សង្គមស៊ីវិលមកពី៧០ប្រទេសចូលរួមសន្និបាតពិភពលោកនៅសៀមរាប
2011.07.02
មានអង្គការ និងសមាគមមិនមែនរដ្ឋាភិបាលមកពីបណ្ដាប្រទេសកំពុងអភិវឌ្ឍន៍មួយចំនួនបង្ហាញថា ពួកគេកំពុងព្រួយបារម្ភអំពីរដ្ឋាភិបាល ដែលបានកំណត់ព្រំដែនសេរីភាពនៃការងាររបស់ពួកគេនោះ។
ចំណែកនៅក្នុងប្រទេសកម្ពុជា ក៏កំពុងសម្ដែងការព្រួយបារម្ភបញ្ហាដូចគ្នានេះ នៅស្របពេលដែលរាជរដ្ឋាភិបាលគ្រោងរៀបចំសេចក្ដីព្រាងច្បាប់ស្ដីពីការគ្រប់គ្រងអង្គការមិនមែនរដ្ឋាភិបាល និងសមាគមនានា ហើយការព្រួយបារម្ភទាំងនោះ ត្រូវបានគេដាក់បញ្ចូលទៅក្នុងវេទិកាអន្តរជាតិ ដើម្បីស្វែងរកមធ្យោបាយរួមគ្នាកាលពីពេលថ្មីៗ។
លោក ឈិត សំអាត នាយកប្រតិបត្តិរបស់វេទិកាអង្គការមិនមែនរដ្ឋាភិបាលស្តីពីកម្ពុជា ហៅជាភាសាអង់គ្លេសថា The NGO Forum on Cambodia ដែលជាអ្នកចូលរួមក្នុងសន្និបាតពិភពលោកលើកទី២នោះដែរ មានប្រសាសន៍កាលពីព្រឹកថ្ងៃព្រហស្បតិ៍ ទី៣០ ខែមិថុនាថា សម្រាប់សង្គមស៊ីវិលនៅក្នុងប្រទេសកម្ពុជា កំពុងមានការព្រួយបារម្ភអំពីលំហដើម្បីធ្វើប្រតិបត្តិការរបស់ខ្លួនដោយសេរី នៅពេលដែលរដ្ឋាភិបាលគ្រោងនឹងធ្វើច្បាប់ដើម្បីគ្រប់គ្រងអង្គការ និងសមាគមមិនមែនរដ្ឋាភិបាលនៅពេលខាងមុខនេះ ដោយគេខ្លាចតែច្បាប់នោះមិនល្អ ហើយពេលចេញទៅប្រើប្រាស់វាអាចកម្រិតនូវសិទ្ធិសេរីភាពក្នុងការប្រតិបត្តិការរបស់សង្គមស៊ីវិល។
លោក ឈិត សំអាត បន្តថា ៖ «យើងធ្វើរួមគ្នាដើម្បីធានានូវលំហហ្នឹង ហើយក៏យើងនឹងយកក្របខ័ណ្ឌដែលយើងពិភាក្សារួមគ្នាដែលបានពីវេទិកានៅសៀមរាបហ្នឹង និងយកទៅប្រជុំនៅមូសាន (ប្រទេសកូរ៉េ) នៅចុងឆ្នាំ២០១១នេះ ដើម្បីទាមទារឱ្យរដ្ឋាភិបាលទាំងអស់នៅលើពិភពលោកហ្នឹង គឺថា គិតគូរពិចារណាទៅលើលំហ ឬក៏សេរីភាពសម្រាប់អង្គការមិនមែនរដ្ឋាភិបាល សង្គមស៊ីវិល ឬក៏សមាគមធ្វើការដោយសេរីបន្តទៅទៀត»។
សង្គមស៊ីវិលនៅក្នុងប្រទេសកម្ពុជា បានធ្វើការអំពាវនាវដល់រដ្ឋាភិបាលឱ្យធ្វើច្បាប់ស្តីពីអង្គការ និងសមាគមមិនមែនរដ្ឋាភិបាលនោះយ៉ាងណាដើម្បីរក្សានូវសេរីភាព និងកិច្ចសហប្រតិបត្តិការរបស់ពួកគេឱ្យមានសេរីភាពទូលំទូលាយ ដូចដែលពួកគេកំពុងមាននៅពេលបច្ចុប្បន្ននេះ។
លោកស្រី ខារ៉ូលីន ម៉ាកខូសលែនដ៍ (Caroline Mc Causland) ជាសមាជិកគណៈកម្មាធិការប្រតិបត្តិរបស់គណៈកម្មការសហប្រតិបត្តិការដើម្បីកម្ពុជា (CCC) មានប្រសាសន៍ថា សង្គមស៊ីវិលគោរពរដ្ឋាភិបាលកម្ពុជា ក្នុងការរៀបចំច្បាប់ដើម្បីធ្វើការកំណត់ទៅលើបញ្ហាផ្សេងៗ ប៉ុន្តែចំពោះការគ្រោងរៀបចំច្បាប់ស្តីពីអង្គការមិនមែនរដ្ឋាភិបាល និងសមាគមនៅកម្ពុជានោះ យើងពិតជាចង់ឱ្យរដ្ឋាភិបាលត្រូវតែគោរពនូវសេរីភាពរបស់សមាគមមិនមែនរដ្ឋាភិបាល បន្ទាប់ពីធ្វើការចុះបញ្ជីរួចរាល់ហើយនោះ។
លោកស្រីបន្ថែមថា ៖ «ប្រទេសជាច្រើនគេមានច្បាប់ស្ដីពីអង្គការក្រៅរដ្ឋាភិបាល ប៉ុន្តែច្បាប់នោះបានហុចផលប្រយោជន៍ទៅឱ្យក្រុមអង្គការក្រៅរដ្ឋាភិបាល ដូចជាឱ្យរួចពន្ធជាដើម ហើយអង្គការក្រៅរដ្ឋាភិបាលនឹងទទួលបានផលប្រយោជន៍សមរម្យ។ ដូច្នេះនៅក្នុងប្រទេសកម្ពុជាយើងស្នើសុំឱ្យមានលក្ខណៈស្ម័គ្រចិត្ត ប្រសិនបើអង្គការណាមួយចង់ចុះឈ្មោះនៅក្នុងបញ្ជីដែលអាចធ្វើទៅបាន។ យើងដឹងហើយថា កម្ពុជាមានច្បាប់ជាច្រើនហើយ ដែលអាចឱ្យសង្គមស៊ីវិលគោរពទៅតាមគោលការណ៍ច្បាប់ក្នុងកិច្ចប្រតិបត្តិការ ដូច្នេះយើងមិនចង់បានច្បាប់ស្ដីពីអង្គការក្រៅរដ្ឋាភិបាល និងសមាគមទៀតទេ»។
ក្រុមអង្គការមិនមែនរដ្ឋាភិបាលដែលមកពីប្រទេសជាច្រើនបានសន្យាថា នឹងជួយសង្គមស៊ីវិលនៅក្នុងប្រទេសកម្ពុជា ក្នុងការតស៊ូមតិចំពោះការគ្រោងរៀបចំច្បាប់ដែលគ្រប់គ្រងអង្គការក្រៅរដ្ឋាភិបាល និងសមាគមនៅកម្ពុជានោះ។
លោកស្រី អេមីលី ដេទូរ៉ាកា(Emele Duituraga) មកពីប្រទេសហ្វីជី (Fiji) មានប្រសាសន៍ថា យើងនឹងឈរទាំងអស់គ្នាជាមួយអង្គការមិនមែនរដ្ឋាភិបាល និងសង្គមស៊ីវិល នៅប្រទេសកម្ពុជា ដើម្បីទទូចឱ្យរដ្ឋាភិបាលប្រទេសនេះ ធ្វើការពិចារណាដោយប្រុងប្រយ័ត្នចំពោះគម្រោងធ្វើច្បាប់ស្ដីពីអង្គការមិនមែនរដ្ឋាភិបាលនោះ។ ពេលបច្ចុប្បន្នសេចក្ដីព្រាងច្បាប់នេះ ត្រូវបានគេបញ្ជូនទៅដល់ទីស្ដីការគណៈរដ្ឋមន្ត្រីហើយ ដើម្បីធ្វើការពិភាក្សាសម្រេច៕
រឿងដែលគេអានច្រើនបំផុត
RFA
- ធនាគារABA មិនព្រមបើកប្រាក់ជាង១ម៉ឺន ៥ពាន់ដុល្លារ ដែលឧបត្ថម្ភដល់បុគ្គលិកណាហ្គាវើលដ៍
- គណបក្សភ្លើងទៀនស្វាគមន៍វត្តមានលោក រ៉ុង ឈុន អតីតមន្ត្រីជាន់ខ្ពស់ គ.ជ.ប ដែលហក់មកចូលរួមជីវភាពជាមួយគណបក្សនេះ
- ថៃយល់ព្រមឱ្យកម្ពុជាប្រើពាក្យ «គុនខ្មែរ» ក្នុងព្រឹត្តិការណ៍ស៊ីហ្គេម២០២៣
- «ករណីឧកញ៉ា សៀង ចាន់ហេង ប្រគល់ដីឲ្យប្អូនស្រីនាយករដ្ឋមន្ត្រីបង្ហាញថា អ្នកធំតែងឈ្នះ»
- អាមេរិក ផ្តល់ពានរង្វាន់អ្នកការពារសិទ្ធិមនុស្សសកលប្រចាំឆ្នាំឲ្យកញ្ញា ឈឹម ស៊ីថរ
រឿងដែលគេអានច្រើនបំផុត
ព័ត៌មានថ្មីៗ
- អ្នកវិភាគថា លោក ហ៊ុន ម៉ាណែត បកស្រាយបំភ្លៃច្បាប់បោះឆ្នោតជ្រើសតាំងតំណាងរាស្ត្រ
- លោក ហ៊ុន សែន បន្តប្រកាសថា នឹងការពារមិនឱ្យមានរដ្ឋប្រហារ ដើម្បីអភិវឌ្ឍប្រទេសឱ្យរីកចំរើន
- អ្នកឃ្លាំមើលថា គណបក្សប្រជាជនកម្ពុជាពុំបានប្រកាន់ជំហរគោលនយោបាយបរទេសឯករាជ្យ
- ប្រតិភូខ្មែរក្រោមប្រាប់សន្និសិទអន្តរសាសនាស្តីពីការរំលោភសិទ្ធិសាសនាខ្មែរក្រោម
- គណបក្សភ្លើងទៀនចាប់ផ្ដើមយុទ្ធនាការពង្រឹងសមាជិកបក្សតាមមូលដ្ឋាន ដើម្បីទទួលបានការគាំទ្រពីប្រជាពលរដ្ឋ