ថៃ​យល់​ព្រម​ទៅ​ប្រជុំ​នៅ​ឥណ្ឌូណេស៊ី

ប៉ុន្តែ​ភាគី​ថៃ​ទទូច​ឲ្យ​កម្ពុជា​ធ្វើ​ការ​ជួប​គ្នា​ទ្វេ​ភាគី​ជា​មុន​សិន មុន​នឹង​ឈាន​ទៅ​ដល់​កិច្ច​ប្រជុំ​នៅ​ប៊ូហ្គូ (Bogor) នៃ​ប្រទេស​ឥណ្ឌូណេស៊ី​នោះ។

មន្ត្រី​នាំ​ពាក្យ​នៃ​ទីស្ដីការ​គណៈរដ្ឋមន្ត្រី​បាន​បដិសេធ​ថា កម្ពុជា​មិន​អាច​ជួប​ប្រជុំ​ទ្វេ​ភាគី​រវាង​កម្ពុជា-ថៃ មុន​នឹង​ទៅ​ប្រជុំ​គណៈកម្មការ​ព្រំដែន​ទូទៅ ហ្ជីប៊ីស៊ី (GBC) និង​គណៈកម្មការ​ចម្រុះ​ខណ្ឌ​សីមា និង​បោះ​បង្គោល​ព្រំដែន ហ្ចេប៊ីស៊ី (JBC) នៅ​ឥណ្ឌូណេស៊ី នា​ថ្ងៃ​ទី​៧-៨ ខែ​មេសា ខាង​មុខ​នោះ​បាន​ទេ។

រដ្ឋ​លេខាធិការ​នៃ​ទីស្ដីការ​គណៈរដ្ឋមន្ត្រី និង​ជា​មន្ត្រី​នាំ​ពាក្យ លោក ផៃ ស៊ីផាន បាន​មាន​ប្រសាសន៍ នៅ​ថ្ងៃ​ទី​២៩ មីនា ថា​ថៃ​គ្មាន​តួនាទី​អ្វី​ក្រៅ​ប្រធាន​អាស៊ាន ដើម្បី​បង្គាប់​ឲ្យ​កម្ពុជា​ធ្វើ​ការ​ប្រជុំ​ណា​មួយ​ជា​មួយ​ប្រទេស​ថៃ មុន​ពេល​កំណត់ ដែល​រៀបចំ​ឡើង​ដោយ​ឥណ្ឌូណេស៊ី​នោះ​ទេ។

លោក ផៃ ស៊ីផាន បាន​លើក​ឡើង​ដូច្នេះ​នៅ​បន្ទាប់​ពី​កាសែត​បាងកក​ប៉ុស្តិ៍​ថៃ (Bangkok Post) បាន ចុះ​ផ្សាយ​កាល​ពី​ល្ងាច​ថ្ងៃ​ទី​២៨ មីនា ដោយ​ស្រង់​សំដី​រដ្ឋ​មន្ត្រី​ក្រសួង​ការពារ​ជាតិ​ថៃ លោក ប្រាវិត វង់សូវ៉ាន់ (Prawit Wong Suwan) បាន​មាន​ប្រសាសន៍​ថា ភាគី​ថៃ​យល់​ព្រម​ពិភាក្សា​គ្នា​អំពី​បញ្ហា​ជម្លោះ​ព្រំដែន​រវាង​កម្ពុជា-ថៃ នៅ​ឥណ្ឌូណេស៊ី ហើយ​ការ​ប្រជុំ​នោះ​ត្រូវ​ធ្វើ​ឡើង​ដោយ​ទ្វេ​ភាគី ប៉ុន្តែ​មុន​នឹង​ទៅ​ប្រជុំ​នៅ​ឥណ្ឌូណេស៊ី ថៃ​ទទូច​ឲ្យ​កម្ពុជា​ជួប​ពិភាក្សា​គ្នា​ទ្វេ​ភាគី​ជា​មុន​សិន។

លោក ប្រាវិត វង់សូវ៉ាន់ ក៏​បាន​ទទូច​ដល់​ភាគី​កម្ពុជា​ទៀត​ថា នៅ​ក្នុង​កិច្ច​ប្រជុំ​នៅ​ឥណ្ឌូណេស៊ី ពេល​ខាង​មុខ​នោះ គឺ​ភាគី​ទាំង​ពីរ​គួរ​តែ​លើក​យក​គណៈកម្មការ​ចម្រុះ​ខណ្ឌ​សីមា និង​បោះ​បង្គោល​ព្រំដែន (JBC) មក​ធ្វើ​ការ​ប្រជុំ​មុន​គណៈកម្មការ​ព្រំដែន​ទូទៅ (GBC) ពី​ព្រោះ​ថា របៀប​វារៈ​ប្រជុំ​គណៈកម្មការ​ព្រំដែន​ទូទៅ​នេះ ភាគី​ទំាង​ពីរ​ធ្លាប់​បាន​ពិភាក្សា​គ្នា​រួច​ហើយ វា​គ្មាន​បញ្ហា​អ្វី​ទេ។

ទាក់​ទង​ទៅ​នឹង​ករណី​នេះ លោក ផៃ ស៊ីផាន ក៏​បាន​បដិសេធ​ថា ការ​ប្រជុំ​នោះ​មិន​អាច​ធ្វើ​ការ​ប្រជុំ​គណៈកម្មការ​ណា​មុន ឬ​ក្រោយ​ទេ គឺ​ត្រូវ​ធ្វើ​ឡើង​ទាំង​ពីរ។

មន្ត្រី​នាំ​ពាក្យ​ក្រសួង​ការ​បរទេស​ខ្មែរ លោក កុយ គួង បាន​ពន្យល់​ថា ទោះ​ជា​យ៉ាង​ណា​មិន​អាច​ធ្វើ​អ្វី​ក្រៅ​ពី​ការ​ជួប​នៅ​ឥណ្ឌូណេស៊ី​នោះ​ទេ ព្រោះ​ថា​កន្លង​មក កម្ពុជា និង​ថៃ​តែង​តែ​បាន​ជួប​ប្រជុំ​ទ្វេ​ភាគី​ជា​ច្រើន​លើក តែ​មិន​គោរព​កិច្ច​សន្យា​របស់​ខ្លួន​ទេ បញ្ហា​ដែល​សំខាន់ កម្ពុជា​រង់ចាំ​តែ​ការ​សម្រេច​របស់​ប្រធាន​អាស៊ាន​ទេ។

កាល​ពី​ព្រឹក​ថ្ងៃ​ទី​២៨ មីនា លោក​នាយក​រដ្ឋ​មន្ត្រី ហ៊ុន សែន បាន​ព្រមាន​មេ​ដឹក​នាំ​ថៃ​ថា កម្ពុជា​នឹង​លើក​យក​បញ្ហា​ប្រជុំ​គណៈកម្មការ​ព្រំដែន​ទូទៅ (GBC) និង​គណៈកម្មការ​ចម្រុះ​ខណ្ឌ​សីមា និង​បោះ​បង្គោល​ព្រំដែន (JBC) នៅ​ក្នុង​កិច្ច​ប្រជុំ​កំពូល​អាស៊ាន ប្រសិន​បើ​ឥណ្ឌូណេស៊ី​ដោះ​ស្រាយ​បញ្ហា​នេះ​មិន​បាន​ទេ​នោះ។

កិច្ច​ប្រជុំ​រវាង​កម្ពុជា-ថៃ នេះ ត្រូវ​បាន​គេ​គ្រោង​ធ្វើ​ឡើង​នៅ​ថ្ងៃ​ទី​២៤-២៥ មីនា នេះ ប៉ុន្តែ​កាល​ពី​ថ្ងៃ​ទី​១៦ មីនា ក្រសួង​ការ​បរទេស​ឥណ្ឌូណេស៊ី​បាន​ជួន​ដំណឹង​ដល់​ក្រសួង​ការ​បរទេស​កម្ពុជា លើក​ពេល​ប្រជុំ​នេះ ទៅ​ធ្វើ​នៅ​ថ្ងៃ​ទី៧-៨ ខែ​មេសា ឆ្នាំ​២០១១ វិញ៕