សាលាដំបូងរាជធានីភ្នំពេញចេញដីកាបង្គាប់ឲ្យពលរដ្ឋមានវិវាទដីធ្លីនៅតំបន់បឹងតាមោក ចំនួន១០នាក់ ឲ្យចូលសវនាការ ចាប់ពីថ្ងៃទី២៤ ខែកក្កដា ដល់ថ្ងៃទី០៦ ខែសីហា ពាក់ព័ន្ធនឹងបទហិង្សាដោយចេតនា និងបទប្រឆាំងនឹងអ្នករាជការសាធារណៈ។ ពលរដ្ឋ និងមន្ត្រីអង្គការសង្គមស៊ីវិល លើកឡើងថា អាជ្ញាធរគួរតែដោះស្រាយវិវាទដោយសន្តិវិធី និងទម្លាក់ចោលការចោទប្រកាន់នានាលើពលរដ្ឋ។
ចៅក្រមស៊ើបសួរសាលាដំបូងរាជធានីភ្នំពេញ លោក ឆែ វិវឌ្ឍនៈ កាលពីថ្ងៃទី៩ ខែកក្កដា បានចេញដីកាបង្គាប់ឲ្យចូលខ្លួនដើម្បីសាកសួរ លើពលរដ្ឋមានទំនាស់ដីធ្លីនៅតំបន់បឹងតាមោក ចំនួន១០នាក់ ពីបទហិង្សាមានចេតនា និងបទប្រឆាំងនឹងអ្នករាជការសាធារណៈ ដែលប្រព្រឹត្តទៅនៅក្នុងខណ្ឌព្រែកព្នៅ រាជធានីភ្នំពេញ ប៉ុន្តែចៅក្រមមិនបានបញ្ជាក់ពីកាលបរិច្ឆេទ នៃបទល្មើសឡើយ។ ពលរដ្ឋទាំង១០នាក់នោះមានលោកស្រី ស៊ា ដាវី លោកស្រី គង់ តឿ លោកស្រី ទឹម អ៊ុក និងពលរដ្ឋបឹងតាមោក ចំនួន ៧នាក់ផ្សេងទៀត។
អាជ្ញាធរមូលដ្ឋាន បានយកដីកាបង្គាប់ឲ្យចូលខ្លួន ដែលពុំបានបញ្ជាក់ពីកាលបរិច្ឆេទ នៃបទល្មើសនេះ ប្រគល់ជូនពលរដ្ឋនៅតំបន់បឹងតាមោក នៅថ្ងៃទី១៦ ខែកក្កដា។
ចៅក្រមស៊ើបសួរសាលាដំបូងរាជធានីភ្នំពេញ ថែមទាំងព្រមានចេញដីកាបង្គាប់ឲ្យចាប់ខ្លួន ក្នុងករណីពលរដ្ឋមិនចូលខ្លួនតាមការកំណត់។
ឆ្លើយតបនឹងបញ្ហានេះ តំណាងពលរដ្ឋមានវិវាទដីធ្លីនៅតំបន់បឹងតាមោក លោកស្រី ស៊ា ដាវី ប្រាប់វិទ្យុអាស៊ីសេរី នៅថ្ងៃទី១៦ ខែកក្កដាថា ពលរដ្ឋនៅតំបន់បឹងតាមោក មិនបានប្រើប្រាស់អំពើហិង្សា និងរារាំងអាជ្ញាធរ ដូចការចោទប្រកាន់របស់តុលាការឡើយ។ «»
ចំណែកឯការដុតស្បៃមោងនោះវិញ លោកស្រី ស៊ា ដាវី ឲ្យដឹងដែរថា មានពលរដ្ឋក្នុងសហគមន៍ម្នាក់បានបាត់បង់ផ្ទៃដីអាស្រ័យផលទាំងស្រុង ហើយគាត់ក៏បានដុតស្បៃមោង សម្រាប់ធ្វើស៊ងដាក់ត្រីរបស់គាត់ចោលតែម្ដង ដោយគ្មានចេតនា ធ្វើឲ្យប៉ះពាល់ដល់អ្នកណាឡើយ។ តំណាង សហគមន៍រូបនេះ ស្នើដល់តុលាការឲ្យពិចារណា ជុំវិញហេតុការណ៍ដែលបានកើតឡើងជាក់ស្ដែង និងទម្លាក់ចោលរាល់ការចោទប្រកាន់លើពលរដ្ឋ។ «»
វិទ្យុអាស៊ីសេរី នៅមិនទាន់អាចទាក់ទងអ្នកនាំពាក្យសាលាដំបូងរាជធានីភ្នំពេញ លោក អ៊ី រិន្ទ ដើម្បីសុំការឆ្លើយតបជុំវិញបញ្ហានេះ បាននៅឡើយទេ នៅថ្ងៃទី១៦ ខែកក្កដា។
ទាក់ទងនឹងបញ្ហានេះ ប្រធានអង្គការសម្ព័ន្ធភាពការពារសិទ្ធិមនុស្ស ឬហៅកាត់ថា ច្រាក់ លោក រស់ សុដ្ឋា ប្រាប់វិទ្យុអាស៊ីសេរីថា អាជ្ញាធរគួរតែផ្ដល់ដំណឹងដល់ពលរដ្ឋនៅមុនការចុះអនុវត្តគម្រោងណាមួយ ដើម្បីកុំឲ្យប៉ះពាល់ដល់ទ្រព្យសម្បត្តិនិងមុខរបរសម្រាប់អាស្រ័យផលរបស់ពលរដ្ឋ ។ ប្រធានអង្គការការពារសិទ្ធិមនុស្សរូបនេះ ស្នើដល់តុលាការឲ្យទម្លាក់ការចោទប្រកាន់លើពលរដ្ឋ និងទទូចដល់អ្នកពាក់ព័ន្ធឲ្យដោះស្រាយវិវាទដីធ្លីនៅតំបន់បឹងតាមោក ដោយសន្តិវិធី និងយុត្តិធម៌។
កាលពីថ្ងៃទី២៧ ខែកុម្ភៈ អាជ្ញាធរខណ្ឌព្រែកព្នៅ បានប្រើគ្រឿងចក្រ ចំនួន២ គ្រឿងចុះកាយដីខាងក្រោយផ្ទះពលរដ្ឋនៅតំបន់បឹងតាមោក ក្នុងសង្កាត់សំរោង ខណ្ឌព្រែកព្នៅ រាជធានីភ្នំពេញ ដើម្បីសាងសង់ប្រឡាយ ដែលមានទទឹង ៤០ម៉ែត្រ ដើម្បីរំដោះទឹកជំនន់។ ប៉ុន្តែការដាក់គ្រឿងចក្រកាយប្រឡាយនោះ អាជ្ញាធរពុំបានជូនដំណឹងដល់ពលរដ្ឋ ដែលកំពុងអាស្រ័យផលលើផ្ទៃបឹងឡើយ ថែមទាំងបានប្រើប្រាស់អំពើហិង្សាលើស្ត្រី និងកុមារ បណ្ដាលឲ្យមានស្ត្រីម្នាក់ដួលសន្លប់ នៅពេលគាត់ព្យាយាមរារាំងមិនឲ្យអាជ្ញាធរកាយដី ដែលគាត់អាស្រ័យផលចិញ្ចឹមត្រី និងដាំបន្លែផ្សេងៗ។
នេះជាលើកទី២ ហើយដែលសាលាដំបូងរាជធានីភ្នំពេញ ចេញដីកាកោះហៅពលរដ្ឋរស់នៅតំបន់បឹងតាមោកឲ្យចូលបំភ្លឺនៅតុលាការ ទាក់ទងនឹងការហាមឃាត់អាជ្ញាធរមិនឲ្យកាយដី ដែលពួកគាត់កំពុងអាស្រ័យផល។ កាលពីខែមេសា ពលរដ្ឋរស់នៅតំបន់បឹងតាមោក បានច្រានចោលដីកាកោះហៅរបស់សាលាដំបូងរាជធានីភ្នំពេញ ពាក់ព័ន្ធនឹងការចោទប្រកាន់ដដែលនេះ ដោយសារតែដីកាកោះនោះ មិនបានបញ្ជាក់ពីពេលវេលា និងទីកន្លែងប្រព្រឹត្តបទល្មើសឲ្យបានច្បាស់លាស់។
ទោះជាយ៉ាងណា ពលរដ្ឋនៅតំបន់បឹងតាមោក បញ្ជាក់ថា ពួកគាត់នឹងចូលខ្លួនទៅបំភ្លឺនៅសាលាដំបូងរាជធានីភ្នំពេញ តាមដីកាកោះរបស់តុលាការ។
ពលរដ្ឋ និងមន្ត្រីអង្គការសង្គមស៊ីវិល ទទូចដល់តុលាការឲ្យទម្លាក់ការចោទប្រកាន់លើពលរដ្ឋ និងស្នើដល់ភាគីពាក់ព័ន្ធដោះស្រាយវិវាទដីធ្លី រ៉ាំរ៉ៃដែលអូសបន្លាយពេលជិត៥ឆ្នាំនៅតំបន់បឹងតាមោក ដោយសន្តិវិធី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។