មន្ត្រីសិទ្ធិមនុស្សថា ការបន្តផ្ដន្ទាទោសលោក រ៉ាត់ រត្នមុនី ជារឿងអយុត្តិធម៌
2019.11.29
លោក រ៉ាត់ រត្នមុនី សកម្មជនសិទ្ធិការងារ
រូប៖ អ្នកស្រី ឡុង គឹមហ៊ាង
សាលាឧទ្ធរណ៍ប្រកាសសាលដីកានៅថ្ងៃទី២៩ វិច្ឆិកា សម្រេចឱ្យសកម្មជនសិទ្ធិការងារលោក រ៉ាត់ រត្នមុនី ជាប់ទោសបន្តទៅទៀត តាមអំណាចសាលក្រមតុលាការក្រុងភ្នំពេញ។ មន្ត្រីសិទ្ធិមនុស្សថ្លែងថា ការសម្រេចនេះជារឿងអយុត្តិធម៌សម្រាប់លោក រ៉ាត់ រត្នមុនី។
ប្រធានផ្នែកសិទ្ធិមនុស្សសមាគម អាដហុក (ADHOC) លោក នី សុខា សោកស្ដាយដែលសាលាឧទ្ធរណ៍តម្កល់សាលក្រមផ្ដន្ទាទោសលោក រ៉ាត់ រត្នមុនី ទុកជាបានការដដែល ក្នុងពេលដែលគាត់ត្រឹមតែជាអ្នកបកប្រែឱ្យសារព័ត៌មានរុស្ស៊ី ហើយភាគីពាក់ព័ន្ធទាំងអស់សុទ្ធតែអវត្តមានក្នុងអង្គសវនាការនាពេលកន្លងទៅ។ ម្យ៉ាងវិញទៀត លោកមើលឃើញថា ការបន្តឃុំខ្លួនលោក រ៉ាត់ រត្នមុនី មិនចំណេញអ្វីដល់រដ្ឋាភិបាល និងប្រព័ន្ធយុត្តិធម៌កម្ពុជាឡើយ។ ដូច្នេះលោកសង្ឃឹមថា តុលាការកំពូលនឹងពិចារណាលើកលែងការចោទប្រកាន់លើសកម្មជនសិទ្ធិការងាររូបនេះ។
តុលាការក្រុងភ្នំពេញបានផ្ដន្ទាទោសឱ្យជាប់ពន្ធនាគារ ២ឆ្នាំ ពីបទ "ញុះញង់ឱ្យមានការរើសអើង" និងសងសំណងដល់ដើមបណ្ដឹងរដ្ឋប្បវេណីចំនួន ៧០លានរៀល ឬស្មើនឹងជិត ២ម៉ឺនដុល្លារអាមេរិក។ គិតត្រឹមពេលនេះ លោកបានជាប់ឃុំក្នុងពន្ធនាគារព្រៃសអស់រយៈពេលជិតមួយឆ្នាំមកហើយ។
ប្រធានសហព័ន្ធសហជីពកម្មករសំណង់កម្ពុជា លោក រ៉ាត់ រត្នមុនី ជាប់ទោសក្នុងរឿងក្តីក្តាំនេះ ដោយសារតែលោកបានជួយបកប្រែភាសាឱ្យក្រុមអ្នកសារព័ត៌មាន RT (Russia Today) ផលិតភាពយន្តឯកសារមួយ ស្ដីពីការជួញដូរផ្លូវភេទនៅកម្ពុជា ក្រោមចំណងជើងថា "ម្តាយខ្ញុំ លក់ខ្ញុំ"។ អាជ្ញាធររបបក្រុងភ្នំពេញបានចាត់ទុកភាពយន្តឯកសារនេះថា ជារឿងប្រឌិត ធ្វើឱ្យប៉ះពាល់ដល់កិត្តិយសស្ត្រីខ្មែរ និងមុខមាត់របស់កម្ពុជា រួចក៏បានតាមចាប់លោកដល់ទីក្រុងបាងកក ប្រទេសថៃ។ ទោះជាយ៉ាងណា អាជ្ញាធរហាក់ព្យាយាមដាក់បន្ទុកទៅលើលោក រ៉ាត់ រត្នមុនី ម្នាក់ប៉ុណ្ណោះ ដោយមិនបានកោះហៅតំណាងសារព័ត៌មាន RT របស់រុស្ស៊ី ដែលអ្នកផលិត ឱ្យមកឆ្លើយបំភ្លឺលើការចេញផ្សាយស្នាដៃរបស់ខ្លួនឡើយ ហើយសាក្សីសំខាន់ៗ ដែលអាចជួយដោះបន្ទុកលោក រ៉ាត់ រត្នមុនី បាននោះ ក៏មិនត្រូវបានកោះហៅឱ្យចូលបំភ្លឺនោះដែរ។
នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការ លីកាដូ (LICADHO) លោក អំ សំអាត ថ្លែងថា ការផ្ដន្ទាទោសលោក រ៉ាត់ រត្នមុនី ប៉ះពាល់ដល់សិទ្ធិសេរីភាពសង្គមស៊ីវិល និងសេរីភាពសារព័ត៌មាន ព្រោះគាត់ជាមេដឹកនាំសហជីពផង និងជាអ្នកបកប្រែឱ្យសារព័ត៌មានផង។ លោកបន្តថា រដ្ឋាភិបាលធ្លាប់បានប្រកាសពីការប្ដេជ្ញាចិត្តប្រយុទ្ធប្រឆាំងនឹងអំពើជួញដូរមនុស្ស។ ដូច្នេះ អាជ្ញាធរមិនគួរយកទោសអូសដំណើរអ្នកដែលជួយផ្សព្វផ្សាយអំពីការជួញដូរផ្លូវភេទនោះឡើយ៖ «»
ស្ថានទូតអាមេរិកប្រចាំកម្ពុជាធ្លាប់បានគូសបញ្ជាក់កាលពីពេលកន្លងទៅថា ការកាត់ទោសលោក រ៉ាត់ រត្នមុនី ធ្វើឱ្យប្រជាពលរដ្ឋ និងសហគមន៍អន្តរជាតិ កាន់តែបាត់ទំនុកចិត្តលើប្រព័ន្ធតុលាការកម្ពុជា ពីព្រោះសកម្មជនសិទ្ធិការងាររូបនេះ មិនទទួលបានសវនាការប្រកបដោយយុត្តិធម៌ឡើយ។
ចំណែកអង្គការសិទ្ធិមនុស្សអន្តរជាតិមួយចំនួន ដូចជា អង្គការឃ្លាំមើលសិទ្ធិមនុស្សអន្តរជាតិ (Human Rights Watch) និងអង្គការអ្នកកាសែតគ្មានព្រំដែន (Reporter Without Borders) ជាដើម បានចេញមុខថ្កោលទោសរបបក្រុងភ្នំពេញជាបន្តបន្ទាប់ ជុំវិញចំណាត់ការលើលោក រ៉ាត់ រត្នមុនី និងបានទាមទារឱ្យរបបនេះ ដោះលែងរូបលោកវិញជាបន្ទាន់។ ក្រុមអង្គការសិទ្ធិមនុស្សទាំងនេះ វាយតម្លៃថា តុលាការបានកាត់ក្តីរឿងនេះ បែបបាយឡុកបាយឡគួរឱ្យអាម៉ាស់ និងគួរឱ្យស្អប់ខ្ពើម ហើយសាលក្រមនេះ បានធ្វើឱ្យបាត់បង់សុចរិតភាពនៃប្រព័ន្ធតុលាការកម្ពុជាយ៉ាងដំណំ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- អ្នកតាមដាននយោបាយថា អាមេរិកដាក់ទណ្ឌកម្ម លោក លី យ៉ុងផាត់ ជាការកាត់ផ្ដាច់សរសៃឈាមសេដ្ឋកិច្ចរបស់បក្សកាន់អំណាច
- កញ្ញា ឈឹម ស៊ីថរ រក្សាជំហរតស៊ូ ដើម្បីសេរីភាពសហជីព និងការពារផលប្រយោជន៍កម្មករក្រោយមានសេរីភាព
- ហេតុអ្វីបានជាអាមេរិកដាក់ទណ្ឌកម្ម «ស្តេចកោះកុង»?
- ក្រសួងការបទេស និងគណបក្សប្រជាជនកម្ពុជាចាត់ទុកថា ជារឿងអយុត្តិធម៌ ដែលក្រសួងរតនាគារសហរដ្ឋអាមេរិកដាក់ទណ្ឌកម្មលើលោក លី យ៉ុងផាត់
- សមត្ថកិច្ចចាប់ខ្លួន លោក ហោ សុខុន អតីតព្រះចៅអធិការវត្តច្បារអំពៅ និងមនុស្ស ៣ទៀត