ក្រសួងយុត្តិធម៌បានទទួលពាក្យបណ្ដឹងរបស់អតីតប្រធានអង្គការមូលនិធិទ្រទ្រង់អរិយធម៌ខ្មែរ លោក មឿង សុន នៅថ្ងៃទី៣០ តុលា ដែលលោកបានស្នើឱ្យក្រសួងជួយរកយុត្តិធម៌ជូនលោក រឿងឈ្មួញដីអ្នកស្រី ទួន ចន្ទ្រា រំលោភយកដីកម្មសិទ្ធិរបស់លោក និងប្ដឹងលោកទៅតុលាការថែមទៀត។
លិខិតរបស់មេធាវីការពារក្ដីឱ្យលោក មឿង សុន គឺលោក សេក សោភ័ណ បានដាក់ស្នើសុំអន្តរាគមន៍ពីរដ្ឋមន្ត្រីក្រសួងយុត្តិធម៌ លោក កើត រិទ្ធ ទៅអយ្យការអមសាលាដំបូងខេត្តព្រះវិហារ ដែលផ្អឹបទុកសំណុំរឿងរបស់លោក ពុំចាត់ការជាង ៤ខែមកហើយ។ លិខិតដដែលនេះបានចាត់ទុកករណីពន្យារពេលរបស់តុលាការខេត្តព្រះវិហារថា ជាការអូសបន្លាយពេលវេលាយូរហួសប្រក្រតី ដែលផ្ដល់ឱកាសឱ្យសកម្មភាពល្មើសបន្តកើតឡើងរហូតដល់សព្វថ្ងៃនេះ។ លោក សេក សោភ័ណ បន្តថា លោកបានដាក់ពាក្យបណ្ដឹងផ្ទាល់ទៅតំណាងអយ្យការ សំអាងតាមអង្គហេតុ បទល្មើសជាក់ស្ដែង ក៏ប៉ុន្តែ មិនទាន់មានចំណាត់ការតាមនីតិវិធីថា តម្កល់ ឬបញ្ជូនរឿងទៅស៊ើបសួរ ឬជម្រះផ្ទាល់តាមនីតិវិធីទេ។ លោកសង្កត់ធ្ងន់ថា ភាពមិនប្រក្រតីនេះបានកើតឡើង ទោះលោកបានដាក់ពាក្យសុំដល់តំណាងអយ្យការ សុំធ្វើការចោទប្រកាន់រួចហើយក៏ដោយ ក៏ខាងអយ្យការមិនមានចំណាត់ការតាមនីតិវិធីឡើយ។
ទោះជាយ៉ាងណា ថ្មីៗនេះ ឈ្មួញដី អ្នកស្រី ទួន ចន្ទ្រា ត្រូវបានអាជ្ញាធរចាប់ខ្លួនពាក់ព័ន្ធនឹងរឿងទំនាស់ដីធ្លីដាច់ដោយឡែកផ្សេងទៀត។
លោក មឿង សុន ឱ្យវិទ្យុអាស៊ីសេរីដឹងនៅថ្ងៃទី៣០ តុលា ពីប្រទេសបារាំងថា លោកទទួលបានដំណឹងថា ឈ្មួញដីអ្នកស្រី ទួន ចន្ទ្រា ត្រូវបានអាជ្ញាធរព្រះវិហារចាប់ខ្លួនបញ្ជូនទៅតុលាការ ករណីឈ្មួញដីរូបនេះ នាំបក្ខពួកឈូសឆាយបំផ្លាញផ្ទះពលរដ្ឋ ៩ខ្នងនៅស្រុកគូលែន ខេត្តព្រះវិហារ កាលពីថ្ងៃទី១៦ តុលា ។ លោក មឿង សុន បន្តថា ករណីនេះវាប្រហាក់ប្រហែលនឹងករណីរបស់លោក ដែលឈ្មួញដីពុំខ្លាចច្បាប់រូបនេះបានបំពានលើរូបលោក។ លោក មឿង សុន បញ្ជាក់ថា ចំពោះសំណុំរឿងរបស់លោក បើទោះបីសាលាឧទ្ធរណ៍ត្បូងឃ្មុំ បានចេញសាលក្រមបង្គាប់ឱ្យអ្នក ស្រី ទួន ចន្ទ្រា ចេញពីដីជាង១៥ហិកតាររបស់លោកដែលជាកម្មសិទ្ធិរបស់លោកយ៉ាងណាក្ដី ក៏អ្នកស្រី ទួន ចន្ទ្រា ពុំធ្វើតាមដែរ។
លោក មឿង សុន៖ «សូមឯកឧត្តមរដ្ឋមន្ត្រីជួយអន្តរាគមន៍ ២ចំណុច ទី១ សុំឱ្យពិនិត្យមើលតុលាការសាលាដំបូងខេត្តព្រះវិហារដែលពុំបានយកចិត្តទុកដាក់លើបណ្ដឹងព្រហ្មទណ្ឌដែលខ្ញុំ(មឿង សុន)បានប្ដឹងទៅលើក្រុមអ្នកស្រី ទួន ចន្ទ្រា កាន់កាប់ដីខ្ញុំដោយខុសច្បាប់ហ្នឹង។ ហើយទី២ សុំឱ្យតុលាការសាលាដំបូងព្រះវិហារ ធ្វើយ៉ាងម៉េចពន្លឿនឱ្យអនុវត្តសាលក្រមឱ្យបុគ្គលនឹងចេញពីដីរបស់ខ្ញុំ។ ពីព្រោះជិត១ឆ្នាំហើយ ដែលសាលក្រម(សាលាឧទ្ធរណ៍)ឱ្យអ្នកស្រី ទួន ចន្ទ្រា ចេញពីដី ប៉ុន្តែ គាត់(ទួន ចន្ទ្រា)ពុំគោរព ខ្លាចសាលក្រមតុលាការ(សាលាឧទ្ធរណ៍)ផង»។
លោក មឿង សុន បន្តថា លោកនិងភរិយា បានលក់ដីនៅភូមិស្រយង់ត្បូង ឃុំស្រយង់ ស្រុកគូលែន ខេត្តព្រះវិហារ ទៅឈ្មួញដីឈ្មោះ ទួន ចន្ទ្រា ជាង ១៥ហិកតារក្នុងតម្លៃ ១០ម៉ឺន ៧ពាន់ដុល្លារ កាលពីឆ្នាំ២០២១ ប៉ុន្តែ ឈ្មោះ ទួន ចន្ទ្រា ពុំគោរពកិច្ចសន្យាប្រគល់ប្រាក់គ្រប់ចំនួន ហើយបានចូលទៅកាន់កាប់ដីនោះ និងបំផ្លាញទ្រព្យសម្បត្តិ រួមនឹងដំណាំផ្សេងទៀត រហូតប្ដឹងលោកទៅតុលាការផ្ដន្ទាទោស ក្រោមបទចោទមិនសមទំនង ដើម្បីកាន់កាប់ដីស្របច្បាប់របស់នោះ។ លើសនេះ លោកថា លោកត្រូវបានឈ្មួញដីរូបនោះ ប្ដឹងទៅតុលាការខេត្តព្រះវិហារ ពីបទឆបោក, រំលោភលើសេចក្ដីទុកចិត្ត, ញុះញង់ឱ្យមានការរើសអើង និងបរិហារកេរ្តិ៍ជាសាធារណៈ និងលួចលក់អចលនទ្រព្យមិនមែនជារបស់ខ្លួនទៅវិញ ហើយលោកស្ទើរតែត្រូវបានជាប់គុកច្រវាក់ បើពុំមានការអន្តរាគមន៍ពីមេធាវីរាជរដ្ឋាភិបាល នៅពេលនោះទេ។
វិទ្យុអាស៊ីសេរីពុំអាចទាក់ទងភាគីលោកស្រី ទួន ចន្ទ្រា បាននៅថ្ងៃទី៣០ តុលា នេះ ខណៈដែលលោកអ្នក ទួន ចន្ទ្រា កំពុងស្ថិតក្រោមនីតិវិធីតុលាការខេត្តព្រះវិហារ ក្រោយពីលោកស្រី និងបក្ខពួក ៥នាក់ ត្រូវបានចាប់ខ្លួនពីបទឈូសឆាយ បំផ្លាញផ្ទះពលរដ្ឋ ៩ខ្នង ក្នុងបំណងដណ្ដើមយកដីពលរដ្ឋធ្វើជាកម្មសិទ្ធិ។
អតីតប្រធានអង្គការមូលនិធិទ្រទ្រង់អរិយធម៌ខ្មែរ លោក មឿង សុន ធ្លាប់ចូលរួមលើកស្ទួយវិស័យទេសចរណ៍យ៉ាងសកម្មនៅកម្ពុជា ពីឆ្នាំ២០០៨ រហូត ២០១៥។ លោកក៏ធ្លាប់ជាអតីតសមាជិកសភាពាណិជ្ជកម្មរាជធានីភ្នំពេញ ក្នុងទសវត្សរ៍៩០ផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។