រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ ថ្លែងប្រាប់អ្នកសារព័ត៌មានកាលពីថ្ងៃទី២៧ តុលាថា សេចក្ដីព្រាងច្បាប់ស្ដីពីសិទ្ធិទទួលបានព័ត៌មាន បានបញ្ជូនទៅដល់ទីស្ដីគណៈរដ្ឋមន្ត្រីហើយ និងរង់ចាំតែស្ថាប័ននេះ បើកកិច្ចប្រជុំសម្រេចមុននឹងបញ្ជូនទៅសភា។
លោក ខៀវ កាញារីទ្ធ អះអាងថា សេចក្ដីព្រាងច្បាប់សិទ្ធិទទួលបានព័ត៌មានគឺក្រសួងព័ត៌មានរៀបចំចប់សព្វគ្រប់អស់ហើយ។ ឥលូវនេះ នៅរង់ចាំតែទីស្ដីការគណៈរដ្ឋមន្ត្រី បើកិច្ចប្រជុំពិនិត្យមើលបន្តតែប៉ុណ្ណោះ។
លោក ខៀវ កាញារីទ្ធ៖ « យើងចប់អស់ហើយ ហើយទៅដល់គណៈរដ្ឋមន្ត្រីពិនិត្យ។ ការធ្វើច្បាប់មានពីរដំណាក់កាល ទី១ គឺការប្រជុំគ្រប់ភាគីដែលពាក់ព័ន្ធ បន្ទាប់មករឿងទោសទណ្ឌ ក្រសួងយុត្តិធម៌ ជាអ្នកប្រជុំពិនិត្យ។ ច្បាប់នេះ យើងបានដាក់ទៅទីស្ដីការគណៈរដ្ឋមន្ត្រីយូរហើយ តែយើងដឹងហើយកន្លងមក គឺជាប់ការងារហូត »។
រដ្ឋមន្ត្រីក្រសួងព័ត៌មានបានឆ្លើយប្រាប់អ្នកសារព័ត៌មានដូច្នេះ នៅក្រោយពី រងការរិះគន់ថា ក្រសួងព័ត៌មានបានប្រើពេលយូរ ដើម្បីរៀបចំធ្វើច្បាប់នេះ ខណៈលោក ហ៊ុន សែន បានសន្យានៅចំពោះមុខអ្នកសារព័ត៌មានប្រមាណ៦ពាន់នាក់កាលពីឆ្នាំ២០២០ថា លោកនឹងរុញឲ្យច្បាប់ស្ដីពីសិទ្ធទទួលបានព័ត៌មានចេញជារូបរាងនៅត្រឹមឆ្នាំ២០២០។
ឥលូវនេះ សេចក្ដីព្រាងច្បាប់បានបញ្ជូនដល់ដៃលោកនាយករដ្ឋមន្ត្រីហ៊ុន សែន ឬទីស្ដីការគណៈរដ្ឋមន្ត្រីហើយ ប៉ុន្តែនៅមិនទាន់បើកិច្ចប្រជុំ ដើម្បីបញ្ជូនបន្តទៅសភាសភានៅឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។