ក្រុមប្រឹក្សាជំនុំជម្រះនៃសាលាដំបូងរាជធានីភ្នំពេញបានកាត់ក្ដីឱ្យអតីតឧកញ៉ា ស្រី ស៊ីណា ដាក់ពន្ធនាគារ ៣១ឆ្នាំ និងបង់សំណងជំងឺចិត្ត ២លានដុល្លារ ដល់ឪពុកម្ដាយជនរងគ្រោះដែលបានស្លាប់ពីរនាក់ គឺម្នាក់១លានដុល្លារ។ តុលាការក៏បានបង្គាប់ឱ្យសងជំងឺចិត្តដល់ជនរងគ្រោះ ដែលរងរបួសម្នាក់ ៣០ម៉ឺន និង២០ម៉ឺនដុល្លារ និងម្ដាយជនរងគ្រោះ ៥ម៉ឺនដុល្លារដែរ។
សេចក្ដីប្រកាសព័ត៌មានរបស់សាលាដំបូងរាជធានីភ្នំពេញចុះថ្ងៃទី២៣ ធ្នូ រកឃើញខ្មាន់កាំភ្លើងស្រី ស៊ីណា ប្រព្រឹត្តិអំពើឃាតកម្ម បទប៉ុនប៉ងឃាតកម្ម បទប្រើប្រាស់អាវុធដោយគ្មានការអនុញ្ញាត និងទរំលោភសិទ្ធិលំនៅឋាន។
កាលពីរសៀលថ្ងៃទី១៧ ខែមិថុនា ឧកញ៉ា ស្រី ស៊ីណា បានប្រើកាំភ្លើងខ្លីបាញ់ប្រហារជាច្រើនគ្រាប់បណ្ដាលឲ្យមនុស្សពីរនាក់ស្លាប់ និងពីរនាក់ទៀតរងរបួសនៅក្នុងផ្ទះរបស់ជនរងគ្រោះ ស្ថិតនៅបុរីប៉េងហួតបឹងស្នោរ ក្នុងខណ្ឌច្បារអំពៅ ដែលផ្ដើមចេញពីទំនាស់បន្តិចបន្តួចរឿងស្នួលខោអាវឆ្លងចូលព្រំដីគ្នា។
ជនរងគ្រោះដែលបាត់បង់ជីវិតទាំងពីរនាក់មានអាយុជាង ២០ឆ្នាំជាគូដណ្ដឹងជិតរៀបការជាមួយគ្នា។ សមត្ថកិច្ចបានឃាត់ខ្លួនឧកញ៉ា ស្រី ស៊ីណា ក្នុងពេលព្យាយាមរត់គេចខ្លួនទៅដល់ស្រុកអង្គស្នួល ខេត្តកណ្ដាល។ ក្នុងពេលចាប់នោះជនដៃដល់រូបនេះ ហាក់គ្មានញញើតសមត្ថកិច្ច និងបានសារភាពថា គាត់ពិតជាបានបាញ់សម្លាប់ជនរងគ្រោះមែន។
ករណីបាញ់សម្លាប់យុវជនពីរនាក់ជាគូដណ្ដឹងនឹងគ្នានេះ បានធ្វើឲ្យពលរដ្ឋខ្មែរគ្រប់ស្រទាប់ រន្ធត់ចិត្ត និងសោកស្ដាយ ហើយស្នើឱ្យតុលាការផ្ដន្ទាទោសដល់ជនប្រព្រឹត្តឱ្យបានធ្ងន់ធ្ងរតាមច្បាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។