សហគមន៍ព្រលាន និងសហគមន៍ដែលមានជម្លោះដីធ្លីផ្សេងទៀតក្នុងខេត្តកោះកុងជាង ១០០នាក់ ធ្វើដំណើរមកលើកទឹកចិត្តតំណាងរបស់ពួកគាត់ ៧នាក់ ដែលចូលសវនាការ នៅថ្ងៃទី២៨ ខែមិថុនា និងទាមទារតុលាការឱ្យទម្លាក់រាល់ការចោទ ដែលគ្រាន់តែទាមទារដីរបស់ពួកគាត់។ នៅមុខតុលាការខេត្តកោះកុងប្រជាពលរដ្ឋ រួមមាន ស្ត្រីមានផ្ទៃពោះ ស្ត្រីពរកូនជាដើម នាំដេករង់ចាំយុត្តិធម៌ខាងមុខតុលាការ។
តំណាងពលរដ្ឋ ដែលមានជម្លោះដីធ្លីស្ថិតក្នុងឃុំកណ្ដោល ជាមួយឧកញ៉ា លី យ៉ុងផាត់ ស្នើដល់តុលាការខេត្តកោះកុងទម្លាក់បទចោទប្រកាន់លើពួកគាត់ទាំង ៧នាក់ ព្រោះពួកគាត់ និងពលរដ្ឋមិនបានប្រព្រឹត្តខុសច្បាប់ដូចការចោទប្រកាន់របស់ឧកញ៉ា និងព្រះរាជអាជ្ញានោះទេ។
តំណាងពលរដ្ឋ អ្នកស្រី ភាព តេង លើកឡើងថា សាលាដំបូងខេត្តកោះកុងបានបើកសវនាការតាមការចោទប្រកាន់របស់ព្រះរាជអាជ្ញា លោក ឃុន ភឿន ទៅលើតំណាងពលរដ្ឋដែលមានជម្លោះដីធ្លីទាំង ៧នាក់ រួមមាន ឈ្មោះ ទន់ ឡាយ ឈ្មោះ ភាព តេង ឈ្មោះ ឆោម រើន ឈ្មោះ ឃង់ រុច ឈ្មោះ ទូច និងមនុស្សមួយចំនួនទៀត ក្រោមបទចោទ «អំពើញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម និង អំពើប៉ះពាល់កម្មសិទ្ធិនៃទ្រព្យសម្បត្តិឯកជនរបស់រដ្ឋ» ដែលបានប្រព្រឹត្តកាលពីចុងខែមករា ឆ្នាំ២០២២ នៅភូមិសុវណ្ណបៃតង ឃុំកណ្ដោល ស្រុកបុទុមសាគរ ខេត្តកោះកុង។
តំណាងពលរដ្ឋ អ្នកស្រី ភាព តេង លើកឡើងថា ក្នុងសវនាការទាំងព្រះរាជអាជ្ញា និងចៅក្រម ព្យាយាមលើកឡើងដើម្បីដាក់បន្ទុកទៅលើពលរដ្ឋដែលជាជនរងគ្រោះឱ្យជាប់ពន្ធនាគារ។ អ្នកស្រី ភាព តេង ថា អ្នកស្រី និងពលរដ្ឋផ្សេងទៀតមិនបានប្រព្រឹត្តិខុសដូចការចោទប្រកាន់ទេ និងទទូចឱ្យតុលាការស្វែងរកយុត្តិធម៌ដល់ពលរដ្ឋក្រីក្រដែលអ្នកមានអំណាច មានលុយយកដីពួកគាត់។
អ្នកស្រី ភាព តេង៖ «អ្នកដែលបាត់បង់ដីធ្លី អ្នកដែលទាមទារតវ៉ាដីធ្លីមិនអាចឱ្យជាប់គប់ជាប់ច្រវាក់ ឬជាប់ប្រព័ន្ធតុលាការទេ តែជាក់ស្ដែងសព្វថ្ងៃនេះ ខ្ញុំគ្រាន់តែតវ៉ាដីធ្លីរបស់ពួកខ្ញុំសោះ យកប្រព័ន្ធតុលាការមកកៀបសង្កត់ ហើយខ្ញុំខាតពេលវេលា ខ្លះមកអត់លុយអត់កាក់លក់មាន់លក់ទាអស់រលីង ខ្លះចងការធនាគារប្រាក់បំណុលវ័ណ្ឌកទាំងគេទាំងខ្ញុំ»។
វិទ្យុអាស៊ីសេរីមិនទាន់អាចសុំការឆ្លើយតបពីអ្នកនាំពាក្យសាលាដំបូងខេត្តកោះកុង លោក ស៊ូ សុវណ្ណារ៉ា បានទេ នៅថ្ងៃទី២៨ ខែមិថុនា។
ពលរដ្ឋ ២៤៣គ្រួសារ ដែលនៅសហគមន៍ព្រលាន ក្នុងឃុំកណ្ដោល ស្រុកបុទុមសាគរ ត្រូវបានក្រុមហ៊ុនស្ករអំពៅកោះកុង (Koh Kong Sugar) និង Koh Kong Plantation Industry របស់លោកឧកញ៉ា លី យ៉ុងផាត់ បានដាក់គ្រឿងចក្រឈូសឆាយដី និងផលដំណាំរបស់គាត់អស់ជាច្រើនហិកតារ កាលពីឆ្នាំ២០០៦ ហើយអាជ្ញាធរបានគំរាមកំហែងមិនឱ្យពលរដ្ឋចេញតវ៉ា និងបានគំរាមចាប់ខ្លួនពួកគាត់ដាក់ពន្ធនាគារ ខណៈដីនោះ ពួកគាត់បានចូលទៅអាស្រ័យផលតាំងពីឆ្នាំ១៩៩៥។
ដោយគ្មានដីធ្លីសម្រាប់ធ្វើកសិកម្មចិញ្ចឹមជីវិតនោះ គឺនៅឆ្នាំ២០១៨ អ្នកភូមិបាននាំគ្នាតវ៉ាទាមទារយកដីធ្លីមកវិញ ប៉ុន្តែរហូតមកដល់ពេលនេះ ពុំមានដំណោះស្រាយនោះទេ ហើយនៅឆ្នាំ២០២២ អ្នកភូមិបាននាំគ្នាចូលទៅបោះតង់រស់នៅលើទីតាំងដីជម្លោះរៀងៗ ខ្លួន និងត្រូវបានអាជ្ញាធរប្ដឹងតំណាងពលរដ្ឋ ៧នាក់ ទៅតុលាការយ៉ាងអយុត្តិធម៌៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។