សមត្ថកិច្ចប៉ូលិស និងអង្គភាពកងទ័ពបានថ្លែងថា ពួកគេកំពុងធ្វើកិច្ចសហប្រតិបត្តិការតាមរកមុខសញ្ញាក្រុមចោរប្លន់ប្រដាប់អាវុធចំនួន ៥នាក់ ដែលបានក្លែងបន្លំឯកសណ្ឋានកងទ័ពធ្វើសកម្មភាពប្លន់ទ្រព្យសម្បត្តិអ្នកភូមិនៅស្រុកសំឡូត ខេត្តបាត់ដំបងកាលពីពេលថ្មីៗនេះ។
លោក ជឹម ភើយ មេបញ្ជាការកងពលតូចថ្មើជើងលេខ ៥២ប្រចាំទិសសំឡូតប៉ៃលិនបានថ្លែងកាលពីថ្ងៃសុក្រទី ១៨ខែធ្នូថា អង្គភាពទ័ពកំពុងសហការជាមួយកម្លាំងប៉ូលិស ប៉េអឹមស្រុកសំឡូត ដើម្បីស្រាវជ្រាវរកមុខសញ្ញាក្រុមចោរប្លន់ដែលធ្វើសកម្មភាពប្លន់ប្រើឯកសណ្ឋានកងទ័ព។
លោក ជឹម ភើយ មានប្រសាសន៍ថា ៖ « រឿងឯកសណ្ឋានហ្នឹងយើងហាមមិនបានទេ ឥឡូវបើនិយាយពីប៉ារ៉ាពេញវាល។ កុំនិយាយតែកងទ័ព សូម្បីតែកម្មករដឹកពោតដឹកសណ្តែកវាសុទ្ឋតែទាហានអស់ហើយ អាហ្នឹងវាគួរតែយើងមានវិធានការទប់ស្កាត់ខោអាវបានវាត្រូវ»។
កាលពីវេលាម៉ោង ៧, ៣០នាទីល្ងាចថ្ងៃពុធថ្មីៗនេះមានជនមិនស្គាល់មុខ ៥នាក់មានឯកសណ្ឋានកងទ័ពមានអាវុធអាកាបត់ ៤ដើមបានចូលទៅផ្ទះជនរងគ្រោះឈ្មោះ ឈូក ម៉េង នៅភូមិស្រែស្តៅ ស្រុកសំឡូតភ្ជុង និងចាប់មនុស្ស ៨នាក់ចងស្លាបសេកប្លន់យកលុយអស់ ២៥លានរៀល មាស២ដំឡឹងកន្លះ និងទូរស័ព្ទដៃ ៤គ្រឿង។
លោក ឈូក ម៉េង ជាជនរងគ្រោះក្នុងអំពើប្លន់បានថ្លែងថា ចោរប្លន់ឯកសណ្ឋានកងទ័ពទាំង ៥នាក់មុនដំបូងបានចូលទៅគំរាមថា មេបញ្ជាការពួកគេបញ្ជាឲ្យមកឆែកឆេររកកាំភ្លើងអាកា ១ដើម និងកាំភ្លើងខ្លី ១ដើមហើយប្លន់តែម្តង។
លោក លី ប៊ួយ អធិការនគរបាលស្រុកសំឡូតថ្លែងថា ប៉ូលិសប៉េអឹមកំពុងធ្វើការជាមួយកងយោធាដើម្បីរកមុខសញ្ញារបស់ក្រុមចោរប្លន់នោះ ៖ «យើងកំពុងដាក់កម្លាំងស្រាវជ្រាវបន្តទាក់ទងជាមួយខាងកងពល ខាងវរៈស្រាវជ្រាវកម្លាំងដែលបាត់មុខ វាមានពន្លឺខ្លះៗដែរ»។
លោក ស ថេត ស្នងការនគរបាលខេត្តបាត់ដំបងមិនទាន់ធ្វើការសន្និដ្ឋានជុំវិញសមាសភាពក្រុមចោរប្លន់ខាងលើនេះទេ។ ប៉ុន្តែលោកបានបញ្ជាក់ថា បានដាក់បញ្ជាកម្លាំងសមត្ថកិច្ចលោកធ្វើការស្រាវជ្រាវបន្ត។
លោកស្នងការបន្តថា ៖ «មកដល់ពេលនេះខ្ញុំបានចាត់កម្លាំងឲ្យចុះស្រាវជ្រាវយើងមិនដឹងថា គាត់ជាយោធាពិតប្រាកដយើងម៉េចសន្និដ្ឋានថា អញ្ចឹងគ្រាន់ថា គេឃើញសកម្មភាពគាត់ពាក់អាវជាប៉ារ៉ាអញ្ចឹងចាំមើលខ្ញុំឲ្យគេស្រាវជ្រាវទៅស្រុកថា តើក្រុមនេះជាក្រុមមួយណាពិតប្រាកដ»។
ជនរងគ្រោះ និងអាជ្ញាធរមូលដ្ឋានបានសន្និដ្ឋានថា ក្រុមចោរប្លន់ទាំង ៥នាក់គឺចេញមកពីជួរកងទ័ព ប៉ុន្តែខាងកងទ័ពវិញបានច្រានចោលការចោទប្រកាន់នេះ យ៉ាងណាក៏ដោយអ្នកភូមិមួយចំនួន នៅស្រុកសំឡូតបានថ្លែងថា អំពើប្លន់ប្រដាប់អាវុធដែលមានរូបភាពជាឯកសណ្ឋានកងទ័ពបានធ្វើឲ្យអ្នកស្រុកមានការព្រួយបារម្ភ៕