លោក ប៉ាវ ស៊ីណា គ្រោងដាក់ពាក្យប្ដឹងប្រឆាំងគម្រោងការគំរាមសម្លាប់ពីថៅកែរោងចក្រ
2015.02.22
ប្រធានសម្ព័ន្ធសហជីពចលនាកម្មករ លោក ប៉ាវ ស៊ីណា (រូបកាន់មេក្រូ) ដឹកនាំកម្មកររោងចក្រអូសេអង់ (Ocean) តវ៉ានៅមុខក្រសួងការងារ កាលពីថ្ងៃទី៦ ខែមិថុនា ឆ្នាំ២០១៤។
ប្រធានសម្ព័ន្ធសហជីពចលនាកម្មករ ឲ្យដឹងថា លោកនឹងស្វះស្វែងរកការពិភាក្សាជាមួយអ្នកច្បាប់ក្រោយពីទទួលបានសារគំរាមសម្លាប់រូបលោករួច។ កាលពីថ្ងៃទី១៦ កុម្ភៈ អ្នកគ្រប់គ្រងរោងចក្រ ប៊ី.ដាប់បឹលយូ (BW=Beautiful Window) នៅតំបន់សេដ្ឋកិច្ចពិសេស ក្រុងបាវិត គំរាមថា មានថៅកែរោងចក្រមួយចំនួនក្នុងតំបន់នេះ កំពុងប្រមូលលុយគ្នាដើម្បីជួលឃាតកបាញ់សម្លាប់ប្រធានសម្ព័ន្ធសហជីពចលនាកម្មករ។
លោក ប៉ាវ ស៊ីណា ថ្លែងថា លោកមិនបារម្ភចំពោះសារគំរាមបាញ់សម្លាប់រូបលោកដោយក្រុមថៅកែរោងចក្រមួយចំនួននៅតំបន់សេដ្ឋកិច្ច មេនហាតធេន (Manhattan) ក្រុងបាវិតនេះឡើយ ដោយលោកចាត់ទុកថា ការតស៊ូមតិរបស់លោកសព្វថ្ងៃនេះ គឺពុំមានអ្វីដែលប្រឆាំងរដ្ឋាភិបាល ឬធ្វើឲ្យខាតប្រយោជន៍ភាគីខាងណាឡើយ ក្រៅពីសម្របសម្រួលឲ្យមានដំណោះស្រាយ ឈ្នះៗទាំងសង្ខាងប៉ុណ្ណោះ។
ប្រធានសម្ព័ន្ធសហជីពចលនាកម្មករ ដែលតែងទាមទារសិទ្ធិឲ្យនិយោជក លោក ប៉ាវ ស៊ីណា ឲ្យដឹងនៅថ្ងៃទី២២ កុម្ភៈ ថា លោកនឹងដាក់បណ្ដឹងប្រឆាំងគម្រោងបាញ់សម្លាប់រូបលោកដោយក្រុមថៅកែរោងចក្រ នៅថ្ងៃទី២៣ កុម្ភៈ។ លោកបញ្ជាក់ថា នេះជាការប្រមាថអាយុជីវិតរបស់លោក ដែលមិនអាចទទួលយកបានឡើយ។ លើសពីនេះទៀត លោកអំពាវនាវសូមឲ្យស្ថាប័នពាក់ព័ន្ធរបស់រដ្ឋ បើកការស៊ើបអង្កេតដើម្បីជំរុញឲ្យការអនុវត្តច្បាប់នៅកម្ពុជា បានល្អប្រសើរបន្ថែមទៀត៖ «ដោយសារតែពួកថៅកែទាំងអស់នោះ គាត់យល់ថា កន្លងទៅនៅខេត្តនេះ (ស្វាយរៀង) ឃើញថា ដូចជាករណីលោក ឈូក បណ្ឌិត គាត់បានបាញ់កម្មករ ហើយរហូតមកដល់ពេលនេះពុំមានទោស ឃើញថា ថៅកែទាំងអស់នោះ ហាក់មានអារម្មណ៍ថាមិនព្រួយ»។
មូលហេតុនៃការបែកធ្លាយព័ត៌មានជុំវិញនៃគម្រោងបាញ់សម្លាប់ប្រធានសម្ព័ន្ធសហជីពចលនាកម្មករនេះ គឺបន្ទាប់ពីប្រធានគ្រប់គ្រងនៃរោងចក្រ ប៊ី.ដាប់បឹលយូ ដ៏ធំមួយដែរ នៅតំបន់សេដ្ឋកិច្ចពិសេស ក្រុងបាវិត កោះហៅតំណាងសហជីពរបស់លោក ប៉ាវ ស៊ីណា ចំនួន ៣នាក់ទៅប្រជុំ។ ក៏ប៉ុន្តែ តំណាងសម្ព័ន្ធសហជីពចលនាកម្មករអះអាងថា កិច្ចប្រជុំកាលពីថ្ងៃទី១៦ កុម្ភៈ នោះបែរទៅជាការគំរាមកំហែងទៅវិញ។ នៅក្នុងកិច្ចប្រជុំនោះ លោក សា លីម ជាជនជាតិចិន បានប្រាប់ថា លោក ប៉ាវ ស៊ីណា ត្រូវបានប្រធានរោងចក្រមួយចំនួននៅតំបន់សេដ្ឋកិច្ចពិសេស កំពុងរៃលុយដើម្បីរៀបចំផែនការជួលឃាតកបាញ់សម្លាប់។
វិទ្យុអាស៊ីសេរី ពុំអាចសុំការបំភ្លឺបានភ្លាមៗទេ ពីភាគីរោងចក្រ។ ដោយឡែកមន្ត្រីនាំពាក្យក្រសួងមហាផ្ទៃ អះអាងថា លោកកំពុងជាប់រវល់នៅថ្ងៃទី២២ កុម្ភៈ មុនផ្ដាច់ទូរស័ព្ទ។ ក្រៅពីនេះវិញ អ្នកនាំពាក្យអគ្គស្នងការនគរបាលជាតិ លោក គៀត ច័ន្ទថារិទ្ធ ទូរស័ព្ទចូលតែពុំមានអ្នកទទួល។
យ៉ាងណានេះជាលើកទីពីរហើយ ដែលមានសារគំរាមកំហែងធ្វើឃាតមុននឹងហេតុការណ៍កើតឡើង។ កាលលោក ជា វិជ្ជា អតីតប្រធានសហជីពសេរីកម្មករនៃព្រះរាជាណាចក្រកម្ពុជា នៅរស់ គឺរូបលោកក៏ត្រូវបានជនមិនស្គាល់អត្តសញ្ញាណផ្ញើសារគំរាម មុនត្រូវបាញ់សម្លាប់នៅក្បែរតូបលក់កាសែតក្បែររបងវត្តលង្កា ដូច្នេះដែរ។
លោក អំ សំអាត មន្ត្រីជាន់ខ្ពស់នៃអង្គការលីកាដូ យល់ឃើញថា សញ្ញានៃការគំរាមបាញ់សម្លាប់ប្រឆាំងមេដឹកនាំសហជីព សកម្មជនដីធ្លី និងអ្នកការពារសិទ្ធិមនុស្សនេះ បង្ហាញថា ប្រទេសកម្ពុជា កំពុងតែពុំមានសុវត្ថិភាពនោះទេ ជាពិសេសទៅទៀតនោះ គឺប្រទេសដែលកំពុងអភិវឌ្ឍន៍មួយនេះ ហាក់បានប្រើប្រាស់ច្បាប់ គាំទ្រពាណិជ្ជករដែលរកស៊ីមិនស្មោះត្រង់ ឬមន្ត្រីមានអំណាចណាមួយដែលវាពុំមែនបម្រើឲ្យផលប្រយោជន៍សម្រាប់សាធារណជនទៅវិញ៖ «ខ្ញុំគិតថា បើសិនជារដ្ឋាភិបាល និងអាជ្ញាធរបណ្ដែតបណ្ដោយឲ្យមានការគំរាមកំហែងជាបន្តទៅទៀត បានន័យថា ស្រុកខ្មែរលែងអនុវត្តច្បាប់ហើយ»។
លោក ប៉ាវ ស៊ីណា និយាយថា ចាប់ពីថ្ងៃទី២៣ កុម្ភៈ ទៅលោកនឹងជួបមន្ត្រីសំខាន់ៗផ្នែកការពារសិទ្ធិមនុស្សមួយចំនួន នឹងដាក់បណ្ដឹងទៅអាជ្ញាធររបស់រដ្ឋដើម្បីសុំកិច្ចអន្តរាគមន៍ប្រឆាំងគម្រោងសម្លាប់រូបលោកនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- អ្នកតាមដាននយោបាយថា អាមេរិកដាក់ទណ្ឌកម្ម លោក លី យ៉ុងផាត់ ជាការកាត់ផ្ដាច់សរសៃឈាមសេដ្ឋកិច្ចរបស់បក្សកាន់អំណាច
- កញ្ញា ឈឹម ស៊ីថរ រក្សាជំហរតស៊ូ ដើម្បីសេរីភាពសហជីព និងការពារផលប្រយោជន៍កម្មករក្រោយមានសេរីភាព
- ហេតុអ្វីបានជាអាមេរិកដាក់ទណ្ឌកម្ម «ស្តេចកោះកុង»?
- ក្រសួងការបទេស និងគណបក្សប្រជាជនកម្ពុជាចាត់ទុកថា ជារឿងអយុត្តិធម៌ ដែលក្រសួងរតនាគារសហរដ្ឋអាមេរិកដាក់ទណ្ឌកម្មលើលោក លី យ៉ុងផាត់
- ពលរដ្ឋរិះគន់អាជ្ញាធរអប្សរាបណ្តោយឱ្យអ្នកមានលុយមានអំណាចសង់ផ្នូរខ្មោចចិនមួយធំក្នុងតំបន់អង្គរ