រដ្ឋសភា​ឯកបក្ស​ត្រៀម​បើក​សម័យប្រជុំ​ពិភាក្សា​ពង្រាង​ច្បាប់​ស្ដីពី​របប​សន្តិសុខ​សង្គម

ដោយ សុ ជីវី
2019-10-02
អ៊ីម៉ែល
មតិ
Share
បោះពុម្ព
រដ្ឋសភា​ឯកបក្ស បើក​សម័យ​ប្រជុំ​លើក​ទី១ នីតិកាលទី៦ កាល​ពី​ថ្ងៃ​ទី១៣ ខែ​ធ្នូ ឆ្នាំ២០១៨។
រដ្ឋសភា​ឯកបក្ស បើក​សម័យ​ប្រជុំ​លើក​ទី១ នីតិកាលទី៦ កាល​ពី​ថ្ងៃ​ទី១៣ ខែ​ធ្នូ ឆ្នាំ២០១៨។
រូប៖ ហ្វេសប៊ុក រដ្ឋសភា

រដ្ឋសភា​ឯកបក្ស កំពុង​ត្រៀម​បើក​សម័យប្រជុំ​លើក​ទី​៣ នីតិកាល​ទី៦ នៅ​ថ្ងៃ​ទី៤ តុលា។ ក្នុង​សម័យ​ប្រជុំ​លើក​ទី​៣​នោះ រដ្ឋសភា​ឯក​បក្ស នឹង​ដាក់​របៀបវារៈ​ចំនួន​៧ ឱ្យ​សមាជិក​ពិភាក្សា និង​អនុម័ត។ ក្នុង​នោះ ក៏​មាន​ច្បាប់​ស្ដីពី​របប​សន្តិសុខ​សង្គម​ផង​ដែរ។ សង្គម​ស៊ីវិល សម្ដែង​ការ​សោកស្ដាយ​ដែល​រដ្ឋសភា​មិន​ឱ្យ​ពួកគេ​ចូលរួម​ពិភាក្សា​ផ្ដល់​យោបល់​បន្ថែម​លើ​សេចក្ដីព្រាងច្បាប់​នេះ ជា​មុន​សិន។

ប្រធាន​សមាគម​ឯករាជ្យ​នៃ​សេដ្ឋកិច្ច​ក្រៅ​ប្រព័ន្ធ លោក វន់ ពៅ ជា​តំណាង​ម្នាក់ ក្នុងចំណោម​សង្គម​ស៊ីវិល ១១​អង្គការ សម្ដែង​ការ​សោកស្ដាយ​ដែល​រដ្ឋសភា មិន​បាន​ផ្ដល់​សេចក្ដី​ព្រាងច្បាប់​ចុងក្រោយ​ស្ដីពី​របប​សន្តិសុខ​សង្គម ដែល​បាន​ស្នើសុំ ដើម្បី​ចូលរួម​ផ្ដល់​មតិយោបល់​។ គិត​ត្រឹម​ថ្ងៃ​ទី១ តុលា ខាង​រដ្ឋសភា​មិន​ទាន់​ឆ្លើយតប​នឹង​សំណើ​របស់​ក្រុម​សង្គម​ស៊ីវិល​ឡើយ។ លោក​ថា ប្រសិនបើ​ច្បាប់​នេះ ត្រូវ​បាន​អនុម័ត​ដោយ​គ្មាន​ការ​ចូលរួម​ពី​ភាគី​ពាក់ព័ន្ធ វា នឹង​មិន​បម្រើ​ផលប្រយោជន៍​កម្មករ​ពេញ​លេញ ដូច​ច្បាប់​មុនៗ​ដែរ គឺ​ច្បាប់​ស្ដីពី​សហជីព ច្បាប់​ស្ដីពី​អង្គការ សង្គម​ស៊ីវិល​ជាដើម។

ក្រុម​អង្គការ​សង្គម​ស៊ីវិល​ចំនួន​១១ ដែល​ធ្វើការ​ពាក់ព័ន្ធ​នឹង​របប​សន្តិសុខ​សង្គម កាលពី​ថ្ងៃ​ទី​៩ កញ្ញា បាន​សរសេរ​លិខិត​រួមគ្នា ដាក់​ទៅ​ប្រធាន​រដ្ឋសភា​ឯក​បក្ស លោក ហេង សំរិន ស្នើសុំ​អត្ថបទ​សេចក្ដី​ព្រាងច្បាប់​ស្ដីពី​របប​សន្តិសុខ​សង្គម និង​ពិគ្រោះ​យោបល់​ឱ្យ​បាន​ពេញលេញ​ជាមួយ​ភាគី​ពាក់ព័ន្ធ​។

លោក វន់ ពៅ ពន្យល់​ថា សេចក្ដីព្រាងច្បាប់​ស្ដីពី​របប​សន្តិសុខ​សង្គម មាន​ពាក់ព័ន្ធ​ជាមួយ​កម្មករ ទាំង​ក្នុង​ប្រព័ន្ធ និង​ក្រៅ​ប្រព័ន្ធ ហើយ អត្ថបទ​នៃ​សេចក្តី​ព្រាង​នេះ មិន​ទាន់​បាន​បង្ហាញ​ដល់​សាធារណៈ និង​មិនបាន​ពិភាក្សា ពិគ្រោះ​យោបល់ ជាមួយ​សង្គម​ស៊ីវិល​ពាក់ព័ន្ធ​ឡើយ ទាំង​នៅ​ក្នុង​ដំណាក់កាល​ព្រាង​របស់​រដ្ឋាភិបាល និង​រដ្ឋសភា​។ ដូច្នេះ​ទើប​សង្គម​ស៊ីវិល ស្នើសុំ​ឱ្យ​រដ្ឋសភា បើក​ឱ្យ​មានការ​ពិនិត្យ និង​ផ្ដល់​យោបល់​ពី​សង្គម​ស៊ីវិល​សិន មុន​អនុម័ត៖ «ព្រួយបារម្ភ​ថា ច្បាប់​ហ្នឹង​ចេញទៅ មិន​បាន​បម្រើ​ផលប្រយោជន៍​យើង ជា​ភាគី​របស់​កម្មករ​ណា។ អ៊ីចឹង​ហើយ បាន​យើង​មានការ​ព្រួយបារម្ភ ហើយ​យើង​មានការ​ស្នើសុំ​សេចក្ដីព្រាង​ហ្នឹង​ពី​រដ្ឋសភា ដើម្បី​ពិនិត្យមើល ហើយ​យើង​សុំ​ជជែក​ពិភាក្សា​ជាមួយ​រដ្ឋសភា​បន្ថែម​ទៀត​ហ្នឹង​ឯង។ ប៉ុន្តែ​រហូត​មក​ដល់​ពេល​នេះ រដ្ឋសភា​មិនទាន់​បាន​ផ្ដល់​សេចក្ដីព្រាង​មក​ឱ្យ​យើង​នៅឡើយ​ទេ»

គណៈរដ្ឋមន្ត្រី​នៃ​របប​ក្រុងភ្នំពេញ បាន​អនុម័ត​សេចក្ដីព្រាងច្បាប់​ស្ដីពី​របប​សន្តិសុខ​សង្គម កាលពី​ថ្ងៃ​ទី២ ខែ​សីហា។ ប៉ុន្តែ​ខ្លឹមសារ​នៃ​សេចក្តី​ព្រាងច្បាប់​នេះ មិន​ត្រូវ​បាន​នាយកដ្ឋាន​នីតិកម្ម បង្ហាញ​ជា​សាធារណៈ​ឡើយ​។ សេចក្តី​ព្រាងច្បាប់​នេះ ត្រូវ​បាន​ក្រសួង​ការងារ និង​បណ្ដុះបណ្ដាល​វិជ្ជាជីវៈ តាក់តែង​កាលពី​ខែ​មិថុនា ឆ្នាំ​២០១៨ ក្នុង​បំណង​បង្កើត​ឱ្យ​មាន​របប​សន្តិ​សុខ​សង្គម សម្រាប់​ប្រជាជន​ទូទៅ ស្របតាម​គោលនយោបាយ​ជាតិ​គាំពារ​សង្គម ឆ្នាំ​២០១៦ ដល់​ឆ្នាំ​២០២៥។ គោលនយោបាយ​ជាតិ គាំពារ​សង្គម​នេះ មាន​៤​ផ្នែក​គឺ ផ្នែក​ប្រាក់​សោធន ផ្នែក​ថែទាំ​សុខភាព ផ្នែក​ហានិភ័យ​ការងារ និង​ផ្នែក​និកម្មភាព​ការងារ។ ទោះ​យ៉ាងណា ក្រសួង​ការងារ និង​បណ្ដុះបណ្ដាល​វិជ្ជាជីវៈ ធ្លាប់​អះអាង​ថា បាន​ពិគ្រោះ​យោបល់ ជាមួយ​ក្រុម​អ្នកជំនាញការ​ផ្នែក​ច្បាប់​របស់​អង្គការ​អន្តរជាតិ​ខាង​ការងារ (ILO) និង​ធ្លាប់​រៀបចំ​សិក្ខាសាលា​ពិគ្រោះ​យោបល់​លើ​សេចក្ដីព្រាងច្បាប់​ច្រើនដង ជាមួយ​តំណាង​ក្រសួង ស្ថាប័ន ដៃគូ​អភិវឌ្ឍន៍​ពាក់ព័ន្ធ​នានា និង​តំណាង​សមាគម​រោងចក្រ​កាត់ដេរ​នៅ​កម្ពុជា (GMAC) តំណាង​សហព័ន្ធ​និយោជក សមាគម​ពាណិជ្ជកម្ម​កម្ពុជា ជាដើម។

អាស៊ីសេរី មិន​អាច​សុំ​ការ​បំភ្លឺ​ពី​មន្ត្រី​រដ្ឋសភា ឈ្មោះ ស៊ីណា ដែល​ចុះហត្ថលេខា ទទួល​ញត្តិ​របស់​ក្រុម​អង្គការ​សង្គម​ស៊ីវិល កាលពី​ថ្ងៃទី៩ កញ្ញា បានទេ ដោយសារ​មិន​ទទួល​ទូរស័ព្ទ​។ ប៉ុន្តែ​អ្នកនាំពាក្យ​រដ្ឋសភា លោក ឡេង ប៉េងឡុង ប្រាប់​អាស៊ីសេរី​ថា លោក​មិន​ដឹង​ថា រដ្ឋសភា​មាន​គម្រោង​បើក​ឱ្យ​ក្រុម​អង្គការ​ពាក់ព័ន្ធ​ពិគ្រោះ​យោបល់ ឬ​អត់​ទេ ព្រោះ​ច្បាប់​នេះ កំពុង​ស្ថិត​ក្នុង​គណៈកម្មការ​ជំនាញ​ទី​៨ នៃ​រដ្ឋសភា៖ «បញ្ហា​នេះ គឺ​ធ្លាក់​នៅ​ក្នុង​ដៃ​គណៈកម្មការ​ទី​៨។ អ៊ីចឹង មិន​ដឹង​ថា ខាង​សង្គម​ស៊ីវិល គាត់​ទាក់ទង​គណៈកម្មការ​ទី​៨ ហើយ​ឬ​នៅ ព្រោះ ឥឡូវ​នេះ នៅ​ក្នុង​ដៃ​គណៈកម្មការ​ទី​៨ ហើយ​គណៈកម្មការ​ទី​៨ បាន​ស្រាវជ្រាវ និង​ពិនិត្យមើល​សព្វគ្រប់​អស់ហើយ ហើយ​បាន​ចុះ​ក្នុង​របៀបវារៈ​កិច្ច​ប្រជុំ​ពេញ​អង្គ ថ្ងៃ​ទី៤»

ក្រុម​អង្គការ​សង្គម​ស៊ីវិល​ចំនួន​១១ ដែល​ធ្វើការ​ពាក់ព័ន្ធ​នឹង​សិទ្ធិ​កម្មករ យល់​ឃើញ​ថា ដ្បិតតែ​សេចក្ដីព្រាងច្បាប់​ស្ដីពី​របប​សន្តិសុខ​សង្គម ធ្លាប់​ត្រូវ​បាន​រដ្ឋាភិបាល​ពិភាក្សា ជាមួយ​តំណាង​សហជីព ប៉ុន្តែ​ការពិគ្រោះ​យោបល់​កន្លងមក មិនបាន​គ្រប់​ជ្រុងជ្រោយ​ឡើយ​។ ពួកគេ​ទទូច​ឱ្យ​រដ្ឋសភា បើក​ឱ្យ​ពួកគេ​ផ្ដល់​យោបល់ ហើយ​ទទួលយក​យោបល់​ទាំងនោះ ដាក់បញ្ចូល​ក្នុង​ពង្រាង​ច្បាប់​ស្ដីពី​របប​សន្តិសុខ​សង្គម ដើម្បី​ធានា​បាន​នូវ​ប្រសិទ្ធភាព និង​ប្រយោជន៍​កម្មករ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល