តុលាការខេត្តបន្ទាយមានជ័យប្រកាសសាលក្រមនៅព្រឹកថ្ងៃទី១៣ មករា ដោយផ្ដន្ទាទោស មន្ត្រីកងរាជអាវុធហត្ថ២រូប ដាក់ពន្ធនាគារពី៤ ទៅ៧ឆ្នាំ ពាក់ព័ន្ធនឹងរឿងការធ្វើទារុណកម្មពលរដ្ឋម្នាក់បណ្ដាលឱ្យស្លាប់ និងមួយចំនួនទៀតរងរបួស។ ទោះជាយ៉ាងនេះក្តី ជនរងគ្រោះមិនសុខចិត្តនឹងសេចក្ដីសម្រេចរបស់តុលាការនេះទេ ហើយពួកគាត់គ្រោងប្ដឹងឧទ្ធរណ៍បន្តទៀត។ មន្ត្រីសង្គមស៊ីវិល យល់ថា តុលាការគួរតែផ្ដន្ទាទោសជនប្រព្រឹត្ត និងអ្នកពាក់ព័ន្ធឱ្យបានធ្ងន់ធ្ងរជាងនេះ។
តុលាការខេត្តបន្ទាយមានជ័យសម្រេចផ្ដន្ទាទោសមេបញ្ជាការរងកងរាជអាវុធហត្ថខេត្តបន្ទាយមានជ័យ លោក ស ប៊ុនសឿង ឱ្យជាប់ពន្ធនាគារ ៤ឆ្នាំ និងផ្ដល់សំណងជំងឺចិត្តដល់ជនរងគ្រោះចំនួន៥នាក់ ក្នុងម្នាក់ពី ២០លាន ទៅ ៣០លានរៀល។ ចំណែកជំនួយការការិយាល័យប្រឆាំងគ្រឿងញៀនអាវុធហត្ថខេត្តនេះគឺលោក ឆយ រដ្ឋនា វិញ តុលាការកាត់ទោសដាក់ពន្ធនាគារ៧ឆ្នាំ និងបង្គាប់ឱ្យបង់ប្រាក់សំណងដល់ជនរងគ្រោះ ដែលរងរបួស៤នាក់ ក្នុងម្នាក់ពី ២០លាន ទៅ ៣០លានរៀល ព្រមទាំងបង់ប្រាក់ ៤០លានរៀលដល់អ្នកស្លាប់។ តុលាការផ្ដន្ទាទោសមន្ត្រីប៉េអិមខេត្តបន្ទាយមានជ័យទាំងពីររូបនេះពីបទហិង្សាដោយចេតនាមានស្ថានទម្ងន់ទោស និងហិង្សាដោយចេតនាមានស្ថានទម្ងន់ទោសដោយសារមរណភាពនៃជនរងគ្រោះ។ បច្ចុប្បន្នសមត្ថកិច្ចបានឃុំខ្លួនមន្ត្រីប៉េអិមទាំងពីរនាក់នេះនៅពន្ធនាគារខេត្តបន្ទាយមានជ័យ។
ទោះជាយ៉ាងនេះក្តី ភាគីជនរងគ្រោះមិនទាន់សុខចិត្តចំពោះការសម្រេចនេះទេ ដោយពួកគាត់ចង់ឱ្យតុលាការកាត់ទោសជនដៃដល់ទាំងពីររូបឱ្យបានធ្ងន់ធ្ងរជាងនេះ និងបង្គាប់ឱ្យផ្ដល់សំណងបន្ថែមទៀត។
ជនរងគ្រោះមួយរូប លោក អាន រួន ប្រាប់អាស៊ីសេរីនៅរសៀលថ្ងៃទី១៣ មករា ថា សេចក្ដីសម្រេចរបស់តុលាការនេះជារឿងអយុត្តិធម៌មិនអាចទទួលយកបានឡើយ។ បុរសវ័យ៥៩ឆ្នាំរូបនេះ បញ្ជាក់ថា តុលាការគួរតែផ្ដន្ទាទោសមន្ត្រីប៉េអិមទាំង២រូបនោះឱ្យបានធ្ងន់ធ្ងរជាងនេះ និងផ្ដល់សំណងជំងឺចិត្តដល់ពួកលោក ឱ្យសមរម្យតាមទង្វើដែលពួកគេវាយធ្វើបាបលោក។ លោកនិយាយថា ជនល្មើសបានវាយទាត់ធាក់ និងធ្វើទារុណកម្មលោកដូចសត្វធាតុ បណ្ដាលឱ្យលោកភ្លាត់ឆ្អឹងជំនីខាងស្ដាំ ហើយធ្លាក់ខ្លួនឈឺមិនអាចធ្វើការងារអ្វីបានឡើយ៖ «ខ្ញុំទទួលយកមិនបាន ព្រោះអីអយុត្តិធម៌សម្រាប់ខ្ញុំខ្លាំងណាស់ ព្រោះខ្ញុំធ្លាក់ខ្លួនពិការមួយជីវិតផង ណាមួយខ្ញុំបាត់បង់ការងារយ៉ាងច្រើន ដូច្នេះខ្ញុំមិនអាចទទួលយកបានទេ ណាមួយខ្ញុំចាស់ហើយ ខ្ញុំធ្វើអីក៏ធ្វើមិនកើតដែរ។ តុលាការឱ្យខ្ញុំសមរម្យផង ណាមួយខ្ញុំយកលុយធនាគារយ៉ាងច្រើនមកធ្វើមើលខ្លួនខ្ញុំ របួសខ្ញុំនេះគ្មានគ្រូពេទ្យណាមើលជាទេ»។
ដូចគ្នានេះដែរ ជនរងគ្រោះម្នាក់ទៀត គឺ លោក នូវ នឿន ប្រាប់ថា តុលាការបានបង្គាប់ឱ្យជនល្មើសផ្ដល់សំណងជំងឺដល់គាត់ចំនួន ២០លានរៀលនេះ គឺតិចតួចមិនគ្រប់សម្រាប់មើលជំងឺនោះឡើយ៖ «សុំឱ្យច្បាប់ហ្នឹងជួយរកយុត្តិធម៌ឱ្យខ្ញុំ និងអ្នកស្លាប់ឱ្យពិតប្រាកដ ដោយថាប្រទេសមានច្បាប់មានយុត្តិធម៌។ រយៈកាលកន្លងមកដូចថា វាតានតឹងមែនទែន វាយូរហើយគេក្រដោះស្រាយឱ្យពួកខ្ញុំ ហើយដល់ពេលដោះស្រាយនិយាយអត់មានអី។ ពួកខ្ញុំអត់មានតវ៉ានៅលើចំណុចណាមួយ គ្រាន់តែប្រកាសភ្លាមបិទសវនាការភ្លាម អីចឹងខ្ញុំអត់ពេញចិត្តអត់បានតវ៉ា»។
កាលពីថ្ងៃទី២៩ធ្នូឆ្នាំ២០១៩ មន្ត្រីកងរាជអាវុធហត្ថខេត្តបន្ទាយមានជ័យ បានចាប់ប្រជាពលរដ្ឋ ៥នាក់យកទៅឃុំ និងវាយដំ បន្ទាប់ពីពលរដ្ឋជាង ១០០នាក់ បានតវ៉ានៅមុខសាលាខេត្តបន្ទាយមានជ័យ ដើម្បីស្នើសុំឱ្យដំណោះស្រាយទំនាស់ដីធ្លីរបស់ពួកគាត់នៅស្រុកស្វាយចេក ។ ករណីហិង្សាកាលនោះ បានបណ្ដាលឱ្យតំណាងពលរដ្ឋម្នាក់គឺលោក ទុយ ស្រស់ បានស្លាប់ ដោយសារស្ថានភាពរបួសធ្ងន់ធ្ងរពេក និងពលរដ្ឋ៤នាក់ទៀត រងរបួសធ្ងន់ និងស្រាល។ ភ្លាមៗនោះអាជ្ញាធរពាក់ព័ន្ធមិនបានអើពើស៊ើបអង្កេតករណីនេះទេ បើទោះបីជាសាក្សី និងជាជនរងគ្រោះក្នុងអំពើហិង្សានោះទាមទាររកយុត្តិធម៌ក៏ដោយ។ ការឃុំខ្លួនជនល្មើស បន្ទាប់ពីលោកនាយករដ្ឋមន្ត្រី ហ៊ុន សែន បានបញ្ជាឱ្យអាជ្ញាធរពាក់ព័ន្ធស្រាវជ្រាវរឿងនេះ។
អ្នកនាំពាក្យសមាគមការពារសិទ្ធិមនុស្សអាដហុក(Adhoc)លោក សឹង សែនករុណា មានប្រសាសន៍ថា ការសម្រេចរបស់តុលាការខេត្តបន្ទាយមានជ័យនេះមិនទាន់គ្រប់គ្រាន់នោះទេ ពីព្រោះលោកយល់ថា សំណុំរឿងនេះជាអំពើធ្វើទារុណកម្មដែលប្រព្រឹត្តដោយអាជ្ញាធរដូច្នេះតុលាការគួរតែផ្ដន្ទាទោសដល់ជនប្រព្រឹត្តឱ្យបានធ្ងន់ធ្ងរតាមច្បាប់៖ «អាបញ្ហាទាំងអស់នេះវាអាចជះឥទ្ធិពលដល់ថ្ងៃក្រោយទៅថា អ្នកទាំងអស់ហ្នឹងគាត់អត់រាងចាល ហើយអាចវាជាគំរូអាក្រក់មួយដល់សមត្ថកិច្ចផ្សេងទៀត អាចនូវអំពើបែបនេះហើយអាចរួចពីការទទួលរងទោសធ្ងន់ធ្ងរ មកមានស្ថានភាពបន្ធូរបន្ថយបែបនេះ អីចឹងទៅ។ អីចឹងវាជាការបង្ហាញពីភាពកម្សោយនៃការអនុវត្តច្បាប់ទៅលើមន្ត្រីដែលមានតួនាទីបែបហ្នឹង ថ្ងៃក្រោយវាចេះតែបន្តកើតហេតុបែបហ្នឹងទៀត»។
មន្ត្រីសង្គមស៊ីវិលរូបនេះបន្ថែមថា ជនរងគ្រោះអាចប្ដឹងឧទ្ធរណ៍ប្រឆាំងនឹងសេចក្ដីសម្រេចនេះបាន ប្រសិនបើពួកគាត់មិនពេញចិត្តនឹងសាលក្រមរបស់តុលាការ។
ជនរងគ្រោះ គឺ លោក អាន រួន និងលោក នូវ នឿន ឱ្យដឹងថា ពួកគាត់នឹងប្ដឹងរកយុត្តិធម៌ទៅតុលាការឧទ្ធរណ៍បន្តទៀតក្នុងពេលឆាប់ៗខាងមុខនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។