តុលាការ​មណ្ឌលគិរី​នឹង​យក​សំណុំរឿង​​ជនជាតិ​ភាគតិច​ជាមួយ​ក្រុមហ៊ុន​បារាំង​មក​ជំនុំ​ជម្រះ​ឡើង​វិញ

ដោយ ហេង រស្មី
2019-10-03
អ៊ីម៉ែល
មតិ
Share
បោះពុម្ព
សាលាដំបូងខេត្ត​មណ្ឌលគិរី។
សាលាដំបូងខេត្ត​មណ្ឌលគិរី។
រូប៖ RFA

តុលាការ​ខេត្ត​មណ្ឌលគិរី​គ្រោង​នឹង​លើក​យក​សំណុំរឿង​ជម្លោះដីធ្លី​រវាង​ជនជាតិ​ដើម​ភាគតិច​ព្នង​ជាង​ ១០០​នាក់ ជាមួយ​ក្រុមហ៊ុន​បារាំង​មក​ជំនុំជម្រះ​ឡើងវិញ ក្រោយ​ពី​ពាក្យ​បណ្ដឹង​នេះ​បាន​កប់​បាត់​អស់​រយៈពេល​ជាង ១០​ឆ្នាំ​មក​​ហើយ។ មន្ត្រី​សង្គម​ស៊ីវិល​សង្ឃឹមថា តុលាការ​កម្ពុជា នឹង​ផ្ដល់​យុត្តិធម៌​ដល់​ជនរងគ្រោះ។

ការ​សម្រេច​របស់​តុលាការ​នេះ​បាន​កើតមានឡើង​ក្រោយពី​តំណាង​សហគមន៍​ជនជាតិ​ដើម​ភាគតិច​ព្នង​ចំនួន ​៩​នាក់​ កាលពី​ថ្ងៃ​ទី១ តុលា​កន្លង​ទៅ​នេះ បាន​ទៅ​​ចូលរួម​សវនាការ​នៅ​ក្នុង​តុលាការ​ណង់ទែរ (Nanterre) នៅ​ក្នុង​ប្រទេស​បារាំង​ ដើម្បី​ឱ្យ​ប្រទេស​មួយ​នេះ រក​យុត្តិធម៌​នៅ​ក្នុង​សំណុំរឿង​រំលោភ​ដីធ្លី​មួយ ​ដែល​បាន​កើតមានឡើង​តាំងពី​ជាង ១០​ឆ្នាំមុន។

កាលពី​អំឡុង​ឆ្នាំ​២០០៨ ជនជាតិភាគតិច​ព្នង​ចំនួន ៧​ភូមិ ក្នុង​ឃុំ​ប៊ូស្រា ស្រុក​ពេជ្រាដា ខេត្ត​មណ្ឌលគិរី បាន​ដាក់​ពាក្យ​បណ្ដឹង​មួយ​ច្បាប់​ទៅ​តុលាការ​ប្រឆាំង​នឹង​ក្រុមហ៊ុន​បារាំង​មួយ​ឈ្មោះ បូឡូរ៉េ (Bollore) ដែល​បាន​ផ្តល់​ទុន​ឱ្យ​ក្រុមហ៊ុន​ឯកជន​មួយ​របស់​បារាំង​ឈ្មោះ សុហ្វីន ខេស៊ីឌី (Socfin-KCD) អភិវឌ្ឈន៍​ដាំ​ដើម​កៅស៊ូ​ដែល​ធ្វើ​ឱ្យ​ប៉ះពាល់​ដល់​ដី​ចម្ការ​វិល​ជុំ​របស់​ជន​ជាតិ​ភាគតិច​ព្នង​ជាង​ ៧០០​គ្រួសារ ដែល​អាស្រ័យ​ផល​នៅ​ក្នុង​ខេត្ត​មណ្ឌលគិរី។

អ្នកនាំពាក្យ​តុលាការ​ខេត្ត​មណ្ឌលគិរី លោក មាស ប្រុស បញ្ជាក់​ថា លោក​ទើបតែ​ចូលកាន់​តួនាទី​ជា​អ្នកនាំពាក្យ​កាលពី​ឆ្នាំ​២០១៥ ​កន្លង​ទៅ​នេះ ហើយ​លោក​មិនបាន​ដឹង​ពី​រឿងរ៉ាវ​ជម្លោះ​នេះ​ជាប់​ពាក់ព័ន្ធ​យ៉ាងណា​នោះ​ទេ។

តែ​ទោះជា​យ៉ាងណា​ក៏​ដោយ​លោក​មាន​ប្រសាសន៍​ថា លោក​នឹង​សើរើ​សំណុំ​រឿង​នេះ​មក​ជំនុំជម្រះ​ឡើងវិញ​ តែ​លោក​មិន​ទាន់​ប្រាកដ​ថា តុលាការ​នឹង​បើក​សវនាការ​​ជា​សាធារណៈ​នៅ​ពេលណា​ទេ៖ «អ៊ីចឹង​បើ​ដឹង​ទាល់តែ​ស្រាវ​ជ្រាវ​​រក​មើល​តាំងពី ២​ពាន់​ជាង​ឯណោះ ៦ ៧ ៨ ពី​ពាន់​ឯណោះ។ អីឡូវ​ដល់​២០១៩ វា​ជាង​ ១០​ឆ្នាំ​ទៅ​ហើយ»

ការ​យឺតយ៉ាវ​នៃ​ការ​ដោះស្រាយ​ពាក្យ​បណ្ដឹង​នេះ​បាន​ជំរុញ​ឱ្យ​ប្រជាពលរដ្ឋ​ជនជាតិ​ដើម​ភាគតិច​ បាន​​ប្តឹង​​ទៅ​​តុលាការ​​បារាំង​ ដើម្បី​ឱ្យ​ជួយ​​រក​​យុត្តិធម៌​ ចំពោះ​​រឿង​ក្តី​​នេះ។

តំណាង​សហគមន៍​ឃុំ​ប៊ូស្រា លោក ក្រើង តុលា ដែល​តំណាង​ឱ្យ​ជនជាតិ​ដើម​ភាគតិច ៩​នាក់​ ទៅ​ចូលរួម​សវនាការ​ក្នុង​ប្រទេស​បារាំង មិន​អាច​ទាក់ទង ​ដើម្បី​សេចក្ដី​អត្ថាធិប្បាយ​បាន​ទេ នៅ​ថ្ងៃ​ទី២ តុលា។

តែ​ទោះជា​យ៉ាងណា អ្នក​សម្របសម្រួល​គម្រោង​ធុរកិច្ច​របស់​មជ្ឈមណ្ឌល​សិទ្ធិមនុស្ស​កម្ពុជា (CCHR) លោក វណ្ណ សុផាត បញ្ជាក់​ថា សវនាការ​បាន​បិទ​បញ្ចប់​​ហើយ ដោយ​នៅ​ក្នុង​សវនាការ​ផ្ទាល់មាត់​នោះ។ តុលាការ​បាន​ស្ដាប់​ការ​បកស្រាយ​ពី​ភាគី​ដើម​បណ្តឹង និង​ចុងចោទ នឹង​ស្នើសុំ​ឱ្យ​ភាគី​ទាំងពីរ​ដាក់​ភស្តុតាង​​បន្ថែម​ទៀត​ពាក់ព័ន្ធ​សំណុំ​រឿង​នេះ។

ចំពោះ​តុលាការ​កម្ពុជា​ដែល​គ្រោង​នឹង​លើក​យក​សំណុំ​រឿង​នេះ មក​ជំនុំជម្រះ​ដែរ​នោះ​លោក ស្វាគមន៍​ហើយ​សង្ឃឹមថា ជនជាតិ​ដើម​ភាព​តិច​ព្នង​នឹង​ទទួល​បាន​យុត្តិធម៌៖ «យើង​សង្ឃឹមថា បើ​តុលាការ​គាត់​លើកឡើង​អ៊ីចឹង យើង​គិត​ថា គាត់​ពិត​ជា​មាន​ឆន្ទៈ​ក្នុង​ការ​ដំណើរការ​នីតិវិធី​ឡើងវិញ​ ហើយក៏​សង្ឃឹម​ផង​ដែរ​ថា ដំណើរការ​ហ្នឹង​ពិត​ជា​មាន​ទៅតាម​នីតិវិធី​និង​រក​យុត្តិធម៌​ទៅតាម​ផ្លូវច្បាប់»

កាលពី​ខែ​មករា​តុលាការ​ប្រទេស​បារាំង​បាន​កោះហៅ​តំណាង​ជនជាតិ​ដើម​ភាគតិច ៩នាក់ ដែល​​បាន​​ដាក់​ពាក្យ​បណ្ដឹង​​ប្ដឹង​​ក្រុមហ៊ុន បូឡូរ៉េ (Bollore) ឱ្យ​ចូលរួម​សវនាការ​បឋម​នៅ​តុលាការ​ប្រទេស​បារាំង​កាលពីដើម​ខែ​កុម្ភៈ ឆ្នាំ​២០១៩ កន្លង​ទៅ​នេះ។ ប៉ុន្តែ​បាន​ខកខាន ដោយសារតែ​ជនជាតិ​ព្នង​ទាំង ៩​នាក់ ពុំ​ទទួល​បាន​ទិដ្ឋាការ​ពី​ស្ថានទូត​បារាំង​នៅ​កម្ពុជា។

លោក វណ្ណ សុផាត បញ្ជាក់​ថា តុលាការ​ប្រទេស​បារាំង​នឹង​បន្ត​សវនាការ​សួរ​ផ្ទាល់មាត់​ម្ដងទៀត​នៅ​ខែ​វិច្ឆិកា ហើយ​គ្រោង​នឹង​បើកសវនាការ​ជំនុំជម្រះ​រឿង​ក្តី​នេះ​ជា​ផ្លូវការ​នៅ​ដើម​ឆ្នាំ​២០២០​ ខាងមុខ។

មជ្ឈមណ្ឌល​សិទ្ធិមនុស្ស​កម្ពុជា (CCHR) កាល​ពី​ឆ្នាំ២០១៨ បាន​ចេញ​របាយការណ៍​មួយ ឱ្យ​ដឹង​ថា មាន​ពលរដ្ឋ​ជាង ៨០០​គ្រួសារ បាន​រង​នូវ​ផល​ប៉ះពាល់​ដោយសារ​ក្រុមហ៊ុន សុហ្វីន ខេ ស៊ី ឌី Socfin-KCD ដែល​ភាគច្រើន​បាន​រំលោភ​ទៅលើ​ដី​ចម្ការ​របស់​ជន​ជាតិ​ព្នង។ ក្នុងចំណោម​ប្រជាពលរដ្ឋ​ជាង​ ៨០០​គ្រួសារ មាន​ចំនួន ៦៤០គ្រួសារ ពាក់ព័ន្ធ​ក្នុង​ដំណើរការ​វិវាទ​ដីធ្លី ជាមួយ​ក្រុមហ៊ុន​មក​​ពី​​ប្រទេស​​បារាំង​​ដោយសារ​តែ​​ក្រុមហ៊ុន​នេះ​ទទួល​បាន​សិទ្ធិ​វិនិយោគ​ដាំ​កៅស៊ូ និង​ដំណាំ​ផ្សេងទៀត​លើ​ផ្ទៃដី ២.៣៨៦​ហិកតារ រយៈពេល ៧០ឆ្នាំ​​នៅ​​ក្នុង​​ខេត្ត​​មណ្ឌលគិរី៕

(តំណាង​សហគមន៍​ជនជាតិ​ដើម​ភាគតិច​ព្នង​ចំនួន ​៩​នាក់​ ពេល​ទៅ​ចូលរួម​សវនាការ​​នៅ​​​តុលាការ ​ណង់ទ័រ (Nanterre) នៅ​​ក្នុង​​ប្រទេស​​បារាំង​ កាលពី​ថ្ងៃ​ទី១ ខែ​តុលា ឆ្នាំ២០១៩ ដើម្បី​​រក​យុត្តិធម៌​នៅ​ក្នុង​សំណុំរឿង​រំលោភ​ដីធ្លី​ ​ដែល​​បាន​​កើត​មាន​ឡើង​​តាំង​ពី​​ជាង ១០​ឆ្នាំ​មុន)

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល