ជនជាតិ​ដើម​ភាគតិច​រាប់​រយ​គ្រួសារ ធ្លាប់​បាន​ប្ដឹង​សុំ​ឱ្យ​អាជ្ញាធរ​ឃុំ ស្រុក និង​ខេត្ត​ជួយ​ដោះស្រាយ​ករណី​នេះ​ដែរ តែ​គ្មាន​ដំណោះស្រាយ​។ លោក​ថា ការ​ផ្តិត​មេដៃ​ដាក់​ញត្តិ​នេះ ជា​ជម្រើស​ចុងក្រោយ​របស់​ពួកគេ ខណៈ​ដែល​អ្នកភូមិ​កំពុង​ភ័យខ្លាច​បាត់បង់ ព្រៃ​អភិរក្ស និង​ព្រៃ​ជំនឿ របស់​សហគមន៍​៖ «ចំណុច​ហ្នឹង​ចំ​ប្រភព​ទឹក​រស់នៅ​របស់​សត្វ​ដំរី​ព្រៃ​តែម្ដង​។ គាត់​ថា គាត់​យក ១០​គីឡូម៉ែត្រ ៤​ជ្រុង​ហើយ លក់​ឱ្យ​ក្រុមហ៊ុន​ចិន មិន​ដឹង​ធ្វើ​អី​យើង​អត់​ដឹង​? តាម​ការ​ប៉ាន់ស្មាន​តំបន់​ហ្នឹង តំបន់​ហ្នឹង​ជា​តំបន់​មាស​មួយ​ដែរ តាម​ខ្ញុំ​ឮ ពី​អាជ្ញាធរ​ខេត្ត​ធ្លាប់​លើកឡើង​កាលពីមុន»

មន្ត្រី​សម្របសម្រួល​សមាគម​ អាដហុក (Adhoc) ខេត្ត​មណ្ឌលគិរី លោក អ៊ាង ម៉េងលី ពន្យល់​ថា ពលរដ្ឋ​មាន​សិទ្ធិ​ថែរក្សា ទ្រព្យសម្បត្តិ​របស់​រដ្ឋ ស្របតាម​រដ្ឋធម្មនុញ្ញ ហើយ​ការ​តវ៉ា និង​សំណូមពរ​​របស់​ពួកគេ​អាជ្ញាធរ​រដ្ឋ និង​តុលាការ មាន​កាតព្វកិច្ច​ដោះស្រាយ​ដោយ​ត្រឹមត្រូវ និង​យុត្តិធម៌។ លោក​ថា ទ្រព្យសម្បត្តិ​របស់​រដ្ឋ​ពុំ​អាច​ទិញ​លក់ដូរ ទៅ​ឱ្យ​បុគ្គល​ណាមួយ​បានទេ ប្រសិន​បើ​​ពុំ​ទាន់​អនុប្បយោគ៖ «ខ្ញុំ​យល់ថា ការ​លក់ដូរ​ដីធ្លី ប្រព្រឹត្ត​ដោយ​អាជ្ញាធរ​ពាក់ព័ន្ធ​ទាំងអស់​ហ្នឹងហើយ គឺជា​អំពើ​ល្មើស​ខុសច្បាប់ ព្រោះថា​ដី​របស់​រដ្ឋ អាជ្ញាធរ​ពុំ​មាន​សិទ្ធិ​លក់ដូរ​អ្វី​នោះ​ទេ​។ ហ្នឹង​ហើយ​​គឺជា​ករណី​មួយ ដែល​យើង​គិត​ថា នៅ​ខេត្ត​មណ្ឌលគិរី​វា ជា​រូបភាព​មួយ​ដែល​អ្នក​មាន​អំណាច និង​មានបុណ្យ​ស័ក្ដិ​យក​ពលរដ្ឋ​ជា​ខែល»

សហគមន៍​ជនជាតិ​ដើម​ភាគតិច​អំពាវនាវ​ឱ្យ​អាជ្ញាធរ​ជាតិ និង​អាជ្ញាធរ​ខេត្ត ដោះស្រាយ​ញត្តិ​របស់​សហគមន៍​ដោយ​យុត្តិធម៌ ដើម្បី​សង្គ្រោះ​ធនធានធម្មជាតិ និង​ព្រៃឈើ ដែល​បន្សល់​ចុងក្រោយ​។ ពួកគេ​យល់ថា តំបន់​ព្រៃស្រោង​ជា​ជម្រក​សត្វព្រៃ​រស់នៅ លាត​សន្ធឹង​លើ​ផ្ទៃដី​ជាង ១​ម៉ឺន​ហិកតារ ពុំគួរ​អនុញ្ញាត​ឱ្យ​ក្រុមហ៊ុន​ចិន វិនិយោគ​នៅ​ក្បែរ​នោះ​ទេ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល