របបក្រុងភ្នំពេញសុំឱ្យសិង្ហបុរីជួយរឿងប្រឆាំងព័ត៌មានក្លែងក្លាយ និងឧក្រិដ្ឋកម្មអ៊ីនធឺណិត
2019.03.05
សៀវភៅច្បាប់មួយចំនួននៃព្រះរាជាណាចក្រកម្ពុជា។
របបលោក ហ៊ុន សែន បានស្នើសុំសិង្ហបុរីឱ្យជួយលើការងារប្រយុទ្ធប្រឆាំងព័ត៌មានក្លែងក្លាយ ឧក្រិដ្ឋកម្មឆ្លងដែន ព្រមទាំងការប្រយុទ្ធប្រឆាំងបទល្មើសបច្ចេកវិទ្យាផងដែរ។ សំណើនេះធ្វើឡើងក្នុងជំនួបរវាងមេដឹកនាំរបបក្រុងភ្នំពេញជាមួយអគ្គស្នងការនគរបាលជាតិសិង្ហបុរី កាលពីថ្ងៃទី៤ មីនា ។ អ្នកការពារសិទ្ធិមនុស្ស បារម្ភថា ពលរដ្ឋកាន់តែច្រើននឹងជាប់ទោសដោយសារការបញ្ចេញមតិលើបណ្ដាញសង្គម បើច្បាប់នេះត្រូវបានបង្កើតឡើងមែននោះ។
លោកនាយករដ្ឋមន្ត្រី ហ៊ុន សែន បានស្នើឱ្យភាគីនគរបាលសិង្ហបុរីជួយចែករំលែកបទពិសោធន៍គ្រប់គ្រងព័ត៌មានមិនពិតនៅលើបណ្ដាញសង្គមដល់នគរបាលកម្ពុជា។ លោកបានថ្លែងកោតសរសើរថា សិង្ហបុរីជាប្រទេសមានកន្លែងអប់រំ និងហ្វឹកហាត់បានល្អ ជាពិសេសមានច្បាប់គ្រប់គ្រងជាក់លាក់ ដូច្នេះលោកស្នើឱ្យសិង្ហបុរីជួយបង្ហាត់បង្រៀនភាគីកម្ពុជា ខណៈរបបរបស់លោកកំពុងគិតគូរពីការបង្កើតច្បាប់ប្រឆាំងនឹងព័ត៌មានក្លាយ។
ចំណែករដ្ឋមន្ត្រីក្រសួងមហាផ្ទៃលោក ស ខេង វិញ ក៏បានលើកឡើងដែរថា នេះជារឿងល្អបំផុតដែលភាគីកម្ពុជា និងសិង្ហបុរី បន្តសហការគ្នាក្នុងការទប់ស្កាត់បទល្មើសឧក្រិដ្ឋនានា ដូចជា ការប្រឆាំងអំពើភេរវកម្ម ការប្រឆាំងបទល្មើសបច្ចេកវិទ្យា និងបទល្មើសឆ្លងដែនដទៃទៀត។
អ្នកនាំពាក្យអគ្គស្នងការនគរបាលជាតិកម្ពុជាលោក ឆាយ គឹមខឿន បានថ្លែងប្រាប់ក្រុមអ្នកសារព័ត៌មានថា អគ្គស្នងការនគរបាលជាតិសិង្ហបុរី លោក ហុង វីតឹក (Hoong Wee Teck) បានសន្យាជួយបណ្ដុះបណ្ដាលដល់មន្ត្រីនគរបាលកម្ពុជាទាក់ទងនឹងជំនាញប្រយុទ្ធប្រឆាំងបទល្មើសបច្ចេកវិទ្យា និងការគ្រប់គ្រងល្បែងពាណិជ្ជកម្ម ជាដើម ហើយកម្មវិធីបណ្ដុះបណ្ដាលនោះនឹងមានទាំងរយៈពេលវែង និងរយៈពេលខ្លី។
ការស្នើសុំជំនួយពីសិង្ហបុរីនេះ សបញ្ជាក់ឱ្យឃើញថា របបក្រុងភ្នំពេញពិតជាមានបំណងបង្កើតឱ្យមានច្បាប់ប្រឆាំងព័ត៌មានក្លែងក្លាយ និងឧក្រិដ្ឋកម្មលើប្រព័ន្ធអ៊ីនធឺណិត បន្ថែមលើការប្រកាសរបស់លោក ហ៊ុន សែន ម្ដងហើយម្ដងទៀតអំពីរឿងនេះ៖ «នៅប្រទេសមួយចំនួនកំពុងបង្កើតច្បាប់ប្រឆាំងនឹងព័ត៌មានក្លែងក្លាយហើយ។ ហើយនៅ ប្រទេសមួយចំនួនកំពុងតែរួមគ្នាប្រយុទ្ធប្រឆាំងបទឧក្រិដ្ឋអ៊ីនធឺណិត។ អ៊ីចឹងទេកម្ពុជាក៏ត្រូវតែគិតគូរពីបញ្ហានេះផងដែរ»។
អ្នកការពារសិទ្ធិមនុស្សសម្ដែងក្ដីព្រួយបារម្ភថា ប្រសិនបើច្បាប់ស្ដីពីការគ្រប់គ្រងបទល្មើសបច្ចេកវិទ្យាត្រូវបានបង្កើតឡើងមែន នោះសិទ្ធិសេរីភាពបញ្ចេញមតិរបស់ពលរដ្ឋលើបណ្ដាញសង្គម និងនៅលើប្រព័ន្ធអ៊ីនធឺណិតសង្គម អាចនឹងរងការរឹតត្បិតកាន់តែខ្លាំង។
ប្រធានគ្រប់គ្រងការិយាល័យឃ្លាំមើលសិទ្ធិមនុស្សនៃអង្គការលីកាដូ (LICADHO) លោក អំ សំអាត ទទួលស្គាល់ថា ប្រទេសមួយចំនួនពិតជាមានច្បាប់គ្រប់គ្រងអ៊ីនធឺណិតមែន ក៏ប៉ុន្តែច្បាប់នេះមានគោលបំណងទប់ស្កាត់បទល្មើស និងបម្រើឱ្យផលប្រយោជន៍ជាតិរបស់គេពិតប្រាកដ។ ដោយឡែកនៅកម្ពុជា លោកកត់សម្គាល់ថា ច្បាប់ភាគច្រើនដែលបង្កើតឡើង មានបង្កប់ខ្លឹមសាររឹតត្បិតសិទ្ធិសេរីភាពពលរដ្ឋ ដូច្នេះលោកយល់ថា ច្បាប់គ្រប់គ្រងបទល្មើសបច្ចេកវិទ្យានេះ ក៏ទំនងជាមានលក្ខណៈដូចគ្នានេះដែរ៖ «ខ្ញុំគិតថា ច្បាប់វាមិនមែនថាយើងត្រូវតែប្រញាប់ឱ្យបានរួសរាន់ឱ្យចង់ចេញគឺចេញឱ្យបានលឿននោះទេ។ គឺត្រូវតែមានការសិក្សាឱ្យបានគ្រប់ជ្រុងជ្រោយ ហើយត្រូវតែមានការថ្លឹងថ្លែងហើយមានការពិគ្រោះយោបល់ជាសាធារណៈឱ្យបានច្រើនមុននឹងសម្រេច។ យើងទទួលស្គាល់ហើយបើច្បាប់នឹងមកជួយទប់ស្កាត់ប្រព្រឹត្តបទល្មើសតាមប្រព័ន្ធអ៊ីនធឺណិត ក៏ប៉ុន្តែវាជះឥទ្ធិពលហើយក៏បង្កភាពគ្រោះថ្នាក់ផងដែរចំពោះសិទ្ធិសេរីភាព និងការបញ្ចេញមតិរបស់ប្រជាពលរដ្ឋ»។
ទោះបីជាកម្ពុជាមិនទាន់មានច្បាប់ប្រភេទនេះក្តី របបលោក ហ៊ុន សែន បានប្រើប្រាស់ក្រមព្រហ្មទណ្ឌ ដើម្បីចាត់ការពលរដ្ឋដែលហ៊ានបញ្ចេញមតិរិះគន់ ឬវាយប្រហាររបបនេះ ជាហូរហែរួចទៅហើយ។ ករណីថ្មីចុងក្រោយបំផុត គឺជាករណីចាប់ឃុំខ្លួនអតីតសកម្មជនគណបក្សសង្គ្រោះជាតិខេត្តស្វាយរៀង លោក គង់ ម៉ាស់ បន្ទាប់ពីលោកបានសរសេររិះគន់របបលោក ហ៊ុន សែន នៅលើបណ្ដាញសង្គមហ្វេសប៊ុក។
លោក អំ សំអាត យល់ឃើញថា ពលរដ្ឋខ្មែរមួយចំនួននៅមានកម្រិតយល់ដឹងទាបនៅឡើយចំពោះការប្រើប្រាស់បណ្ដាញសង្គម និងប្រព័ន្ធអ៊ីនធឺណិត ជាពិសេសពួកគាត់នៅមិនទាន់អាចបែងចែកឱ្យដាច់ពីគ្នារវាងអ្វីជាព័ត៌មានពិត និងអ្វីជាព័ត៌មានក្លែងក្លាយនៅឡើយ ដូច្នេះបើច្បាប់នេះលេចចេញជារូបរាងមែន នោះចំនួនអ្នកជាប់ទោសដោយសារការបញ្ចេញមតិលើបណ្ដាញសង្គម និងអ៊ីនធឺណិត នឹងកើតមានច្រើនករណី។ អ្នកការពារសិទ្ធិមនុស្សរូបនេះ ស្នើឱ្យរដ្ឋាភិបាលអនុវត្តយន្តការអប់រំណែនាំពលរដ្ឋ ឱ្យមានចំណេះដឹងលើការប្រើប្រាស់បណ្ដាញសង្គម និងអ៊ីនធឺណិតជាមុនសិន មុននឹងឈានដល់ការបង្កើតច្បាប់ប្រឆាំងព័ត៌មានក្លែងក្លាយ និងឧក្រិដ្ឋកម្មលើប្រព័ន្ធបច្ចេកវិទ្យានេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- លោក ហ៊ុន សែន អះអាងថា សេដ្ឋកិច្ចកម្ពុជាលែងត្រូវការប្រព័ន្ធអនុគ្រោះពន្ធEBA ពីអឺរ៉ុបហើយ
- ពលករខ្មែរមួយចំនួនធ្វើការនៅប្រទេសថៃប្រកាសស្វាគមន៍អមដំណើរលោក សម រង្ស៊ី វិលចូលស្រុកវិញ
- ពលរដ្ឋបង្ខំចិត្តចាកចេញពីតំបន់អង្គរ ប្រឈមនឹងជីវភាពខ្វះខាត និងបាត់បង់មុខរបរ
- លោក ហ៊ុន សែន ស្នើចៅហ្វាយចាស់វៀតណាមឱ្យចាប់លោក សម រង្ស៊ី បើមេបក្សប្រឆាំងរូបនេះប្រើទឹកដីវៀតណាមចូលមកកម្ពុជា
- បទវិភាគ៖ តើចលនានយោបាយ សម រង្ស៊ីនិយម ដល់ទីបញ្ចប់ ឬនៅបន្ត?