ពលរដ្ឋស្ទឹងត្រែងថា អាជ្ញាធរមិនទាន់រកដំណោះស្រាយឲ្យពលរដ្ឋរងគ្រោះដីធ្លីពីធ្វើការអាជីវកម្មរ៉ែធ្យូង
2024.09.22
ទិដ្ឋភាពក្រុមហ៊ុន ហ្គ្រីន វូត ឌីវេឡុបមេន ខមភេនី (Green Wood Development Company LTD) នៅខេត្តស្ទឹងត្រែង ថតពីលើអាកាស។
រូប៖ ផ្ដល់ឱ្យ
ពលរដ្ឋនៅខេត្តស្ទឹងត្រែង អះអាងថា អាជ្ញាធរមិនទាន់ស្វែងរកដំណោះស្រាយឲ្យពលរដ្ឋរងគ្រោះពីធ្វើការអាជីវកម្មរ៉ែធ្យូង របស់ក្រុមហ៊ុន ហ្គ្រីន វូត ឌីវេឡុបមេន ខមភេនី (Green Wood Development Company LTD) ដែលបានរំលោភយកដីស្រែចម្ការ និងផលដំណាំរបស់ពលរដ្ឋនោះទេ ក្រៅពីពាក្យសន្យារកដំណោះស្រាយ និងហាមពលរដ្ឋមិនឲ្យចេញតវ៉ា។ ប៉ុន្តែអាជ្ញាធរខេត្តស្ទឹងត្រែងបានចោទពលរដ្ឋទាំងនោះថា ជាអ្នករំលោភយកដីរបស់ក្រុមហ៊ុន។
ក្រោយពីមានការផ្សព្វផ្សាយ និងជំនួបរវាងសមាគមការពារសិទ្ធិមនុស្សអាដហុក (Adhoc) និងអាជ្ញាធរខេត្តស្ទឹងត្រែង ជាងកន្លែងខែមកនេះ អាជ្ញាធរពាក់ព័ន្ធបានចុះទៅជួបប្រជាពលរដ្ឋរងគ្រោះដីធ្លី ពីធ្វើការអាជីវកម្មរ៉ែធ្យូង របស់ក្រុមហ៊ុន ហ្គ្រីន វូត ឌីវេឡុបមេន ដោយបានសន្យាចំពោះមុខប្រជាពលរដ្ឋថានឹងមានដោះស្រាយល្អនៅរយៈពេល២ទៅ៣ខែទៀត ហើយអាជ្ញាធរបានហាមពលរដ្ឋមិនឲ្យចេញតវ៉ា និងប្រើប្រាស់ហិង្សាទៅលើក្រុមហ៊ុនចិនជាដាច់ខាត។
ពលរដ្ឋរងគ្រោះដីធ្លីម្នាក់ សុំមិនបញ្ចេញឈ្មោះ ដោយបារម្ភពីសុវត្ថិភាព អះអាងប្រាប់វិទ្យុអាស៊ីសេរីនៅថ្ងៃទី២១ ខែកញ្ញាថា កាលពីថ្ងៃទី២០ ខែកញ្ញា អាជ្ញាធរបានចុះមកជួបប្រជាពលរដ្ឋរងគ្រោះដីធ្លី ពីធ្វើការអាជីវកម្មរ៉ែធ្យូងជាង ១០នាក់ ហើយអាជ្ញាធរមិនបានរកដំណោះស្រាយ ឬកាត់ឆ្វៀលដី ពីការរងផលប៉ះពាល់នោះទេ។ លោកបន្ថែមថា ពលរដ្ឋព្រមធ្វើតាមការស្នើសុំរបស់អាជ្ញាធរ និងរងចាំដំណោះស្រាយពីអាជ្ញាធរខេត្តមួយនេះ។ លោកថា ពលរដ្ឋនៅតំបន់នោះគ្មានចង់បានអ្វីក្រៅពីដីស្រែចម្ការ និងផ្ដល់សំណងពីការខូចខាតផលដំណាំរបស់ពលរដ្ឋដែលក្រុមហ៊ុនបានឈូសឆាយកន្លងទៅនោះទេ។
ពលរដ្ឋរងគ្រោះដីធ្លីម្នាក់ សុំមិនបញ្ចេញឈ្មោះ៖ «ចង់បានដំណោះស្រាយ ពីកន្លែងណាទៅកន្លែងណា បាន២ហិកតារក៏ដោយ ប្រជាពលរដ្ឋចង់រកដំណោះស្រាយកន្លែងនឹង ឬមួយកន្លែងនឹងបានរស់នៅបានហើយត្រូវបានប៉ុន្មានហិកតារ ប៉ះពាល់ជាមួយក្រុមហ៊ុនតើគេកាត់ឆ្វៀលពីក្រុមហ៊ុនរបៀបម៉េច ហើយប៉ះពាល់ដំណាំប្រជាពលរដ្ឋក្នុងមួយហិកតារតម្លៃប៉ុន្មាន ចន្ទីក៏ដោយ កៅស៊ូក៏ដោយ»។
កាលពីថ្ងៃទី០៥ ខែកញ្ញា នៅក្នុងជំនួប រវាងសមាគមការពារសិទ្ធិមនុស្ស និងអភិវឌ្ឍន៍នៅកម្ពុជា ហៅកាត់ថា(អាដហុក)កន្លងទៅ អាជ្ញាធរខេត្តស្ទឹងត្រែងបានសន្យាថា នឹងចុះសិក្សាស្រាវជ្រាវពីផលប៉ះពាល់ និងរកដំណោះស្រាយជូនប្រជាពលរដ្ឋរងគ្រោះដីធ្លីនៅតំបន់នោះ។
ទោះជាយ៉ាងណាជុំវិញរឿងនេះ អ្នកនាំពាក្យសាលាខេត្តស្ទឹងត្រែង លោក ម៉ែន គុង លើកឡើងថា អាជ្ញាធរខេត្តបានចុះសិក្សាស្រាវជ្រាវរួចរាល់ហើយ គឺប្រជាពលរដ្ឋទាំងអស់នោះជាអ្នករស់នៅលើដីរបស់ក្រុមហ៊ុន ហើយពលរដ្ឋមួយចំនួនទៀតគ្រាន់តែទៅសុំដីរបស់ក្រុមហ៊ុនរស់នៅបណ្ដោះអាសន្នតែប៉ុណ្ណោះ។ លោកបន្ថែមថា ចំពោះសំណងផលដំណាំខូចខាតរបស់ពលរដ្ឋ លោកឲ្យពលរដ្ឋទៅសម្របសម្រួលជាមួយក្រុមហ៊ុន។
លោក ម៉ែន គុង៖ «ជារួមអាជ្ញាធរបានអំពាវនាវទៅដល់ប្រជាពលរដ្ឋរួចហើយត្រូវចូលរួមសហការដោះស្រាយបញ្ហាទាំងអស់នេះ ហើយត្រូវចូលរួមអនុវត្តទៅតាមអ្វីដែលបានជូនដំណឹង ហើយប្រសិនពិតថាតំបន់ទាំងអស់នោះនៅក្នុងដីប្រជាពលរដ្ឋមែនអាជ្ញាធរមិនព្រងើយកន្តើយក្នុងការដោះស្រាយនោះទេ តែដល់ពេលស្រាវជ្រាវទៅពិតប្រាកដណាស់នៅក្នុងដីរបស់ក្រុមហ៊ុន ហើយក្រុមហ៊ុនបានបញ្ជាក់ហើយថា ប្រជាពលរដ្ឋមកសុំរស់នៅបណ្ដោះអាសន្ន ដើម្បីជីវភាពបណ្ដោះអាសន្នផង និងធ្វើការនៅក្នុងក្រុមហ៊ុនផង»។
ឆ្លើយតបនឹងការអះអាងរបស់អាជ្ញាធរ ពលរដ្ឋលើកឡើងថា ពួកគាត់រស់នៅតំបន់នោះជាង២០ឆ្នាំមកហើយ និងអ្នកខ្លះទៀតរស់នៅតាំងពីដូនតារបស់ពួកគាត់មក មិនមែនទៅសុំដីរបស់ក្រុមហ៊ុនរស់នៅដូចការលើកឡើងរបស់អាជ្ញាធរឡើយ។
ទាក់ទិនបញ្ហានេះ អនុប្រធានផ្នែកសិទ្ធិមនុស្ស ដីធ្លី និងធនធានធម្មជាតិនៃសមាគមការពារសិទ្ធិមនុស្សអាដហុក លោក យិន ម៉េងលី យល់ឃើញថា បញ្ហាមួយនេះមិនពិបាកក្នុងការរកដំណោះស្រាយនោះទេ អាជ្ញាធរត្រូវពិនិត្យផ្ទៀងផ្ទាត់រវាងឯកសាររបស់ប្រជាពលរដ្ឋ និងក្រុមហ៊ុនថានរណាជាអ្នកកាន់កាប់ដីទាំងអស់នោះមុន។ លោកបន្ថែមថា ប្រសិនបើអាជ្ញាធរឲ្យពលរដ្ឋរងចាំដំណោះស្រាយពីអាជ្ញាធរ ក្រុមហ៊ុនក៏ត្រូវផ្អាកក្នុងការឈូសឆាយដីស្រែចម្ការ និងផលដំណាំរបស់ប្រជាពលរដ្ឋដូចគ្នា ដើម្បីទុកពេលឲ្យអាជ្ញាធរចុះសិក្សា និងជួបប្រជាពលរដ្ឋស្វែងរកដំណោះស្រាយក្នុងការបញ្ចប់វិវាទមួយនេះ។
លោក យិន ម៉េងលី៖ «អាជ្ញាធរគួរតែចុះទៅសិក្សាផ្ទាល់ជាមួយប្រជាពលរដ្ឋ ចុះទៅជួបប្រជាពលរដ្ឋផ្ទាល់ សិក្សាអំពីបញ្ហាដីនេះ ហើយធ្វើរបាយការណ៍ឲ្យច្បាស់ជូនប្រមុខរដ្ឋាភិបាល អំពីផលប៉ះពាល់ពីការធ្វើអាជីវកម្មនេះទៅ ដើម្បីបញ្ចប់បញ្ហាទៅ»។
កាលពីថ្ងៃទី២០ ខែតុលា ឆ្នាំ២០២១ អតីតរដ្ឋមន្ត្រីក្រសួងរ៉ែ និងថាមពល លោក ស៊ុយ សែម បានចុះហត្ថលេខា ឲ្យក្រុមហ៊ុន ហ្គ្រីន វូត ឌីវេឡុបមេន ខមភេនី (Green Wood Development Company LTD) ធ្វើអាជីវកម្មរ៉ែធ្យូងលើផ្ទៃដី ៨,៨១ គីឡូម៉ែត្រការ៉េ ឬស្មើជិត១ពាន់(៨៨១)ហិកតារ នៅក្នុងភូមិសាស្ត្រតំបន់តាឡាត់ ស្រុកសេសាន ខេត្តស្ទឹងត្រែង។ បច្ចុប្បន្នក្រុមហ៊ុនកំពុងធ្វើអាជីវកម្មរ៉ែធ្យូង ហើយធ្វើឲ្យប៉ះពាល់ដីស្រែចម្ការរបស់ប្រជាពលរដ្ឋជាង១០០គ្រួសារ ដោយមិនទាន់រកដំណោះស្រាយ ឬផ្ដល់សំណងដល់ពលរដ្ឋឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ជនជាតិឥណ្ឌា ៦៧នាក់ទៀត ត្រូវបានសង្គ្រោះចេញពីកន្លែងឆបោកតាមអនឡាញនៅកម្ពុជា
- តុលាការចោទប្រកាន់ពលករខ្មែរដែលបញ្ជូនពីម៉ាឡេស៊ី ពីបទញុះញង់ និងឃុំខ្លួននៅពន្ធនាគារ
- លោក ស៊ុន ចាន់ថុល អះអាងថា ក្រុមហ៊ុនអាមេរិកាំងច្រើនចាប់អារម្មណ៍ចង់មកវិនិយោគនៅកម្ពុជា
- កាស៊ីណូលោក លី យ៉ុងផាត់ រងការចោទប្រកាន់ថា បង្ខាំងមនុស្សឱ្យធ្វើការឆបោកតាមអនឡាញ
- សមត្ថកិច្ចចាប់ខ្លួនអ្នកសារព័ត៌មានឯករាជ្យ ដែលធ្លាប់បានពានពីសហរដ្ឋអាមេរិក គឺលោក ម៉ិច ដារ៉ា