តុលាការ​ក្រុង​ភ្នំពេញ​កាត់​ទោស​មេដឹកនាំ​សហជីព​វិស័យ​ទេសចរណ៍​ឱ្យ​ជាប់​ពន្ធនាគារ​១​ឆ្នាំ​កន្លះ

ដោយ ខាន់ លក្ខិណា
2024.05.09
តុលាការ​ក្រុង​ភ្នំពេញ​កាត់​ទោស​មេដឹកនាំ​សហជីព​វិស័យ​ទេសចរណ៍​ឱ្យ​ជាប់​ពន្ធនាគារ​១​ឆ្នាំ​កន្លះ លោក ម៉ម រិទ្ធី ប្រធាន​សហព័ន្ធ​សហជីព​កម្មករ​និយោជិត​វិស័យ​ទេសចរណ៍​សេវាកម្ម​កម្ពុជា (CTSWF) និង​ជា​អនុប្រធាន​ទី២​ សហភាព​ការងារ​កម្ពុជា (CLC)។
រូប៖ ហ្វេសប៊ុក CLC 2024-05-07

តុលាការ​ក្រុង​ភ្នំពេញ កាលពី​ថ្ងៃទី​៧ ខែ​ឧសភា កាត់ទោស​ប្រធាន​សហព័ន្ធ​សហជីព​វិស័យ​ទេសចរណ៍ (CTSWF) លោក ម៉ម រីទ្ធី ឱ្យ​ជាប់​ពន្ធនាគារ ១​ឆ្នាំ ៦​ខែ ពី​បទ «ញុះញង់​ឱ្យ​ប្រព្រឹត្ត​បទឧក្រិដ្ឋ​ជាអាទិ៍ និង​បទ​«​ធ្វើ​ឱ្យ​បាត់បង់​ជំនឿ​លើ​សេចក្ដីសម្រេច​របស់​តុលាការ​» ប្រព្រឹត្ត​នៅ​លើ​បណ្ដាញ​សង្គម​ហ្វេសប៊ុក (FACEBOOK) កាល​ពី​ថ្ងៃ​ទី២៤ ខែ​កុម្ភៈ ឆ្នាំ​២០២២។

សហជីព និង​សង្គម​សម្ដែង​ការ​សោកស្ដាយ និង​ចាត់ទុក​ការ​យក​ច្បាប់ព្រហ្មទណ្ឌ មក​ធ្វើការ​ចោទប្រកាន់​នេះ ថា ជា​រឿង​អយុត្តិធម៌ និង​ជា​ការ​បំភិតបំភ័យ និង​យាយី​ដល់​សិទ្ធិ​របស់​សហជីព។

ក្នុង​ដីកា​បង្គាប់​ឱ្យ​ចាប់ និង​ឃុំខ្លួន​របស់​ចៅក្រម​ជំនុំជម្រះ​សាលាដំបូង​រាជធានី​ភ្នំពេញ លោក ធន់ ដារិទ្ធ បាន​កាត់ទោស​ឱ្យ​លោក ម៉ម រីទ្ធី ជាប់​ពន្ធនាគារ ១ ឆ្នាំ ៦ ខែ និង​ពិន័យ​ជា​ប្រាក់​ចំនួន ២​លាន​រៀល​ផង​ដែរ។

ជុំវិញ​រឿង​នេះ សហភាព​ការងារ​កម្ពុជា (CLC) បាន​ចេញ​សេចក្ដីថ្លែងការណ៍ នៅ​ថ្ងៃទី​៨ ខែ​ឧសភា ដោយ​ចាត់ទុក​ការ​ចាប់​ខ្លួន​លោក ម៉ម រិទ្ធី ភ្លាមៗ តាម​អំណាច​សាលក្រម​កំបាំងមុខ​នេះ​ថា ជា​សកម្មភាព​បំភិតបំភ័យ សម្លុត និង​យាយី​ដល់​សិទ្ធិ​របស់​តំណាង​កម្មករ​និយោជិត។

មួយ​វិញ​ទៀត ការ​ចាប់​មេដឹកនាំ​សហជីព​រូប​នេះ គឺជា​ការ​បង្ក​ឧបសគ្គ​ដល់​ការ​ប្រើប្រាស់​សិទ្ធិ​សហជីព ការ​រំខាន​ធ្ងន់ធ្ងរ​ដល់​សិទ្ធិ​សហជីព ការ​រំលោភ​បំពាន​លើ​គោលការណ៍​សេរីភាព​សមាគម និង​ការ​វាយប្រហារ​ធ្ងន់ធ្ងរ​លើ​សិទ្ធិ​សហជីព។

សហភាព​ការងារ​កម្ពុជា ថា ការ​យក​ច្បាប់ព្រហ្មទណ្ឌ​មក​ធ្វើការ​ចោទ​ប្រកាន់ និង​ចាប់​ខ្លួន​មក​លើ លោក ម៉ម រិទ្ធី គឺជា​រឿង​ដែល​មិន​សម​ហេតុផល ដោយសារតែ​ការ​បញ្ចេញមតិ​របស់​លោក គឺ​ក្នុង​គោលដៅ​ស្ថាបនា និង​កែតម្រូវ​ឱ្យ​មាន​ការ​អនុវត្ត​ច្បាប់​ឱ្យ​បាន​សមស្រប និង​មាន​តម្លាភាព​របស់​សមត្ថកិច្ច ខេត្ត​ព្រះសីហនុ។

ប្រធាន​សហភាព​ការងារ​កម្ពុជា លោក អាត់ ធន់ ប្រាប់​វិទ្យុ​អាស៊ីសេរី​នៅ​ថ្ងៃទី៨ ខែ​ឧសភា ដោយ​ចាត់ទុក​ករណីនេះ ថា ជា​ការ​គំរាមកំហែង​សកម្មភាព​សហជីព។

លោក អាត់ ធន់៖ «គាត់​គ្រាន់តែ​ធ្វើការ​បម្រើ​កម្មករ ក្នុង​ជា​សហជីព​ទេ​។ អ្វី​ដែល​គាត់ គឺ​គាត់​ជួយ​ក្មេង ដែល​ត្រូវ​គេ​ចាប់​ឃុំ ហើយ​ទីបំផុត​គាត់​ត្រូវ​បាន​ប្ដឹង​ចោទប្រកាន់​ធ្ងន់ធ្ងរ ថា​អាហ្នឹង​ជា​រឿង​យុត្តិធម៌ និង​បំភិត​បំភ័យ​ទៅលើ​គាត់​ធ្ងន់ធ្ងរ»

រីឯ​ប្រពន្ធ​របស់​លោក ម៉ម រីទ្ធី គឺ​លោកស្រី គង់ សុដា អំពាវនាវ​ឱ្យ​តុលាការ និង​សមត្ថកិច្ច​ដោះលែង​បី្ដ​ឱ្យ​មាន​សេរីភាព​វិញ ដោយ​លោកស្រី​ថា ប្ដី​របស់​គាត់​មិន​បាន​ធ្វើ​ខុស​ឡើយ។

លោកស្រី គង់ សុដា៖ «បើ​សំណូមពរ​របស់ខ្ញុំ គឺ​ឱ្យ​ក្រុម​អាជ្ញាធរ​និង​ក្រុមការងារ​គាត់​ជួយ​ឱ្យ​គាត់​បាន​ចេញ​មក​ខាងក្រៅ​ឃុំ​អ៊ីចឹង»

អ្នកនាំពាក្យ​សាលាដំបូង​រាជធានី​ភ្នំពេញ​លោក អ៊ី រិន្ទ ប្រាប់​វិទ្យុ​អាស៊ីសេរី នៅ​ថ្ងៃទី៨ ខែ​ឧសភា ថា ប្រសិនបើ​ភាគី​ពាក់ព័ន្ធ​មិន​សុខចិត្ត​ការ​សម្រេច​របស់​តុលាការ​នោះ គឺ​អាច​ប្ដឹង​ទៅ​តុលាការ​ជាន់ខ្ពស់​បន្ត​ទៀត​បាន។

លោក អ៊ី រិន្ទ៖ «តុលាការ​គាត់​សម្រេច​ហើយ ហើយ​បើ​អ្នក​កើតទុក្ខ​មិន​សុខចិត្ត​អី​អាច​ប្ដឹង​ឧទ្ធរណ៍​បាន»

នាយក​ទទួល​បន្ទុក​កិច្ចការ​ទូទៅ នៃ​អង្គការ​ការពារ​សិទ្ធិមនុស្ស លោក អំ សំអាត ប្រាប់​វិទ្យុ​អាស៊ីសេរី នៅ​ថ្ងៃទី​០៨ ខែ​ឧសភា ថា ករណី​ចាប់ខ្លួន​នេះ ជា​ការ​ធ្វើទុក្ខបុកម្នេញ ការ​រំលោភបំពាន ការ​យាយី​ទៅលើ​ការ​ធ្វើ​សកម្មភាព និង​ការងារ​របស់​មេដឹកនាំ​សហជីព។

លោក​ថា ចំណុច​ទាំងអស់​នេះ តែងតែ​ត្រូវ​សហគមន៍​ជាតិ និង​អន្តរជាតិ​រិះគន់ អំពី​ការ​រំលោភបំពាន ការ​រឹតត្បិត​លើ​សិទ្ធិ​សេរីភាព​នៃ​សហជីព និង​ការងារ​ជាដើម។

លោក អំ សំអាត៖ «យើង​អត់​ចង់​ឃើញ​ការរិះគន់ ការ​លើក​ឡើងជា​ដដែល ដែល​ធ្វើ​ឱ្យ​ប៉ះពាល់​ដល់​សិទ្ធិ​សហជីព សិទ្ធិមនុស្ស​នៅក្នុង​កម្ពុជា​ទេ​។ យើង​ការគោរព​ទៅតាម​គោលការណ៍​នៃ​រដ្ឋធម្មនុញ្ញ បទដ្ឋាន​ស្ដី​អំពី​សិទ្ធិមនុស្ស ដែល​កម្ពុជា​ទទួលស្គាល់ ដូចជា ច្បាប់​អន្តរជាតិ​ស្ដីពី​ការងារ ហើយនឹង​ធានា​អំពី​សិទ្ធិ​សេរីភាព​សហជីព​ស្របច្បាប់ ដែល​ការពារ​ផល​នូវ​សហជីព និង​ផលប្រយោជន៍​កម្មករ​តាមច្បាប់​នោះ»

តុលាការ​ក្រុង​ភ្នំពេញ កាល​ពី​ទី​៧ ខែ​ឧសភា បាន​បញ្ជា​ឱ្យ​ក្រុម​កងកម្លាំង សមត្ថកិច្ច​ចាប់ខ្លួន​លោក ម៉ម រិទ្ធី ដាក់​ពន្ធនាគារ​ទៅ​តាម​អំណាច​សាលក្រម​តុលាការ ដែល​សម្រេច​ផ្ដន្ទាទោស​ដាក់​ពន្ធនាគារ​រយៈពេល ១​ឆ្នាំ​កន្លះ ពី​បទ​«​ញុះញង់​ឱ្យ​ប្រព្រឹត្ត​បទឧក្រិដ្ឋ​ជាអាទិ៍ និង​បទ​ធ្វើ​ឱ្យ​បាត់បង់​ជំនឿ​លើ​សេចក្តី​សម្រេច​របស់​តុលាការ​» ករណី​លោក​បញ្ចេញមតិ រឿង​ការ​ចាប់​ឃុំខ្លួន​បុគ្គលិក​ជា​ស្ត្រី​ម្នាក់ ឈ្មោះ ម៉ម ស្រីល័ក្ខណ នៅ​កាស៊ីណូ ជិន​ប៉ី ដែល​លោក​មើល​ឃើញ​ថា ជា​រឿង​អយុត្តិធម៌ ដែល​មេដឹកនាំ​សហជីព​ត្រូវ​ចេញមុខ​ជួយ​ការពារ និង​ទាមទារ​យុត្តិធម៌។

ក្រោយ​ការ​ប្រឹងប្រែង​តស៊ូ​មតិ ជាមួយ​ក្រុមហ៊ុន​អស់​ជាច្រើន​ខែ​មក​នោះ តុលាការ​ខេត្ត​ព្រះសីហនុ បាន​សម្រេច​ដោះលែង​បុគ្គលិក​ស្ត្រី​រូប​នោះ ឱ្យ​នៅ​ក្រៅ​ឃុំ ប៉ុន្តែ​បែរ​ជា​មាន​ពាក្យ​ប្ដឹង​លោក ម៉ម រិទ្ធី ទៅវិញ។

កាស៊ីណូ ជិនប៉ី ដែល​លោក ម៉ម រិទ្ធី ប្រឹង​តស៊ូ​មតិ​ទាមទារ​ឱ្យ​អ្នកស្រី ម៉ម ស្រីល័ក្ខណ នោះ គឺ​របស់​លោក ចេន ហ្ស៊ី (Chen Zhi) ប្រធាន​សម្ព័ន្ធ​ក្រុមហ៊ុន​ព្រីនស៍ គ្រុប (Prince Group) និង​ជាទី​ប្រឹក្សា​ប្រធាន​ព្រឹទ្ធសភា លោក ហ៊ុន សែន និង​លោក​នាយករដ្ឋមន្ត្រី ហ៊ុន ម៉ាណែត៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ៕

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។