"តុលាការ​បាន​រំលោភ​គោលការណ៍​សិទ្ធិ​ទទួល​បាន​ការ​ជំនុំជម្រះ​ដោយ​យុត្តិធម៌​នៅ​កម្ពុជា"

ដោយ ហេង សកល
2018-06-19
អ៊ីម៉ែល
មតិ
Share
បោះពុម្ព
ពលរដ្ឋ​សហគមន៍​ដី​ធ្លី​បឹងកក់ តវ៉ា​មុខ​សាលាឧទ្ធរណ៍ នៅ​ព្រឹក​ថ្ងៃ​ទី ២៤ ធ្នូ ២០១៤។
ពលរដ្ឋ​សហគមន៍​ដី​ធ្លី​បឹងកក់ តវ៉ា​មុខ​សាលាឧទ្ធរណ៍ នៅ​ព្រឹក​ថ្ងៃ​ទី ២៤ ធ្នូ ២០១៤។
RFA

អង្គការ​សង្គម​ស៊ីវិល​លើកឡើង​ថា តុលាការ​បាន​រំលោភ​គោលការណ៍​សិទ្ធិ​ទទួល​បាន​ការ​ជំនុំជម្រះ​ដោយ​យុត្តិធម៌​នៅ​កម្ពុជា។

របាយការណ៍​ប្រចាំ​ឆ្នាំ​របស់​មជ្ឈមណ្ឌល​សិទ្ធិមនុស្ស​កម្ពុជា ផ្សព្វផ្សាយ​នៅ​ថ្ងៃ​ទី​១៩ ខែ​មិថុនា នេះ​ឱ្យ​ដឹង​ថា សាលាឧទ្ធរណ៍​មិនបាន​គោរព​គោលការណ៍​ការ​សន្មត​ទុកជាមុន​ថា​គ្មាន​ទោស សិទ្ធិ​ទទួល​បាន​សេចក្ដី​សម្រេច​មាន​សម្អាង​ហេតុ ព្រមទាំង​សិទ្ធិ​ទទួល​បាន​មេធាវី​ការពារ​ជនជាប់ចោទ​ជាដើម។

របាយការណ៍​នេះ​ធ្វើឡើង​ចាប់ពី​ថ្ងៃ​ទី​០១ ខែ​វិច្ឆិកា ឆ្នាំ​២០១៦ ដល់​ថ្ងៃ​ទី​៣១ ខែ​តុលា ឆ្នាំ​២០១៧ បាន​សង្កេតការណ៍​សវនាការ​លើ​សំណុំរឿង​ព្រហ្មទណ្ឌ​ចំនួន ៣៤០ករណី ឱ្យ​ដឹង​ថា ក្នុងចំណោម​សំណុំរឿង​ជាង​៦៥% ចៅក្រម​ខកខាន​ក្នុង​ការ​ប្រាប់ និង​ពន្យល់​ដល់​ជនជាប់ចោទ​អំពី​សិទ្ធិ​នៅ​ស្ងៀម ហើយ​ជនជាប់ចោទ​២១% ចៅក្រម​ក៏​មិនបាន​ប្រាប់​អំពី​សិទ្ធិ​ទទួល​បាន​មេធាវី​ការពារ​ចំពោះ​មុខ​តុលាការ​ផង​ដែរ។

របាយការណ៍​នេះ​ឱ្យ​ដឹង​បន្ត​ថា ចៅក្រម​សាលាឧទ្ធរណ៍​បានសម្រេច​សេចក្ដី​ដោយ​មិនបាន​បង្ហាញ​ពី​មាត្រា​ច្បាប់ និង​ភស្តុតាង​ណាមួយ​ធ្វើជា​មូលដ្ឋាន​ដើម្បី​ដាក់​បន្ទុក​ជនជាប់ចោទ​ទេ ក្រៅ​តែ​ពី​ការ​លើកឡើង​ថា តម្កល់ ឬ​បដិសេធ​សេចក្ដីសម្រេចចិត្ត​របស់​សាលាដំបូង​ប៉ុណ្ណោះ។

របាយការណ៍​ដដែល​ឱ្យ​ដឹង​បន្ត​ថា ក្នុង​ដំណាក់កាល​សវនាការ​មាន​ជនជាប់ចោទ​ចំនួន​៤០​នាក់​បាន​លើក​ឡើង​ពី​ចម្លើយ​សារភាព​របស់​ពួកគេ ដោយ​មាន​ការ​បង្ខិតបង្ខំ ការ​ប្រើ​ហិង្សា​ពី​សមត្ថកិច្ច ប៉ុន្តែ​មិន​ត្រូវ​បាន​តុលាការ​ពិចារណា​ឡើយ។

អាស៊ីសេរី មិន​អាច​សុំ​ការ​បំភ្លឺ​ពី​អ្នកនាំពាក្យ​ក្រសួងយុត្តិធម៌​ជុំវិញ​រឿង​នេះ​បានទេ​នៅ​ថ្ងៃ​ទី​១៩ ខែ​មិថុនា ដោយ​ទូរស័ព្ទ​ចូល​គ្មាន​អ្នកទទួល។

លោក ហ៊ុន ស៊ាងហាក់ អ្នក​សម្របសម្រួល​គម្រោង​សិទ្ធិ​ទទួល​បាន​ការ​ជំនុំជម្រះ​ដោយ​យុត្តិធម៌ ស្នើ​ឱ្យ​អាជ្ញាធរ​ពាក់ព័ន្ធ​ចាត់វិធានការ​ជាបន្ទាន់​ដើម្បី​ធានា​ថា សិទ្ធិ​ទទួល​បាន​ការ​ជំនុំ​ជម្រះ​ដោយ​យុត្តិធម៌​នៅ​កម្ពុជា និង​សិទ្ធិ​ការពារ​អនីតិជន​ត្រូវ​បាន​គោរព​ឱ្យ​បាន​ពេញលេញ​តាម​ផ្លូវ​ច្បាប់​យ៉ាង​ដិតដល់៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល