មន្ត្រី​តុលាការ​យោធា​ប្រតិកម្ម​នឹង​ការ​មិន​ចាត់​ការ​ប្រធាន​តុលាការ​នេះ​ករណី​ពុករលួយ​និង​គ្រួសារ​និយម

ដោយ សេក បណ្ឌិត
2019-08-23
អ៊ីម៉ែល
មតិ
Share
បោះពុម្ព
​សវនាការ​មួយ នៃ​តុលាការ​យោធា
​សវនាការ​មួយ នៃ​តុលាការ​យោធា
រូប៖ គេផ្ដល់ឱ្យ

មន្ត្រី​ក្នុង​តុលាការ​យោធា សម្ដែង​ការ​សោកស្ដាយ​ដែល​ក្រសួង​ការពារជាតិ មិន​បើក​ការស៊ើបអង្កេត​ផ្លូវការ និង​មិន​មាន​ចំណាត់​ការ​អ្វី​ទាំងអស់​ចំពោះ​ប្រធាន​តុលាការ​យោធា ដែល​មន្ត្រី​រូប​នេះ ចោទ​ថា ពាក់ព័ន្ធ​អំពើពុករលួយ និង​បាន​ប្រមូល​ផ្តុំ​បក្ខពួក​សាច់ញាតិ​ធ្វើ​ការ​ក្នុង​ស្ថាប័ន​តែមួយ​អស់​រយៈពេល​ច្រើន​ឆ្នាំ​មក​ហើយ។ សង្គម​ស៊ីវិល​ដែល​ធ្វើការ​ប្រយុទ្ធ​ប្រឆាំង​អំពើពុករលួយ លើកឡើង​ថា ក្រសួង​ការពារជាតិ គួរតែ​ស្រាវជ្រាវ និង​ឆ្លើយតប​ឱ្យ​បាន​ច្បាស់​ដើម្បី​ឱ្យ​អ្នក​ចោទ​ប្រកាន់​អាច​ទទួល យក​បាន។

មន្ត្រី​បម្រើការ​ក្នុង​តុលាការយោធា​ដែល​សុំ​លាក់​អត្តសញ្ញាណ​ព្រោះ​បារម្ភ​ពី​សុវត្ថិភាព បាន​បញ្ចេញ ប្រតិកម្ម និង​ទម្លាយ​ឯកសារ​បន្ថែម​ទៀត បន្ទាប់ពី​អ្នកនាំពាក្យ​ក្រសួងការពារជាតិ លោក ឈុំ សុជាត ប្រកាស​ថា មិន​មាន​ចំណាត់ការ​អ្វី​ទាំងអស់​លើ​ប្រធាន​តុលាការ​យោធា ដោយ​គ្រាន់តែ​បញ្ជាក់​យ៉ាង​ខ្លី​ថា ការតែងតាំង​មន្ត្រី​នៅ​ក្នុង​តុលាការយោធា​ពិតជា​ធ្វើឡើង​ដោយ​ត្រឹមត្រូវ​តាមច្បាប់ មិនមែន​ធ្វើ​ឡើង តាម​បែប​បក្ខពួក​និយម​គ្រួសារនិយម។

មន្ត្រី​រូប​នេះ លើកឡើង​ទាំង​ហួសចិត្ត​ថា មិន​ដឹង​ថា លោក ឈុំ សុជាត ផ្អែកលើ​អ្វីខ្លះ​នោះ​ទេ ដែល ចេះតែ​ឆ្លើយ​ថា ការតែងតាំង​មន្ត្រី​ក្នុង​តុលាការយោធា​ធ្វើឡើង​ដោយ​ត្រឹមត្រូវ​តាម​នីតិវិធី​នៃ​ឋានានុក្រម​ពិតមែន​នោះ ពីព្រោះ​សាច់ញាតិ​ពូជពង្ស និង​បក្ខពួក​មួយ​ចំនួន​របស់​ប្រធាន​តុលាការ​យោធា លោក ន័យ ថុល សុទ្ធតែ​អសមត្ថភាព និង​ពុំ​មាន​សញ្ញាប័ត្រ​ច្បាប់​ឡើយ។ ជាក់ស្ដែង​ភរិយា​របស់ លោក ន័យ ថុល គឺ​អ្នកស្រី ខឹម សម្បត្តិ ដែល​ត្រូវ​បាន​តែងតាំង​ជា​អនុប្រធាន​តុលាការ​យោធា បន្ទាប់ពី​ប្តី និង​ធ្វើជា​ចៅក្រម ព្រមទាំង​មាន​ឋានន្តរសក្ដិ ឧត្តមសេនីយ៍​ត្រី​ផ្កាយ​១ នៅ​ក្រសួង​ការពារ ជាតិ បាន​រៀន​ត្រឹម​ថ្នាក់​ទី​៦​ប៉ុណ្ណោះ។

មន្ត្រី​តុលាការ​យោធា​ដែល​ទម្លាយ​រឿង​ពុករលួយ​បក្ស​ពួក​និយម​នេះ​បញ្ជាក់​ទៀត​ថា ចៅក្រម​មួយ​ចំនួន​ទៀត ក៏​រៀន​សូត្រ មិនបាន​ចប់​បាក់​ឌុប​ដែរ។ លោក​លើកឡើង​ដោយ​ចំ​ឈ្មោះ​ថា លោក ចៅក្រម ឃឹម សុឃាន រៀន​ថ្នាក់​ទី​៧ លោក ពិន សំអឿន រៀន​ថ្នាក់​ទី​១២ លោក ប៉ោក ប៉ន រៀន​ថ្នាក់​ទី​១០។

មន្ត្រី​រូប​នេះ​បញ្ជាក់​ថា លក្ខខណ្ឌ​ក្នុង​ការ​ជ្រើសរើស​ជា​ចៅក្រម គឺ​ទាមទារ​ដាច់ខាត​នូវ​កម្រិត​សញ្ញាប័ត្រ​បរិញ្ញាបត្រ​ច្បាប់ ហើយ​ចៅក្រម​តុលាការ​យោធា ទាមទារ​ប្រាក់​បៀវត្ស​ដូច​ចៅក្រម​នៅ​តុលាការ​ស៊ីវិល​ដែរ។ បើ​និយាយ​ពី​លក្ខខណ្ឌ​ចូល​បម្រើ​កងទ័ព​​​វិញ យ៉ាង​ទាប​បំផុត ក៏​មាន​សញ្ញាប័ត្រ​ត្រឹម​បាក់​ឌុប​ដែរ ប៉ុន្តែ​ករណី​នេះ ចៅក្រម​តុលាការ​យោធា​រក​សញ្ញាប័ត្រ​បាក់​ឌុប​គ្មាន​ផង។ ដូច្នេះ ​ក្នុង​នាម​​ជា​​ចៅក្រម ជា​អ្នក​ជំនុំជម្រះ​ក្តី​រក​យុត្តិធម៌​ជូន​យោធិន ថា​តើ​ពួកគាត់​នឹង​មាន​សមត្ថភាព​កាត់​ក្តី យ៉ាង​​ដូច​ម្ដេច។

ប្រភព​ដដែល បន្ត​ថា ការ​ឆ្លើយ​តប​របស់​អ្នក​ក្រសួង​ការពារជាតិ គឺ​មាន​បំណង​ជួយ​បិទបាំង​ការពារ អំពី​បញ្ហា​ពុករលួយ​បក្ខពួក​និយម ដោយសារ​ប្រហែលជា​ថ្នាក់ដឹកនាំ​ទាំងនេះ មាន​ជាប់​ពាក់ព័ន្ធ ឬ ទទួល​បាន​ប្រយោជន៍​នៃ​ការ​ប្តូរ​ទីតាំង​អគារ​តុលាការយោធា​ចំនួន ២​លើក នា​ពេល​កន្លង​មក។

មន្ត្រី​តុលាការយោធា​រូប​នេះ បាន​ស្នើ​សុំ​ឱ្យ​លោក​នាយករដ្ឋមន្ត្រី ហ៊ុន សែន មេត្តា​ជួយ​ពិនិត្យ​និង ផ្តល់​នូវ​ការពិត ដូច​លោក ធ្លាប់​បាន​អនុវត្ត​កន្លង​មក​តាម​រយៈ «អភិក្រម​ទី​៥» ក្នុង​ការ​វះកាត់​បញ្ហា​មិន ប្រក្រតី​នៅ​តាម​ស្ថាប័នរដ្ឋ។

អាស៊ីសេរី បាន​ព្យាយាម​ទាក់ទង​អ្នកនាំពាក្យ​ក្រសួង​ការពារជាតិ លោក ឈុំ សុជាត ជាច្រើន​លើក ប៉ុន្តែ លោក​មិន​ទទួល​ទូរស័ព្ទ។

នាយក​កម្មវិធី​ជាន់ខ្ពស់​នៃ​អង្គការ​តម្លាភាព​កម្ពុជា លោក ប៉ិច ពិសី មាន​ប្រសាសន៍​ថា នៅ​ពេល​មាន ការ​ចោទប្រកាន់​ពី​មន្ត្រី​ក្នុង​តុលាការយោធា​ថា មាន​អំពើពុករលួយ និង​មាន​គ្រួសារ​និយម​បែបនេះ ក្រសួង​ការពារជាតិ គួរតែ​ស្រាវជ្រាវ​បង្ហាញ​ភស្តុតាង​ឱ្យ​បាន​ត្រឹមត្រូវ​ច្បាស់លាស់ មិន​អាច​គ្រាន់តែ ឆ្លើយ​ថា ការតែងតាំង​មន្ត្រី​ក្នុង​តុលាការយោធា​ធ្វើឡើង​ដោយ​ត្រឹមត្រូវ​នោះ​ទេ៖ «ទោះ​បី​ជា​ការ​តែងតាំង​បងប្អូន​សាច់​ញាតិ​នេះ​មិន​មែន​ជា​បទ​ល្មើស​ក្តី តើ​យើង​អាច​បង្ហាញ​ទៅ​សាធារណជន ឬ​មន្ត្រី​ផ្សេង​ទៀត ដែល​ធ្វើ​ការ​ក្នុង​ស្ថាប័ន​ដូច​គ្នា​ហើយ​គិត​ថា អយុត្តិធម៌​នោះ គួរ​តែ​បង្ហាញ​ឲ្យ​គាត់​ឃើញ​ថា តើ​ប្រសិន​បើ​តម្លា​ភាព​មែន​នោះ តើ​រើស​យ៉ាងម៉េច ផ្សព្វផ្សាយ និង​ដាក់​ពាក្យ​យ៉ាង​ម៉េច និង​ការ​ប្រឡង​នោះ​ហ៊ាន​ធានា​នៃ​ឯករាជ្យ​នៃ អ្នក​រើស​ដែរ​ទេ អ្នក​ដែល​កែ ឬ​ឲ្យ​ពិន្ទុ​នោះ។ ប្រសិន​បើ​ការ​បក​ស្រាយ​ជា​ការ​បក​ស្រាយ​ធម្មតា​ទេ ខ្ញុំ​គិត​ថា ពិបាក​ទទួល​យក​បាន»

កាលពីដើម​ខែ​កក្កដា កន្លង​ទៅ មន្ត្រី​ជាន់ខ្ពស់​នៅ​តុលាការ​យោធា បាន​ទម្លាយ​ថា ប្រធាន​តុលាការ​យោធា ឧត្ដមសេនីយ៍​ឯក​ផ្កាយ​៣ លោក ន័យ ថុល ដែល​កាន់​តំណែង​នេះ​តាំងពី​ឆ្នាំ​១៩៨៧ មក មាន​ឋានៈ​ស្មើ​រដ្ឋមន្ត្រី និង​ជា​ចៅក្រម​នៅ​សាលាក្ដី​ខ្មែរក្រហម​ផង បាន​តែងតាំង​ភរិយា​របស់​លោក​គឺ​អ្នកស្រី ខឹម សម្បត្តិ​និង​កូនប្រុស​បង្កើត​ពីរ​នាក់​របស់​ខ្លួន​ឱ្យ​ធ្វើ​ជា​ចៅក្រម និង​ជា​អនុប្រធាន​តុលាការ យោធា។ កូនប្រុស​ទាំងពីរ​នាក់ ឈ្មោះ ផូរ ភិរម្យ និង ឈ្មោះ ផូរ វីរៈ នេះ​មិន​ត្រឹម​តែ​មាន​តួនាទី​ជា​អនុប្រធាន​តុលាការ​យោធា និង​ជា​ចៅក្រម​ទេ​គឺ​ពួកគេ​ក៏​ជា​នាយការិយាល័យ​ចៅក្រម​ស៊ើបសួរ​ព្រមទាំង​ជា​នាយទាហាន​មាន​ឋានន្តរសក្ដិ ឧត្ដមសេនីយ៍​ត្រី និង​ទោ​ទៀត​ផង។ ចំណែក​កូន​ទី​៣ លោក ន័យ ផូរច័ន្ទគង្គារ ក៏​កំពុង​ធ្វើ​ការ​នៅ​ក្នុង​តុលាការ​យោធា​ដែរ។ លោក ន័យ ថុល ក៏​ប្រមូល​សាច់ញាតិ​មួយ​ចំនួន​ទៀត​ដូចជា លោក​ឧត្ដមសេនីយ៍​ទោ នុត សោភ័ណ្ឌ ត្រូវជា​ប្អូនជីដូនមួយ​កំពុង​កាន់​តួនាទី​ជា​អនុប្រធាន​តុលាការ​យោធា​ជា​ចៅក្រម និង​ជា​នាយការិយាល័យ​ហិរញ្ញវត្ថុ។ លោក នុត សោភ័ណ្ឌ មាន​បងប្អូន​បង្កើត​ម្នាក់​ទៀត​ឈ្មោះ នុត សុផែន កំពុង​ធ្វើ​ការ​ក្រោមបង្គាប់​របស់​លោក។ ប្រភព​បន្ត​ថា សូម្បីតែ​អ្នក​បើក​ឡាន​ឱ្យ​លោក ន័យ ថុល ឈ្មោះ អ៊ូ សេរី​ក៏​ត្រូវ​បាន​ដំឡើង​ឱ្យ​ធ្វើ​ជា​ចៅក្រម​ដែរ។ ក្រៅ​ពី​នេះ ចៅក្រម​មួយចំនួន​ទៀត​ក៏​ជា​សាច់ញាតិ និង​បក្ខពួក​របស់​លោក ន័យ ថុល ដែរ ដូចជា​លោក​ចៅក្រម ង៉ូវ វុទ្ធី ចៅក្រម ឃឹម សុឃាន និង​ចៅក្រម ពិន សំអឿន។

រីឯ​មន្ត្រី​គ្រាក់ៗ​នៅ​ក្នុង​ស្ថាប័ន​នេះ​មួយ​ចំនួន​ក៏បាន​ប្រមូល កូន​និង​សាច់ញាតិ​ចូល​ធ្វើ​ការ​ជា​ហូរហែ​ដែរ​ដូចជា​អនុរដ្ឋលេខាធិការ​ក្រសួងការពារជាតិ និង​ជា​ចៅក្រម​តុលាការយោធា នាយ​ឧត្ដមសេនីយ៍ ផ្កាយ​៤ លោក សាវ សុខ ក៏​មាន​កូនស្រី​ម្នាក់​ឈ្មោះ​ សុខ គីណូ កត្តា ជា​ចៅក្រម​តុលាការយោធា​និង​មាន​ឋានន្តរសក្ដិ​វរសេនីយ៍ត្រី។ រីឯ​អនុប្រធាន​តុលាការយោធា និង​ជា​ចៅក្រម លោក​ឧត្ដមសេនីយ៍​ទោ ប៉ោក ប៉ន មាន​កូន​ប្រុស​ឈ្មោះ ប៉ុន វណ្ណៈ ជា​ចៅក្រម។

ប្រភព​បន្ត​ថា សព្វថ្ងៃ​នេះ ចៅក្រម​នៅ​ក្នុង​តុលាការយោធា​មាន​ចំនួន ២៥​រូប ហើយ​ក្នុង​នោះ​អនុប្រធាន​តុលាការយោធា មិន​តិច​ជាង​១០ នាក់​នោះ​ទេ ខណៈ​តុលាការ​នេះ​មិន​សូវ​មាន​សំណុំរឿង កាត់​ក្តី​ឡើយ។ ពួកគេ ឃុបឃិត​គ្នា​ដំឡើង​តួនាទី​ខ្ពស់ៗ និង​មាន​មុខងារ​ច្រើន​បែបនេះ គឺ​គ្រាន់តែ ដើម្បី​បើកប្រាក់​ខែ​រដ្ឋ​ប៉ុណ្ណោះ។

នាយក​កម្មវិធី​ជាន់ខ្ពស់​នៃ​អង្គការ​តម្លាភាព​កម្ពុជា​ថ្លែង​ថា ការតែងតាំង​សាច់ញាតិ​រហូតដល់​មិត្តភ័ក្ដិ ជិត​ស្និត​ក្នុង​ស្ថាប័ន​ជាមួយគ្នា ដោយ​មិនបាន​ឆ្លងតាម​នីតិវិធី​ត្រឹមត្រូវ គឺជា​ប្រភេទ​អំពើពុករលួយ ដែល​មាន​ការ​ទទួល​ស្គាល់​ជាស​កល​។ លោក ប៉ិច ពិសី ស្នើសុំ​ឱ្យ​ក្រសួងការពារជាតិ គួរតែ​ពិនិត្យ ស៊ើប​អង្កេត​រឿង​នេះ ដើម្បី​ធានា​ថា ការ​រើស​មន្ត្រីរាជការ​ទាំងអស់​មាន​តម្លាភាព ហើយ​គួរតែ​ទប់ ស្កាត់​បញ្ហា​បក្ខពួក​គ្រួសារនិយម ព្រោះ​វា​នឹង​បង្ក​ឱ្យ​មាន​បញ្ហា​ធំ៖ «កាល​ណា​តែង​តាំង​បង​ប្អូន​សាច់​ញាតិ ដែល​មាន​ការ​សង្ស័យ​ថា អត់​មាន​សញ្ញាប័ត្រ ឬ​ក៏​ជំនាញ​បច្ចេកទេស​ក្នុង​ការ​កាន់​ការងារ​នេះ​ទៀត វា​រឹត​តែ​ធ្វើ​ឲ្យ​មាន​បញ្ហា អត់​មាន​តម្លា​ភាព​ក្នុង​ការ​រើស​នេះ​ទៀត។ កាល​ណា​អត់​តម្លា​ភាព​អត់​សុចរិត​ភាព ហើយ​គ្រួសារ​បក្ខ​ពួក​និយម​នេះ​វា​ជា​អំពើ​ពុក​រលួយ​ហើយ។ បញ្ហា​នៃ​ការ​តែង​តាំង​បក្ខ​ពួក​គ្រួសារ​នេះ បើ​យើង​មើល​មួយ​ភ្លែត​ទៅ អាច​បក​ស្រាយ​ថា ដោយ​សារ​គាត់​ចេះ​ដែរ​ទើប​គាត់​បាន​ដំណែង​នេះ ប៉ុន្តែ​ជា​ទូទៅ​កាល​ណា​យើង​មាន​បង​ប្អូន​ក្មួយ​គ្រួសារ​សាច់​ញាតិ​ធ្វើ​ការ គឺ​វា​អាច​នាំ​ឈាន​ទៅ​ដល់​ទំនាស់​ផល​ប្រយោជន៍​ក្នុង​ការ​ធ្វើ​ការ​នេះ​ទៀត។ឧទាហរណ៍​ថា បើ​ម្នាក់​នេះ​ធ្វើ​ខុស​អត់​ហ៊ាន​ដាក់​ទោស​ទេ ព្រោះ​ជា​ក្មួយ​យើង​អីចឹង​ទៅ។ ទោះ​បី​ជា​អ្នក​នោះ​មាន​សមត្ថភាព​ក៏​ដោយ ការ​អនុវត្ត​ជា​ស្តង់ដារ គឺ​គេ​មិន​អនុញ្ញាត​ឲ្យ​គ្រួសារ​ធ្វើ​ការងារ​ជាមួយ​គ្នា​ក្នុង​ស្ថាប័ន​រដ្ឋ​ទេ»

លោក ប៉ិច ពិសី សង្កេត​ឃើញ​ថា មិនមែន​មានតែ​ស្ថាប័ន​តុលាការយោធា​មួយ​ទេ​ដែល​មាន​បញ្ហា គ្រួសារនិយម គឺ​ស្ទើរ​តែ​គ្រប់​ក្រសួង​ស្ថាប័ន​ទៅ​ហើយ​។ លោក​អំពាវនាវ​ឱ្យ​ក្រសួង​ស្ថាប័ន​រដ្ឋ​ទាំងអស់ គួរតែ​ជ្រើសរើស​មន្ត្រីរាជការ​ឱ្យ​បម្រើ​ការងារ​ក្នុង​ក្រសួង​គឺ​ធ្វើ​យ៉ាង​ណា​ឱ្យ​មាន​តម្លាភាព សុចរិត​ភាព កុំ​ឱ្យ​មានគ្រួសារ​និយម​តទៅទៀត ហើយ​ផ្ដោត​ទៅ​លើ​ចំណេះដឹង និង​ជំនាញ​របស់​បេក្ខជន​ដើម្បី​ឱ្យ​អ្នក​ចេះ​មាន ឱកាស​ធ្វើការ​តាម​ចំណេះ​ជំនាញ​របស់​ពួកគេ​ក្នុង​ស្ថាប័នរដ្ឋ ដើម្បី​ផ្ដល់​សេវា​ប្រកប ដោយ​ប្រសិទ្ធភាព​ដល់​ប្រជា​ប្រជាពលរដ្ឋ និង​ផលប្រយោជន៍​សម្រាប់​សង្គម​ជាតិ។

អាស៊ីសេរី​បាន​ទទួល​លិខិត​ពី​មន្ត្រី​រដ្ឋាភិបាល​ជា​បន្តបន្ទាប់​ស្នើ​ឱ្យ​ចុះផ្សាយ ពី​បញ្ហា​បក្ខពួក និង​ពុករលួយ​នៅ​តាម​ក្រសួង​មន្ទីរ​នានា។ ថ្មីៗ​ នេះ​អាស៊ីសេរី​បាន​ទទួល​លិខិត​ពី​មន្ត្រី​នៃ​ក្រសួង​ព័ត៌មាន ដែល​បង្ហាញ​ភស្តុតាង​អំពី​អំពើពុករលួយ ស្រដៀង​គ្នា​នឹង​នៅ​តុលាការយោធា​ដែរ​។ លិខិត​របស់​មន្ត្រី​ក្រសួង​ព័ត៌មាន បាន​ចោទប្រកាន់​ដោយ​ចំ​ឈ្មោះ​ដល់​មន្ត្រី​ពីរ​រូប គឺ​លោក ឈុំ សុជាតិ រដ្ឋលេខាធិការ និង​ជា​នាយខុទ្ទកាល័យ​នៃ​ក្រសួង​ព័ត៌មាន និង​លោក លោក គាម ម៉ារិទ្ធីយ៉ា ឬ​ហៅ​ថា កែវ សោភ័ណ ដែល​ជា​អនុរដ្ឋលេខាធិការ​នៃ​ក្រសួង​ព័ត៌មាន ដែល​តែងតាំង​សាច់ញាតិ​របស់​ខ្លួន​នៅ​ក្នុង​ក្រសួង មាន​តាំងពី​ប្រពន្ធ​កូន និង​បងប្អូន​ថ្លៃ​ជាដើម​។ ដូចជា​ករណី​នៅ​តុលាការ​យោធា​ដែរ តែ​ក្រសួង​ព័ត៌មាន​បដិសេធ​ស៊ើបអង្កេត​ករណី​ទេ ដោយ​ឆ្លើយ​ថា ជា​រឿង​ធម្មតា៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល