ក្រសួងយុត្តិធម៌ស្នើលោកនាយករដ្ឋមន្ត្រី ហ៊ុន សែន ឲ្យលើកលែងទោស និងបន្ធូរបន្ថយទោស ទណ្ឌិត២៨៣នាក់ ក្នុងឱកាសទិវាជ័យជំនះ ៧មករា ឆ្នាំ២០២៣ ខាងមុខ។
អ្នកនាំពាក្យក្រសួងយុត្តិធម៌ លោក គឹម សន្តិភាព ប្រាប់កាសែតក្នុងស្រុកថា គណៈកម្មការជាតិពិនិត្យ និងវាយតម្លៃបញ្ជីឈ្មោះទណ្ឌិត បានបញ្ជូនសំណើទៅលោក នាយករដ្ឋមន្ត្រីហ៊ុន សែន រួចហើយ ដើម្បីពិនិត្យ និងសម្រេចស្នើសុំព្រះមហាក្សត្រ ផ្តល់ការអនុគ្រោះទោសដល់ទណ្ឌិតចំនួន ២៨៣នាក់ ក្នុងនោះមានស្រី ២៧ នាក់។
ក្នុងចំណោមទណ្ឌិតទាំង២៨៣នាក់ នោះ មានតែទណ្ឌិតស្ត្រីម្នាក់គត់ ស្នើសុំដោះលែងពីពន្ធនាគារ។ ចំណែកទណ្ឌិត២៨២នាក់ ផ្សេងទៀត គឺសុំបន្ធូរបន្ថយទោស ចន្លោះពី៣ខែដល់ ១២ខែ។
គេនៅមិនទាន់ដឹងថា ទណ្ឌិតទាំងនោះជាអ្នកទោសប្រភេទណាទេ។ រដ្ឋាភិបាលកម្ពុជា សម្រេចលើកលែងទោស និងបន្ធូរបន្ថយទោសដល់ទណ្ឌិត ចំនួន៥ដងក្នុងមួយឆ្នាំៗ គឺ នៅថ្ងៃទិវាជ័យជម្នះលើរបបប្រល័យពូជសាសន៍៧មករា បុណ្យចូលឆ្នាំខ្មែរ បុណ្យវិសាខបូជា បុណ្យឯករាជ្យជាតិ និងពិធីបុណ្យអុំទូក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។