ពលរដ្ឋជាង ២០០គ្រួសារនៅខេត្តព្រះវិហារ បដិសេធទទួលសំណងតិចតួចពីក្រុមហ៊ុនរ៉ែមាសឌែលខម
ការដ្ឋានក្រុមហ៊ុនរ៉ែមាស នៅតំបន់ភ្នំលុង ឃុំរមទម្យ ខេត្តព្រះវិហារ ថ្ងៃទី៩ ខែធ្នូ ឆ្នាំ២០១៨។
រូប៖ Mother Nature Cambodia
ជនជាតិដើមភាគតិចកួយ ២៥០គ្រួសារ នៅខេត្តព្រះវិហារ បដិសេធទទួលសំណងពីក្រុមហ៊ុន រ៉ែមាស ឌែលខម ខេមបូឌា (Delcom Cambodia) ដោយលើកហេតុផលថា ក្រុមហ៊ុនបានផ្តល់សំណងតិចតួចពេក ជាថ្នូរការហ៊ុមព័ទ្ធយកដីស្រែចម្ការរបស់ពួកគាត់ជាច្រើនរយហិកតារ។ អ្នកភូមិថា ក្រុមហ៊ុនទាំងនេះបានហ៊ុមព័ទ្ធរំលោភយកដីពួកគាត់ជាង ៤០០ហិកតារ នៅតំបន់ភ្នំលុង ដើម្បីពង្រីកផ្ទៃដីធ្វើអាជីវកម្មរ៉ែមាសជាថ្មីទៀត ធ្វើឱ្យពលរដ្ឋផ្ទុះការតវ៉ាជាច្រើនលើក។
ជនជាតិដើមភាគតិចទាំងនោះ រស់នៅភូមិចំនួន៤ គឺភូមិស្វាយដំណាក់ ភូមិរំដេង ត្រពាំងទន្ទឹម និងភូមិអូរទ្រលោក ឃុំរមទម ឱ្យដឹងថា ក្រុមហ៊ុនរ៉ែមាស ឌែលខម បានប្រកាសផ្តល់សំណងជូនពួកគាត់ពីផលប៉ះពាល់ដីស្រែចម្ការ ដោយក្នុងមួយហិកតារ មួយលានរៀល ឬស្មើ ២៥០ដុល្លារ។ រីឯដីមានប្លង់រឹងក្រុមហ៊ុនផ្តល់សំណង ១ហិកតារ ១.៥០០ដុល្លារ។
តំណាងពលរដ្ឋ លោក ទុយ ឆេង ឱ្យដឹងនៅថ្ងៃទី៣ កញ្ញាថា ពលរដ្ឋមិនពេញចិត្តចំពោះការផ្តល់សំណងដ៏តិចតួចដូច្នោះទេ ប៉ុន្តែតំណាងក្រុមហ៊ុនបានគំរាមអ្នកភូមិថា បើពលរដ្ឋមិនទទួលយក ក៏គេនៅតែរឹបអូសយកដីទាំងនោះដែរ។
លោកថា ក្រុមហ៊ុនបានហ៊ុមព័ទ្ធយកដីស្រែចម្ការរបស់ជនជាតិដើមកួយ នៅតំបន់ភ្នំលុងជាង ៤០០ហិកតារ ហើយនៅរយៈពេល ៨ខែចុងក្រោយនេះ ក្រុមហ៊ុននៅតែបន្តរំលោភយក ៩៧ហិកតារជាថ្មីទៀត នៅតំបន់រំដេង និង ភូមិស្វាយដំណាក់។ លោកបន្ថែមថា ពលរដ្ឋបានស្រែកទ្រហោយំ ដោយសារបាត់បង់ទីកន្លែងអាស្រ័យផលរកចំណូលចិញ្ចឹមជីវិត។ លោកបញ្ជាក់ថា ដីដែលក្រុមហ៊ុនរំលោភយក ៩៧ ហិកតារនេះ គឺជាដីស្រែចម្ការដែលជនជាតិដើមកួយអាស្រ័យផលចិញ្ចឹមជីវិតតាំងពីដើមរៀងមក៖ «បានតែ ១ហិកតារ ២៥០ដុល្លារទេ បើយកក៏យក បើមិនយកត្រូវតែអត់ គេនិយាយដូច្នោះតែម្ដង។ បើនិយាយពីអាជ្ញាធរវិញ គេដោះស្រាយ ប៉ុន្តែគេដោះស្រាយឱ្យតែក្រុមហ៊ុនទេ ចំណែកចម្ការស្រែរបស់ពលរដ្ឋហ្នឹង គេមិនឱ្យពលរដ្ឋធ្វើទេ»។
ពលរដ្ឋមានជម្លោះដីធ្លីម្នាក់ទៀត លោកស្រី យឹម ផាត ថ្លែងថា គ្រួសារលោកស្រី មានដីជិត ៦ហិកតារ មានប្លង់ទន់ និងដី ២០ហិកតារទៀត គ្មានប្លង់ ត្រូវក្រុមហ៊ុនរំលោភយកទាំងស្រុង នៅរយៈពេល ៨ខែចុងក្រោយនេះ។ លោកស្រីថា ជាច្រើនខែមកហើយ អ្នកភូមិជាង ២០០គ្រួសារមិនអាចចូលទៅអាស្រ័យផល លើដីរបស់ខ្លួន ព្រោះក្រុមហ៊ុនពង្រាយកម្លាំងយោធា យាមល្បាត និងគំរាមពលរដ្ឋ។ រីឯដំណាំដាំដុះជាច្រើនហិកតារ ត្រូវក្រុមហ៊ុនឈូសកម្ទេចចោល៖ «គេធ្វើបាបពលរដ្ឋ គេគាបសង្កត់ពលរដ្ឋអ្នកក្រីក្រឱ្យគ្នាស្លាប់ គេជួលតែអ្នកមានអំណាច គេជួលតែក្រុមហ៊ុន គេអត់មានជួលពលរដ្ឋទេ។ យើងដាក់ពាក្យបណ្ដឹង ក្នុងពាក្យបណ្ដឹងបង់ឱ្យគេ ៣០ម៉ឺន បានគេដោះស្រាយឱ្យ ដោះស្រាយមិនចេញទេ គេច្រានយើងចោលទៀត»។
វិទ្យុអាស៊ីសេរីមិនអាចទាក់ទងសុំការបំភ្លឺរឿងនេះ អភិបាលខេត្តព្រះវិហារ លោក ប្រាក់ សុវណ្ណ និងអភិបាលស្រុករវៀងលោក ហោ ប៊ុនហួរ បាននៅឡើយទេ នៅថ្ងៃទី៣ កញ្ញា ព្រោះទូរស័ព្ទហៅចូលតែគ្មានអ្នកលើក។ ចំណែកអ្នកនាំពាក្យក្រសួងរ៉ែ និងថាមពល លោក យស មុនីរ៉ាត់ និងតំណាងក្រុមហ៊ុន ឌែលខម ខេមបូឌា ក៏មិនទាន់អាចទាក់ទងបានដែរ។
ប៉ុន្តែមេឃុំរមទម លោក សោម មុត ថ្លែងថា លោកមិនបានដឹងរឿងរ៉ាវនេះទេ ព្រោះពលរដ្ឋមិនបានមកពឹងអាជ្ញាធរឃុំ ឱ្យជួយដោះស្រាយ។ លោកថា ជម្លោះដីធ្លីនេះ ហួសពីសមត្ថភាពអាជ្ញាធរឃុំហើយ មកទល់ពេលនេះ អាជ្ញាធរស្រុក និងខេត្ត បានចុះសម្របសម្រួលដោះស្រាយជាញឹកញាប់៖ «ហួសពីហើយ សុទ្ធតែស្រុក និងខេត្តដោះស្រាយ»។
ជុំវិញរឿងនេះ មន្ត្រីសម្របសម្រួលសមាគមអាដហុក ខេត្តព្រះវិហារ លោក ឡោ ចាន់ យល់ថា ប្រសិនបើក្រុមហ៊ុនស្របច្បាប់ ទទួលសិទ្ធិវិនិយោគពីរដ្ឋាភិបាល ហេតុអ្វីបានជា ក្រុមហ៊ុនដើរប្រមូលទិញដីពីពលរដ្ឋក្នុងតម្លៃថោកៗ? លោកថា ប្រសិនបើពលរដ្ឋ មិនព្រមលក់ ក្រុមហ៊ុនបានដើរគំរាមកំហែង បំភិតបំភ័យ ដើម្បីលក់ដីឱ្យខ្លួន៖ «យើងឃើញថា ដោយសារមានតែមានសន្ទុះតវ៉ាខ្លាំងឡើងៗ ពីពលរដ្ឋបែរជាក្រុមហ៊ុនគេ ដើរឱ្យតំណាង ឱ្យអ្នកដែលគេស្គាល់ទៅ ទិញដីពីពលរដ្ឋ ដូច្នេះ គឺគំរាមកំហែង បំបាក់ស្មារតីពួកគាត់ លើអ្នកដែលអត់ព្រមលក់ដីឱ្យក្រុមហ៊ុន»។
តំណាងពលរដ្ឋបន្ថែមថា សំណុំរឿងចាស់ ដែលពលរដ្ឋប្ដឹងក្រុមហ៊ុន អាជ្ញាធរមិនត្រឹមតែមិនយកចិត្តទុកដាក់ដោះស្រាយទេ ហើយក្រុមហ៊ុននៅតែ រំលោភដីពួកគាត់ជាបន្តបន្ទាប់។ រីឯដីពលរដ្ឋខ្លះទៀតមានប្លង់រឹង ឬប្លង់កម្មសិទ្ធិ ក៏ក្រុមហ៊ុនរំលោភបំពានដែរ៕
- ស្ដាប់ផ្ទាល់ (ព្រឹក ៥:៣០-៦:៣០ ល្ងាច ៧:៣០-៨:៣០)
- សំឡេង
- អ្នកវិភាគថា សេចក្តីព្រាងច្បាប់កំណត់សញ្ជាតិតែមួយមើលងាយដល់អង្គព្រះមហាក្សត្រខ្មែរដែលមានសញ្ជាតិលើសពីមួយ
- សហជីពសង្ស័យកាស៊ីណូចិនចង់ដោះដៃពីការទទួលខុសត្រូវ ទើបតម្រូវឲ្យបុគ្គលិកលាឈប់ពីការងារ
- ''របបក្រុងភ្នំពេញតាមធ្វើទុក្ខបុកម្នេញលើព្រះសង្ឃដែលឈឺឆ្អាលរឿងសង្គមជាច្រើនអង្គ''
- ខ្មែរអាមេរិកកាំង សោកស្តាយការបាត់បង់អ្នកលើកស្ទួយព្រះពុទ្ធសាសនា និងវប្បធម៌ខ្មែរនៅលើទឹកដីសហរដ្ឋអាមេរិក
- ពលរដ្ឋរិះគន់ការបោះក្រដាសប្រាក់ ៣ម៉ឺនដាក់រូបលោក ហ៊ុន សែន ថា ជាការមិនឱ្យតម្លៃព្រះមហាក្សត្រ
