ប្រជាពលរដ្ឋនៅស្រុកស្នួល ខេត្តក្រចេះ បាននាំគ្នាធ្វើដំណើរទៅរាជធានីភ្នំពេញ ដើម្បីស្វែងរកកិច្ចអន្តរាគមន៍ពីសំណាក់មន្ត្រីពាក់ព័ន្ធ ឲ្យជួយដោះស្រាយបញ្ហាដីធ្លីរបស់ពួកគាត់ជាមួយក្រុមហ៊ុនកូរ៉េ។ ប្រជាពលរដ្ឋអះអាងថា បើមិនមានការដោះស្រាយបញ្ហាជូនពួកគាត់ទេ នោះពួកគាត់នឹងនៅតែបន្តទាមទាររហូតដល់មានដំណោះស្រាយពីថ្នាក់ដឹកនាំ។
ប្រជាពលរដ្ឋនៅស្រុកស្នួល ខេត្តក្រចេះ ជាង ១០០នាក់ នាំគ្នាដាក់ញត្តិនៅខុទ្ទកាល័យលោកនាយករដ្ឋមន្ត្រី ហ៊ុន សែន និងក្រសួងដែនដី នគរូបនីយកម្ម និងសំណង់ នៅថ្ងៃទី២២ កក្កដា។ ប៉ុន្តែការដាក់ញត្តិត្រូវបានមន្ត្រីក្រសួងរៀបចំដែនដី នគរូបនីយកម្ម និងសំណង់ បញ្ជាក់ថា ប្រជាពលរដ្ឋទាំងនោះមិនទាន់គោរពតាមនីតិវិធីនោះទេ។
តំណាងប្រជាពលរដ្ឋម្នាក់រស់នៅឃុំស្នួល ស្រុកស្នួល ខេត្តក្រចេះ លោក សួន វិច្ឆិកា មានប្រសាសន៍ថា ពួកគាត់បាននាំគ្នាឡើងទៅភ្នំពេញ ដើម្បីយកញត្តិជុំវិញបញ្ហាទំនាស់ដីធ្លីរបស់ពួកគាត់ជាមួយក្រុមហ៊ុនកូរ៉េឈ្មោះ ហូរ៉ាយស៊ិន អាគ្រីខាល់ឆឺរ ឌីវ៉ូឡប់មែន (Horizon Agriculture Development) ដែលបានប្ដឹងជំទាស់ការចេញប្លង់កម្មសិទ្ធិស្របច្បាប់របស់ប្រជាពលរដ្ឋជាង ៣០០គ្រួសារ កាលពីពេលកន្លងទៅ។
លោកបន្តថា ពួកគាត់បានប្រមូលផ្តុំគ្នានៅមុខរូបសំណាកព្រះបរមរតនកោដ្ឋ ក្រោយមកក៏ខាងអាជ្ញាធរឱ្យពួកគាត់ជួបជុំគ្នានៅជិតវត្តបទុមវតី វិញ។ ក្រោយពេលអាជ្ញាធរពន្យល់ពីនីតិវិធីជុំវិញរឿងដីធ្លីនោះ ពួកគាត់សម្រេចថានឹងដាក់ពាក្យបណ្ដឹងតវ៉ាមួយនៅថ្នាក់ខេត្តដំបូងសិន បន្ទាប់មកនឹងដាក់ពាក្យបណ្ដឹងមកថ្នាក់ជាតិទៀត ពីព្រោះគាត់គិតថា ការសម្រេចរបស់ថ្នាក់ខេត្តកន្លងមក មិនត្រឹមត្រូវនោះឡើយ។
លោក សួន វិច្ឆិកា៖ «ក្នុងនោះដែរ គាត់បានមើលឯកសារពាក់ព័ន្ធនឹងសេចក្តីសម្រេចរបស់ថ្នាក់ខេត្តហើយ ហើយគាត់ឱ្យប្រជាពលរដ្ឋដាក់ពាក្យបណ្ដឹងមួយទៅថ្នាក់ខេត្ត ដើម្បីបន្តសិទ្ធិក្នុងការប្ដឹងបន្ត។ ហើយប្រសិនបើប្រជាពលរដ្ឋមិនបានដាក់ទៅទេ គឺប្រជាពលរដ្ឋនឹងអស់សិទ្ធិក្នុងការប្ដឹងតហើយ។ ហើយក្នុងហ្នឹង ការដាក់ទៅហ្នឹងប្រជាពលរដ្ឋក៏បានធ្វើលិខិតជំទាស់ហ្នឹង ទៅថ្នាក់ខេត្ត ដើម្បីមានសិទ្ធិបន្តប្ដឹងមកថ្នាក់ជាតិ»។
ប្រភពដដែលអះអាងថា ពួកគាត់នឹងមិនវិលត្រឡប់ទៅស្រុកវិញនោះទេ ប្រសិនបើមិនមានការដោះស្រាយសមស្របណាមួយសម្រាប់ពួកគាត់ទេនោះ។
មន្ត្រីនៅក្រសួងរៀបចំដែនដី នគរូបនីយកម្ម និងសំណង់ ម្នាក់ ដែលបានទៅពន្យល់ណែនាំប្រជាពលរដ្ឋទាំងនោះ ដោយសុំមិនឱ្យបញ្ចេញឈ្មោះ និងសំឡេង ឱ្យដឹងថា ជាជំហានដំបូង ពួកគាត់ត្រូវដាក់ពាក្យបណ្ដឹងជំទាស់នៅថ្នាក់ខេត្តជាមុនសិន។ មន្ត្រីរូបនោះបន្តថា នៅក្នុងពាក្យបណ្ដឹងជំទាស់នៅថ្នាក់ខេត្ត ប្រជាពលរដ្ឋទាំងនោះអាចមានរយៈពេលរហូតដល់ថ្ងៃទី៣ ខែសីហា ហើយក្នុងកំឡុងពេលនេះ ពួកគាត់មិនអាចប្ដឹងរំលងមកថ្នាក់ជាតិបាននោះទេ គឺត្រូវធ្វើតាមនីតិវិធី ហើយបើថ្នាក់ខេត្តមិនអាចដោះស្រាយបានថាយ៉ាងណានោះ ទើបពួកគាត់អាចប្ដឹងមកដល់ថ្នាក់ជាតិបាន។
មន្ត្រីដដែលយល់ថា ទម្រាំដល់ថ្ងៃទី៣ ខែសីហា ហើយនីតិវិធីនឹងមានយូរជាងនេះទៀតនោះ ប្រជាពលរដ្ឋទាំងអស់គប្បីវិលត្រឡប់ទៅលំនៅឋានវិញ ពីព្រោះបើពួកគាត់បន្តស្នាក់នៅភ្នំពេញ វានឹងអាចមានបញ្ហាផ្សេងៗជុំវិញការស្នាក់អាស្រ័យ នឹងកើតឡើងដល់ពួកគាត់មិនខាន។
លោក សួន វិច្ឆិកា បញ្ជាក់ថា ពួកគាត់នឹងចាត់តំណាងមួយចំនួននៅខេត្តក្រចេះ ស្រាប់ ដើម្បីដាក់ពាក្យបណ្ដឹងជំទាស់នៅថ្នាក់ខេត្ត និងដើម្បីត្រៀមខ្លួនប្រជុំដោះស្រាយបញ្ហាដីធ្លីនោះ។ ស្របពេលដែលប្រជាពលរដ្ឋផ្សេងទៀតនៅភ្នំពេញ នឹងនៅតែបន្តធ្វើការទាមទារឱ្យរាជរដ្ឋាភិបាលពន្លឿនការដោះស្រាយជូនពួកគាត់។
ការតវ៉ានៅរាជធានីភ្នំពេញ ជុំវិញបញ្ហាដីធ្លីរបស់ពួកគាត់ជាង ១ពាន់ហិកតារ (១.៥៦២,៧៥) ជាមួយក្រុមហ៊ុនកូរ៉េនៅពេលនេះ ក្រោយពេលប្រជាពលរដ្ឋជាង ៣០០គ្រួសារ បានច្រានចោលទៅនឹងសេចក្តីសម្រេចរបស់ក្រុមការងារដោះស្រាយទំនាស់ដីធ្លីថ្នាក់ខេត្ត ដែលបានប្រជុំសម្រេចជាមួយតំណាងប្រជាពលរដ្ឋ ៨នាក់ កាលពីថ្ងៃទី៨ កក្កដា គឺធ្វើឱ្យពួកគាត់ខាតបង់ដីយ៉ាងច្រើន។
តំណាងប្រជាពលរដ្ឋអះអាងថា ការប្រជុំសម្រេចនោះ គឺធ្វើឡើងដោយឯកតោភាគី ពោលគឺតំណាងពួកគាត់មិនមានសិទ្ធិតវ៉ាអ្វីឡើយ ដោយអាជ្ញាធរបញ្ជាក់ថា ពេលនោះ គឺជាពេលប្រកាសសេចក្តីសម្រេច ហើយរាល់ការតវ៉ាណាមួយ គឺប្រជាពលរដ្ឋអាចធ្វើទៅបានក្នុងរយៈពេល ១ខែ ឬ ៣០ថ្ងៃ ក្រោយការប្រកាសសេចក្តីសម្រេចនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។