សាលាដំបូងរាជធានីភ្នំពេញ សម្រេចឃុំខ្លួនមន្ត្រីយោធិនឈ្មោះ ផែង វណ្ណៈ ដែលសកម្មនៅលើហ្វេសប៊ុក (Facebook) ពាក់ព័ន្ធនឹងការចោទថា លោកបានសរសេរសារចោទលោក ហ៊ុន សែន ជាឃាតកសម្លាប់បណ្ឌិត កែម ឡី។ អ្នកច្បាប់ និងសង្គមស៊ីវិល យល់ថា វិធានការច្បាប់នេះមិនសមទំនងឡើយ ហើយជំរុញឱ្យរដ្ឋាភិបាលត្រូវតែស្វែងរកឃាតកពិត ដើម្បីកាត់ទោសនិងបញ្ចប់មន្ទិល សង្ស័យ។
អនុប្រធានសាលាដំបូងរាជធានីភ្នំពេញនិងជាចៅក្រមស៊ើបសួរ លោក កី ម៉ានេរ៉ា សម្រេចចេញ ដីកាឃុំខ្លួនមន្ត្រីយោធិនថ្នាក់វរសេនីយ៍ទោឈ្មោះ ផែង វណ្ណៈ នៅពន្ធនាគារព្រៃសបណ្ដោះអាសន្ននៅថ្ងៃទី០៣ ខែមេសា ក្រោយរងការចោទថា បង្ហោះសារលើហ្វេសប៊ុក ក្នុងចេតនាចោទលោកហ៊ុន សែន ជាឃាតកសម្លាប់លោកបណ្ឌិតកែម ឡី ដែលត្រូវគេបាញ់សម្លាប់ខែកក្កដាឆ្នាំ២០១៦។
អ្នកនាំពាក្យអយ្យការអមសាលាដំបូងរាជធានីភ្នំពេញលោក លី សុផាណា ឱ្យដឹងតាមបណ្ដាញសង្គមតេឡេក្រាម (Telegram) ថា ការសម្រេចឃុំខ្លួននេះ បន្ទាប់ពីចៅក្រមស៊ើបសួរចោទប្រកាន់ លោក ផែង វណ្ណៈ ពីបទ«ញុះញង់ឱ្យប្រព្រឹត្តបទឧក្រិដ្ឋជាអាទិ៍និងបរិហារកេរ្តិ៍ជាសាធារណៈតាម បណ្ដឹងរបស់មេធាវីលោក ហ៊ុន សែន។
ប្រធានក្រុមមេធាវីរបស់លោក ហ៊ុនសែន គឺលោក គី តិច កាលពីថ្ងៃទី១ មេសា បានប្ដឹងលោក ផែងវណ្ណៈ ថា មានផែនការ និងគោលបំណងច្បាស់លាស់ក្នុងការចោទប្រកាន់ និងទម្លាក់កំហុសលើលោក ហ៊ុន សែន ថា ជាឃាតកសម្លាប់បណ្ឌិត កែម ឡី និងធ្វើឱ្យសាធារណៈក៏យល់ច្រឡំដូច្នោះដែរ។
ដើមហេតុនៃការប្តឹងបែបនេះ បន្ទាប់ពីប្រធានគណបក្សយុវជន និងជាឧត្ដមក្រុមប្រឹក្សាពិគ្រោះយោបល់ លោក ពេជ្រ ស្រស់ ប្ដឹងចោទលោក ផែង វណ្ណៈ ពីបទប្រព្រឹត្តអំពើពុករលួយទៅអង្គភាពប្រឆាំងអំពើពុករលួយ ក្រោយលោកផែងវណ្ណៈ ធ្វើជាតំណាងឱ្យគ្រួសារអ្នកបើករថយន្តបុកនិស្សិតស្រីម្នាក់ស្លាប់ និងយកលុយ ៥ពាន់ដុល្លារទៅចូលបុណ្យ។ ក្រោយមកលោក ផែង វណ្ណៈ សរសេរតបនៅលើហ្វេសប៊ុកវិញ ដោយប្រៀបធៀបថាគ្រាន់តែយកលុយទៅចូលបុណ្យករណីគ្រោះថ្នាក់ចរាចរណ៍នេះត្រូវគេប្ដឹងពីរឿងពុករលួយ ចុះករណីអគ្គនាយកអង្គភាពហ្វ្រេសញ៉ូវ (FreshNews) លោក លឹម ជាវុត្ថា តំណាងឱ្យថ្នាក់ដឹកនាំយកថវិកា ៥ម៉ឺនដុល្លារ ចូលបុណ្យបណ្ឌិត កែម ឡី ដើម្បីធ្វើចេតិយម្ដេចមិនប្តឹងទៅអង្គភាពប្រឆាំងអំពើពុករលួយដែរទៅ។
អាស៊ីសេរីមិនអាចសុំការឆ្លើយតបពីមេធាវីលោក ហ៊ុន សែន គឺលោក គី តិចបានទេដោយ លោក ប្រាប់ថា កំពុងជាប់រវល់៖ «សុំទោសខ្ញុំកំពុងប្រជុំក្រុមប្រឹក្សាច្បាប់»។
ទោះយ៉ាងណាក្នុងបណ្ដឹងនោះលោក គី តិច ស្នើសុំឱ្យតុលាការចោទប្រកាន់ និងផ្ដន្ទាទោសលោកផែង វណ្ណៈ ឱ្យបានធ្ងន់ធ្ងរបំផុតតាមច្បាប់ និងស្នើឱ្យមានការឃាត់ខ្លួននិងឃុំខ្លួនលោក ផែង វណ្ណៈ ជាបន្ទាន់ ដើម្បីទប់ស្កាត់ការប្រព្រឹត្តអំពើល្មើសជាបន្តបន្ទាប់ដែលអាចនាំឱ្យមានភាពវឹកវរធ្ងន់ធ្ងរដល់សន្តិសុខសង្គម ព្រោះលោកចាត់ទុកទង្វើលោក ផែង វណ្ណៈ គឺជាការបរិហារកេរ្តិ៍និងជាការចោទ ប្រកាន់ថាលោក ហ៊ុន សែន ជាឃាតកសម្លាប់លោក កែម ឡី។
ប៉ុន្តែប្រធានការិយាល័យមេធាវីក្រុមអ្នកច្បាប់អមរិន្ទ្រ លោកមេធាវី សុក សំអឿន មានប្រសាសន៍ថា លោក មិនដឹងថាសំណុំរឿងលោក ផែង វណ្ណៈ នេះ ខាងតុលាការ និងមេធាវីរដ្ឋាភិបាលមានភស្តុតាងអ្វីទេ ប៉ុន្តែបើគ្រាន់តែសំណេរលោក ផែង វណ្ណៈ គឺមិនសមនឹងការចោទប្រកាន់និងការឃុំខ្លួនឡើយ។ មេធាវីចាស់វស្សារូបនេះ សង្កេតឃើញថា ជាទូទៅតុលាការស្រុកខ្មែរ គឺតែងតែធ្វើការចោទប្រកាន់ និងឃុំខ្លួននៅពេលមានបណ្ដឹងពីរដ្ឋាភិបាលហើយ ដោយមិនសូវខ្វល់ថា មានអ្នករិះគន់នោះទេ៖ «មិនដឹងថាតើសម្ដេចនាយកលោកប្រកាន់ហើយគិតថា ប្រជាពលរដ្ឋខ្មែរគ្រាន់តែលឺប៉ុណ្ណឹងនាំគ្នាយល់ម៉េច។ យើងអត់ដឹងហ្អាស់ ហើយមិនដឹងថាជាចេតនា របស់សម្ដេចនាយកឬក៏មេធាវីឬក៏អ្នកផ្សេង។ ប៉ុន្តែគ្រាន់តែប្រព័ន្ធស្រុកខ្មែរហើយតែមានពាក្យបណ្ដឹង ហើយបណ្ដឹងនោះចេញពីរដ្ឋាភិបាល អ៊ីចឹងដឹងថាមានទោស ហើយចោទរាងធ្ងន់ហើយឃុំសិនហើយ»។
លោក ផែង វណ្ណៈ គឺជាមនុស្សទី៥ហើយ ដែលត្រូវរបបក្រុងភ្នំពេញប្ដឹងដាក់ពន្ធនាគារពាក់ព័ន្ធនឹងការអត្ថាធិប្បាយភ្ជាប់លោក ហ៊ុន សែន ទៅនឹងសំណុំរឿងឃាតកម្មលោកបណ្ឌិតកែម ឡី។ មនុស្ស ៤ នាក់មុននោះ គឺមានប្រធានស្ដីទីគណបក្សសង្គ្រោះជាតិលោក សម រង្ស៊ី អតីតសមាជិកព្រឹទ្ធសភាគណបក្សសម រង្ស៊ី លោកស្រ ថាក់ ឡានី អ្នកវិភាគនយោបាយនិងសង្គមលោក គឹម សុខ និងអ្នកលេងហ្វេសប៊ុកឈ្មោះ ហេង លក្ខណា កំពុងជាប់ឃុំ និងជាប់បណ្ដឹងនៅតុលាការ ព្រោះតែរិះគន់ថា លោក ហ៊ុន សែន និងក្រុមគ្រួសាររបស់លោកមានជាប់ទាក់ទិននឹងឃាតកម្មលោកបណ្ឌិត កែម ឡី នេះ។
រីឯប្រធានសមាគមមូលនិធិកែម ឡី លោក សៅ កុសល មានប្រសាសន៍ថា ការសម្រេចឃុំខ្លួននិងការចោទប្រកាន់លើលោក ផែង វណ្ណៈ នេះ ហាក់ដូចជាមិនសមហេតុផលឡើយ ព្រោះលោកគ្រាន់តែប្រៀបធៀបការយកលុយទៅចូលបុណ្យសពប៉ុណ្ណោះ។ លោកយល់ថា ប្រសិនបើរដ្ឋាភិបាល មិនចង់ឃើញមតិរិះគន់ ឬការដាក់មន្ទិលសង្ស័យផ្សេងៗ គួរតែពន្លឿនការស្វែងរកយុត្តិធម៌ និងឃាតកពិត មកផ្ដន្ទាទោសតាមច្បាប់៖ «ការងារដែលរដ្ឋាភិបាល ក៏ដូចជាតុលាការ ត្រូវធ្វើគឺបើកការស៊ើបអង្កេតមួយដោយឯករាជ្យ និងបង្ហាញតម្លាភាពនៃការស៊ើបអង្កេតនេះដល់បងប្អូនជនរួមជាតិជាពិសេសគ្រួសារលោកបណ្ឌិត ដែលទទួលរងនូវអំពើអយុត្តិធម៌កន្លងមក។ តែផ្ទុយ ទៅវិញ ខ្ញុំសង្កេតឃើញថា ការរំពឹងទុកនូវយុត្តិធម៌ពីរដ្ឋាភិបាលក៏ដូចជាតុលាការក្នុងការស៊ើបអង្កេតករណីនេះ ហាក់បីដូចជាមានការយឺតយ៉ាវ និងមិនបានបំពេញការងារតាមបែបវិជ្ជាជីវៈទេ។ផ្ទុយទៅវិញបែរជាទៅចោទអ្នកនេះអ្នកនោះដោយសារតែការងឿងឆ្ងល់ចំពោះចំណាត់ការតុលាការ»។
លោកបណ្ឌិត កែម ឡី ត្រូវបានឃាតករបាញ់សម្លាប់កណ្ដាលថ្ងៃ នៅស្ដារម៉ាតកាល់តិច (Caltex) ស្តុបបូកគោ ជិត៣ឆ្នាំហើយ។ សាធារណជននៅតែទទូចឱ្យតុលាការបង្ហាញលទ្ធផលស៊ើបអង្កេតរបស់ខ្លួនក្នុងសំណុំរឿងបណ្ឌិត កែម ឡី ដែលត្រូវបានទុកឱ្យស្ងប់ស្ងាត់បាត់ឈឹងអស់រយៈពេលជាច្រើនខែកន្លងទៅនេះ។ ពួកគេថា តុលាការមិនត្រូវបិទបញ្ចប់ត្រឹមបុគ្គលជួបសម្លាប់នោះឡើយហើយក៏មិនអាចហាមឃាត់ការរិះគន់ និងការបញ្ចេញមតិសង្ស័យផ្សេងៗ លើឃាតកម្មនេះបានដែរ។
លោក សៅ កុសល បន្តថា នៅពេលតុលាការតែងតែប្រើប្រាស់វិធានការច្បាប់តឹងរ៉ឹងចំពោះអ្នកវិភាគឬអ្នកណាដែលបញ្ចេញមតិប៉ះពាល់ដល់លោក ហ៊ុន សែន បែបនេះ គឺបង្ហាញប្រព័ន្ធយុត្តិធម៌ មិនមានឯករាជ្យភាព ដែលពលរដ្ឋទូទៅអាចពឹងផ្អែកបាននោះទេ។
លោក ផែង វណ្ណៈ ត្រូវបានគេដឹងថា ជាអ្នកគាំទ្រគណបក្សប្រជាជនកម្ពុជា និងលោក ហ៊ុន សែន។ កាលពីខែធ្នូឆ្នាំ២០១៣ គណនេយ្យហ្វេសប៊ុកឈ្មោះថា ផែង វណ្ណៈ ក៏ធ្លាប់បានបង្ហោះសារគំរាមសម្លាប់ប្រធានគណបក្សសង្គ្រោះជាតិ លោក កឹម សុខា ដោយភ្ជាប់នូវរូបថតកាំភ្លើងខ្លី និងគ្រាប់កាំភ្លើងចំនួន ៧គ្រាប់ ប៉ុន្តែករណីនេះមិនមានវិធានការច្បាប់លើលោក ផែង វណ្ណៈ ឡើយ។
អ្នកវិភាគនយោបាយ និងសង្គមលោក គឹម សុខ យល់ថាការចាត់វិធានការលើលោក ផែង វណ្ណៈ នេះមិនមែនជាការអនុវត្តច្បាប់នោះឡើយ។ ករណីនេះលោកយល់ថា ហាក់ដូចជាយុទ្ធសាស្ត្របង្កើតព័ត៌មានឱ្យពលរដ្ឋភ្លេចគិតរឿងជាតិធំៗ និងរឿងអសមត្ថភាពរបស់លោក ហ៊ុន សែន និងមួយទៀតករណីនេះ ហាក់ដូចជាចង់កម្ចាត់បុគ្គលណា ដែលហ៊ានប៉ះពាល់ដល់ប្រយោជន៍ ឬមុខមាត់លោកហ៊ុន សែន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។