អ្នកវិភាគនយោបាយ លោក គឹម សុខ លើកឡើងថា លោកគ្មានលុយសងលោក ហ៊ុន សែន នោះទេ ហើយលោកក៏មិនដែលទទួលយកការកាត់ទោសដ៏អយុត្តិធម៌របស់តុលាការកម្ពុជាម្តងណាដែរ។ លោក គឹម សុខ អះអាងថា លោក នឹងនៅតែបន្តចូលរួមជាមួយក្រុមអ្នកប្រជាធិបតេយ្យ និងបន្តផ្តល់មតិយោបល់ស្របតាមច្បាប់ ដើម្បីស្តារប្រជាធិបតេយ្យនៅកម្ពុជា ដោយមិនខ្វល់ចំពោះការគំរាម ឬការប្តឹងទារលុយពីលោកនាយករដ្ឋមន្ត្រី ហ៊ុន សែន ឡើយ។
លោក គឹម សុខ៖ «ករណីរបស់ខ្ញុំនេះវាលែងជារឿងដោយឡែកទៅហើយ វាជារឿងប្រទេសជាតិទាំងមូល ក្នុងស្ថានភាពបច្ចុប្បន្ន មិនមែនតែខ្ញុំទេ សកម្មជនសង្គម សកម្មជននយោបាយ អ្នកនយោបាយ ប្រជាពលរដ្ឋទូទៅដែលគណបក្ស ប្រជាជន មើលឃើញថា ហ៊ានធ្វើសកម្មភាពដើម្បីតតាំងរកយុត្តិធម៌ពីការដឹកនាំមិនត្រឹមត្រូវរបស់រដ្ឋាភិបាលលោក ហ៊ុន សែន គឺគេប្រើប្រព័ន្ធតុលាការ ដើម្បីគំរាមកំហែង លើរឿងពីរយ៉ាង។ ទី១គំរាមលើរឿងអសន្តិសុខដោយប្រើប្រព័ន្ធតុលាការ ទី២ គឺគាបសង្កត់លើហិរញ្ញវត្ថុដោយការតម្រូវឲ្យបង់លុយរាប់ម៉ឺនដុល្លារហើយអ្នកខ្លះ ដល់រាប់លានដុល្លារទៅទៀត»។
ប្រតិកម្មរបស់លោក គឹម សុខ នេះ គឺបន្ទាប់ពីតុលាការក្រុងភ្នំពេញ នៅថ្ងៃទី១៨ ខែមករា បានផ្ដន្ទាទោសកំបាំងមុខឲ្យលោកជាប់ពន្ធនាគារ ១៨ ខែ និងពិន័យជាប្រាក់ ៨លានរៀល (៨.០០០.០០០) ឬប្រមាណ ២ពាន់ដុល្លារ ព្រមទាំងបង្គាប់បង់សំណងជំងឺចិត្តឲ្យលោក ហ៊ុន សែន ចំនួន ៥០លានរៀល (៥០.០០០.០០០)ឬប្រមាណជាង ១ម៉ឺនដុល្លារអាមេរិក។ សេចក្តីសម្រេចរបស់តុលាការនេះ ធ្វើឡើងតាមបណ្តឹងរបស់លោក ហ៊ុន សែន ដែលបានប្តឹងលោក គឹម សុខ ពីបទញុះញង់ និងបរិហារកេរ្តិ៍ជាសាធារណៈ បន្ទាប់ពីអ្នកវិភាគរូបនេះ បានលើកឡើងកាលពីខែកុម្ភៈ ឆ្នាំ២០១៧ថា របបលោក ហ៊ុន សែន ជាអ្នកបង្កើតប្រព័ន្ធសម្លាប់មនុស្ស តែរកឃាតកមិនឃើញ។
មុនភៀសខ្លួនទៅក្រៅប្រទេស លោក គឹម សុខ ក៏ធ្លាប់ត្រូវបានតុលាការ ចាប់ឃុំខ្លួនលោកក្នុងពន្ធនាគារ ១៨ខែម្តងហើយ និងបង្គាប់ឲ្យបង់សំណងទៅលោក ហ៊ុន សែន ចំនួន៨០០លានរៀល ស្មើនឹងប្រមាណ២០ម៉ឺនដុល្លារ ក្នុងសំណុំរឿងស្រដៀងគ្នានេះដែរ។ កាលនោះ លោក ហ៊ុន សែន ប្តឹងលោក គឹម សុខ ថា បាននិយាយចោទគណបក្សប្រជាជនកម្ពុជាថា ជាអ្នកនៅពីក្រោយនៃឃាតកម្មបាញ់សម្លាប់បណ្ឌិត កែម ឡី ។ កន្លងមក អ្នកច្បាប់ ក៏ធ្លាប់រិះគន់ថា តុលាការមិនអាចបំបែកសំណុំបែបនេះជាពីរទេ ព្រោះលោក គឹម សុខ បានបញ្ចេញមតិរិះគន់រដ្ឋាភិបាល ស្រដៀងគ្នា និងធ្វើឡើងក្នុងពេលតែមួយ។ ច្បាប់ព្រហ្មទណ្ឌកម្ពុជា បើបទល្មើសដូចគ្នាឬស្រដៀងគ្នា តុលាការអាចក្រសោបចូលគ្នាហើយកាត់សេចក្ដីតែម្ដង ពោលគឺតុលាការ មិនអាចកាត់ទោសមនុស្សពីរដងទៅលើបទល្មើសដូចគ្នានោះទេ។
ទោះជាយ៉ាងណា លោក គឹម សុខ បញ្ជាក់ជំហរថា លោកនឹងមិនសុំការអនុគ្រោះពីលោក ហ៊ុន សែន នោះទេ ប៉ុន្តែលោកនឹងបន្តគោលដៅរបស់លោក គឺការរួមគ្នាជាមួយនឹងពលរដ្ឋដាក់សម្ពាធលើគណបក្សប្រជាជនកម្ពុជា និងលោក ហ៊ុន សែន ឲ្យខ្ទាតចេញពីអំណាច ទើបអាចកែទម្រង់នៃការដឹកនាំជាតិឲ្យល្អត្រឹមត្រូវឡើងវិញ និងធ្វើឲ្យពលរដ្ឋគ្រប់រូប មិនទទួលរងភាពអយុត្តិធម៌ ហូរទឹកភ្នែក និងហូរឈាម បន្តទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។