ពលរដ្ឋ ៤ ភូមិខេត្តកំពង់ស្ពឺបារម្ភបាត់បង់ដីស្រែ ក្រោយពីកាត់ឆ្វៀលដីប្រគល់ជូននគរបាលជាតិ
2024.07.23
ពលរដ្ឋក្រីក្រជាច្រើនគ្រួសារ រស់នៅក្នុងភូមិចំនួន៤ នៅខេត្តកំពង់ស្ពឺព្រួយបារម្ភខ្លាចក្រែង បាត់បង់ដីស្រែចម្ការចិញ្ចឹមជីវិត ក្រោយពីរដ្ឋាភិបាលបានកាត់ឆ្វៀលដីជាង ៣ ពាន់ហិកតារ (៣.០០១) ប៉ះចំដីស្រែចម្ការរបស់ពួកគាត់ ដែលអាជ្ញាធរមិនទាន់ដោះស្រាយនៅឡើយ។
ពលរដ្ឋរាប់រយគ្រួសាររស់នៅក្នុងភូមិចំនួន ៤រួម មានភូមិ សុរិយា ភូមិថ្មី ភូមិកេះ និងភូមិដូនជន់ ក្នុងឃុំតាសាល ស្រុកឱរ៉ាល់ កំពុងកើតទុក្ខមិនសុខចិត្ត ខ្លាចក្រែងរបូតដីស្រែចម្ការចិញ្ចឹមជីវិតទាំងស្រុង នៅកៀកនឹងភូមិកំណើតរបស់ពួកគាត់។
អ្នកភូមិថា អាជ្ញាធរខេត្តនេះមិនទាន់ចាត់វិធានការដោះស្រាយពីផលប៉ះពាល់ជាមួយពលរដ្ឋនៅឡើយទេ តែបែរជាដាក់គ្រឿងចក្រកាយក្រវាត់ព្រំប្រទល់ដី ដោយគ្មានការពិភាក្សា និងជូនដំណឹងប្រាប់ពលរដ្ឋជាមុន។
ពលរដ្ឋរងផលប៉ះពាល់រស់នៅភូមិសុរិយា លោក លី រ៉ាន់ ប្រាប់វិទ្យុអាស៊ីសេរីនៅថ្ងៃទី២២ កក្កដាថា ពលរដ្ឋរស់នៅតំបន់នោះ បានរងគ្រោះម្តងហើយម្តងទៀត បន្ទាប់ពីបាត់បង់ព្រៃឈើ ហើយបច្ចុប្បន្នការដកហូតដីស្រែចម្ការរបស់ពួកគាត់ពីសំណាក់រដ្ឋាភិបាល បានធ្វើឱ្យអ្នកភូមិកំពុងដេកភ័យ ខ្លាចក្រែងគ្មានដីបង្កបង្កើនផលចិញ្ចឹមជីវិត។
លោកបន្ថែមថា ពលរដ្ឋចំនួន ៤ភូមិ មានទម្លាប់ដាំដុះ និងធ្វើស្រែនៅតំបន់នោះជាបន្តបន្ទាប់ជិត ២០ ឆ្នាំមកហើយ ប្រសិនបើអាជ្ញាធរដកហូត ហាក់ដូចសម្លាប់ពួកគាត់ទាំងរស់។
លោក លី រ៉ាន់៖ «ពួកគាត់ជួបការលំបាកស្រែកក៏គ្មានធ្វើ ដំណាំដាំដុះក៏ដាំមិនបានទៀតឥឡូវ ពួកគាត់ជួបការលំបាកគ្រប់បែបយ៉ាង អត់មានការងារធ្វើ ហើយស្រែចម្ការក៏ហូបអត់គ្រប់គ្រាន់ ជាឆ្នាំងបាយចិញ្ចឹមជីវិត ប្រសិនបើពួកគាត់យកអស់ទៀតស្មើនឹងចងករពួកខ្ញុំសម្លាប់»។
ចាប់តាំងពីឆ្នាំ២០២២ មកទល់ពេលនេះ អ្នកភូមិរាប់រយនាក់ បានលើកគ្នាតវ៉ា ២ដងមកហើយ ដោយរារាំងអាជ្ញាធរ ខេត្តកំពង់ស្ពឺមិនឱ្យកំណត់ព្រំដី កាត់ឆ្វៀលដីជាង ៣ ពាន់ហិកតារ (៣.០០១) ដើម្បីសាងសង់ទីលានហ្វឹកហ្វឺននគរបាលជាតិ ឋិតក្នុងស្រុកឱរ៉ាល់ ខេត្តកំពង់ស្ពឺ»។
វិទ្យុអាស៊ីសេរីមិនទាន់អាចទាក់ទងសុំការបំភ្លឺរឿងនេះ ពីអភិបាលខេត្តកំពង់ស្ពឺដែលទើបឡើងកាន់ដំណែងថ្មី លោក ជាម ច័ន្ទសោភ័ណ បាននៅឡើយទេ នៅថ្ងៃទី២២ កក្កដា ដោយទូរស័ព្ទហៅចូលតែមានអ្នកចុចបិទ។
រីឯមេឃុំតាសាល លោក អឺល សារ៉ា ថ្លែងថា ពលរដ្ឋរអ៊ូរទាំរឿងដំណាំដែលពួកគាត់ខិតខំដាំដុះត្រូវខូចខាត ក៏ប៉ុន្តែពលរដ្ឋទាំង៤ភូមិកំពុងរង់ចាំ ដំណោះស្រាយពីបញ្ហានេះ។
លោកបដិសេធមិនបកស្រាយលម្អិតរឿងនេះទេ ដោយអះអាងអាជ្ញាធរថ្នាក់ជាតិ និងអាជ្ញាធរខេត្តកំពុងប្រជុំរកដំណោះស្រាយជូនពលរដ្ឋនៅថ្ងៃទី២២ កក្កដានេះ។
កាលពីថ្ងៃទី២១ ខែកញ្ញា ឆ្នាំ ២០២០ រដ្ឋលេខាធិការនៃស្តីទីការគណៈរដ្ឋមន្ត្រី លោក កែន សត្ថា បានសរសេរលិខិតផ្ញើទៅក្រសួងបរិស្ថាន និងអភិបាលខេត្តកំពង់ស្ពឺ ស្តីពីការផ្តល់ដីជូនបណ្ឌិតសភានគរបាលកម្ពុជាចំនួនជាង ៣ ពាន់ហិកតារ (៣.០០១) ដើម្បីសាងសង់ទីលានហ្វឹកហ្វឺនកងកម្លាំងនគរបាលជាតិ។
លោក កែន សត្ថា អះអាងថា ទីតាំងស្នើនេះ មានផលប៉ះពាល់ជាមួយពលរដ្ឋ បណ្ឌិតសភានគរបាលកម្ពុជាត្រូវដោះស្រាយ ដោយសហការជាមួយក្រសួងបរិស្ថាន រដ្ឋបាលខេត្តកំពង់ស្ពឺ និងអាជ្ញាធរមូលដ្ឋាន។
ជុំវិញរឿងនេះ ប្រធានអង្គការប្រឆាំងអំពើពុករលួយទប់ស្កាត់ការបំផ្លាញធនធានធម្មជាតិ និងការពារសិទ្ធិពលរដ្ឋ (ACNCIPO) លោក ជា ហ៊ាន យល់ថា អាជ្ញាធរអាចនឹងពិបាកដោះស្រាយរឿងនេះព្រោះដីដែលកាត់ឆ្វៀលក្នុងតំបន់នោះ ឋិតក្នុងដែនជម្រកសត្វព្រៃភ្នំឱរ៉ាល់ មានការទិញលក់ដូរតៗគ្នា ដោយមានការឃុបឃិតគ្នាជាមួយអាជ្ញាធរមូលដ្ឋានមួយចំនួន។
លោកយល់ថា ពលរដ្ឋក្រីក្រមានដីស្រែចម្ការ និងមានដំណាំដាំដុះ ដែលកាន់កាប់ជាក់ស្តែងជាច្រើនឆ្នាំមកហើយ អាជ្ញាធរគួរតែមានដំណោះស្រាយឱ្យបានសមរម្យជូនពួកគាត់៖
លោក ជា ហ៊ាន៖ «ទីតាំងដីដែលពួកគាត់អាស្រ័យផលយូរហើយគឺថា រដ្ឋត្រូវតែបំពេញតួនាទី ក្នុងនាមជារដ្ឋត្រូវតែផ្ដល់គោលនយោបាយអនុវត្តជួយពួកគាត់ឱ្យបានស្របច្បាប់ ហើយអ្នកដែលមានការទិញលក់អាហ្នឹងគួរតែចិត្តវិធានការផ្លូវច្បាប់»។
ពលរដ្ឋចំនួន ៤ភូមិកំពុងរង់ចាំអាជ្ញាធរដោះស្រាយបញ្ហានេះ តែប្រសិនបើគ្មានដំណោះស្រាយទេ អ្នកភូមិនឹងលើកគ្នាតវ៉ាទ្រង់ទ្រាយធំ នៅសាលាខេត្តកំពង់ស្ពឺ។
អ្នកភូមិចាត់ទុកដីក្នុងតំបន់នោះជាអាយុជីវិតនៅកៀកនឹងភូមិកំណើតរបស់ពួកគាត់ងាយស្រួលដាំដុះ បង្កបង្កើនផល និងចិញ្ចឹមសត្វ ដោយមិនធ្វើចំណាកស្រុក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- អ្នកតាមដាននយោបាយថា អាមេរិកដាក់ទណ្ឌកម្ម លោក លី យ៉ុងផាត់ ជាការកាត់ផ្ដាច់សរសៃឈាមសេដ្ឋកិច្ចរបស់បក្សកាន់អំណាច
- កញ្ញា ឈឹម ស៊ីថរ រក្សាជំហរតស៊ូ ដើម្បីសេរីភាពសហជីព និងការពារផលប្រយោជន៍កម្មករក្រោយមានសេរីភាព
- ហេតុអ្វីបានជាអាមេរិកដាក់ទណ្ឌកម្ម «ស្តេចកោះកុង»?
- សមត្ថកិច្ចចាប់ខ្លួន លោក ហោ សុខុន អតីតព្រះចៅអធិការវត្តច្បារអំពៅ និងមនុស្ស ៣ទៀត
- ក្រសួងការបទេស និងគណបក្សប្រជាជនកម្ពុជាចាត់ទុកថា ជារឿងអយុត្តិធម៌ ដែលក្រសួងរតនាគារសហរដ្ឋអាមេរិកដាក់ទណ្ឌកម្មលើលោក លី យ៉ុងផាត់