ចៅក្រមបញ្ជូនសំណុំរឿងអតីតបុគ្គលិកអាស៊ីសេរីទៅជំនុំជម្រះ ក្រោយបិទបញ្ចប់ការស៊ើបសួរ
2019.03.15
លោក អ៊ួន ឈិន (ឆ្វេង) និងលោក យាង សុធារិន អតីតជាអ្នករាយការណ៍ព័ត៌មានអាស៊ីសេរី។
RFA
ចៅក្រមស៊ើបសួរតុលាការក្រុងភ្នំពេញបានបិទបញ្ចប់នីតិវិធីស៊ើបអង្កេតសំណុំរឿងអតីតបុគ្គលិកអាស៊ីសេរីហើយ កាលពីពេលថ្មីៗ នេះ និងបានសម្រេចបញ្ជូនសំណុំរឿងក្ដីនេះទៅជំនុំជម្រះនៅពេលខាងមុខ។ អ្នកការពារសិទ្ធិមនុស្ស ស្នើឱ្យតុលាការពន្លឿននីតិវិធីជំនុំជម្រះ ដើម្បីផ្ដល់យុត្តិធម៌ដល់អតីតអ្នករាយការណ៍ព័ត៌មានអាស៊ីសេរីទាំងពីររូប។
អតីតបុគ្គលិកអាស៊ីសេរី លោក យាង សុធារិន សម្ដែងការខកចិត្តដែលចៅក្រមស៊ើបសួរ លោក ពេជ្រ វិជ្ជាធរ បានសម្រេចបញ្ជូនសំណុំរឿងនេះទៅជំនុំជម្រះ។ លោកថា តុលាការគ្មានភស្តុតាងបង្ហាញពីពិរុទ្ធភាពរបស់ពួកលោកឡើយ ដូច្នេះគួរណាស់តែលើកលែងការចោទប្រកាន់នេះ ក្រោយពេលបិទបញ្ចប់នីតិវិធីស៊ើបអង្កេត។
ទោះជាយ៉ាងណា លោកអះអាងថា លោកមិនមានការព្រួយបារម្ភចំពោះសវនាការជំនុំជម្រះនោះទេ ព្រោះលោក និងលោក អ៊ួន ឈិន មិនបានប្រព្រឹត្តកំហុសដូចការចោទប្រកាន់ឡើយ។ លោកបន្តថា ប្រសិនបើតុលាការកាត់ក្ដីរឿងនេះដោយឈរលើគោលការណ៍យុត្តិធម៌ និងមិនលម្អៀង ពួកលោកនឹងបានរួចខ្លួនពីបទចោទប្រកាន់នេះ៖ «វាអត់ឃើញលទ្ធផលដែលកើតចេញពីទង្វើរបស់ខ្ញុំ ដូចការចោទប្រកាន់។ បើចោទប្រកាន់យើងខ្ញុំថា បានធ្វើឱ្យប៉ះពាល់ដល់ការការពារជាតិ តើព័ត៌មានណា? ចំណុចហ្នឹងហើយដែលខ្ញុំថា តុលាការអត់មានការរីកចម្រើនក្នុងការស៊ើបអង្កេតរកភស្តុតាង ដែលបញ្ជាក់ថា យើងហ្នឹងបានបំផ្លាញជាតិ បានធ្វើឱ្យប៉ះពាល់ដល់ការការពារជាតិហ្នឹង វាអត់មាន។ ហើយរឿងអាសអាភាសហ្នឹង អត់មានទាល់តែសោះ ខ្ញុំមិនដឹងថា តើគាត់យកស្អី ដើម្បីឱ្យខ្ញុំពាក់ព័ន្ធទៅនឹងរឿងចែកចាយវីដេអូអាសអាភាស អ៊ីចឹងសម្រាប់ខ្ញុំអត់មានអីត្រូវបារម្ភទាំងអស់រឿងហ្នឹង។ អ៊ីចឹងបានជាខ្ញុំនិយាយហើយ និយាយទៀតថា បើជំនុំជម្រះមែន ឈរលើគោលការណ៍យុត្តិធម៌ យើងខ្ញុំនៅតែមនុស្សស្អាតស្អំ»។
មេធាវីការពារក្តីឱ្យអតីតបុគ្គលិកអាស៊ីសេរី លោក សំ ចំរើន ថ្លែងថា ចៅក្រមស៊ើបសួរតុលាការក្រុងភ្នំពេញបានចេញដីកាដំណោះស្រាយ តាំងពីចុងខែកុម្ភៈ ដោយបញ្ជូនសំណុំរឿងនេះទៅជំនុំជម្រះ ក៏ប៉ុន្តែលោកទើបតែទទួលបានដីកានោះ កាលពីថ្ងៃអង្គារ ដើមសប្ដាហ៍នេះ។ ទោះជាយ៉ាងណា លោកថាតុលាការមិនទាន់បានកំណត់កាលបរិច្ឆេទជំនុំជម្រះរឿងនេះនៅឡើយទេ ខណៈលោក និងកូនក្តីបានត្រៀមខ្លួនរួចហើយក្នុងការតតាំងក្ដីនេះ។
អាស៊ីសេរីមិនអាចទាក់ទងចៅក្រមសាលាដំបូងរាជធានីភ្នំពេញ លោក អ៊ឹម វណ្ណៈ ដើម្បីសាកសួរអំពីថ្ងៃកំណត់នៃការជំនុំជម្រះរឿងក្ដីនេះបាននៅឡើយទេ នៅថ្ងៃទី១៥ មីនា។
អតីតបុគ្គលិកអាស៊ីសេរីពីររូប គឺលោក អ៊ួន ឈិន និងលោក យាង សុធារិន ហៅ យាង សុជាមេត្តា ត្រូវបានអាជ្ញាធរក្រុងភ្នំពេញចាប់ខ្លួនកាលពីពាក់កណ្ដាលខែវិច្ឆិកា ឆ្នាំ២០១៧ កន្លងទៅ ពាក់ព័ន្ធនឹងការបង្កើតស្ទូឌីយោថតចម្រៀងដោយមិនមានការអនុញ្ញាត។ ក៏ប៉ុន្តែក្រោយមកអាជ្ញាធរបែរជាចោទអ្នកទាំង២ ពីបទឧក្រិដ្ឋធ្វើចារកម្មទៅវិញ ដែលបទចោទនេះប្រឈមនឹងការជាប់ពន្ធនាគាររហូតដល់ ១៥ឆ្នាំ ប្រសិនបើតុលាការសម្រេចឱ្យពួកលោកមានទោស។
តុលាការក្រុងភ្នំពេញ បានចោទប្រកាន់អ្នកទាំងពីរពីបទ "ផ្ដល់ឱ្យរដ្ឋបរទេសនូវព័ត៌មានជាអាទិ៍ដែលនាំឱ្យអន្តរាយដល់ការការពារជាតិ" និងក្រោយមកបានបន្ថែមបទចោទថ្មីមួយទៀត គឺបទផលិតវីដេអូអាសអាភាស។ ពួកលោកត្រូវបានដោះលែងឱ្យនៅក្រៅឃុំ កាលពីចុងខែសីហា ឆ្នាំ២០១៨ កន្លងទៅ ក្រោយជាប់ពន្ធនាគារអស់រយៈពេលជាង ៩ខែ។ ក៏ប៉ុន្តែសេរីភាពដែលទទួលបាននេះ មានលក្ខណៈរឹតត្បិតនៅឡើយ ព្រោះតុលាការបានដាក់អ្នកទាំងពីរក្រោមការត្រួតពិនិត្យ និងមិនអនុញ្ញាតឱ្យធ្វើដំណើរទៅក្រៅប្រទេសនោះឡើយ។
ប្រធានគ្រប់គ្រងការិយាល័យឃ្លាំមើលសិទ្ធិមនុស្សនៃអង្គការ លីកាដូ (LICADHO) លោក អំ សំអាត សង្កេតឃើញថា សំណុំរឿងពាក់ព័ន្ធនឹងសកម្មជនសង្គម និងអ្នកទោសមនសិការ មិនងាយនឹងទម្លាក់ចោលនៅក្នុងដំណាក់កាលចៅក្រមស៊ើបសួរឡើយ បើទោះបីជាតុលាការខ្វះភស្តុតាងដាក់បន្ទុកក៏ដោយ។ លោកស្នើឱ្យតុលាការពន្លឿនសវនាការជំនុំជម្រះសំណុំរឿងអតីតបុគ្គលិកអាស៊ីសេរីនេះ និងផ្ដល់យុត្តិធម៌ពិតប្រាកដដល់ពួកគេទាំងពីរវិញ៖ «សង្ឃឹមថា នឹងមានការទម្លាក់ចោលបទចោទប្រកាន់សម្រាប់អ្នកទាំងពីរ ឱ្យមានសេរីភាពពេញលេញ ពីព្រោះបច្ចុប្បន្នទោះបីជាអ្នកទាំងពីរនៅក្រៅឃុំបណ្ដោះអាសន្នក៏ដោយ ក៏ស្ថិតនៅក្រោមការត្រួតពិនិត្យរបស់តុលាការ ហើយអ្នកទាំងពីរមិនអាចចាកចេញទៅណាឆ្ងាយបាន និងជាពិសេសត្រូវបង្ហាញខ្លួននៅមុខប៉ុស្តិ៍ប៉ូលិស»។
ស្របពេលនៃការរំលាយគណបក្ស សង្គ្រោះជាតិដែលជាបក្សប្រឆាំងធំជាងគេនៅកម្ពុជា របបលោក ហ៊ុន សែន ក៏បានវាយបង្ក្រាបឥតឈប់ឈរលើសារព័ត៌មានឯករាជ្យផងដែរ។ របបនេះបានប្រើប្រាស់ប្រព័ន្ធតុលាការ និងបញ្ហាពន្ធដារជាអាវុធ ដើម្បីកម្ទេចស្ថាប័នណាដែលមិនព្រមដើរតាមគន្លងរបស់ខ្លួន។ ការវាយបង្ក្រាបទាំងនោះ រួមមានការបិទស្ថាប័នព័ត៌មាន ការប្ដឹងអ្នកសារព័ត៌មានទៅតុលាការ និងការចាប់ខ្លួនអ្នកសារព័ត៌មានពីបទធ្វើចារកម្មជាដើម។ មកទល់នឹងពេលនេះ របបក្រុងភ្នំពេញមិនទាន់បានធ្វើឱ្យប្រសើរឡើងនូវសេរីភាពសារព័ត៌មាននៅឡើយទេ ទោះបីជារបបនេះបានក្រសោបយកអំណាចរដ្ឋទាំងអស់មកកាន់កាប់ផ្ដាច់មុខតែម្នាក់ឯងក៏ដោយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- អ្នកតាមដាននយោបាយថា អាមេរិកដាក់ទណ្ឌកម្ម លោក លី យ៉ុងផាត់ ជាការកាត់ផ្ដាច់សរសៃឈាមសេដ្ឋកិច្ចរបស់បក្សកាន់អំណាច
- កញ្ញា ឈឹម ស៊ីថរ រក្សាជំហរតស៊ូ ដើម្បីសេរីភាពសហជីព និងការពារផលប្រយោជន៍កម្មករក្រោយមានសេរីភាព
- ហេតុអ្វីបានជាអាមេរិកដាក់ទណ្ឌកម្ម «ស្តេចកោះកុង»?
- ក្រសួងការបទេស និងគណបក្សប្រជាជនកម្ពុជាចាត់ទុកថា ជារឿងអយុត្តិធម៌ ដែលក្រសួងរតនាគារសហរដ្ឋអាមេរិកដាក់ទណ្ឌកម្មលើលោក លី យ៉ុងផាត់
- សមត្ថកិច្ចចាប់ខ្លួន លោក ហោ សុខុន អតីតព្រះចៅអធិការវត្តច្បារអំពៅ និងមនុស្ស ៣ទៀត