គ្រូបង្រៀន ១១នាក់ ប្ដឹងឧទ្ធរណ៍ពាក់ព័ន្ធនឹងសំណុំរឿងបណ្ដេញគ្រូបង្រៀនចេញពីក្របខ័ណ្ឌរបស់ក្រសួងអប់រំ
2019.05.01
លោក រ៉ុង ឈុន ប្រធានសហភាពសហជីពកម្ពុជា និងអតីតប្រធានសមាគមគ្រូបង្រៀនឯករាជ្យកម្ពុជា ថ្ងៃទី១ ខែឧសភា ឆ្នាំ២០១៩។
រូប៖ ហ្វេសប៊ុក CENTRAL
តុលាការរបបក្រុងភ្នំពេញបានសម្រេចទាត់ចោលបណ្ដឹងរបស់ក្រុមគ្រូបង្រៀន ១១នាក់ និងបង្គាប់ឱ្យពួកគេបង់ប្រាក់ប្រដាប់ក្ដី ចំពោះសំណុំរឿងបណ្ដេញគ្រូបង្រៀនចេញពីក្របខ័ណ្ឌរបស់ក្រសួងអប់រំ។ ក្រុមគ្រូបង្រៀនសម្រេចថា នឹងប្ដឹងទាស់ទៅសាលាឧទ្ធរណ៍ប្រឆាំងនឹងសេចក្ដីនេះដោយពួកគេចាត់ទុកថា សំណុំរឿងនេះមានលក្ខណៈនយោបាយជាងការអនុវត្តតាមផ្លូវច្បាប់។
ប្រធានសហភាពសហជីពកម្ពុជាលោក រ៉ុង ឈុន និងអតីតប្រធានសមាគមគ្រូបង្រៀនឯករាជ្យកម្ពុជា បានចាត់ទុកសេចក្ដីសម្រេចរបស់តុលាការរបបក្រុងភ្នំពេញថា ជារឿងអយុត្តិធម៌ចំពោះសំណុំរឿងក្រុមគ្រូបង្រៀន១១ដែលក្រសួងអប់រំបានបណ្ដេញចេញពីក្របខ័ណ្ឌក្រសួងអប់រំ។
លោក រ៉ុង ឈុន បានបញ្ជាក់ថា ក្រុមគ្រូបង្រៀនទាំង ១១នាក់សម្រេចថា នឹងពឹងពាក់រកមេធាវីប្ដឹងទាស់ទៅកាន់សាលាឧទ្ធរណ៍ដើម្បីទាមទាររកយុត្តិធម៌ ចំពោះសំណុំរឿងនេះ៖ «អ្វីដែលយើងទទួលបាននេះធ្វើឱ្យយើងមានការខកចិត្តយ៉ាងខ្លាំងទៅនឹងលទ្ធផលរបស់តុលាការសាលាដំបូងប្រកាសទាត់ចោលនៅរាល់បណ្ដឹងរបស់គ្រួបង្រៀនទាំង ១១នាក់ក្នុងការស្វះស្វែងរកយុត្តិធម៌នេះបាទ»។
លោក រស់ ពិសិដ្ឋ ចៅក្រមសាលាដំបូងក្រុងភ្នំពេញកាលពីថ្ងៃទី២២ ខែមេសា បានសម្រេចទាត់ចោលសំណុំរឿងក្រុមគ្រូបង្រៀនចំនួន ១១នាក់ ដែលក្រសួងអប់រំបានលុបឈ្មោះចេញពីក្របខ័ណ្ឌគ្រូបង្រៀន។ តុលាការក៏បានសម្រេចឱ្យក្រុមគ្រូបង្រៀនទាំង ១១នាក់បង់ប្រាប់ប្រដាប់ក្ដីផងដែរ។
អាស៊ីសេរីមិនអាចទាក់ទងអ្នកនាំពាក្យតុលាការក្រុងភ្នំពេញ លោក លី សុផាន់ណា បានទេកាលពីថ្ងៃទី៣០ មេសា។
ក្រុមគ្រូបង្រៀនសរុប ១១នាក់ ត្រូវបានក្រសួងអប់រំលុបឈ្មោះចេញពីក្របខ័ណ្ឌជាបន្តបន្ទាប់ កាលពីខែមករា ឆ្នាំ២០១៨ កន្លងទៅ ក្រោមហេតុផលថា ពួកគេបោះបង់ចោលការងារ និងមួយចំនួនទៀតអវត្តមានដោយគ្មានច្បាប់អនុញ្ញាត។
អ្នកនាំពាក្យក្រសួងអប់រំលោក ឌី ខាំបូលី មិនបានផ្ដល់សេចក្ដីពន្យល់បន្ថែមទាក់ទិនទៅនឹងសេចក្ដីសម្រេចរបស់តុលាការទេ។ លោកបញ្ជាក់ថា លោកគោរពទៅនឹងសេចក្ដីសម្រេចរបស់តុលាការគឺដោយសារតែយើងគ្មានសិទ្ធិបញ្ជាចំពោះសំណុំរឿងនេះទេ៖ «ជារួមអត់មានយោបល់អ្វីទាំងអស់ពីព្រោះនេះជានីតិវិធីតាមផ្លូវច្បាប់របស់តុលាការ។អញ្ចឹងក្រសួងមិនមានយោបល់អ្វីទាំងអស់ទៅលើការសម្រេចហ្នឹង ជាឆន្ទានុសិទ្ធិរបស់តុលាការហ្នឹងជាគោលការច្បាប់ដែលមានជាធរមាន»។
ក្រុមគ្រូបង្រៀន ចំនួន១១នាក់ បានដាក់បណ្ដឹងទៅតុលាការរបបក្រុងភ្នំពេញកាលពីថ្ងៃទី១៦ ខែមករា ឆ្នាំ២០១៩ ដើម្បីជួយរកយុត្តិធម៌រឿងក្រសួងលុបឈ្មោះចេញពីក្របខ័ណ្ឌនេះ ធ្លាប់បានចូលខ្លួនទៅឆ្លើយបំភ្លឺនៅសាលាដំបូងរាជធានីភ្នំពេញ នៅថ្ងៃទី២៧ កុម្ភៈ។ ក៏ប៉ុន្តែកាលចូលទៅបំភ្លឺក្នុងអង្គសវនាការនៅពេលនោះមិនទាន់ចេញជាលទ្ធផលអ្វីនៅឡើយទេ ដោយតុលាការសម្រេចលើកពេលនីតិវិធីត្រៀមទៅថ្ងៃក្រោយទៀត។
អតីតគ្រូបង្រៀននៅវិទ្យាល័យក្រុងព្រះសីហនុលោក លី ឌី មានប្រសាសន៍ថាការសម្រេចរបស់តុលាការគ្មានអ្វីចម្លែកទេ គឺធ្វើឡើងតាមនិន្នាការនយោបាយនយោបាយ៖ «ត្រូវសិក្សាឡើងវិញថ្ងៃបង្រៀនយប់ឡើងធ្វើទាហានតាំងពីជំនាន់រដ្ឋកម្ពុជា។ចុងបញ្ចប់ខ្ញុំទទួលបានក្នុងអារម្មណ៍មួយស្ដាយអ្វីដែលយើងខំពីក្មេងមកពីមុនទេ។ សុំឱ្យលោកពិចារណាឡើងវិញបើធ្វើប៉ះលើបងប្អូន ឬកូនចៅលោកគ្រូវិញនឹងឈឺចាប់ហើយ»។
ក្រុមគ្រូបង្រៀនដែលក្រសួងអប់រំការលុបឈ្មោះពួកគេចេញពីក្របខ័ណ្ឌគ្រូបង្រៀនធ្លាប់បាននិយាយថា ពួកគេបានបានដាក់ពាក្យសុំអនុញ្ញាតឱ្យស្ថិតនៅក្រៅក្របខ័ណ្ឌ ដើម្បីទៅបម្រើការជាសមាជិកក្រុមប្រឹក្សាឃុំសង្កាត់ ក្រុមប្រឹក្សាស្រុកខណ្ឌ ក្រុមប្រឹក្សារាជធានីខេត្តក្រុង និងជាសមាជិកគណៈកម្មាធិការជាតិរៀបចំការបោះឆ្នោតកាលពីឆ្នាំ២០១៨។ ក៏ប៉ុន្តែក្រោយពេលរបបក្រុងភ្នំពេញរំលាយគណបក្សសង្គ្រោះជាតិកាលពីខែវិច្ឆិកា ឆ្នាំ២០១៧ នោះមក ពួកគេក៏ត្រូវបាត់បង់តួនាទី និងបានលាលែងចេញពីតំណែងនោះវិញ។ ក្រោយពីអស់តួនាទីនៅអង្គភាពថ្មី ពួកគេបានដាក់ពាក្យសុំចូលបម្រើការងារនៅក្របខ័ណ្ឌជាគ្រូបង្រៀនវិញ ក៏ប៉ុន្តែក្រសួងមិនត្រឹមតែមិនបានចេញប្រកាសឱ្យពួកគេចូលបម្រើការងារវិញនោះទេ គឺថែមទាំងបានលុបឈ្មោះពួកគេចេញពីក្របខ័ណ្ឌដើមនេះទៀតផង។
ទោះជាយ៉ាងណាក្ដី ក្រុមគ្រូបង្រៀនទាំងនោះមិនបោះបង់ចោលការទាមទាររបស់ខ្លួនដែរ។ ពួកគេនិយាយថា នឹងស្វះស្វែងយុត្តិធម៌ ចំពោះរឿងក្ដីនេះបន្តទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ពលករខ្មែរមួយចំនួនធ្វើការនៅប្រទេសថៃប្រកាសស្វាគមន៍អមដំណើរលោក សម រង្ស៊ី វិលចូលស្រុកវិញ
- លោក ហ៊ុន សែន អះអាងថា សេដ្ឋកិច្ចកម្ពុជាលែងត្រូវការប្រព័ន្ធអនុគ្រោះពន្ធEBA ពីអឺរ៉ុបហើយ
- ពលរដ្ឋបង្ខំចិត្តចាកចេញពីតំបន់អង្គរ ប្រឈមនឹងជីវភាពខ្វះខាត និងបាត់បង់មុខរបរ
- ម្ចាស់អាជីវកម្មទាំងខ្នាតតូច និងខ្នាតធំកំពុងជួបវិបត្តិបង្វិលសាច់ប្រាក់មិនទាន់
- ពលរដ្ឋខ្មែរកម្ពុជាក្រោមនៅវៀតណាមរងការហាមឃាត់ និងប្រើហិង្សាពេលប្រារព្ធពិធីរំឭកការបាត់បង់ទឹកដី