ក្រុមការងារ ១០០រាត្រី ដែលបន្តបេសកកម្មពីលោក បណ្ឌិត កែម ឡី ត្រៀមផ្សាយរបាយការណ៍រាត្រីទី៤៤ ស្ដីពីមន្ត្រី ៤ប្រភេទ ដែលជាឫសគល់ ធ្វើឱ្យជាតិមហន្តរាយ និងប៉ះពាល់ដល់គោលនយោបាយអភិវឌ្ឍន៍ប្រទេសជាតិរបស់របបក្រុងភ្នំពេញ។ ការលាតត្រដាងរបាយការណ៍នេះ ក្រោយពីពួកគេបានស្រាវជ្រាវប្រើរយៈពេលជាច្រើនខែ ដោយបានចុះមូលដ្ឋានប្រមូលព័ត៌មាន ពីមន្ត្រីមូលដ្ឋាន និងអាជ្ញាធរជាតិ។
របាយការណ៍កម្រាស់៥ទំព័រ ដោយគ្រោងចេញផ្សាយនាពេលឆាប់ៗនេះ របស់ក្រុមយុវជន ១០០រាត្រី ក្នុងបំណង លុបបំបាត់មន្ត្រីទាំង៤ប្រភេទនេះ ដែលពួកគេរកឃើញថា ជាឧបសគ្គរាំងស្ទះដល់ការអនុវត្តគោលនយោបាយជាតិដែលមាននៅលើក្រដាស និងធ្វើឱ្យកើតមានវិបត្តិសង្គម នយោបាយ សេដ្ឋកិច្ចធ្លាក់ចុះ និងបាត់បង់ធនធានធម្មជាតិជាដើម។
សមាជិកក្រុមការងារ ១០០រាត្រី និងជាប្រធានសមាគមសម្ព័ន្ធនិស្សិតបញ្ញវន្តខ្មែរ លោក មួង សូនី ឱ្យដឹងនៅថ្ងៃទី២១ មីនា ថា វិធីសាស្ត្រនៃការស៊ើបអង្កេតនេះ ពួកគេបានចុះមូលដ្ឋានតាមភូមិ-ឃុំ/សង្កាត់ រហូតដល់ថ្នាក់ជាតិ ដោយត្រូវចំណាយពេល ១២ខែ ដើម្បីតាមដានពីប្រសិទ្ធភាពការងាររបស់មន្ត្រីពាក់ព័ន្ធនៃស្ថាប័នរដ្ឋ សមត្ថកិច្ច និងប្រព័ន្ធយុត្តិធម៌។ លោកថា របាយការណ៍នេះ ពួកលោកគ្រោងនឹងផ្ញើជូនប្រមុខដឹកនាំរដ្ឋ និងស្ថាប័នពាក់ព័ន្ធត្រូវកែលម្អឡើងវិញ ក្នុងទិសដៅជួយសង្គមជាតិ ពលរដ្ឋ និងគណបក្សប្រជាជនកម្ពុជាផងដែរ៖ «យើងឃើញថា មន្ត្រី៤ប្រភេទនេះ គឺបានបង្កបញ្ហាធ្ងន់ធ្ងរណាស់ទៅលើអធិបតេយ្យភាពរបស់ប្រទេស ដែលនាំឱ្យប្រទេសកម្ពុជាយើង មិនមានការអភិវឌ្ឍន៍ជឿនលឿនទេ ហើយកម្ពុជានឹងបាត់បង់លុយជាច្រើនទៅលើមន្ត្រីទាំងនេះ ចំណាយលុយក្រៅផ្លូវការ អស់រាប់រយលានដុល្លារក្នុងមួយឆ្នាំៗ ហើយពលរដ្ឋខ្មែររងភាពអយុត្តិធម៌ដោយសារមន្ត្រីទាំង៤ប្រភេទនេះ»។
ខ្លឹមសារនៃរបាយការណ៍បង្ហាញថា រដ្ឋាភិបាលចាំបាច់ត្រូវលប់បំបាត់ និងកែលម្អមន្ត្រី៤ប្រភេទនេះរួមមាន មន្ត្រីមិនធ្វើការងារ ជាមន្ត្រីខ្មោច ចាំតែបើកប្រាក់ខែ សរសេររបាយការណ៍កុហកថ្នាក់លើ និងបង់លុយជួយគណបក្សប្រជាជនកម្ពុជា។ ទី២ មន្ត្រីពុករលួយ លួចលុយគម្រោងអភិវឌ្ឍន៍របស់ជាតិ ទារលុយថ្លៃសេវាសាធារណៈពីប្រជាជន ឃុបឃិតជាមួយឈ្មួញទុច្ចរិត បង្កើតឱ្យមានអយុត្តិធម៌សង្គមជាដើម។ ទី៣ មន្ត្រីមិនចូលនិវត្តន៍ និងចែកដំណែងឱ្យកូនដោយមិនផ្តល់ឱកាសឱ្យក្មេងជំនាន់ក្រោយមានសមត្ថភាពធ្វើការងាររដ្ឋ។ ទី៤មន្ត្រីមិនចេះអ្វីទាល់តែសោះ គឺគ្មានសមត្ថភាពឬមិនចេះអក្សរ គ្មានជំនាញ ធ្វើការងារតាមគេបញ្ជា។
ក្រោយពីការចុះសិក្សាស្រាវជ្រាវ របស់ក្រុមការងារ១០០រាត្រីតាមឃុំ/សង្កាត់ និងការជួបពិភាក្សាជាមួយមន្ត្រីរាជការមួយចំនួន រកឃើញថា មន្ត្រីទាំង៤ប្រភេទនេះ មានប្រមាណ៧០ភាគរយ។
ឆ្លើយតបការលើកឡើងនេះ អ្នកនាំពាក្យគណបក្សប្រជាជនកម្ពុជា លោក សុខ ឥសាន មានប្រសាសន៍ថា ខ្លឹមសារនៃរបាយការណ៍នេះ រដ្ឋាភិបាលជ្រាបជាយូរមកហើយ និងកំពុងដោះស្រាយតាមនីតិវិធី ដោយមានការអប់រំ ណែនាំផ្អែកតាមបទបញ្ជាផ្ទៃក្នុង ការដាស់តឿន និងការអនុវត្តច្បាប់ជាដើម។ លោកថា ថ្មីៗនេះប្រមុខរដ្ឋាភិបាលបានវះកាត់មន្ត្រីមួយចំនួនដែរ និងបានបង្កើតស្ថាប័នច្រកចេញចូលតែមួយ ដើម្បីលុបបំបាត់អំពើពុករលួយ និងការសូកប៉ាន់ជាដើម។ លោកបញ្ជាក់ថា ក្រុមយុវជនដែលចុះសិក្សាស្រាវជ្រាវនេះគឺជារឿងចាស់ ដែលរដ្ឋាភិបាលកំពុងដោះស្រាយ តែការដោះស្រាយនោះទៀតសោតមិនអាចធ្វើបានភ្លាមៗនោះទេ៖ «យើងធ្វើតាមនីតិវិធីរបស់យើង មានការអប់រំផង ការចាប់បង្ខំដើម្បីឱ្យអនុវត្តតាមបទបញ្ជាផ្ទៃក្នុងក៏ដូចជាច្បាប់ផ្សេងៗផងមិនអាចថា គ្នាធ្វើខុសហើយដេញចោលភ្លាមៗទេ។ តែថ្មីៗនេះរដ្ឋាភិបាលបានវះកាត់ មួយចំនួនហើយ។ ខ្ញុំយល់ថា ក្មួយៗសិក្សាស្រាវជ្រាវនេះសុទ្ធជារឿងចាស់ទេ»។
មន្ត្រីនាំពាក្យនៃសមាគមអាដហុក (Adhoc) លោក ស៊ឹង សែនករុណា យល់ថា ខ្លឹមសាររបាយការណ៍នេះ គឺជាព័ត៌មានយ៉ាងសំខាន់ដាក់ជូនប្រមុខដឹកនាំរដ្ឋ ថា តើចំណុចអវិជ្ជមានដែលបានរកឃើញទាំងនោះជារឿងពិត ឬយ៉ាងណា? ក៏ប៉ុន្តែប្រសិនបើជាការពិត តើរដ្ឋាភិបាលត្រូវរកវិធីបែបណាដើម្បីកែទម្រង់មន្ត្រីអសកម្មទាំងនោះ។ លោកថា សកម្មភាពរបស់ក្រុមយុវជនបានរួមចំណែកជួយដល់សង្គមជាតិ ក្នុងនាមជាពលរដ្ឋ ដែលច្បាប់អនុញ្ញាត និងជាគន្លឹះសំខាន់ក្នុងការដោះស្រាយវិបត្តិសង្គមមួយផ្នែក ប្រសិនបើរបបក្រុងភ្នំពេញយកមកពិចារណា និងអនុវត្ត៖ «ជាការរួមចំណែកសំខាន់មួយ ផ្តល់ព័ត៌មានដល់រដ្ឋាភិបាលជាពន្លឺមួយក្នុងការធ្វើការកែទម្រង់ការដឹកនាំ និងការគ្រប់គ្រងមន្ត្រីទាំងអស់ហ្នឹង ដើម្បីតម្រង់ទិញកុំឱ្យមានការប្រព្រឹត្តទង្វើបែបហ្នឹងទៀត។ ត្រូវដាក់វិន័យរដ្ឋបាល និងច្បាប់បើរកឃើញថា មន្ត្រីទាំងអស់នោះ មិនបានប្រព្រឹត្តតាមតួនាទីខ្លួន»។
ខ្លឹមសារនៃរបាយការណ៍របស់ក្រុមការងារ ១០០រាត្រី បន្ថែមថា ប្រសិនបើពុំមានវិធានការលុបបំបាត់ឬកំណែទម្រង់មន្ត្រីទាំង៤ប្រភេទនោះទេ នឹងប៉ះពាល់ធំធេងដល់ការអភិវឌ្ឍសង្គមជាតិ ធនធានធម្មជាតិ និងបាត់បង់ថវិកាជាតិ បង្កើតឱ្យមានអយុត្តិធម៌សង្គម ធ្វើបាបរាស្ត្រទន់ខ្សោយ រាំងស្ទះមិនផ្ដល់ឱកាសឱ្យអ្នកមានចំណេះដឹងពិតប្រាកដបម្រើការងាររដ្ឋ ហើយលើសពីនេះទៀត គឺប៉ះពាល់អវិជ្ជមានខ្លាំងដល់មុខមាត់គណបក្សកាន់អំណាចខ្លួនឯងតែម្ដង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។