សាលក្រម​ទម្លាក់​ចោល​​បទ​ចោទ​លើ​លោក អាឡិច ចូល​ជា​ស្ថាពរ

ដោយ ម៉ៅ សុធានី
2020-03-03
អ៊ីម៉ែល
មតិ
Share
បោះពុម្ព
លោក​ អាឡិច ហាន់ដ្រូហ្គាន់ហ្សាលេស ដេវីតសុន (Alejandro Gonzalez Davidson) ប្រធាន​អង្គការ​មាតា​ធម្មជាតិ​។
លោក​ អាឡិច ហាន់ដ្រូហ្គាន់ហ្សាលេស ដេវីតសុន (Alejandro Gonzalez Davidson) ប្រធាន​អង្គការ​មាតា​ធម្មជាតិ​។
Mother Nature Cambodia

សាលក្រម​តុលាការ​ខេត្ត​កោះកុង​ដែល​ទម្លាក់​ចោល​បទ​ចោទ​ប្រកាន់​លើ​សកម្មជន​បរិស្ថាន​លោក អាឡិច (Alejandro Gonzalez Davidson) បាន​ចូល​ជា​ស្ថាពរ​ហើយ បន្ទាប់​ពី​មិន​មានការ​ប្ដឹង​ឧទ្ធរណ៍​ពី​តំណាង​អយ្យការ។ អ្នក​ការពារ​សិទ្ធិ​មនុស្ស​ថា នេះ​ជា​ករណី​​ដ៏​កម្រ​ដែល​អ្នក​ធ្វើ​ការ​សង្គម​ទទួល​បាន​យុត្តិធម៌​ពី​តុលាការ។

មេធាវី​ការពារក្តី​ឱ្យ​​​​លោក អាឡិច គឺ​លោក សំ ចំរើន ឱ្យ​​អាស៊ី​សេរី​ដឹង​នៅ​ថ្ងៃ​ទី៣ មីនា​ថា លោក​បាន​បញ្ជាក់​ជាមួយ​ក្រឡា​បញ្ជី​​សាលាដំបូង​ខេត្ត​កោះកុង​​រួច​ហើយ​ថា សាលក្រម​របស់​តុលាការ​បាន​ចូល​ជាធរមាន​​ហើយ។ នេះ​មានន័យ​ថា កូន​ក្តី​របស់​លោក គឺ​លោក អាឡិច បាន​រួច​ផុត​ពី​​ការ​ចោទ​ប្រកាន់​ទាំងស្រុង​ទាក់ទង​នឹង​សំណុំ​រឿង​ព្រហ្មទណ្ឌ​នៅ​តុលាការ​ខេត្ត​កោះកុង។

ទោះ​ជា​យ៉ាង​ណា លោក​បញ្ជាក់​ថា លោក​មិន​ទាន់​ទទួល​បាន​លិខិត​សាលក្រម​ស្ថាពរ​នេះ​​ដល់​ដៃ​នៅ​ឡើយ​ទេ ប៉ុន្តែ​លោក​​នឹង​ស្នើសុំ​​ពី​មន្ត្រី​ក្រឡា​បញ្ជី​តុលាការ​ខេត្ត​កោះកុង​នៅ​ពេល​ឆាប់ៗ នេះ«បើ​គិត​មក​ដល់​ពេល​នេះ សាលក្រម​នេះ​​ចូល​ជា​ស្ថាពរ​ពេញលេញ​ហើយ។ យើង​បាន​តាម​ដាន និង​ពិនិត្យ​​ក្នុង​​សំណុំ​រឿង​ជាមួយ​អ្នក​ស្រី​ក្រឡាបញ្ជី​​ពេញលេញ​​អស់​ហើយ​ គឺ​ថា​មិន​មាន​បណ្ដឹង​ឧទ្ធរណ៍​នៅ​ក្នុង​សំណុំ​រឿង​ហ្នឹង​ទៀត​ទេ»

តុលាការ​ខេត្ត​​កោះកុង​បាន​ចោទ​ប្រកាន់​លោក អាឡិច ពី​បទ “សម​គំនិត​ក្នុង​អំពើ​គំរាម​កំហែង​ថា នឹង​ធ្វើ​ឱ្យ​ខូច​ខាត​ដែល​​ភ្ជាប់​នូវ​បញ្ជា​អ្វី​មួយ” ប្រព្រឹត្ត​ទៅ​នៅ​ចំណុច​ភូមិ​​អណ្ដូង​ទឹក ឃុំ​អណ្ដូង​ទឹក ស្រុក​បទុម​សាគរ ខេត្ត​កោះកុង កាល​ពី​អំឡុង​ខែ​កក្កដា និង​សីហា ឆ្នាំ២០១៥ កន្លងទៅ។ តុលាការ​បាន​​បំបែក​សំណុំ​រឿង​នេះ ​ចេញ​ពី​សំណុំ​រឿង​អតីត​យុវជន​មាតា​ធម្មជាតិ​៣ នាក់ ដែល​ត្រូវ​បាន​ចាប់​ខ្លួន​ និង​ផ្ដន្ទាទោស​ ដោយសារ​​​​ពួក​គេ​បាន​ចេញមុខ​តវ៉ា​ប្រឆាំង​​ការ​បូម​ខ្សាច់​បែប​អនាធិបតេយ្យ​ ក្នុង​ខេត្ត​កោះកុង។

តុលាការ​ខេត្ត​កោះកុង​បាន​លើក​យក​សំណុំ​រឿង​របស់​លោក អាឡិច នេះ​មក​​ជំនុំ​ជម្រះ​នៅ​ចុង​ខែ​កក្កដា ឆ្នាំ២០១៩ ហើយ​នៅ​ចុង​ខែ​សីហា តុលាការ​បាន​​សម្រេច​ទម្លាក់​ចោល​បទ​ចោទ​ប្រកាន់​លើ​សកម្មជន​បរិស្ថាន​រូប​នេះ។ ចៅក្រម​ជំនុំ​ជម្រះ​​បាន​បើក​​សិទ្ធិ​ប្តឹង​​ឧទ្ធរណ៍​ចំពោះ​សេចក្ដី​សម្រេច​នេះ ក៏​ប៉ុន្តែ​តំណាង​អយ្យការ​មិន​បាន​ប្តឹង​​ឧទ្ធរណ៍​នោះ​ឡើយ។ ដូច្នេះ សាលក្រម​នេះ​ត្រូវ​​ចូល​ជា​ស្ថាពរ​ហើយ បើ​គិត​ទៅ​លើ​ក្របខ័ណ្ឌ​ពេល​វេលា ដែល​មាន​ចែង​ក្នុង​បញ្ញត្តិ​ច្បាប់។

សកម្មជន​បរិស្ថាន​ជន​ជាតិ​​អេស្ប៉ាញ លោក អាឡិច ដែល​ចេះ​​ភាសាខ្មែរ​យ៉ាង​ស្ទាត់​ជំនាញ​នោះ ថ្លែង​ថា លោក​​ភ្ញាក់​ផ្អើល​ចំពោះ​ការ​សម្រេច​សេចក្ដី​នេះ ព្រោះ​លោក​កត់​សម្គាល់​ថា សំណុំ​​រឿង​ព្រហ្មទណ្ឌ​ប្រឆាំង​នឹង​អ្នក​​ធ្វើ​ការ​សង្គម​កន្លងមក ច្រើន​តែ​មាន​ភាព​អយុត្តិធម៌។ តែ​យ៉ាង​ណា លោក​ថា លោក​រីករាយ​នឹង​ដំណឹង​នេះ ព្រោះ​លោក​បាន​តស៊ូ​​ដើម្បី​ស្វែង​រក​​យុត្តិធម៌​សម្រាប់​ខ្លួន​ឯង អស់​រយៈពេល​ជិត៥ ឆ្នាំទៅ​ហើយ។ លោក​​បន្ថែម​ថា ក្រោយ​​ទទួល​បាន​សាលក្រម​ស្ថាពរ​ពី​តុលាការ លោក​នឹង​ព្យាយាម​រក​វិធី ដើម្បី​វិល​ត្រឡប់​ទៅ​ប្រទេស​កម្ពុជា​វិញ៖ «ខួប ៥ឆ្នាំ​ហើយ ដែល​ខ្ញុំ​ត្រូវ​បាន​បណ្ដេញ​ចេញ​ពី​​ប្រទេស​កម្ពុជា គោល​ជំហរ​របស់​ខ្ញុំ​ហ្នឹង គឺ​ចង់​តែ​ត្រឡប់​ទៅវិញ​​ទេ ដើម្បី​បន្ត​បេសកកម្ម​របស់​ខ្ញុំ​អស់​មួយ​ជីវិត​។ ខ្ញុំ​មិន​​មែន​ជា​ជន​បរទេស​ដែល​មក​នៅ​​ខ្មែរ​មួយ​​រយៈ បន្ទាប់មក​ចេញ​ទៅ​ក្រៅ​ប្រទេស ឬ​ក៏​ត្រឡប់​ទៅ​ប្រទេស​វិញ​ទេ។ ខ្ញុំ​ចង់​នៅ​ខ្មែរ​រហូត»

អ្នក​នាំ​ពាក្យ​សមាគម​អាដហុក (ADHOC) លោក ស៊ឹង សែនករុណា សាទរ​ចំពោះ​ករណី​ដែល​លោក​ អាឡិច បាន​​រួច​ផុត​ពី​បទ​ចោទ​ប្រកាន់​ជា​ស្ថាពរ ព្រោះ​លោក​ថា សំណុំ​រឿង​ប្រឆាំង​នឹង​សកម្មជន​បរិស្ថាន ឬ​អ្នក​​ការពារ​សិទ្ធិមនុស្ស​​ កម្រ​នឹង​មាន​យុត្តិធម៌​បែប​នេះ​ណាស់។ លោក​បន្ថែម​ថា អាជ្ញាធរ​កម្ពុជា​គួរ​តែ​បើក​​ផ្លូវ​ឱ្យ​លោក អាឡិច បាន​វិល​ត្រឡប់​មក​កម្ពុជា​វិញ ដើម្បី​ជួយ​​ការពារ​បរិស្ថាន និង​ធនធាន​ធម្មជាតិ​នៅ​ស្រុក​​ខ្មែរ៖ «តុលាការ​បាន​ទម្លាក់​បទ​ចោទ​ប្រកាន់​ទៅ​ហើយ ហើយ​អាជ្ញាធរ​កម្ពុជា​ហ្នឹង​គួរ​តែ​បើក​ផ្លូវ​ឱ្យ​លោក អាឡិច បាន​វិល​ត្រឡប់​មក​ប្រទេស​កម្ពុជា​វិញ។ តាម​ខ្ញុំ​ដឹង ជា​ឆន្ទៈ​របស់​លោក អាឡិច ហ្នឹង គឺ​តែង​តែ​ចង់​ជួយ​រួម​ចំណែក​នៅ​ក្នុង​ការ​ការពារ​ព្រៃ​ឈើ​របស់​ប្រទេស​កម្ពុជា​ហ្នឹង។ មិន​តែ​ប៉ុណ្ណឹង​ទេ លោក​​ អាឡិច ក៏​ធ្លាប់​ថា ចង់​បាន​សញ្ជាតិ​កម្ពុជា​ទៅទៀត​ ដើម្បី​បាន​ជួយ​ពលរដ្ឋ​កម្ពុជា​ផង ហើយ​បាន​ជួយ​​រួម​ចំណែក​ការពារ​បរិស្ថាន​ផង»

អ្នក​នាំ​ពាក្យ​អគ្គស្នងការដ្ឋាន​នគរបាល​ជាតិ លោក ឆាយ គឹមខឿន បដិសេធ​មិន​ធ្វើ​អត្ថាធិប្បាយ​រឿង​នេះ​ទេ ដោយ​លោក​បង្វែរ​ឱ្យ​ទៅ​សួរ​ខាង​មន្ត្រី​ជំនាញ​​វិញ។

អាស៊ី​សេរី​បាន​ទាក់ទង​ទៅ​អគ្គនាយក​អន្តោប្រវេសន៍​​ក្រសួង​មហាផ្ទៃ លោក គៀត ច័ន្ទថារិទ្ធិ ដើម្បី​សាកសួរ​អំពី​រឿង​នេះ​ដែរ តែ​លោក​បាន​ប្រាប់​ឱ្យ​​ទៅ​សួរ​អ្នក​នាំ​ពាក្យ​របស់​លោក​ គឺ​លោក កែវ វណ្ណថន។ អាស៊ី​សេរី​ក៏​​បាន​ទូរស័ព្ទ​ទៅ​លោក កែវ វណ្ណថន ទៀត ប៉ុន្តែ​លោក​បាន​ចុច​ផ្ដាច់ នៅ​ពេល​​ទូរស័ព្ទ​រោទិ៍។

លោក​ អាឡិច ត្រូវ​បាន​ក្រុម​​អាជ្ញាធរ​បណ្ដេញ​ចេញ​ពី​កម្ពុជា​ កាល​ពី​ចុង​ខែ​កុម្ភៈ ឆ្នាំ២០១៥ ក្រោម​​ហេតុផល​ថា ទិដ្ឋាការ​របស់​លោក​​ផុត​កំណត់​។ ក៏​ប៉ុន្តែ ​ក្រុម​អ្នក​សង្កេត​ការណ៍​ យល់​ថា ការ​បណ្ដេញ​ចេញ​នេះ ដោយ​សារ​លោក​​ជា​សកម្មជន​បរិស្ថាន​លេចធ្លោ​មួយ​រូប ​ដែល​បាន​ចេញ​មុខ​យ៉ាង​សកម្ម​ក្នុង​កិច្ច​ការពារ​ធនធាន​ធម្មជាតិ​នៅ​តំបន់​​អា​រ៉ែង ក្នុង​ខេត្ត​កោះកុង។

លោក អាឡិច ​បាន​ព្យាយាម​ជាច្រើន​ដង​ដើម្បី​បាន​វិល​ត្រឡប់​មក​ប្រទេស​កម្ពុជា​វិញ ប៉ុន្តែ​ត្រូវ​ទទួល​បរាជ័យ ​ដោយ​សារ​លោក​​ជាប់​ឈ្មោះ​នៅ​ក្នុង​បញ្ជី​​​នៃ​ជន​ដែល​មិន​ត្រូវ​បាន​អនុញ្ញាត​ឱ្យ​ចូល​​ទឹក​ដី​កម្ពុជា។ កាល​ពី​ខែ​កក្កដា ឆ្នាំ២០១៩ លោក​បាន​សាកល្បង​ស្នើសុំ​ទិដ្ឋាការ​អនឡាញ​ម្ដង​ទៀត​ពី​អាជ្ញាធរ​កម្ពុជា ហើយ​អាជ្ញាធរ​​ក៏​បាន​​ផ្ដល់​ទិដ្ឋាការ​អនឡាញ​ដល់​លោក ក៏​ប៉ុន្តែ​ប៉ុន្មាន​ម៉ោង​ក្រោយ​មក​ គេ​ក៏បាន​​និរាករណ៍​ទិដ្ឋាការ​នោះ​វិញ​ដោយ​មិន​បញ្ជាក់​មូលហេតុ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

គេហទំព័រ​ទាំងមូល