សហគមន៍​មាន​ទំនាស់​ដីធ្លី​ជា​មួយ​ក្រុម​ហ៊ុន​ចិន នៅ​ខេត្ត​កោះ​កុង ស្នើសុំ​អាជ្ញាធរ​កាត់​ឆ្វៀល​ដី​ឲ្យ​ពលរដ្ឋ


2019.03.04
បញ្ហាដីធ្លី ខេត្ត​កោះកុង 030419 ៦២២ សហគមន៍​ខេត្ត​កោះ​កុង មាន​ទំនាស់​ដីធ្លី​ជា​មួយ​ក្រុម​ហ៊ុន​ចិន ឈ្មោះ យូញៀន ឌីវេឡុបមិន គ្រុប​(Union Development Group Co.,Ltd) ប្រមូល​ផ្ដុំ​មុខ​សាលាខេត្ត​កោះកុង នៅ​ថ្ងៃ​ទី៤ មីនា ស្នើសុំ​អាជ្ញាធរ​កាត់​ឆ្វៀល​ដី​ឲ្យ​ពួក​គាត់។
រូបថត៖ សហគមន៍​ផ្ដល់​ឲ្យ

ប្រជា​សហគមន៍ ប្រមាណ​ ៤០​នាក់ តំណាង​ឲ្យ​ ៧៧គ្រួសារ រស់នៅ​ស្រុក​គិរី​សាគរ នាំ​គ្នា​ប្រមូល​ផ្ដុំ​មុខ​សាលាខេត្ត​កោះកុង នៅ​ថ្ងៃ​ចន្ទ ទី៤ មីនា តវ៉ា​ទាមទារ​ឲ្យ​អាជ្ញាធរ​ខេត្ត​​ពន្លឿន​ដំណោះស្រាយ​ ដោយ​ចុះ​ឆ្វៀល​ដីធ្លី​ឲ្យ​ពួកគាត់ ​ដែល​មាន​ជម្លោះ​ដីធ្លី​ជាង​ ១០​ឆ្នាំ​មក​ហើយ ​ជាមួយ​ក្រុមហ៊ុន​ចិន​ឈ្មោះ យូញៀន ឌីវេឡុបមិន គ្រុប (Union Development Group Co.,Ltd)។ អាជ្ញាធរ​ប្រាប់​ពលរដ្ឋ​ថា នឹង​ចុះ​ដោះស្រាយ ប្រសិន​បើ​មាន​ចំណាត់​ការ​ពី​ក្រសួង​បរិស្ថាន។

តំណាង​ប្រជាពលរដ្ឋ​ដែល​មាន​ទំនាស់​ដីធ្លី​ក្រុមហ៊ុន​ចិន យូញៀន ឌីវីឡុប​មិន​គ្រុប លោកស្រី សាំង ពុយ ប្រាប់​អាស៊ី​សេរី​ ពួកគាត់ទាំង ​៧៧​គ្រួសារ​ចង់​បាន​ទទួល​បាន​ការ​អភិវឌ្ឍន៍​នៅ​នឹង​កន្លែង មិន​ចង់​​ការដោះដូរ​ដី​ទៅ​រស់​នៅ​ទីតាំង​ថ្មី​នោះ​ទេ។

តំណាង​ពលរដ្ឋ​រូប​នេះ បញ្ជាក់​ថា ពួក​គាត់​បាន​រស់​នៅ​ក្នុង​ភូមិ​ឃុំ​ជា​ទី​កំណើត​របស់​ខ្លួន​ជាង ​៣០​ឆ្នាំ​មក​ហើយ។ លោកស្រី​បន្ត​ថា ​គ្រួសារ​នីមួយៗ សុទ្ធតែ​ប្លង់​កម្មសិទ្ធិ​កាន់​កាប់​ដីធ្លី​ត្រឹមត្រូវ ចេញ​ដោយ​អាជ្ញាធរ​មូលដ្ឋាន ប៉ុន្តែ​អាជ្ញាធរ​ខេត្ត​បែរ​ជា​ចោទ​ប្រកាន់​ពលរដ្ឋ​ថា រស់​នៅ​ខុស​ច្បាប់​លើ​ដី​ឧទ្យាន​ជាតិ​​បទុម​សាគរ​ទៅ​វិញ​ ក្រោយ​ពី​មាន​​ក្រុម​ហ៊ុន​ចិន​ទទួល​បាន​ដីសម្បទាន​សេដ្ឋកិច្ច​ពី​រដ្ឋាភិបាល​ កាល​ពី​ឆ្នាំ២០០៨។

ដោយ​សារ​តែ​បញ្ហា​ដីធ្លី​ជាង​១០​ឆ្នាំ​មក​នេះ លោកស្រី សាំង ពុយ ថ្លែង​ឲ្យ​ដឹង​ថា ជីវភាព​ប្រជាពលរដ្ឋ កាន់តែ​ស្រុត​ចុះ​ដុនដាប​ទៅៗ ពី​មួយ​ឆ្នាំទៅ​មួយ​ឆ្នាំ ព្រោះ​គ្មាន​ដី​បង្កបង្កើន​ផល គ្មាន​មុខរបរ​ដូច​មុន ហើយ​ជំពាក់​បំណុល​ធនាគារ​កាន់​តែ​ច្រើនៗ។ លោកស្រី​ សាំង​ ពុយ ទទូច​ស្នើសុំ​ប្រមុខ​រដ្ឋាភិបាល លោក​នាយក​រដ្ឋមន្ត្រី​ ហ៊ុន សែន ជួយ​ដោះស្រាយ​បញ្ចប់​វិវាទ​ដីធ្លី​ឲ្យ​ពួក​គាត់​ផង៖ «ខាង​បង​ចង់​បាន​ដំណោះស្រាយ ឲ្យ​យើង​រស់​នៅ​ក្នុង​ភូមិ​ហ្នឹង​វិញ​ណា៎។ កាត់​ឆ្វៀល​ដី ដូច​គាត់​កាត់​ឆ្វៀល​ដី​ឲ្យ​ទៅ​ព្រែក​ខ្សាច់​មួយ​ចំនួន។ ឲ្យ​យើង​រស់​នៅ​ដូច​ពី​មុន​វិញ។ ពួក​យើង​ចង់​បាន​អ៊ីចឹង»

អាស៊ី​សេរី ព្យាយាម​សុំ​ការ​បំភ្លឺ​ពី​អភិបាល​រង​ខេត្ត​កោះកុង លោក សុខ សុធី ជុំវិញ​ដំណោះស្រាយ​សម្រាប់​ពលរដ្ឋ ប៉ុន្តែ​លោក​បដិសេធ ផ្ដល់​បទ​សម្ភាសន៍​ឲ្យ​អាស៊ី​សេរី៖ «សូម​លោក​បើក​លេខ​របស់​លោក​បន្តិច​មក ទើប​ខ្ញុំ​អាច​ឆ្លើយ​ទៅ​បាន»

ប៉ុន្តែ តំណាង​ពលរដ្ឋ​លោក​ស្រី​ សាំង ពុយ ឲ្យ​អាស៊ី​សេរី​ដឹង​ថា អាជ្ញាធរ​នឹង​ចុះ​ដោះស្រាយ​ហើយ​ឆ្វៀល​ដី​ឲ្យ​​ពលរដ្ឋ​ ប្រសិន​បើ​មាន​ចំណាត់​ការ​ពី​ក្រសួង​បរិស្ថាន​ ក្រោយ​ពួក​គាត់​ចូល​ជួប​អភិបាល​រង​ខេត្ត​លោក សុខ សុធី៖ «គាត់​ប្រាប់​ថា​គោលការណ៍​ហ្នឹង​ ហួស​ពី​ព្រំដែន​របស់​ខាង​ខេត្ត។ ខាង​ខេត្ត​ហ្នឹង​ចាំ​បញ្ជា​មក​ពី​ក្រសួង​បរិស្ថាន។ យើង​ចង់​ដឹង​ថា​ចុះ​ស្រាយ​ថ្ងៃ​ណា គាត់​ឲ្យ​ទៅ​សួរ​ក្រសួង​បរិស្ថាន។ អ៊ីចឹង! ពួក​យើង​សម្រេច​ថា យើង​នឹង​ទៅ​ជួប​ក្រសួង​បរិស្ថាន​ទៅ។ ព្រោះ​យើង​មក​ហ្នឹង អត់​បាន​ដំណោះស្រាយ​អ្វី​ទាំង​អស់។ អត់​បាន​ព័ត៌មាន​អ្វី​ទាំង​អស់។ អ៊ីចឹង! ទៅ​ជួប​ក្រសួង​បរិស្ថាន​តាម​តែ​គាត់​ណែនាំ»

លិខិត​របស់​ទីស្ដីការ​ដែល​មាន​យោង​ចំណារ​របស់​លោក​នាយក​រដ្ឋមន្ត្រី ​ហ៊ុន សែន​ ហើយ​បាន​ដាក់​ចូល​សាលា​ខេត្ត​កោះកុង​ កាលពី​ថ្ងៃ​ទី១៦ ខែ​ឧសភា ឆ្នាំ២០១៨ បញ្ជាក់​ឲ្យ​ដឹង​តាម​ន័យ​ដើម​ថា៖ «ក្រសួង​បរិស្ថាន​ត្រូវ​សិក្សា​ការ​កាត់​ឆ្វៀល​ដី​នៅ​ទីតាំង​ឃុំ​ព្រែក​ខ្សាច់​ ស្រុក​គិរី​សាគរ​ និង​ទីតាំង​កៀន​ទឹក​ ឃុំ​ថ្មស​ ស្រុក​បទុម​សាគរ​ ខេត្ត​កោះកុង​ ចេញ​ពី​តំបន់​វិនិយោគ​អភិវឌ្ឍន៍​របស់​ក្រុមហ៊ុន​ចិន យូញៀន ឌីវេឡុបមិន គ្រុប ​( Union Development Group Co.,Ltd) ​សម្រាប់​ផ្ដល់​ជូន​ប្រជា​ពលរដ្ឋ​ និង​រដ្ឋបាល​ថ្នាក់​ក្រោម​ជាតិ​ពាក់​ព័ន្ធ»

ក្នុង​លិខិត​នោះ បញ្ជាក់​ទៀត​ថា រដ្ឋាភិបាល​កម្ពុជា​ក៏​បាន​បញ្ជា​ឲ្យ​ក្រុមហ៊ុន​ Union Development Group Co., Ltd ​ត្រូវ​រក្សា​ទុក​ព្រៃ​កោង​កាង​ ព្រៃ​លិច​ទឹក​ តំបន់​ព្រៃ​ស្រោង​ តំបន់​ទី​ជម្រាល​ភ្នំ​ ជា​តំបន់​អភិរក្ស នៅ​ក្នុង​ប្លង់​មេ​ និង​កម្មវិធី​អភិវឌ្ឍន៍​របស់​ខ្លួន។

ទាក់ទង​នឹង​ដំណោះស្រាយ​ពី​ខាង​ក្រសួង​បរិស្ថាន​វិញ អាស៊ី​សេរី ពុំ​ទាន់​អាច​ទាក់ទង អ្នក​នាំ​ពាក្យ​ក្រសួង​បរិស្ថាន លោក នេត្រ ភ័ត្ត្រា ដើម្បី​សុំ​ពន្យល់​អំពី​ករណី​នេះ​បាន​នៅ​ឡើយ​ទេ នៅ​ថ្ងៃ​ទី៤ មីនា។ ក៏​ប៉ុន្តែ​កន្លង​មក​លោក នេត្រ ភ័ត្ត្រា ធ្លាប់​ប្រាប់​អាស៊ី​សេរី កាល​ពី​ពាក់​ខែ​វិច្ឆិកា ឆ្នាំ​២០១៨ ថា ស្ថានភាព​ជម្លោះដីធ្លី​រវាង​ពលរដ្ឋ និង​ក្រុមហ៊ុន​មិន​ធ្ងន់ធ្ងរ​ដូច​មុន​ឡើយ ហើយ​ក្រសួងបរិស្ថាន កំពុង​បន្ត​ខិតខំ​ដោះស្រាយ​ជម្លោះ​ដែល​នៅ​សេសសល់ តាមរយៈ​កំណត់​អត្តសញ្ញាណ​របស់​ប្រជាជន​ដែល​មាន​ផល​ប៉ះពាល់​ជាក់ស្ដែង។

អ្នកនាំពាក្យ​ក្រសួងបរិស្ថាន​រូប​នេះ អះអាង​ថា ការ​ផ្ដល់​ដី​សម្បទាន​សេដ្ឋកិច្ច​នៅ​តំបន់​នោះ មិនបាន​ផ្ដល់​ប៉ះពាល់​ដល់​បរិស្ថាន​និង​ជីវភាព​ប្រជាពលរដ្ឋ ដូច​ការចោទប្រកាន់​តាម​ប្រព័ន្ធ​ព័ត៌មាន​និង​អង្គការ​សង្គម​ស៊ីវិល​ឡើយ។ លោក​បញ្ជាក់​ថា ក្រសួង​លើកទឹកចិត្ត​ឲ្យ​ប្រជាពលរដ្ឋ​រង​ផល​ប៉ះពាល់ ដាក់​សំណើ ឬ​របាយការណ៍​ភស្តុតាង និង​បញ្ជី​ស្នាម​ផ្សេងៗ​ជូន​ក្រសួង​ដើម្បី​ពិនិត្យ​ដោះស្រាយ​តាម​បច្ចេកទេស​និង​នីតិវិធី។

ពលរដ្ឋ​អះអាង​ថា ពួក​គាត់​បាន​ដាក់​ញត្តិ​ច្រើន​លើក​ច្រើន​សា​ហើយ នៅ​តាម​ស្ថាប័ន​រដ្ឋ​នានា ក្នុង​ក្រុង​ភ្នំពេញ អស់​រយៈ​ពេល​ជាង ១០ឆ្នាំ​មក​ហើយ ប៉ុន្តែ​នៅ​តែ​មិន​មាន​ដំណោះស្រាយ​ណា​មួយ​ពី​ខាង​អាជ្ញាធរ​នៅ​ឡើយ។

មន្ត្រី​ប្រឹក្សា​ផ្នែក​ច្បាប់​នៃ​អង្គការ លីកាដូ (Licadho) ប្រចាំ​ខេត្ត​កោះកុង លោក ហ៊ួ អ៊ីន ដែល​តាម​ជម្លោះ​ដីធ្លី​នេះ សង្កេត​ឃើញ​ថា អាជ្ញាធរ​ធ្លាប់​សន្យា​ដោះស្រាយ​ជូន​ពួកគាត់ ​ម្ដង​ជា​ពីរ​មក​ហើយ ប៉ុន្តែ​មក​ដល់​ពេល​នេះ នៅ​តែ​មិន​ឃើញ​មាន​លទ្ធផល។ លោក​ ហ៊ូ អ៊ី យល់ថា ការ​ពន្យារ​ពេលនេះ គឺ​ពិតជា​ផ្ដល់ ប៉ះពាល់​ខ្លាំង​បំផុត​ដល់​ប្រជាពលរដ្ឋ​ទាំង​វិបត្តិ​ផ្លូវចិត្ត និង​វិបត្តិ​សេដ្ឋកិច្ច​គ្រួសារ​ពួកគាត់៖ «បើ​សិន​ជា​ក្រុមហ៊ុន គាត់​គ្មាន​គោលការណ៍​ផ្ដល់​ជា​សំណង​ទេ។ ខាង​រដ្ឋាភិបាល​គួរ​តែ​ពិចារណា​កាត់​ឆ្វៀល​ដី​ឲ្យ​ទៅ​ប្រជា​ពលរដ្ឋ។ ព្រោះថា​ដី​ដែល​រដ្ឋាភិបាល​ផ្ដល់​ឲ្យ​ទៅ​ក្រុមហ៊ុន​នោះ គឺ​មាន​ទំហំ ​ធំធេង​ណាស់ គឹ​លើស​ទៅ​ហ្នឹង​ច្បាប់​ដែល​ផ្ដល់​ឲ្យ​ទៀត​នោះ។ ច្បាប់​ផ្ដល់​ឲ្យ​តែ​១ម៉ឺន​ហិកតារ​ទេ។ តែ​ក្រុមហ៊ុន យូ​ញៀន បាន​ទៅ​ដល់​ជាង​៤ម៉ឺន​៥​ពាន់​ហិកតារ។ អ៊ីចឹង! គួរ​តែ​ពន្លឿន​ទៅ កុំ​នៅ​អូស​បន្លាយ​មក​ដល់​ពេល​នេះ​ទៀត ព្រោះ​វា​ជិត​១០​ឆ្នាំ​ទៅ​ហើយ»

អាស៊ី​សេរី មិន​អាច​សុំ​ការ​បកស្រាយ​ពី​ខាង​តំណាង​ក្រុមហ៊ុន​ចិន UDG លោក ឡុក លី បាន​នៅ​ឡើយ។

ក្នុង​ពេល​ឈរ​ទាមទារ​នៅ​ពី​មុខ​សាលា​ខេត្ត​កោះកុង ពលរដ្ឋ​ខ្លះ​លើក​រូប​ថត លោក ហ៊ុន សែន និង​ភរិយា ពលរដ្ឋ​ខ្លះ​ទៀត​លើ​បដា​ជា​ភាសា​ខ្មែរ និង​អង់គ្លេស។ ឃ្លា​ក្នុង​បដា​សរសេរ​ជា​ភាសា​អង់គ្លេស​ដាក់​ថា "ក្រុមហ៊ុន​ចិន ហៅ​កាត់​ថា យូឌីជី មក​ប្រទេស​កម្ពុជា​យើង​មិន​មែន​មក ដើម្បី​អភិវឌ្ឍន៍​នោះ​ទេ។ ពួក​គេ​មក​ធ្វើ​ឲ្យ​ខូចខាត​ប្រទេស​ជាតិ ហើយ​រឹប​អូស​យក​ដីធ្លី​ពួក​យើង។ ចំណែក​បដា​សរសេរ​អក្សរ​ខ្មែរ​វិញ​ដាក់​ថា "ការ​ផ្ដល់​ដី​សម្បទាន​ រដ្ឋាភិបាល​តែង​តែ​ធ្វើ​ឲ្យ​រាស្ត្រ​រងទុក្ខ បាត់​បង់​ផ្ទះ​សម្បែង​និង​មុខរបរ កុមារ​បាត់​បង់​សិក្សា និង​ការ​ចំណាកស្រុក។ តើ​ផល​ប្រយោជន៍​បាន​ទៅ​អ្នក​ណា​ពិតប្រាកដ? មាន​ដី​ទើប​មាន​ជីវិត"

ប្រជា​សហគមន៍​ទាំង ៥ឃុំ​នៃ​ខេត្ត​កោះកុង ប្រកាស​ជំហរ​ថា ពួកគេ​នឹង​នាំ​គ្នា​មក​ទី​ក្រុងភ្នំពេញ ដើម្បី​ស្វែង​ដំណោះស្រាយ​ជាថ្មី​ទៀត​ពី​លោក​នាយករដ្ឋមន្ត្រី និង​រដ្ឋមន្ត្រី​ក្រសួង​បរិស្ថាន លោក សាយ សំអាល់ បើ​ទោះ​ជា​ត្រូវ​ប្រឈម​នឹង​ការ​រារាំង​ពី​អាជ្ញាធរ​ក្រុង​ភ្នំពេញ​ក៏​ដោយ។

ជម្លោះ​រវាង​ពលរដ្ឋ​ខេត្ត​កោះកុង ជាមួយ​ក្រុមហ៊ុន​ចិន យូញៀន នៅ​ខេត្ត​កោះកុង បាន​អូស​បន្លាយ​រ៉ាំរ៉ៃ​ជាង ១០ឆ្នាំ​មក​ហើយ។ ពលរដ្ឋ​បាន​ចោទ​ក្រុមហ៊ុន​ចិន យូញៀន​ថា កន្លង​មក​បាន​ធ្វើ​សកម្មភាព​ជា​ច្រើន ដើម្បី​បណ្ដេញ​ប្រជា​ពលរដ្ឋ​ចេញពី​លំនៅឋាន ក្នុង​ភូមិ​ក្បែរ​មាត់​សមុទ្រ ដោយ​ឲ្យ​សំណង​មិន​សមរម្យ​ទៅ​ពលរដ្ឋ។ កាលពី​ថ្ងៃ​ទី​៥ ខែ​កុម្ភៈ ក្រុមហ៊ុន​ចិន​មួយ​នេះ បាន​ដុត​កម្ទេច​ផ្ទះ និង​កាប់​បំផ្លាញ​ផល​ដំណាំ​នៅ​តំបន់​ថ្ម​ពាន ក្នុង​ឃុំ​ព្រែក​ខ្សាច់ ស្រុក​គិរី​សាគរ ខេត្ត​កោះកុង​ជា​ដើម៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។