ពលរដ្ឋ​កោះកុង​បន្ត​តវ៉ា​នៅមុខ​ក្រសួង​ដែនដី​ករណី​អាជ្ញាធរ​វាស់ដី​ព្រៃ និង​ដី​លិច​ទឹក​សង​ពួកគេ

ដោយ វ៉ែន សុមេធ
2018-06-28
Share
ពលរដ្ឋ​កោះកុង ជម្លោះដី ជាមួយ​ឧកញ៉ា លី យ៉ុងផាត់ ៦២២ ពលរដ្ឋ​មាន​ជម្លោះដីធ្លី​រ៉ាំរ៉ៃ ក្រុម​៣១៧​គ្រួសារ នៅ​ខេត្ត​កោះកុង ជាមួយ​ឧកញ៉ា លី យ៉ុងផាត់ តវ៉ា​បិទ​ផ្លូវ នៅ​មុខ​ទីស្ដីការ​ក្រសួង​រៀបចំ​ដែនដី នរូបនីយកម្ម និង​សំណង់ នៅ​ថ្ងៃ​ទី២៨ ខែ​មិថុនា ឆ្នាំ​២០១៨។
Photo Courtesy of Ma Chetra's Facebook

ពលរដ្ឋ​មាន​ជម្លោះដីធ្លី​រ៉ាំរ៉ៃ ក្រុម​៣១៧​គ្រួសារ នៅ​ខេត្ត​កោះកុង ជាមួយ​ក្រុមហ៊ុន​ស្ករអំពៅ​របស់​ឧកញ៉ា លី យ៉ុងផាត់ បាន​លើកគ្នា​ឡើង​តវ៉ា​នៅមុខ​ក្រសួង​រៀបចំ​ដែនដី​ជាថ្មី ដើម្បី​តវ៉ា​នឹង​ការ​វាស់​ដី​ព្រៃ​លិច​ទឹក សង​ឲ្យ​ពលរដ្ឋ។ សង្គម​ស៊ីវិល ស្នើ​ឲ្យ​អាជ្ញាធរ​ពាក់ព័ន្ធ អនុវត្ត​តាម​កិច្ចសន្យា​សង​ដី ដែល​អាច​ធ្វើស្រែ ដាំ​ដំណាំ និង​សាងសង់​លំនៅឋាន​ឲ្យ​ពលរដ្ឋ ទើប​ជម្លោះ​អាច​បិទ​បញ្ចប់។

ពលរដ្ឋ ដែល​ឡើង​មក​តវ៉ា​មាន​ចំនួន​ជាង ២០០​នាក់ មកពី​ភូមិ​ចំនួន​៩ នៃ​ឃុំ​ដងពែង ឃុំ​ជីខលើ ឃុំ​ជីខក្រោម ឃុំ​កណ្ដោល ស្រុក​បទុម​សាគរ និង​ស្រុក​ស្រែអំបិល ខេត្ត​កោះកុង។

ពលរដ្ឋ​មាន​ជម្លោះដីធ្លី​ម្នាក់ គឺ​លោក ឱម ផុន ឲ្យ​ដឹង​ថា ពួកគេ​បាន​មក​តវ៉ា​នៅ​ភ្នំពេញ​ជាច្រើន​ថ្ងៃ​ហើយ។ ពលរដ្ឋ​រូប​នេះ បន្ដ​ថា ពួកគេ​មិន​ពេញចិត្ត​នឹង​ទង្វើ​របស់​អាជ្ញាធរ​ខេត្ត​កោះកុង ដែល​វាស់វែង​ដី​ព្រៃ​និង​ដី​ភក់​ក្នុង​បឹង​លិច​ទឹក​ឲ្យ​ពួកគេ ហើយ​មិន​អាច​ធ្វើស្រែ ដាំ​ដំណាំ ឬ​សង់​លំនៅឋាន​បាន ទើប​ពួកគេ​មក​រក​កិច្ច​អន្តរាគមន៍​ពី​លោក ជា សុផារ៉ា រដ្ឋមន្ដ្រី​ក្រសួង​រៀបចំ​ដែនដី ឲ្យ​ចេញមុខ​ជួយ។ លោក​បន្ដ​ថា អាជ្ញាធរ​រាជធានី​ភ្នំពេញ បាន​រារាំង​ពួកគេ មិន​ឲ្យ​ដើរ​ដង្ហែ យក​ញត្តិ​ទៅ​ដាក់​តាម​ស្ថាប័នរដ្ឋ​ទេ ដោយ​ណែនាំ​ឲ្យ​ពួកគេ​តវ៉ា ដោយ​ស្ងៀមស្ងាត់ ប៉ុន្តែ​ពលរដ្ឋ​មិន​ព្រម។ លោក ថា ដោយសារ សុខភាព​ទន់ខ្សោយ លោក​សន្លប់ ២​ដង ក្នុង​ការ​តវ៉ា​ជាច្រើន​ថ្ងៃ​មកនេះ។ «»

ក្រសួង​រៀបចំ​ដែនដី នគរូបនីយកម្ម និង​សំណង កាលពីដើម​ខែ​មិថុនា បាន​ចេញ​សេចក្តី​ប្រកាស​ព័ត៌មាន​ថា ក្រុមការងារ​ជំនាញ នឹង​ដោះស្រាយ​បញ្ចប់​ទំនាស់ ដីធ្លី​ជូន​ប្រជាពលរដ្ឋ​ដែល​មាន​ជម្លោះ​ជាមួយ​ក្រុមហ៊ុន​ស្ករ​អំពៅ នៅ​ស្រុក​ស្រែអំបិល និង​ស្រុក​បុទុមសាគរ ខេត្ត​កោះកុង ឲ្យ​បាន​រួចរាល់​ទាំងស្រុង​នៅ​បំណាច់​ខែ​មិថុនា​ឆ្នាំ​២០១៨​នេះ។

សេចក្ដីប្រកាស​ព័ត៌មាន​កាលណោះ ធ្វើ​ឡើង ក្រោយ​ពី​រដ្ឋមន្ត្រី​ក្រសួង​រៀបចំ​ដែនដី​លោក ជា សុផារ៉ា បាន​ចុះ​ជួប​តំណាង​ប្រជាពលរដ្ឋ ៣១៧​គ្រួសារ ដែល​មាន​វិវាទ​ជាមួយ​ក្រុមហ៊ុន​ឈ្មោះ កោះកុង​ស៊ូហ្គើ (Kohkong Sugar) និង​ក្រុមហ៊ុន​កោះកុងផ្លេនថេសិន (Kohkong Plantation) នៅ​ស្រុក​ស្រែអំបិល និង​ស្រុក​បុទុមសាគរ កាលពី​ថ្ងៃ​ទី​៥ ខែ​មិថុនា។ ក្រសួង​បញ្ជាក់​ថា ក្រុមការងារ​កំពុង​មមាញឹក វាស់វែង​បែងចែក​ដី​ឡូតិ៍ ជូន​ក្រុម​ប្រជាពលរដ្ឋ​២០០​គ្រួសារ ដែល​ទើបបាន​ចាប់ឆ្នោត​ជ្រើសរើស​ដី​ឡូតិ៍​រួចរាល់ និង​ជូន​ក្រុម​ប្រជាពលរដ្ឋ ១៧៥​គ្រួសារ ដែល​ជិត​នឹង​បាន​បញ្ចប់​ទៅ​ហើយ​នោះ។

បន្ទាប់​ពី​នេះ ក្រុម​ការងារ​ជំនាញ នឹង​បន្ត​ចាត់ចែង​បែក​ចែក​ដី​ឡូតិ៍ សម្រាប់​ក្រុម​ប្រជាពលរដ្ឋ ៣១៧​គ្រួសារ ក្រុម​ប្រជាពលរដ្ឋ ១៧០​គ្រួសារ និង​ក្រុម​ប្រជាពលរដ្ឋ ៩៨​គ្រួសារ សរុប​ចំនួន ៥៨៥​គ្រួសារ ដែល​គ្រោង​ចុះ​វាស់វែង​បែងចែក​ដី​ឡូតិ៍​ឲ្យ​បាន​រួចរាល់ ចន្លោះ​ពី​ថ្ងៃ​ទី​២០ ខែ​មិថុនា ដល់​បំណាច់​ខែ​មិថុនា​នេះ។

ពលរដ្ឋ​ម្នាក់ទៀត ក្នុង​ក្រុម ៣១៧​គ្រួសារ គឺ​លោក ង៉ែត ស៊ឹម ឲ្យ​ដឹង​ថា មន្ត្រី​ជំនាញ​របស់​ក្រសួង និង​អាជ្ញាធរ​ខេត្ត​កោះកុង ពិតជា​បាន​ចុះ​វាស់វែង ដី​សង​ពលរដ្ឋ​ពិតមែន ប៉ុន្តែ​ដី​នោះ ជា​ប្រភេទ​ដី​ព្រៃ សំបូរ​ថ្ម ដី​ខ្លះ​ជា​ដី​បឹង ដី​ភក់ សំបូរ​សត្វ​ឈ្លើង ដែល​មិន​អាច​ដាំ​ដំណាំ​បាន។ ម្យ៉ាង​ដី​នោះ គ្មាន​ហេដ្ឋារចនាសម្ព័ន្ធ​ត្រឹមត្រូវ ពិសេស​គឺ​គ្មាន​ថ្នល់​ធ្វើដំណើរ។ «»

ចំណែក​ពលរដ្ឋ​ក្រុម ១៧៥​គ្រួសារ មាន​អ្នកស្រី ផាវ ញ៉ឹង ជា​តំណាង​ឲ្យ​ដឹង​ថា ក្រុម​ពួកគាត់​ក៏​ទទួល​បាន​ដី​ប្រភេទ​បែបនេះ​ដូចគ្នា។ តែ​យ៉ាងណា អ្នកស្រី ផាវ ញ៉ឹង ថា នៅ​រង់​ចាំ​មើល​ការ​ដោះស្រាយ​សិន ហើយ​បើ​សិន​ពលរដ្ឋ​មិន​ទទួល​យក​បាន ក្រុម​១៧៥​គ្រួសារ ក៏​អាច​នឹង​ឡើង​ទៅ​តវ៉ា​នៅ​ភ្នំពេញ​ជាថ្មី​ដែរ។ «»

អាស៊ីសេរី​មិន​អាច​សុំ​ការ​បញ្ជាក់​ពី​អ្នកនាំពាក្យ​ក្រសួង​រៀបចំ​ដែនដី លោក សេង ឡូត និង អភិបាលរង​ខេត្ត​កោះកុង ទទួលបន្ទុក​ដីធ្លី លោក អន ភារៈ បាន​ទេ នៅ​ថ្ងៃទី​២៨ មិថុនា។ ប៉ុន្តែ​អភិបាលរង​រាជធានី​ភ្នំពេញ លោក មាន ចាន់យ៉ាដា បាន​ស្នើ​ឲ្យ​ពលរដ្ឋ​ក្រុម ៣១៧​គ្រួសារ ដែល​តវ៉ា​នៅមុខ​ក្រសួង​រៀបចំ​ដែនដី ទៅ​ដេក​រង់ចាំ ក្នុង​វត្ត​សាមគ្គីរង្សី នៅ​ខណ្ឌ​មានជ័យ​វិញ ដោយ​អាជ្ញាធរ​នឹង​សម្របសម្រួល ហៅ​អភិបាលខេត្ត​កោះកុង អ្នកស្រី មិថុនា ភូថង ទៅ​ជួប នៅ​ព្រឹក​ថ្ងៃ​ទី​២៩ មិថុនា។ «»

អ្នក​សម្របសម្រួល​សមាគម​សិទ្ធិមនុស្ស​លីកាដូ (Licadho) ប្រចាំ​ខេត្ត​កោះកុង លោក ហួរ អ៊ីន យល់​ថា ដើម្បី​ដោះស្រាយ​បញ្ចប់​រឿង​នេះ ទាំង​ក្រសួង​រៀបចំ​ដែនដី និង​អាជ្ញាធរ​ខេត្ត​កោះកុង ត្រូវ​ធ្វើតាម​ការ​ព្រមព្រៀង​គ្នា ជាមួយ​ពលរដ្ឋ គឺ​ត្រូវ​សង​ដី ដែល​ពលរដ្ឋ​អាច​ទទួល​យក​បាន។ «»

ពលរដ្ឋ និង​អាជ្ញាធរ​រាជធានី​ភ្នំពេញ នៅតែ​ខ្វែងគំនិត​គ្នា ដោយសារ​ពលរដ្ឋ សំណូមពរ ឲ្យ​មានការ ជួប​គ្នា នៅ​ក្នុង​ក្រសួង​រៀបចំ​ដែនដី ព្រោះ​វត្ត​អារាម មិនមែន​ជា​កន្លែង​ដោះស្រាយ​បញ្ហា​ដីធ្លី​ទេ។ពួកគេ​ព្រមាន​ថា នឹង​មិន​ទៅ​ខេត្ត​កោះកុង​វិញ​ទេ ប្រសិនបើ​ពួកគេ​មិន​ទទួល​បាន​ដំណោះស្រាយ​ពី​ក្រសួង​ដែនដី៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល