សង្គម​ស៊ីវិល៖ ការ​បញ្ឈរជើង​លោក ផែង វណ្ណៈ ជា​សញ្ញា​ល្អ​នៃ​ការ​អនុវត្ត​ច្បាប់

0:00 / 0:00

មន្ត្រី​សង្គម​ស៊ីវិល​យល់​ថា ការ​បញ្ឈរ​ជើង​លោក ផែង វណ្ណៈ ជា​សញ្ញា​ល្អ​មួយ​នៃ​ការ​អនុវត្ត​ច្បាប់​របស់​ស្ថាប័ន​មាន​សមត្ថកិច្ច។ ចំណែក​លោក កឹម សុខា អនុ​ប្រធាន​គណបក្ស​សង្គ្រោះ​ជាតិ ថា​លោក​នឹង​រង់ចាំ​មើល​ចំណាត់​ការ​របស់​សមត្ថកិច្ច។

ការ​លើក​ឡើង​របស់​មន្ត្រី​សង្គម​ស៊ីវិល និង​មន្ត្រី​​បក្ស​ប្រឆាំង​ដូច​នេះ បន្ទាប់​ពី​លោក ស ខេង រដ្ឋមន្ត្រី​ក្រសួង​មហាផ្ទៃ សម្រេច​បញ្ឈរ​ជើង​លោក ផែង វណ្ណៈ តាម​រយៈ​ការ​ផ្ទេរ​ការងារ​ពី​នាយកដ្ឋាន​សន្តិសុខ​ផ្ទៃក្នុង​មក​នាយកដ្ឋាន​បុគ្គលិក។

លោក ស ខេង សម្រេច​បែប​នេះ​ក្នុង​ហេតុផល​ថា ដើម្បី​បង្ក​ភាព​ងាយស្រួល​ក្នុង​ការ​ស៊ើប​អង្កេត​លើ​រូប​លោក (ផែង វណ្ណៈ) ពាក់ព័ន្ធ​នឹង​ការ​គំរាម​សម្លាប់​លោក កឹម សុខា អនុ​ប្រធាន​ទី​១​រដ្ឋ​សភា និង​ជា​អនុ​ប្រធាន​គណបក្ស​សង្គ្រោះ​ជាតិ តាម​បណ្ដាញ​សង្គម​ហ្វេសប៊ុក (Fecebok) និង​ពីរ​ករណី​ផ្សេង​ទៀត។

មន្ត្រី​ជាន់ខ្ពស់​នៃ​អង្គការ​សិទ្ធិមនុស្ស​លីកាដូ (LICADHO) លោក អំ សំអាត និយាយ​ថា ការ​សម្រេច​របស់​លោក ស ខេង បែប​នេះ ជា​ការ​បោះ​ជំហាន​ទៅ​មុខ​របស់​សមត្ថកិច្ច​ក្នុង​ការ​អនុវត្ត​ការងារ​របស់​ខ្លួន។ ទោះ​យ៉ាង​នេះ​ក្ដី មន្ត្រី​សង្គម​ស៊ីវិល​រូប​នេះ​យល់​ថា សំណុំរឿង​ដែល​ទាក់ទង​នឹង​លោក កឹម សុខា អូស​បន្លាយ​យូរ បើ​ធៀប​ទៅ​នឹង​ករណី​គំរាម​សម្លាប់​មន្ត្រី​រដ្ឋាភិបាល។

លោក អំ សំអាត៖ «យើង​មិន​ចោទ​ប្រកាន់ លោក ផែង វណ្ណៈ ថា​យ៉ាង​ម៉េច​ទេ ប៉ុន្តែ​ចង់​ឲ្យ​ក្រសួង​មហាផ្ទៃ គាត់​ធ្វើ​ការ​ដោយ​យក​ចិត្ត​ទុកដាក់ និង​ឯករាជ្យ។ ជន​ណា​ដែល​ប្រព្រឹត្ត គំរាម​កំហែង​ទៅ​លើ​ឯកឧត្ដម កឹម សុខា សុំ​ឲ្យ​មាន​ការ​បញ្ជូន​ទៅ​តុលាការ»

ជុំវិញ​រឿង​បញ្ឈរ​ជើង​លោក ផែង វណ្ណៈ នេះ​ដែរ អ្នក​នាំ​ពាក្យ​ក្រសួង​មហាផ្ទៃ លោក ខៀវ សុភ័គ បាន​ឲ្យ​ដឹង​នៅ​ថ្ងៃ​ទី​២១ ខែ​តុលា ថា លោក ផែង វណ្ណៈ មាន​ជាប់​ពាក់ព័ន្ធ ៣​ករណី ដែល​ក្រសួង​មហាផ្ទៃ ត្រូវ​ស៊ើប​អង្កេត គឺ​ករណី​គំរាម​សម្លាប់​លោក កឹម សុខា ករណី​បរិហារកេរ្តិ៍​អ្នកស្រី កែវ ម៉ាលី សមាជិក​ព្រឹទ្ធ​សភា​ពី​គណបក្ស​ប្រជាជន​កម្ពុជា និង​លោក សៀក សុជាតិ នាយ​រង​សេនាធិការ​ចម្រុះ និង​នាយក​ទីចាត់ការ​ព្រំដែន​នៃ​កង​យោធពល​ខេមរភូមិន្ទ តាម​ហ្វេសប៊ុក និង​ករណី​មួយ​ទៀត ជា​រឿង​ផ្ទាល់​ខ្លួន​របស់​លោក ផែង វណ្ណៈ ដែល​លោក ខៀវ សុភ័គ មិន​ទាន់​អាច​បញ្ជាក់​ថា ជា​ករណី​អ្វី​នោះ​ទេ។

លោក ខៀវ សុភ័គ៖ «ធម្មតា​ទេ មន្ត្រី​រាជការ​ដែល​មាន​តួនាទី ប្រសិនជា​គាត់​ប៉ះពាល់​ការងារ​ស៊ើប​អង្កេត យើង​ត្រូវ​ផ្ទេរ​ការងារ ពាក្យ​សាមញ្ញ​ថា បញ្ឈរជើង។ បើសិនជា​គាត់​ស្ថិត​នៅ​ក្នុង​តួនាទី ឬ​សិទ្ធិ​អំណាច អាច​ប៉ះពាល់​ដល់​ការងារ​ស៊ើប​អង្កេត»

លោក ផែង វណ្ណៈ មាន​តួនាទី​ជា​អនុ​ប្រធាន​ការិយាល័យ​នាយកដ្ឋាន​សន្តិសុខ​ផ្ទៃក្នុង​នៃ​ក្រសួង​មហាផ្ទៃ។ ខណៈ​ដែល​ក្រសួង​បញ្ឈរ​ជើង​ដូច​នេះ លោក ខៀវ សុភ័គ អ្នក​នាំ​ពាក្យ​ក្រសួង​មហាផ្ទៃ បញ្ជាក់​បន្ថែម​ថា លោក ផែង វណ្ណៈ មិន​តម្រូវ​ឲ្យ​មាន​ការ​ទទួល​ខុស​ត្រូវ​លើ​ការងារ​របស់​លោក​ទៀត​ទេ។

លោក ផែង វណ្ណៈ បដិសេធ​មិន​ផ្ដល់​បទសម្ភាសន៍​ឲ្យ​វិទ្យុ​អាស៊ីសេរី ទាក់ទង​រឿង​នេះ​ទេ។

ដោយ​ឡែក​ប្រធាន​ស្ដីទី​គណបក្ស​សង្គ្រោះ​ជាតិ លោក កឹម សុខា មិន​ទាន់​បង្ហាញ​ការ​យល់​ឃើញ​ចំពោះ​វិធានការ​នេះ​នៅ​ឡើយ​ទេ ដោយ​លោក​នឹង​តាមដាន​ការ​អនុវត្ត​ការងារ​របស់​សមត្ថកិច្ច៖ «យើង​មិន​អាច​វាយ​តម្លៃ​មុន​បាន​ភ្លាម​ទេ នៅ​ពេល​ទើប​តែ​ចាប់​ផ្ដើម​ចំណាត់​ការ។ រង់ចាំ​មើល​លទ្ធផល​សិន»

កាល​ពី​ឆ្នាំ​២០១៣ គណនេយ្យ​ហ្វេសប៊ុក ឈ្មោះ ផែង វណ្ណៈ បាន​បង្ហោះ​សារ​គំរាម​សម្លាប់​អនុ​ប្រធាន​គណបក្ស​សង្គ្រោះ​ជាតិ លោក កឹម សុខា។ សារ​ព្រមាន​បាន​បង្ហោះ​រូប​កាំភ្លើង​ខ្លី មាន​គ្រាប់​កាំភ្លើង​ចំនួន ៧​គ្រាប់ និង​សរសេរ​ថា ទុក ៧​គ្រាប់​ឲ្យ​លោក កឹម សុខា គ្រាប់​ទី​១ បាញ់​ដៃ​ឆ្វេង គ្រាប់​ទី​២ បាញ់​ដៃ​ស្ដាំ គ្រាប់​ទី​៣ បាញ់​ជើង​ឆ្វេង គ្រាប់​ទី​៤ បាញ់​ជើង​ស្ដាំ គ្រាប់​ទី​៥ បាញ់​ចំ​ពោះ គ្រាប់​ទី​៦ បាញ់​បេះដូង និង​គ្រាប់​ទី​៧ បាញ់​ឲ្យ​ចំ​ក្បាល​លោក កឹម សុខា។

​អ្នក​នាំ​ពាក្យ​ក្រសួង​មហាផ្ទៃ លោក ខៀវ សុភ័គ ថ្លែង​ថា សព្វថ្ងៃ​នេះ​ក្រសួង​មហាផ្ទៃ បាន​បង្កើត​គណៈកម្មការ​មួយ​ដែល​មាន​មន្ត្រី​ជំនាញ និង​ដឹកនាំ​ដោយ​រដ្ឋលេខាធិការ​ក្រសួង​មហាផ្ទៃ មួយ​រូប​ដើម្បី​ស៊ើប​អង្កេត​ករណី​លោក ផែង វណ្ណៈ នេះ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖

ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។