អ្នកវិភាគ​ថា ឧត្ដមក្រុមប្រឹក្សា​នៃ​អង្គចៅក្រម​នៅតែ​មិន​អាច​ធ្វើការ​ដោយ​ឯករាជ្យ​បាន​នៅឡើយ

ដោយ​ សុ ជីវី
2019-10-24
អ៊ីម៉ែល
មតិ
Share
បោះពុម្ព
អ្នក​វិភាគ​ឯករាជ្យ បណ្ឌិត ឡៅ ម៉ុងហៃ ចូលរួម​វេទិកា​អ្នក​ស្ដាប់​អាស៊ីសេរី នៅ​យប់​ថ្ងៃ​ទី​២៩ ខែ​សីហា ឆ្នាំ​២០១៧។
អ្នក​វិភាគ​ឯករាជ្យ បណ្ឌិត ឡៅ ម៉ុងហៃ ចូលរួម​វេទិកា​អ្នក​ស្ដាប់​អាស៊ីសេរី នៅ​យប់​ថ្ងៃ​ទី​២៩ ខែ​សីហា ឆ្នាំ​២០១៧។
Photo: RFA

អ្នកច្បាប់ និង​ជា​អ្នកវិភាគ​មើល​ឃើញ​ថា ការតែងតាំង​សមាជិក​ថ្មី​សម្រាប់​ឧត្តមក្រុមប្រឹក្សា​នៃ​អង្គចៅក្រម​នៅតែ​មិន​អាច​ឱ្យ​ស្ថាប័ន​កំពូល​មួយ​នេះ ធ្វើការ​ដោយ​ឯករាជ្យ​​​​​​​​​​​​​​​​​​​​​​​​​​បាន​នៅ​ឡើយ។ លើស​ពី​នេះ​ស្ថាប័ន​នេះ​នៅតែ​ឋិត​ក្រោម​អំណាច​ដ៏​លើសលប់​របស់​រដ្ឋមន្ត្រី​ក្រសួង​យុត្តិធម៌។ មន្ត្រី​ក្រសួង​យុត្តិធម៌​ចាត់​ទុក​ការ​លើក​ឡើង​​នេះ​​ថា ពុំ​បាន​ស្វែងយល់​ពី​ច្បាប់​ឱ្យ​បាន​ត្រឹមត្រូវ​ទេ។

អ្នកច្បាប់ និង​ជា​អ្នកវិភាគ​នយោបាយ លោក បណ្ឌិត ឡៅ ម៉ុងហៃ លើកឡើង​ថា រដ្ឋមន្ត្រី​​ក្រសួង​យុត្តិធម៌​​មាន​​អំណាច​​លើសលប់​នៅ​ក្នុង​ការគ្រប់គ្រង​ឧត្ដម​ក្រុម​ប្រឹក្សា​​នៃ​​អង្គចៅក្រម ដែល​លោក​ថា ជា​ការ​រំលោភ​អំណាច ខុស​​ពី​​អ្វី​​ដែល​​មាន​​ចែង​​ក្នុង​​រដ្ឋធម្មនុញ្ញ។

លោក​ថា រដ្ឋមន្ត្រី​ក្រសួងយុត្តិធម៌​ជា​សមាជិក​ឧត្ដមក្រុមប្រឹក្សា​នៃ​អង្គចៅក្រម​នោះ ក៏​ជា​អ្នក​ដែល​មាន​ឥទ្ធិពល​លើ​សមាជិក​​ផ្សេង​ទៀត ដែល​បញ្ហា​នេះ​ហើយ បង្ហាញ​ថា ការតែងតាំង​សមាជិក​ថ្មី​នេះ​ពុំបាន​ធ្វើ​ឱ្យ​ស្ថាប័ន​នេះ​មាន​អ្វី​ផ្លាស់ប្ដូរ ឱ្យ​​ទៅ​​ជា​​ស្ថាប័ន​​ឯករាជ្យ​​បាន​​នៅ​ឡើយ៖ «រឿង​បុគ្គលិក​បម្រើការ​ហ្នឹង​គឺ​ចាប់​តាំង​ពី​​អគ្គ​ព្រះរាជ​អាជ្ញា​​រហូត​មន្ត្រី​រដ្ឋបាល​ហ្នឹង គឺ​ខាង​​ផ្នែក​​​អំណាច​​តុលាការ គឺ​ដូចជា​នៅ​ក្នុង​ការគ្រប់គ្រង តាំងពី​រដ្ឋបាល​រហូត​ដល់​ការតែងតាំង​គឺ នៅ​ក្រោម​រដ្ឋមន្ត្រី​ក្រសួង​យុត្តិធម៌ អ៊ីចឹង​​ហើយ​​បាន​ជា​​ច្បាប់ នៅ​ជា​ធរមាន​សព្វថ្ងៃ​ហ្នឹង​មិន​បាន​សមស្រប​ទៅ​នឹង​រដ្ឋធម្មនុញ្ញ​ជាពិសេស​គឺ​ការ​បែងចែក​អំណាច ឱ្យ​តុលាការ​ឯករាជ្យ​​​នោះ​​​ទេ»

រដ្ឋមន្ត្រី​ក្រសួងយុត្តិធម៌​ លោក អង្គ វង្សវឌ្ឍានា បាន​ប្រកាស​ទទួលស្គាល់​ជា​ផ្លូវការ សមាជិក​​ឧត្តម​ក្រុម​ប្រឹក្សា​​នៃ​​អង្គ​ចៅក្រម​​ចំនួន ១១​រូប ក្នុង​​នោះ ​៤​រូប​ ជ្រើស​តាំង​​តាមរយៈ​ការបោះឆ្នោត​។ ចំណែក​៧​រូប​ទៀត​ត្រូវ​បាន​ជ្រើសតាំង​ចេញពី​ស្ថាប័ន​សំខាន់ៗ​ មួយ​ចំនួន​ដូចជា​ព្រឹទ្ធសភា រដ្ឋសភា ក្រុមប្រឹក្សា​ធម្មនុញ្ញ ចៅក្រម និង​ព្រះរាជអាជ្ញា​នៃ​សាលាដំបូង និង​សាលា​ជម្រះក្ដី​ជាន់ខ្ពស់​។ សមាសភាព​នេះ​នៅ​រង់ចាំ​តែ​ព្រះរាជក្រឹត្យ​តែង​តាំងពី​ព្រះមហាក្សត្រ​ប៉ុណ្ណោះ ដើម្បី​ចូល​បំពេញ​ការងារ​សម្រាប់​អាណត្តិ​ថ្មី នៅ​ពាក់​កណ្ដាល​ខែ​វិច្ឆិកា​ខាងមុខ។

សេចក្ដី​ប្រកាស​ពី​លទ្ធផល​ផ្លូវការ​របស់​ក្រសួង​យុត្តិធម៌​កាល​ពី​ថ្ងៃ​ចន្ទ បាន​ឱ្យ​ដឹង​ថា សមាជិក​ឧត្ដមក្រុមប្រឹក្សា​នៃ​អង្គចៅក្រម​ចំនួន ៤​រូប ដែល​ត្រូវ​បាន​ជ្រើស​តាំងពី​ការបោះឆ្នោត​នោះ​មាន​លោក ចាយ ច័ន្ទ​តារា​វណ្ណ ជ្រើសតាំង​ដោយ​ចៅក្រម​នៃ​សាលា​ជម្រះ​ក្តី​ជាន់ខ្ពស់​លោក សេង ប៊ុនឃាង ជា​សមាជិក ជ្រើសតាំង​ដោយ​ព្រះរាជអាជ្ញា​នៃ​មហា​អយ្យការ អម​សាលា​ជម្រះក្តី​ជាន់ខ្ពស់ និង​ព្រះរាជអាជ្ញា​បម្រើ​ការងារ​នៅ​ក្រសួង​យុត្តិធម៌។

ចំណែក​លោក អ៊ីវ បូរិន្ទ ជា​សមាជិក​ត្រូវ​បាន​ជ្រើសតាំង​ដោយ​ចៅក្រម​ពេញ​សិទ្ធិ​នៃ​​សាលាដំបូង​​ទូទាំង​​ប្រទេស និង​​លោក ស្រ៊ា រតនៈ ជា​សមាជិក ត្រូវ​បាន​ជ្រើសតាំង​​ដោយ​ព្រះរាជអាជ្ញា​ពេញ​សិទ្ធិ​នៃ​អយ្យការ​អម​សាលាដំបូង​ទូទាំង​ប្រទេស។

ឆ្លើយតប​នឹង​ការរិះគន់​របស់​អ្នកវិភាគ អ្នកនាំពាក្យ​នៃ ក្រសួងយុត្តិធម៌ លោក ជិន ម៉ាលីន ថ្លែង​​ថា សមាជិក​​ឧត្ដម​ក្រុម​ប្រឹក្សា​​នៃ​​អង្គចៅក្រម​បំពេញ​តួនាទី​ទៅ​តាម​​ការ​​កំណត់​​ដោយ​​ច្បាប់៖ «អ្នក​ទាំងអស់​នោះ​មិនមែន​ចេញ​មកពី​ការតែងតាំង​ទេ គឺ​ចេញពី​ការបោះឆ្នោត​ទៅ​តាម​តំណាង​ក្រុម​នីមួយៗ ហើយ​ការ​បំពេញ​ភារកិច្ច​របស់​គេ​ហ្នឹង ទៅតាម​តួនាទី​ភារកិច្ច​កំណត់​ដោយ​ច្បាប់ ហើយក៏​មិន​ស្ថិត​នៅ​ក្រោម​រដ្ឋមន្ត្រី​ក្រសួង​យុត្តិធម៌​ដែរ​។ រដ្ឋមន្ត្រី​ក្រសួងយុត្តិធម៌​ជា​សមាជិក​នៃ​ឧត្ដមក្រុមប្រឹក្សា​នៃ​អង្គចៅក្រម ប៉ុន្តែ​មិន​មាន​សិទ្ធិ​សម្រេច​ក្នុង​ការ​ដាក់​ទណ្ឌកម្ម ក្នុង​ការ​ដាក់​ពិន័យ ដកហូត​ចៅក្រម ឬ​ព្រះរាជអាជ្ញា​ណាមួយ​ទេ គឺ​ត្រូវ​សម្រេច​ដោយ​ក្រុមប្រឹក្សាវិន័យ​នោះ​ទេ។ អ៊ីចឹង​អ្នក​អត្ថាធិប្បាយ​សូម​មើល​ច្បាប់​ស្ដីពី​ការ​ប្រព្រឹត្តទៅ​នៃ​ឧត្ដមក្រុមប្រឹក្សា នៃ​អង្គចៅក្រម»

ចំពោះ​បណ្ឌិត ឡៅ ម៉ុងហៃ លោក​នៅតែ​មើល​ឃើញ​ថា ស្ថាប័ន​នេះ​ឯករាជ្យ​បាន​លុះណាតែ​​ថ្នាក់​ដឹក​នាំ​​យល់​ដឹង​​នូវ​​សារ​ប្រយោជន៍​​របស់​​តុលាការ​​ឯករាជ្យ​បញ្ឈប់​​​រាល់​​ការ​​ជ្រៀតជ្រែក​​ពី​​អ្នក​​នយោបាយ៖ «ដើម្បី​ឱ្យ​មានការ​បែងចែក​អំណាច និង​ទី​២ ធានា​ឱ្យ​តុលាការ​ឯករាជ្យ គឺ​គេ​បញ្ចូល​ក្នុង​រដ្ឋធម្មនុញ្ញ ហើយ​នឹង​ច្បាប់​​ទាក់ទង​តុលាការ​ហ្នឹង​ឱ្យ​ចៅក្រម​ព្រះរាជអាជ្ញា ប្រទេស​ខ្លះ​ដល់​អ្នកស៊ើប​អង្កេត​​ទៅ​ទៀត​​មិន​​ឱ្យ​​ជា​​សមាជិក​​គណបក្ស​​ណា​​ទេ ហើយ​ហាម​រហូតដល់​មិន​ឱ្យ​ធ្វើ​​សកម្មភាព​​នយោបាយ​​ទៅ​​ទៀត»

ច្បាប់​ស្ដីពី​ការរៀបចំ និង​ការ​ប្រព្រឹត្ត​ទៅ​នៃ​ឧត្ដមក្រុមប្រឹក្សា នៃ​អង្គចៅក្រម​បាន​ចែង​ថា ឧត្ដមក្រុមប្រឹក្សា​នៃ​អង្គចៅក្រម ត្រូវ​ស្ថិត​ក្រោម​ព្រះរាជាធិបតីភាព​នៃ​ព្រះមហាក្សត្រ​ក្នុង​បំណង​ជួយ​ព្រះមហាក្សត្រ ដើម្បី​ធានា​ឯករាជ្យ​នៃ​អំណាចតុលាការ​ស្របតាម​រដ្ឋធម្មនុញ្ញ។ ស្ថាប័ន​នេះ​មាន​តួនាទី សម្រេច និង​លើក​សេចក្ដី​ស្នើ​ថ្វាយ​ព្រះមហាក្សត្រ​អំពី​ការតែងតាំង ការ​ផ្លាស់ប្ដូរ នឹង​លុប​ឈ្មោះ និង​ដំឡើង​ឋានន្តរសក្ដិ ចៅក្រម និង​ព្រះរាជអាជ្ញា​។ ឧត្ដមក្រុមប្រឹក្សា​នៃ​អង្គចៅក្រម​ក៏​មាន​តួនាទី​ដាក់​ពិន័យ​ចំពោះ​ចៅក្រម និង​ព្រះរាជអាជ្ញា​គ្រប់​ជាន់ថ្នាក់៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល