សហគមន៍​ខ្មែរ​នៅ​អូស្ត្រាលី​កំពុង​រក​មេធាវី​ប្ដឹង​ក្រុមហ៊ុន​Chevron ករណី​ឃាតកម្ម​បណ្ឌិត កែម ឡី

ដោយ ថន ថារ៉ូ
2019-08-06
អ៊ីម៉ែល
មតិ
Share
បោះពុម្ព
សព​បណ្ឌិត កែម ឡី ដែល​ត្រូវ​ឃាតក​បាញ់​សម្លាប់​នៅ​ក្នុង​ហាង​ទំនិញ​ស្តារ​ម៉ាត (Star Mart) ក្នុង​បរិវេណ​ស្ថានីយ​ប្រេង​ឥន្ធនៈ​កាល់តិច (Caltex) ស្តុប​បូកគោ រាជធានី​ភ្នំពេញ ថ្ងៃ​ទី​១០ ខែ​កក្កដា ឆ្នាំ​២០១៦។
សព​បណ្ឌិត កែម ឡី ដែល​ត្រូវ​ឃាតក​បាញ់​សម្លាប់​នៅ​ក្នុង​ហាង​ទំនិញ​ស្តារ​ម៉ាត (Star Mart) ក្នុង​បរិវេណ​ស្ថានីយ​ប្រេង​ឥន្ធនៈ​កាល់តិច (Caltex) ស្តុប​បូកគោ រាជធានី​ភ្នំពេញ ថ្ងៃ​ទី​១០ ខែ​កក្កដា ឆ្នាំ​២០១៦។
Photo: RFA

សហគមន៍​ខ្មែរ​នៅ​អូស្ត្រាលី​កំពុង​ស្វះ​ស្វែងរក​មេធាវី​អន្តរជាតិ​ដែល​ពូកែ​ឱ្យ​ជួយ​ការពារ​ពួកគេ​ដើម្បី​ធ្វើ​ពាក្យ​បណ្តឹង​ក្រុមហ៊ុន​Chevron ក្នុង​ករណី​ឃាតកម្ម​បណ្ឌិត កែម ឡី​។ ខ្មែរ​នៅ​អូស្ត្រាលី រំពឹង​ថា ការ​ស្វែងរក​យុត្តិធម៌​តាម​មធ្យោបាយ​បែបនេះ​នឹង​ទទួល​បាន​លទ្ធផល ខណៈ​ពួកគេ​គ្មាន​ជំនឿ​ថា តុលាការ​នៃ​របប​ក្រុងភ្នំពេញ​អាច​ផ្ដល់​យុត្តិធម៌​ជូន​លោក​បណ្ឌិត កែម ឡី បាន​ឡើយ។

សហគមន៍​ខ្មែរ​នៅតែ​ប្តេជ្ញា​ចិត្ត​ថា នឹង​រិះរក​គ្រប់​មធ្យោបាយ​ដើម្បី​ស្វែងរក​ការពិត និង​យុត្តិធម៌​លោក បណ្ឌិត កែម ឡី ឱ្យ​ទាល់តែ​បាន។ ចំពោះ​ដាក់ពាក្យ​បណ្ដឹង តាម​ផ្លូវ​ច្បាប់​នេះ សហគមន៍​ខ្មែរ​នៅ​អូស្ត្រាលី នឹង​ពឹង​ពាក់​មេធាវី​ជើង​ខ្លាំង​ដែល​បណ្ដឹង​នេះ​គឺ​ធ្វើ​ឡើង​ជា​លក្ខណៈ​អន្តរជាតិ។

ប្រធាន​សហព័ន្ធ​ខ្មែរ​សាជីវកម្ម លោក ហុង លីម ឱ្យ​អាស៊ីសេរី​ដឹង​ថា ខ្មែរ​នៅ​អូស្ត្រាលី​បាន​ពិភាក្សា​ជាមួយ​អ្នកច្បាប់ និង​អ្នក​យោ​បាយ​នៅ​អូស្ត្រាលី រក​ឃើញ​ថា តាមច្បាប់​នៅ​ប្រទេស​អូស្ត្រាលី និង​ច្បាប់​អន្តរជាតិ ពួកគេ​អាច​ដាក់​ពាក្យ​ក្រុមហ៊ុន Chevron ដែល​ធ្វេសប្រហែស​បណ្ដាល​លោក កែម ឡី ត្រូវ​ឃាតក​បាញ់​សម្លាប់៖ «ចោទ​ថា ដោយសារ​ក្រុមហ៊ុន​នេះ​ធ្វេសប្រហែស​ហ្នឹងហើយ​គ្មាន​ការប្រុងប្រយ័ត្ន​មិនបាន​យកចិត្តទុកដាក់​ទើបបាន​លោក​បណ្ឌិត កែម ឡី ស្លាប់​នៅ​កន្លែង​អ្នក​ឯង​ដូច្នេះ​ក្រុមហ៊ុន​ត្រូវ​ទទួលខុសត្រូវ​រឿង​ហ្នឹង»

អតីត​សមាជិកសភា​អូស្ត្រាលី​ដើមកំណើត​ខ្មែរ​រូប​នេះ ឱ្យ​ដឹង​ទៀត​ថា ចំណុច​ទី​២ ដែល​សហគមន៍​ខ្មែរ គ្រោង​ប្តឹង​នោះ​គឺ​ទាមទារ​ឱ្យ​ក្រុមហ៊ុនChevron ផ្ដល់​ភស្តុតាង ឯកសារ​ពាក់ព័ន្ធ​នានា និង​វីដេអូ​ពី​កាមេរា​សុវត្ថិភាព​ក្នុង​ស្ថានីយ​ប្រេងសាំង​កាល់​តិច ដែល​នៅ​ទីនោះ​លោក កែម ឡី ត្រូវ​បាន​ឃាតក​បាញ់​សម្លាប់​កាល​ពី​ជាង​បី​ឆ្នាំមុន។

ចំពោះ​ការរៀបចំ​ពាក្យ​បណ្តឹង​លោក ហុង លីម បញ្ជាក់​ថា ពេលនេះ​សហគមន៍​ខ្មែរ​កំពុង​ជជែក​គ្នា​ដើម្បី​សម្រេច​ថា គួរ​ឱ្យ​ភរិយា​លោក កែម ឡី ដាក់ពាក្យ​ប្ដឹង​ឬ​សហគមន៍​ខ្មែរ​រួមគ្នា​ដាក់ពាក្យ​បណ្ដឹង៖ «យើង​អ្នក​អត់​មាន​ឈឺក្បាល​ទេ អ្នកណា​ធ្វើ​អី​គេ​បង្ខំ​សម្លុត​គំរាម​យក​ភស្តុតាង​ដែល​អ្នកណា​ជា​សម្លាប់​លោក កែម ឡី យើង​ចោទ​ថា ក្រុមហ៊ុន​ធ្វេសប្រហែស​ទៅ​ប្រគល់​ឱ្យ​គេ​(​សមត្ថកិច្ច​)​គឺ​ខុស​មិន​អាច​ទទួលយក​បានទេ ការ​ពិនិត្យ​ជា​អន្តរជាតិ​ការ​ស៊ើបអង្កេត​អន្តរជាតិ​ត្រូវ​ប្រគល់​ភស្តុតាង​នោះ​មក​ឱ្យ​យើង​(​សហគមន៍​ខ្មែរ​នៅ​អូស្ត្រាលី)»

ក្រៅពី​គ្រោង​ប្ដឹង​ក្រុមហ៊ុន Chevron លោក ហុង លីម ឱ្យ​ដឹង​ទៀត​ថា សហគមន៍​ខ្មែរ​ក៏​គ្រោង​ស្នើសុំ​ឱ្យ​លោក សម រង្ស៊ី ផ្តល់​ភស្តុតាង​ដែរ​លោក​ទទួល​បាន​ពី​ក្រុមហ៊ុន Chevron ជូន​ដល់​សហគមន៍​ខ្មែរ​នៅ​អូស្ត្រាលី ព្រោះ​លោក ហុង លីម ថា​លោក​នៅចាំ​បាន​ថា លោក សម រង្ស៊ី ធ្លាប់​លើក​ឡើង​ថា លោក​បាន​ទទួល​ភស្តុតាង​មួយ​ចំនួន​ពី​ក្រុមហ៊ុន Chevron«ស្នើសុំ​ទៅ​លោក សម រង្ស៊ី ថា ឱ្យ​គាត់​ជួយ​យើង​ក្នុង​ការ​ស៊ើបអង្កេត​ជា​អន្តរជាតិ​ហ្នឹង​ឱ្យ​គាត់​ប្រគល់​ភស្តុតាង​ហ្នឹង​មក​ដូច្នេះ​អ្វី​ដែល​អ្នកឯង​មាន​ហ្នឹង​ឱ្យ​ទៅ​លោក សម រង្ស៊ី ច្បាស់​ជា​មាន​កូពី (ថត​ចម្លង) អាច​ឱ្យ​មក​យើង​បាន​ហើយ​ដូច្នេះ​យើង​ត្រូវ​យក​អាហ្នឹង​មួយទៀត»

ទាក់ទង​សំណើ​រលោក ហុង លីម នេះ​អាស៊ីសេរី​មិនទាន់​អាច​សុំ​ការ​ឆ្លើយ​តប​ពី​លោក សម រង្ស៊ី បាន​នៅឡើយ​ទេ​នៅ​ថ្ងៃ​ទី៦ ខែ​សីហា ដោយ​ទូរស័ព្ទ​ចូល​គ្មាន​អ្នកទទួល។

តុលាការ​អាមេរិក​នៅ​រដ្ឋ​កាលីហ្វ័រញ៉ា (California) សហរដ្ឋអាមេរិក បាន​កាត់ក្ដី​ឲ្យ​លោក សម រង្ស៊ី ឈ្នះ​ក្រុមហ៊ុន Chevron ដែល​ជា​មេក្រុម​ធំ​របស់​ក្រុមហ៊ុន​សាំង​កាល់តិច ដោយ​តុលាការ​បាន​តម្រូវ​ឱ្យ​ក្រុមហ៊ុន​នេះ ប្រគល់​ឯកសារ​ភស្តុតាង ដែល​ខ្លួន​មាន ទៅ​ឱ្យ​ទៅ​លោក សម រង្ស៊ី។

មេធាវី​ការពារ​ក្តី​ឱ្យ​លោក សម រង្ស៊ី លោក លោក ន័រ ហេហ្គី (Noah Hagey) ធ្លាប់​បាន​ប្រាប់​អាស៊ីសេរី​ថា ក្រោយ​លោក សម រង្ស៊ី បាន​ឈ្នះ​ក្តី​លើ​ក្រុមហ៊ុន Chevron តុលាការ​អាមេរិក​បាន​តម្រូវ​ឱ្យ​ក្រុមហ៊ុន​មួយ​នេះ បញ្ចេញ​នូវ​ឯកសារ​រាប់​រយ​ទំព័រ ជុំវិញ​ករណី​ឃាតកម្ម​លោក កែម ឡី ។ លោក​បន្ត​ថា សារសំខាន់​នៃ​ឯកសារ​ភស្តុតាង​ផ្ដល់​ឱ្យ​ដោយ​ក្រុមហ៊ុន​នេះ បង្ហាញ​ឱ្យ​ឃើញ​ថា ក្រុមហ៊ុន​បាន​ផ្តល់​នូវ​ខ្សែអាត់​វីដេអូ​ថត​បាន ទៅ​ឱ្យ​របប​ក្រុងភ្នំពេញ​ក្នុង​នោះ​រួមមាន​ប្រព័ន្ធ​កាមេរ៉ា​សុវត្ថិភាព ថត​ពី​កាមេរា​វីដេអូ​ចំនួន ១៤ កាមេរ៉ា ក្នុង​ថ្ងៃ​ទី​១០ កក្កដា ឆ្នាំ​២០១៦ នៅ​ពេល​លោក កែម ឡី ត្រូវ​គេ​ធ្វើឃាត​។ ប៉ុន្តែ លោក​មេធាវី ថា អាជ្ញាធរ​កម្ពុជា បាន​ព្យាយាម​បិទបាំង​ព័ត៌មាន​ពិតប្រាកដ​នៅ​ពីក្រោយ​ហេតុការណ៍​ឃាតកម្ម​លោក កែម ឡី និង​បាន​ធ្វើ​ឱ្យ​សាធារណជន​មានការ​ភ័ន្តច្រឡំ ដោយសារតែ​មិន​បញ្ចេញ​ខ្សែអាត់​វីដេអូ​ទាំងស្រុង​ជុំវិញ​ករណី​នេះ។

លោក សម រង្ស៊ី ប្រធាន​ស្តីទី​គណបក្ស​សង្គ្រោះ​ជាតិ ធ្លាប់​អះអាង​ប្រាប់​អាស៊ីសេរី​ថា ភស្តុតាង​ដែល​ក្រុមហ៊ុន Chevron ផ្ដល់​ឱ្យ​នេះ អាច​បញ្ជាក់​បន្ថែម​ថា របប​លោក ហ៊ុន សែន ជា​អ្នក​នៅ​ពីក្រោយ​សំណុំរឿង​ឃាតកម្ម​មួយ​នេះ។

លោក កែម ឡី អ្នកវិភាគ​ហ៊ាន​រិះគន់​របប​ក្រុងភ្នំពេញ​ឥត​សំចៃ​មាត់ ត្រូវ​បាន​ខ្មាន់កាំភ្លើង បាញ់សម្លាប់​លោក នៅ​ហាង​លក់ទំនិញ (Star Mart) ក្នុង​ស្ថានីយ​ប្រេង​ឥន្ធនៈ កាល់តិច (Caltex) ជាប់​ស្តុប​បូកគោ ដែល​ស្ថានីយ​ប្រេង​នេះ ជា​របស់​ក្រុមហ៊ុន Chevron មាន​ការិយាល័យ​កណ្ដាល​នៅ​អាមេរិក។ ជាង​បី​ឆ្នាំ​មកនេះ តុលាការ​នៃ​របប​ក្រុងភ្នំពេញ​បាន​ផ្ដន្ទាទោស ឈ្មោះ អឿត អាង ហៅ ជួប សម្លាប់ តែ​ម្នាក់​គត់ ឱ្យ​ជាប់គុក​អស់​មួយ​ជីវិត ដែល​តុលាការ​ចោទ​ថា បុរស​ម្នាក់​នេះ ជា​អ្នក​បាញ់​សម្លាប់​លោក កែម ឡី។

សមាជិកសភា​អូស្ត្រាលី​មកពី​គណបក្ស​ពលករ​លោក ជូលៀន ហ៊ីល (Julian Hill) ចោទ​ប្រកាន់​ថា សមត្ថកិច្ច និង​ព្រះរាជអាជ្ញា​របស់​កម្ពុជា មិនបាន​ស៊ើបអង្កេត​ករណី​ឃាតកម្ម​នេះ​ឱ្យ​បាន​ពេញលេញ​នោះ​ទេ​។ លោក​អះអាង​ថា លោក​នឹង​ទាមទារ​ជា​ផ្លូវការ ទៅ​រដ្ឋមន្ត្រីការបរទេស​អូស្ត្រាលី​ឱ្យ ជំរុញ​ទៅ​របប​ក្រុងភ្នំពេញ ឱ្យ​ស៊ើបអង្កេត​ពេញលេញ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល