សកម្មជនដីធ្លីមកពីសហគមន៍១៩៧គ្រួសារ ឃុំជីខលើ ស្រុកស្រែអំបិល ខេត្តកោះកុង ចំនួន៩នាក់សង្ឃឹមថា សាលាឧទ្ធរណ៍ប្រចាំខេត្តព្រះសីហនុ នឹងផ្ដល់ភាពយុត្តិធម៌ និងទម្លាក់បទចោទទាំងអស់ឱ្យពួកគាត់សេរីភាពឡើងវិញ។ ក្ដីសង្ឃឹមនេះ គឺបន្ទាប់ពីតុលាការជាន់ខ្ពស់ បានបើកសវនាការលើបណ្ដឹងឧទ្ធរណ៍របស់ពួកគាត់ កាលពីថ្ងៃទី២៦ ខែតុលា ហើយតុលាការ គ្រោងនឹងប្រកាសសាលដីកានៅថ្ងៃទី១៦ ខែវិច្ឆិកា ខាងមុខ។ មន្ត្រីឃ្លាំមើលសិទ្ធិមនុស្សយល់ឃើញថា តុលាការគួរតែទម្លាក់បទចោទលើតំណាងសហគមន៍ដីធ្លី៩នាក់ឱ្យមានសេរីភាពឡើងវិញ ចៀសវាងធ្វើឱ្យប៉ះពាល់ដល់ស្មារតីរបស់ពួកគាត់។
តំណាងសហគមន៍មានជម្លោះដីធ្លីនៅខេត្តកោះកុងចំនួន៩នាក់ រួមមាន លោកស្រី ដេត ហួរ លោកស្រី អិន ធូ លោកស្រី កើត នៅ និងតំណាងសហគមន៍៥នាក់ផ្សេងទៀត ទទូចឱ្យតុលាការខេត្តព្រះសីហនុទម្លាក់ចោលបទប្រកាន់ទាំងអស់ដើម្បីឱ្យពួកគាត់មានសិទ្ធិសេរីភាពពេញលេញ។ ពួកគាត់អះអាងថា ពួកគាត់ គ្រាន់តែអនុវត្តសិទ្ធិតវ៉ាដោយសន្តិវិធី និងដាក់ញត្តិស្នើសុំឱ្យអាជ្ញាធរដោះស្រាយវិវាទដីធ្លីរបស់ពួកគាត់ដែលក្រុមហ៊ុនរបស់ ឧកញ៉ា ហេង ហ៊ុយ បានរំលោភយក ពោលគឺពួកគាត់ មិនបានញុះញង់ និងបរិហារបង្កាច់កេរ្តិ៍នរណាឡើយ។
សកម្មជនដីធ្លីសហគមន៍ ១៩៧គ្រួសារ លោកស្រី ដេត ហ៊ួរ ប្រាប់វិទ្យុអាស៊ីសេរីនៅថ្ងៃទី២៧ តុលា ថា គោលបំណងនៃការប្ដឹងជំទាស់នេះគឺដោយសារតែ លោកស្រី និងសមាជិកចំនួន ៨រូបទៀតមិនអាចទទួលយកការសម្រេចរបស់តុលាការខេត្តកោះកុង ដែលកាត់ទោសឱ្យលោកស្រី ជាប់ពន្ធនាគារ ១ឆ្នាំ និងពិន័យជាប្រាក់សរុបចំនួន៤០លានរៀល ទាំងលោកស្រីមិនបានប្រព្រឹត្តខុសឡើយ។
លោកស្រី ដេត ហ៊ួរ៖ «ជុំវិញរឿងនេះខ្ញុំយល់ថា មិនឯករាជ្យចំពោះពួកខ្ញុំ មិនផ្ដល់ភាពយុត្តិធម៌ជូនពួកខ្ញុំបានទើបខ្ញុំប្ដឹងទៅសាលាឧទ្ធរណ៍ដល់ពេលខ្ញុំទៅសាលាឧទ្ធរណ៍ខ្ញុំមើលឃើញសាលាឧទ្ធរណ៍កាលពីម្សិលមិញ គាត់ហាក់មានតម្លាភាព បើទោះជាគាត់មិនទាន់ប្រកាសសាលាក្រមយ៉ាងណាក៏យើងមើលឃើញគាត់សួរពីច្បាប់ទាំងអស់ គាត់អត់បានសួរអ្វីដែលបញ្ច្រាសផ្ទុយទៅនឹងច្បាប់ដូចតុលាការខេត្តកោះកុងទេ»។
សាលាឧទ្ធរណ៍ខេត្តព្រះសីហនុគ្រោងនឹងប្រកាសសាលដីកា លើសំណុំរឿងបទញុះញង់ និងបទបរិហារបង្កាច់កេរ្តិ៍ របស់តំណាងសហគមន៍ទាំង៩នាក់នៅថ្ងៃទី១៦ ខែវិច្ឆិកា។
តំណាងសហគមន៍ ដីធ្លីខេត្តកោះកុង ម្នាក់ទៀត លោកស្រី ផាវ ញ៉ើង ដែលបានចូលរួមឃ្លាំមើលសវនាការរបស់ លោកស្រី ដេត ហួរ កត់សំគាល់ថា អាជ្ញាធរខេត្តព្រះសីហនុនៅតែតាមគំរាមកំហែង លោកស្រី និងពលរដ្ឋផ្សេងដែលចូលរួមឃ្លាំមើលសវនា ថាប្រយ័ត្នជាប់គុកម្ដងទៀតប្រសិនបើមិនឈប់តវ៉ា។ លោកស្រី ផាវ ញ៉ើង ហួសចិត្តនឹងទង្វើរបស់អាជ្ញាធរទាំងអស់នោះដោយគ្រាន់តែលោកស្រី និងពលរដ្ឋប្រមាណជាង១០០ កាន់បដាទាមទារឱ្យតុលាការទម្លាក់បទចោទលើតំណាងសហគមន៍របស់ពួកគាត់។
លោកស្រី ផាវ ញ៉ើង៖ «ពួកខ្ញុំដើរហើរនេះបាត់បង់សេរីភាពក្នុងការដើរហើរហើយ សិទ្ធិសេរីភាពជួបជុំក៏មិនឱ្យជួប ហើយក្នុងការសំដែងមតិម្សិលមិញក៏គេហាមមិនឱ្យនិយាយគ្រាន់តែពួកខ្ញុំនិយាយ ពាក់ព័ន្ធនឹងជាប់ពន្ធនាការអីហ្នឹងក៏គាត់ស្រែកគំហុកមិនឱ្យពួកយើងនិយាយទេកន្លែងនេះ កន្លែងគេធ្វើការ ពួកខ្ញុំឆ្លើយថា កន្លែងដែលធ្វើការនឹងហើយដែលពួកខ្ញុំចង់និយាយខ្ញុំនិយាយដើម្បីឱ្យគេដឹងនេះជាការបញ្ចេញមតិរបស់ពួកខ្ញុំ គាត់ថាមកបញ្ចេញមតិអីនៅកន្លែងហ្នឹងមករញ៉េរញ៉ៃបង្កតែរឿង»។
ជុំវិញបញ្ហានេះអ្នកសម្របសម្រួលគម្រោងធុរកិច្ច និងសិទ្ធិមនុស្ស នៃមជ្ឈមណ្ឌលសិទ្ធិមនុស្សកម្ពុជា (CCHR) លោក វណ្ណ សុផាត សង្កេតឃើញថា មកដល់ពេលនេះមានតំណាងសហគមន៍ដីធ្លី២នាក់ហើយដែលបានតវ៉ារកដំណោះស្រាយដីធ្លីរហូតដល់បាត់បង់ជីវិត ដូច្នេះអាជ្ញាធរពាក់ព័ន្ធគួរតែដោះស្រាយបញ្ចប់វិវាទដីធ្លីនេះឱ្យទាន់ពេលវេលា។
លោក វណ្ណ សុផាត៖ «អ៊ីចឹងសរុបសេចក្ដីមកអាជ្ញាធរយើងហ្នឹងគាត់អនុវត្តតាមតែបទបញ្ជាទេ អ៊ីចឹងគាត់មិនដែលទៅសិក្សាស្រាវជ្រាវ ឬមួយក៏ឃើញបញ្ហាហ្នឹងកើតឡើងអ៊ីចឹងហើយក៏គាត់មិនអាចនិយាយបញ្ហាពីការពិតហ្នឹងបានដែលគឺថាឱ្យតែមានបញ្ហាអីហ្នឹងកើតឡើងពីការរិះគន់ លើកឡើងពីការរកឃើញខ្វះចន្លោះរបស់អាជ្ញាធរ ឬរបស់ក្រុមហ៊ុនអីហ្នឹងគាត់តែងតែការពារគាត់តែងតែដោះសាហើយនិងការពារ»។
ក្រុមពលរដ្ឋ អះអាងថា ក្រុមហ៊ុនរបស់លោក ហេង ហ៊ុយ បានរំលោភយកដីស្រែចម្ការរបស់ពួកគាត់ តាំងតែពីឆ្នាំ២០០៧ ហើយពាក្យបណ្ដឹងរបស់ពលរដ្ឋដែលដាក់នៅក្រសួងរៀបចំដែនដី និងក្រសួងស្ថាប័នពាក់ព័ន្ធដទៃទៀតជាច្រើនលើក ប៉ុន្តែពួកគាត់ មិនត្រឹមតែមិនទទួលបានដំណោះស្រាយនោះទេ ថែមទាំងទទួលរងនូវការគំរាមកំហែងធ្វើបាប និងការប្ដឹងបកពីលោក ហេង ហ៊ុយ ទៅវិញ។ ពលរដ្ឋ និងមន្ត្រីសង្គមស៊ីវិល យល់ថា ការប្រើប្រាស់ប្រព័ន្ធតុលាការនេះ គឺដើម្បីដាក់សម្ពាធឲ្យពួកគាត់បញ្ឈប់ការតវ៉ាទាមទារដីធ្លី ដែលត្រូវបានឧកញ៉ា ហេង ហ៊ុយ រំលោភយកទៅនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។