អាណាព្យាបាលកុមាររងគ្រោះដោយសារម្សៅទឹកដោះគោនូទ្រីលេត ទទូចឱ្យសាលាឧទ្ធរណ៍ពន្លឿនការកាត់ក្ដីសំណុំរឿងក្រុមហ៊ុនមួយនេះ ដោយមិនត្រូវលើកយកហេតុផលថា ពួកគាត់គ្មានភស្តុតាងមកពន្យារពេលតទៅទៀតឡើយ។ មន្ត្រីសង្គមស៊ីវិលជំរុញឱ្យសាលាឧទ្ធរណ៍ប្រញាប់បញ្ចប់សំណុំរឿងមួយនេះ ដើម្បីផ្ដល់យុត្តិធម៌ឱ្យកុមាររងគ្រោះ។
អាណាព្យាបាលកុមាររងគ្រោះ ដោយសារម្សៅទឹកដោះគោនូទ្រីលេត (Nutrilatt) ប្រាប់ថា ពួកគាត់មិនទាន់ទទួលបានដីកាកោះហៅពីសាលាឧទ្ធរណ៍ ដើម្បីរកយុត្តិធម៌ឱ្យកូនរបស់ពួកគាត់នៅឡើយទេ ក្រោយតុលាការកំពូល សម្រេចបង្វិលរឿងនេះ ត្រឡប់ទៅសាលាឧទ្ធរណ៍ រយៈពេល ១ខែទៅហើយ។
ម្ដាយកុមាររងគ្រោះលោកស្រី ប៉ុន ពេជ្រវត្តា ប្រាប់វិទ្យុអាស៊ីសេរីនៅថ្ងៃទី២០ មករា ថា លោកស្រី រួមទាំងអាណាព្យាបាលក្មេងរងគ្រោះដទៃទៀត កំពុងរង់ចាំការកោះហៅរបស់សាលាឧទ្ធរណ៍ ព្រោះសំណុំរឿងនេះអូសបន្លាយជាង ៣ឆ្នាំមកហើយ។ លោកស្រីបន្តថា ប្រសិនបើសាលាឧទ្ធរណ៍នៅតែពន្យារពេលបន្តទៀត នឹងធ្វើឱ្យលោកស្រីកាន់តែខកចិត្ត និងអស់ជំនឿលើប្រព័ន្ធច្បាប់នៅកម្ពុជា។
លោកស្រី ប៉ុន ពេជ្រវត្តា៖ «ខ្ញុំសំណូមពរឱ្យពួកគាត់កោះហៅឱ្យលឿនៗ។ ហើយសូមសំណូមពរមួយទៀត នៅពេលដែលកោះហៅហើយ បើខាងក្រុមហ៊ុនមិនចូល ក៏យើងត្រូវកាត់ក្ដីភ្លាមៗដែរ។ ខ្ញុំអត់ចង់ឱ្យប្រើលេស ព្រោះលេសហ្នឹងប្រើតាំងពីសាលាដំបូងមក។ លេសដែលថាគាត់(ភាគីក្រុមហ៊ុន)ឈឺមានលិខិតពេទ្យ គាត់រវល់ គាត់ដូរមេធាវី គាត់ឈឺអីហ្នឹងគឺដដែលៗ យើងត្រូវពន្យារពេលរហូត។ ដូចថា យើងឧទ្ធរណ៍ត្រូវកាត់ថ្ងៃហ្នឹង ហៅលើកហ្នឹងគាត់អត់មក ឧទាហរណ៍លើកម្ដងទៀត ទម្រាំតែកោះហៅម្ដងទៀត គឺបីបួនខែ អ៊ីចឹងវាខាតពេលពួកខ្ញុំខ្លាំង»។
កាលពីថ្ងៃទី២១ ខែធ្នូ ឆ្នាំ២០២៣ តុលាការកំពូល ដែលមានប្រធានចៅក្រមជំនុំជម្រះ គឺ លោក គង់ ស្រ៊ីម បានប្រកាសសាលដីកា ដោយសម្រេចបង្វិលសំណុំរឿងក្រុមហ៊ុនម្សៅទឹកដោះគោនូទ្រីលេត ត្រឡប់ទៅសាលាឧទ្ធរណ៍វិញ ដើម្បីរកភស្តុតាងបន្ថែម។ ក៏ប៉ុន្តែ អាណាព្យាបាលកុមាររងគ្រោះ មិនពេញចិត្តចំពោះការសម្រេចនេះឡើយ ព្រោះឆ្លងកាត់សវនាការច្រើនលើកមកនេះ ពួកគាត់បានបង្ហាញភស្តុតាងរឹងមាំ និងសម្បូរបែបទាំងឯកសារផ្លូវច្បាប់ និងលទ្ធផលធ្វើតេស្ដពីមន្ទីរពិសោធន៍ និងអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែងនិងបង្ក្រាបការក្លែងបន្លំ (ក.ប.ប) ខណៈភាគីក្រុមហ៊ុន ធ្លាប់ទទួលស្គាល់ថា ផលិតផលរបស់ខ្លួន គ្មានគុណភាព និងធ្វើឱ្យប៉ះពាល់ដល់កុមារពិតប្រាកដមែន។
វិទ្យុអាស៊ីសេរីមិនអាចទាក់ទងអ្នកនាំពាក្យសាលាឧទ្ធរណ៍ភ្នំពេញ លោក ឃុន លាងម៉េង និងតំណាងក្រុមហ៊ុនម្សៅទឹកដោះគោនូទ្រីលេត ដើម្បីសុំការបកស្រាយបានទេ នៅថ្ងៃទី២០ ខែមករា។
ជុំវិញរឿងនេះ នាយកទទួលបន្ទុកកិច្ចការទូទៅនៃអង្គការសិទ្ធិមនុស្សលីកាដូ (LICADHO) លោក អំ សំអាត ជំរុញឱ្យសាលាឧទ្ធរណ៍ពន្លឿននីតិវិធី ដើម្បីឱ្យគ្រួសារកុមាររងគ្រោះ ព្រោះសំណុំរឿងនេះ ធ្លាប់ឆ្លងកាត់សាលាឧទ្ធរណ៍ម្ដងរួចមកហើយ ខណៈអាណាព្យាបាលរបស់កុមារ បានបង្ហាញភស្តុតាងរឹងមាំជាច្រើនលើកផងដែរ។
លោក ឃុន លាងម៉េង៖ «សាលាឧទ្ធរណ៍គួរតែពន្លឿននីតិវិធី ដើម្បីធ្វើយ៉ាងណា កុំឱ្យមានការអូសបន្លាយពេលវេលាយូរទៅទៀត ចំពោះការរង់ចាំយុត្តិធម៌ដោយអន្ទះសារបស់ក្រុមគ្រួសារកុមាររងគ្រោះ ហើយដែលមានផលប៉ះពាល់ច្រើន សម្រាប់កុមារដែលរងគ្រោះហ្នឹង ហើយគាត់ណាយពេលវេលាជាច្រើន យូរមកហើយដោយសារតែរឿងក្ដីហ្នឹង»។
កាលពីដើមខែធ្នូ ឆ្នាំ២០២០ អាណាព្យាបាលទារករងគ្រោះដោយសារម្សៅទឹកដោះគោ នូទ្រីលេត ចំនួន ២១គ្រួសារ បានដាក់ពាក្យបណ្ដឹងទៅសាលាដំបូងរាជធានីភ្នំពេញ ប្ដឹងក្រុមហ៊ុន នូទ្រីលេត ម៉ាស្ទ័រ អិលអឹម (Nutrilatt Master LM Co., LTD) ដោយអះអាងថា ក្រុមហ៊ុននេះផ្សព្វផ្សាយពាណិជ្ជកម្មភូតកុហក ក្លែងបន្លំ លក់ម្សៅទឹកដោះគោគ្មានគុណភាព បណ្ដាលឱ្យកូនៗរបស់ពួកគេ ទទួលទានហើយមានសភាពស្លេកស្លាំង ស្ពឹកស្រពន់ និងមានជំងឺខ្វះគ្រាប់ឈាមក្រហម ខ្វះជាតិដែក និងជាតិស័ង្កសី រហូតធ្លាក់ខ្លួនឈឺធ្ងន់ធ្ងរ។
អាណាព្យាបាលកុមាររងគ្រោះស្នើឱ្យសាលាឧទ្ធរណ៍ បើកសវនាការឱ្យបានឆាប់រហ័ស និងប្រកបដោយភាពយុត្តិធម៌ ព្រោះការសម្រេចរបស់តុលាការកំពូល បានធ្វើឱ្យពួកគាត់កាន់តែឈឺចាប់ និងពិបាកទទួលយក ដោយសារកូនរបស់ពួកគាត់ត្រូវរងគ្រោះហើយ ចំណែកពួកគាត់បានឡើងបំភ្លឺនៅតុលាការច្រើនឆ្នាំ ប៉ុន្តែជាចុងក្រោយ បែរជាតុលាការកំពូលសម្រេចបង្វិលសំណុំរឿងថយក្រោយទៅវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។