មន្ត្រីអង្គការសង្គមស៊ីវិលស្នើឱ្យអាជ្ញាធរពាក់ព័ន្ធស្វែងរកចាប់អតីតរដ្ឋមន្ត្រីក្រសួងវប្បធម៌ របស់ថៃដែលកំពុងគេចខ្លួននៅកម្ពុជាប្រគល់ឱ្យថៃវិញ។ សំណើរបស់សង្គមស៊ីវិលនេះបន្ទាប់ពីតុលាការថៃបានចេញដីកាចាប់អតីតរដ្ឋមន្ត្រីរូបនេះពីបទក្លែងបន្លំ ក្នុងពេលដែលលោកជាអភិបាលក្រុងផាត់តាយ៉ា (Pattaya)។
មន្ត្រីអង្គការសង្គមស៊ីវិល លើកឡើងថា អតីតរដ្ឋមន្ត្រីក្រសួងវប្បធម៌របស់ថៃដែលបានគេចខ្លួនមកកម្ពុជានេះជាជនល្មើស ដែលអាជ្ញាធរខ្មែរគួរតែបញ្ជូនឱ្យទៅទទួលទោសនៅប្រទេសកំណើតវិញឱ្យបានឆាប់។
ប្រធានសមាគមការពារសិទ្ធិមនុស្សអាដហុក (Adhoc) លោក នី សុខា ប្រាប់វិទ្យុអាស៊ីសេរីនៅថ្ងៃទី៧កញ្ញា ថា ជនទាំងឡាយដែលប្រព្រឹត្តបទល្មើសហើយរត់គេចខ្លួនមកស្នាក់នៅកម្ពុជាពុំមែនជារឿងល្អឡើយ។ លោកស្នើឱ្យអាជ្ញាធរខ្មែរស្វែងរកចាប់អតីតរដ្ឋមន្ត្រីក្រសួងវប្បធម៌ថៃ គឺ លោក ឥទ្ធិពល ឃុនព្លឿម (Itthiphol Kunplome) ប្រគល់ឱ្យអាជ្ញាធរថៃវិញ ដើម្បីកុំឱ្យកម្ពុជាមានឈ្មោះអាក្រក់ខាងទីជម្រករបស់ក្រុមឧក្រិដ្ឋជន ឬជនល្មើសមានលុយមានអំណាច។
លោក នី សុខា៖ «ចង់មិនចង់ធ្វើឱ្យប៉ះពាល់ទីមួយមុខម៉ាត់របស់រដ្ឋាភិបាល គឺរដ្ឋាភិបាលមួយដែលមានលក្ខណៈស៊ុមគ្រលុំគប់គិតជាមួយអ្នករកស៊ីមិនត្រឹមត្រូវនៅក្នុងប្រទេសគេ ហើយអាចជាកន្លែងមួយដែលធ្វើឱ្យអ្នកដែលប្រព្រឹត្តល្មើសច្បាប់ទាំងអស់នោះ ជាកន្លែងជ្រកកោន។ អ៊ីចឹងអាហ្នឹងធ្វើឱ្យប៉ះពាល់កិត្តិយសដល់មុខម៉ាត់រដ្ឋាភិបាលធ្ងន់ធ្ងរ។ ហើយវិនិយោគទុនមួយចំនួនអាចខ្លាចរអាមិនចង់មករកស៊ីនៅកម្ពុជា ដោយសារតែគេថា ប្រទេសយើងជាប្រទេសមួយដែលសំបូរទៅដោយជនដែលមិនល្អមករស់នៅ»។
សំណើរបស់សង្គមស៊ីវិលនេះ បន្ទាប់ពីតុលាការថៃចេញដីកាចាប់ខ្លួនអតីតរដ្ឋមន្ត្រីក្រសួងវប្បធម៌របស់ថៃ គឺលោក ឥទ្ធិពល ឃុនព្លឿម (Itthiphol Kunplome) ដែលជារដ្ឋមន្ត្រីជំនាន់រដ្ឋាភិបាលរបស់លោក ប្រាយុទ្ធ ចាន់អូចារ (Prayuth Chan O Cha) ពីបទក្លែងបន្លំ ពាក់ព័ន្ធនឹងការសាងសង់អាគារខុនដូរកម្ពស់ ៥៧ជាន់នៅឆ្នេរសមុទ្រផាត់តាយ៉ា (Pattaya) ក្នុងពេលដែលលោកជាអភិបាលក្រុងផាត់តាយ៉ា។ សារព័ត៌មានរបស់ថៃជាច្រើនស្ថាប័នបានចុះផ្សាយថា អតីតរដ្ឋមន្ត្រីរូបនេះបានរត់គេចខ្លួនដោយធ្វើដំណើរតាមយន្តហោះចាកចេញពីព្រលានយន្តហោះសុវណ្ណភូមិ ទីក្រុងបាងកកមកប្រទេសកម្ពុជា កាលពីថ្ងៃទី៣០ ខែសីហា កន្លងទៅ ហើយអាជ្ញាធរថៃកំពុងតាមចាប់អតីតរដ្ឋមន្ត្រីរូបនេះ។
វិទ្យុអាស៊ីសេរីមិនអាចទាក់ទងអគ្គស្នងការនគរបាលជាតិ លោក ស ថេត និងអ្នកនាំពាក្យអគ្គស្នងការដ្ឋាននគរបាលជាតិ លោក ឆាយ គឹមខឿន ដើម្បីសុំអត្ថាធិប្បាយជុំវិញបញ្ហានេះបានទេនៅថ្ងៃទី៧ កញ្ញា។
ជុំវិញរឿងនេះប្រធានសមាគមសម្ព័ន្ធនិស្សិតបញ្ញវន្តខ្មែរ លោក កើត សារ៉ាយ មានប្រសាសន៍ថា កន្លងទៅកម្ពុជា បានចុះកិច្ចប្រតិបត្តិការយោគយល់គ្នាបញ្ជូនជនដែលមានទោសត្រឡប់ទៅទទួលទោសនៅប្រទេសកំណើតវិញ ជាមួយរដ្ឋាភិបាលថៃរួចមកហើយ។ លោកបញ្ជាក់ថា ដូច្នេះអាជ្ញាធរកម្ពុជាគួរតែប្រឹងប្រែងស្វែងរកចាប់អតីតរដ្ឋមន្ត្រីរូបនេះបញ្ជូនទៅឱ្យអាជ្ញាធរថៃវិញ។
លោក កើត សារ៉ាយ៖ «វាជាការបង្ហាញមួយថា កម្ពុជាមិនមែនជាសំបុកមិនមែនជាទីកន្លែងសម្រាប់ជនល្មើសមកជ្រកកោនទេ។ មិនមែនជាទីកន្លែងសម្រាប់អ្នកលាងលុយកខ្វក់ឬក៏ជនល្មើសប្រព្រឹត្តិបទល្មើសផ្សេងៗមកជ្រកកោនទេ ដើម្បីបង្ហាញពីភាពស្អាតស្អំបង្ហាញពីសក្ដានុពលនៃការអនុវត្តច្បាប់នៅកម្ពុជាដែរ។ ហ្នឹងហើយជាកត្តាដែលខ្ញុំគិតថា ជំរុញឱ្យមានការអនុវត្តច្បាប់បានតឹងរ៉ឹងសម្រាប់ជនល្មើស ឬឧក្រិដ្ឋជនបរទេសដែលចូលមកក្នុងប្រទេសកម្ពុជាហ្នឹង»។
កម្ពុជាត្រូវបានគេរកឃើញថា ត្រូវបានជនល្មើស ឬឧក្រិដ្ឋជនប្រើប្រាស់ធ្វើជាទីកន្លែងសម្រាប់ជ្រកកោន ដើម្បីងាយស្រួលប្រព្រឹត្តបទល្មើស និងការលាងលុយកខ្វក់។
កាលពីខែមីនា ឆ្នាំ២០២២កន្លងទៅ អង្គការឃ្លាំមើលអំពើលាងលុយកខ្វក់លើពិភពលោក ឈ្មោះក្រុមការងារសកម្មភាពហិរញ្ញវត្ថុ (FATF) ដែលមានមូលដ្ឋាននៅទីក្រុងប៉ារីស (Paris) ប្រទេសបារាំង (France) បានដាក់កម្ពុជាក្នុង «បញ្ជីប្រផេះ» នៃក្រុមប្រទេសមានហានិភ័យខាងអំពើលាងលុយកខ្វក់ ដែលពិភពលោកត្រូវបង្កើនការតាមដាន។
មន្ត្រីសង្គមស៊ីវិលឱ្យដឹងថា មូលហេតុដែលក្រុមឧក្រិដ្ឋជនយកទឹកដីកម្ពុជាដើម្បីជ្រកកោនដោយសារការអនុវត្តច្បាប់ធូររលុងនិងការប្រព្រឹត្តអំពើពុករលួយពីសំណាក់អាជ្ញាធរខ្មែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។