របាយការណ៍​ក្រុម​ការងារ​១០០​រាត្រី៖ តុលាការ​ជា​ឧបករណ៍​បម្រើ​មហិច្ឆតា​នយោបាយ​បក្ស​កាន់​អំណាច

ដោយ សន ចាន់រដ្ឋា
2019-05-10
អ៊ីម៉ែល
មតិ
Share
បោះពុម្ព
ប្រធាន​សមាគម​សម្ព័ន្ធ​និស្សិត​បញ្ញវន្ត​ខ្មែរ និង​ជា​សមាជិក​ក្រុម​ចងក្រង​សៀវភៅ​ស្ដីពី​ទស្សនៈ​បណ្ឌិត កែម ឡី លោក មួង សូនី ថ្លែង​ក្នុង​កម្មវិធី​វេទិកា​អ្នក​ស្ដាប់​វិទ្យុ​អាស៊ី​សេរី កាល​ពី​ថ្ងៃ​ទី​១៥ ខែ​សីហា ឆ្នាំ​២០១៦។
ប្រធាន​សមាគម​សម្ព័ន្ធ​និស្សិត​បញ្ញវន្ត​ខ្មែរ និង​ជា​សមាជិក​ក្រុម​ចងក្រង​សៀវភៅ​ស្ដីពី​ទស្សនៈ​បណ្ឌិត កែម ឡី លោក មួង សូនី ថ្លែង​ក្នុង​កម្មវិធី​វេទិកា​អ្នក​ស្ដាប់​វិទ្យុ​អាស៊ី​សេរី កាល​ពី​ថ្ងៃ​ទី​១៥ ខែ​សីហា ឆ្នាំ​២០១៦។
RFA

ក្រុម​ការងារ ១០០​រាត្រី ដែល​បន្ត​បេសកកម្ម​ពី​លោក​បណ្ឌិត កែម ឡី បាន​បង្ហាញ​របាយការណ៍​ស្រាវជ្រាវ​ទី ៤៥ ស្ដីពី ប្រព័ន្ធ​តុលាការ​គ្រប់គ្រង​ដោយ​គណបក្ស​ប្រជាជន​កម្ពុជា​។ របាយការណ៍ ៤​ទំព័រ បាន​លាតត្រដាង ពី​គណបក្ស​កាន់អំណាច ប្រើ​ប្រព័ន្ធ​តុលាការ ជា​ឧបករណ៍​បម្រើ​មហិច្ឆតា​នយោបាយ ដើម្បី​ក្រាញ​អំណាច។

ការ​លាតត្រដាង​របាយ​ការណ៍​ថ្មី​នេះ ក្រោយពី ក្រុមការងារ ១០០​រាត្រី បាន​ចុះ​សិក្សា​ស្រាវជ្រាវ​ជិត ១ ឆ្នាំ ដោយ​បាន​ប្រ​មួល​ព័ត៌មាន ពី​ក្រុម​មេធាវី ក្រុម​អង្គការ​ការពារ​សិទ្ធិមនុស្ស និង ពលរដ្ឋ​រងគ្រោះ ដោយសារ​ប្រព័ន្ធ​យុត្តិធម៌​ជាដើម​។ ពួកគេ​សង្កេត​ឃើញ​ថា ភាព​អយុត្តិធម៌​នៅ​កម្ពុជា បាន​កើត​គ្រប់​វិស័យ​រួមមាន នយោបាយ និង សេដ្ឋកិច្ច​ជាដើម​។ ពលរដ្ឋ​ក្រីក្រ​មិន​អាច​ឈ្នះ​អ្នក​មាន​អំណាច អ្នកមាន​ធនធាន​ច្រើន និង​មន្ត្រី​គ្រាក់ៗ​របស់​រដ្ឋាភិបាល​។​

ខ្លឹមសារ​របាយការណ៍​នោះ​បង្ហាញ​ថា គណបក្ស​ប្រជាជន​កម្ពុជា​បាន​គ្រប់គ្រង​ទៅ​លើ​ស្ថាប័ន​កំពូលៗ​នៃ​អំណាចតុលាការ តាមរយៈ​ការ​ដាក់បញ្ចូល​សមាជិក​គណៈកម្មការ​កណ្ដាល និង​អចិន្ត្រៃយ៍ ក្នុង​គណបក្ស​ខ្លួន​ចូល​គ្រប់គ្រង​អំណាចតុលាការ ដូចជា ក្រុមប្រឹក្សា​នៃ​អង្គចៅក្រម តុលាការ​កំពូល សាលាឧទ្ធរណ៍ មាន​១០​រូប។

ពួកគេ​រកឃើញ​ថា ចំណុច​ស្នូល សំខាន់ ៣ ដែល​គណបក្ស​កាន់អំណាច កំពុង​អនុវត្ត​រួមមាន ទី​១ ការអនុញ្ញាត​ឱ្យ​អំណាច​នីតិប្រតិបត្តិ គឺ​ក្រសួងយុត្តិធម៌ លូក​ជ្រៅ ក្នុង​កិច្ចការ​របស់​តុលាការ និង​អយ្យការ​គ្រប់​ជាន់ថ្នាក់។ ចំណុច​ទី ២ ចៅក្រម និង​ព្រះ​រាជអាជ្ញា​កាត់​ក្តី ខ្លាច​អំណាច​អ្នកធំ ឧកញ្ញ៉ា និង​អំពើពុករលួយ បាន​ក្លាយ​ជា​ជំងឺ​ចាក់​ឫស​ណែន ក្នុង​សង្គម​ច្រើន​ឆ្នាំ​មក​ហើយ​។ ទី​៣ ប្រព័ន្ធ​តុលាការ ពុករលួយ និង​កាត់​ក្ដី​លម្អៀង ជាហេតុ​ធ្វើ​ឱ្យ​ប៉ះពាល់​ប្រព័ន្ធ​សេដ្ឋកិច្ច​ប្រជាជន ជីវភាព​ប្រជាជន​ក្រីក្រ និង​សង្គមជាតិ​ធំធេង។

សមាជិក​ក្រុមការងារ ១០០​រាត្រី និង​ជា​ប្រធាន​សមាគម​សម្ព័ន្ធ​និស្សិត​បញ្ញវន្ត​ខ្មែរ លោក មួង សូនី រៀបរាប់​ថា ពួកគេ​បាន​ស្រង់​ព័ត៌មាន ពី​គ្រប់​មជ្ឈដ្ឋាន ដើម្បី​ស្រាវជ្រាវ និង​វាយតម្លៃ​រួម ទាក់ទិន​ប្រព័ន្ធ​យុត្តិធម៌ និង​ការអនុវត្ត​ជាក់ស្ដែង​របស់​តុលាការ និង​អយ្យការ​។ លោក​ថា បើ​ទោះ​បី​រដ្ឋធម្មនុញ្ញ​បាន​ចែង​ពី​អំណាចតុលាការ ជា​អំណាច​ឯករាជ្យ ដាច់​ចេញ​ពី​អំណាចនីតិប្រតិបត្តិ និង​អំណាច​នីតិ​បញ្ញត្តិ​ក្តី តែ​អនុវត្ត​ជាក់ស្ដែង​មិន​ដូច្នេះ​ទេ​។ ចៅក្រម និង​ព្រះរាជអាជ្ញា នៅតែ​ឋិត​ក្រោម​សម្ពាធ​គណបក្ស​កាន់អំណាច និង​មន្ត្រី​គ្រាក់ៗ​ក្នុង​របប​ក្រុងភ្នំពេញ ធ្វើ​ឱ្យ​ប៉ះពាល់​សិទ្ធិ​សេរីភាព​ប្រជាជន​។ លោក​ថា ក្រសួងយុត្តិធម៌​ដែល​ជា​សេនាធិការ​របស់​រដ្ឋាភិបាល បាន​គ្រប់​ដណ្ដប់​លើ​ស្ថាប័ន​តុលាការ​ទាំងមូល និង​ដាក់​សម្ពាធ​លើ​សេចក្ដី​សម្រេច​របស់​តុលាការ ប្រសិនបើ​រឿង​ក្តី​នោះ​ពាក់ព័ន្ធ​រឿង​នយោបាយ​៖ «រដ្ឋធម្មនុញ្ញ​យើង​បាន​ផ្ដល់​ឱ្យ​ប្រទេស​កម្ពុជា មានការ​បែងចែក​អំណាច​ដាច់​ពី​គ្នា ខ្ញុំ​គិត​ថា គណបក្ស​ប្រជាជន គួរ​តែ​ធ្វើការ​អនុវត្ត​ឱ្យ​បាន​នូវ​ច្បាប់រដ្ឋធម្មនុញ្ញ​យើង​។ ឃើញ​ហើយ​ថា ការ​ធ្វេស​ប្រហែស និង​ការ​មិនបាន​យក​ចិត្តបាន​យកចិត្ត​ដាក់ និង​គណបក្ស​ប្រជាជន​ហ្នឹង គឺ​មានការ​បណ្ដែតបណ្ដោយ​ឱ្យ​មាន​អំពើ​យុត្តិធម៌​ជាច្រើន ក្នុង​ការ​ស្ថាប័ន តុលាការ យើង​ឃើញ​ថា មាន​ប្រទេស​ជាច្រើន ក្នុង​ពិភពលោក មាន​ប្រព័ន្ធ​តុលាការ ស្រដៀង​យើង​ដែរ តែ​គេ​មាន​យុត្តិធម៌​ជាង​យើង»

ខ្លឹមសារ​របាយការណ៍​បន្ថែម​ថា ឧត្ដមក្រុមប្រឹក្សា​នៃ​អង្គចៅក្រម ជា​អំណាច​កំពូល​របស់​តុលាការ ដែល​មាន​ព្រះមហាក្សត្រ​ជា​ព្រះប្រធាន និង​មាន​សមាជិក​ចំនួន ៨​រូប​។ សមាជិក​ឧត្ដមក្រុមប្រឹក្សា នៃ​អង្គចៅក្រម សុទ្ធ​សឹង​ជា មន្ត្រី​គណៈកម្មការ​អចិន្ត្រៃយ៍ របស់​គណបក្ស​កាន់អំណាច មាន ១០​រូប រួមមាន ប្រធាន​តុលាការ​កំពូល លោក ឌិត មន្ទីរ រដ្ឋមន្ត្រី​ក្រសួងយុត្តិធម៌ គឺ​លោក អង្គ វង្សវឌ្ឍនា ចៅក្រម ឃឹម ប៉ុណ្ណ ប្រធាន​ក្រុមប្រឹក្សា​ជំនុំជម្រះ និង​ជា​អនុប្រធាន​តុលាការ​កំពូល​។ លោក អ៊ុក គឹមសិទ្ធិ ព្រះរាជអាជ្ញា​រង​តុលាការ​កំពូល លោក យូ ប៊ុនឡេង ប្រធាន​សាលា​ឧទ្ធរណ៍។ លោក អ៊ុំ សារិទ្ធិ សមាជិក​ក្រុមប្រឹក្សា​នៃ​អង្គចៅក្រម​។ លោកស្រី លី វួចឡេង ចៅក្រម​ក្រសួង​យុត្តិធម៌​។ លោក ជីវ កេង អនុប្រធាន​តុលាការ​កំពូល លោក ឈួន ចាន់ថា អគ្គព្រះរាជអាជ្ញារង និង​ជា​តំណាង​មហា​អយ្យការ​តុលាការ​កំពូល លោកជំទាវ ជា លាង ជា​គណៈព្រះរាជអាជ្ញា មហា​អយ្យការ និង​ជា​សហ​ព្រះរាជអាជ្ញា​ជាតិ​អង្គ​ជំនុំជម្រះ​សាលា​ក្តី​ខ្មែរក្រហម ដែល​ពួកគាត់​ជា​សមាជិក​គណៈកម្មការ​កណ្ដាល នៃ​គណបក្ស​កាន់អំណាច។

លើស​ពី​នេះ ចៅក្រម និង​តុលាការ​កំពូល ដែល​សមាជិក​គណបក្ស​ប្រជាជន ទទួល​សំណុំ​រឿង​ក្តី ប្រធាន​បក្ស​ប្រឆាំង​លោក កឹម សុខា បាន​កម្ទេច គណបក្ស​សង្គ្រោះជាតិ កាលពី​ចុង​ឆ្នាំ ២០១៧ ។ របាយការណ៍​បន្ត​ថា របប​ក្រុងភ្នំពេញ បាន​បង្កើត​ច្បាប់​ថ្មី​៣​ទៀត ទី​១ ច្បាប់​លក្ខន្តិកៈ​ចៅក្រម និង​ព្រះរាជអាជ្ញា ទី​២ ច្បាប់​ស្ដីពី​ការ​រៀបចំ​អង្គការ​តុលាការ និង​ទី ៣ ច្បាប់​ស្ដីពី ការ​ប្រព្រឹត្ត​ទៅ នៃ​ឧត្ដមក្រុមប្រឹក្សា នៃ​អង្គចៅក្រម​។ ច្បាប់​ទាំងនេះ បាន​ផ្ដល់​អំណាច​ធំធេង​ដល់ រដ្ឋមន្ត្រី​ក្រសួង​យុត្តិធម៌ ដើម្បី​ក្ដោបក្ដាប់​អំណាច​តុលាការ និង​អយ្យការ​គ្រប់​ជាន់ថ្នាក់​។

លោក មួង សូនី សង្កេត​ឃើញ​ថា ច្បាប់​ទាំង​៣​នេះ បាន​ដើរ​បញ្ច្រាស​ពី​រដ្ឋធម្មនុញ្ញ ដែល​ចែងថា អំណាច​តុលាការ​ជា​អំណាច​ឯករាជ្យ​។ លោក​ថា ការសម្រេច​ក្ដី របស់​តុលាការ​គ្រប់​ជាន់ថ្នាក់ នៅតែ​រង​សម្ពាធ​ពី​ក្រសួងយុត្តិធម៌ ដែល​ជា​ដើមហេតុ មិន​ផ្ដល់​អំណាច​ពេញលេញ ដល់​តុលាការ បំពេញភារកិច្ច​អនុវត្ត​ច្បាប់ ដោយ​ស្មើភាព​គ្នា​ក្នុង​សង្គម​នោះ​ទេ​។ ឧទាហរណ៍ ប្រសិនបើ​មន្ត្រី​គ្រាក់ៗ របស់​គណបក្ស​កាន់អំណាច ប្រព្រឹត្ត​ខុសច្បាប់ ស្ថាប័ន​តុលាការ​ទាំងនោះ គ្មាន​ឥទ្ធិពល ផ្ដន្ទាទោស មន្ត្រី​ទាំង​នោះ​ទេ៖ «រដ្ឋអំណាច​ដែល​ដឹកនាំ​ដោយ គណបក្ស​ប្រជាជន ក្រៅពី​ការគ្រប់គ្រង​តុលាការ​តាមរយៈ ក្រសួងយុត្តិធម៌ យើង​មើល​ពី​ផល​ប៉ះពាល់ ។ ខ្ញុំ​គិត​ថា ការគ្រប់គ្រង​បែប​ហ្នឹង​គឺ​ផ្ទុយ​ស្រឡះ ​ពី​ច្បាប់​រដ្ឋធម្មនុញ្ញ​ដែល​ចែងថា ប្រទេស​កម្ពុជា​អនុវត្ត​ប្រជាធិបតេយ្យ​សេរី​ពហុបក្ស​។ អីចឹង​បើ​ពេលណា តុលាការ​មិន​ឯករាជ មិនបាន​បំពេញ​លក្ខខណ្ឌ​ប្រទេស​ប្រជាធិបតេយ្យ អីចឹង​វា​ដូចគ្នា​ប្រព័ន្ធ​គ្រប់គ្រង​បែប​កុម្មុយនិស្ត បែប​ផ្ដាច់ការ»

ឆ្លើយតប​រឿង​នេះ អ្នកនាំពាក្យ​គណបក្ស​ប្រជាជន​កម្ពុជា លោក សុខ ឥសាន ទទួល​ស្គាល់​ថា សមាជិក​ឧត្ដមក្រុមប្រឹក្សា​អង្គចៅក្រម​ទាំង ១០​រូប គឺជា​សមាជិក​គណបក្ស​ប្រជាជន​កម្ពុជា ព្រោះ​របប​នយោបាយ ប្រជាធិបតេយ្យ​សេរី​ពហុបក្ស គណបក្ស​ណា ដែល​ឈ្នះ​ឆ្នោត គឺ​មន្ត្រី​តុលាការ មន្ត្រី​យោធា និង​មន្ត្រីរាជការ សុទ្ធតែ​កើត​ចេញ​ពី​គណបក្ស​ឈ្នះ​ឆ្នោត​។ លោក​ថា គណបក្ស​ឈ្នះ​ឆ្នោត​មិន​អាច​យក​មន្ត្រី បក្ស​ប្រឆាំង​ចូល​ក្នុង​ស្ថាប័ន​សំខាន់ៗ​ជាតិ​នោះ​ទេ​។ លោក​បញ្ជាក់​ថា ការតែងតាំង​មន្ត្រី​តុលាការ គឺជា​សិទ្ធិ​របស់​គណបក្ស​ឈ្នះ​ឆ្នោត ដែល​បាន​បង្កើត​រាជរដ្ឋាភិបាល និង​តែងតាំង​មន្ត្រី​របស់​ខ្លួន​ចូល​ក្នុង​ស្ថាប័ន​របស់​រដ្ឋ៖ «ថាៗ​ទៅ អាហ្នឹង មិនមែន​ត្រឹម​១០​នាក់​ទេ ២០ ទៅ ៣០​នាក់ ឬ ១០០% កើត​ចេញ​ពី​គណបក្ស​ប្រជាជន ក៏​អត់​មាន​សិទ្ធិ​អី​ថា​ដែរ​។ អាហ្នឹង​វា​ជា​សិទ្ធិ​សម្រេច របស់​គណបក្ស​ឈ្នះ​ឆ្នោត។ ជឿ​អស់លោក​យុវជន​១០០​ថ្ងៃ និង ២០០​ថ្ងៃនេះ​គាត់​ថា​ត្រូវ​ទេ​? ខ្ញុំ​យល់ថា គាត់​ចង់​ទិតៀន​រដ្ឋាភិបាល ក៏ប៉ុន្តែ​ទិតៀន គេ​ធ្វើ​ត្រឹមត្រូវ​តាមច្បាប់ ត្រឹមត្រូវ​តាម​គោលការណ៍​លទ្ធិប្រជាធិបតេយ្យ​។ ខ្ញុំ​យល់ថា ការតែងតាំង​មន្ត្រី​តុលាការ​ក្ដី និង​មន្ត្រី​យោធា​ក្ដី ដែល​គណបក្ស​ប្រជាជន​ឈ្នះ​ឆ្នោត គឺ​ត្រឹមត្រូវ​តាម​គោលការណ៍​លទ្ធិប្រជាធិបតេយ្យ និង​គោលការណ៍​ច្បាប់»

ទោះ​យ៉ាងណា អ្នក​ជំនាញ​ប្រជាធិបតេយ្យ និង​ជា​អ្នកឃ្លាំមើល​សិទ្ធិមនុស្ស​នៃ​សមាគម​អាដហុក (Adhoc) លោក សឹង សែនករុណា យល់ថា ការ​ប្រកួតប្រជែង​ផ្នែក​នយោបាយ គណបក្ស​កាន់អំណាច​មិន​គួរ​ប្រើ​ប្រ​ព័ទ្ធ​តុលាការ​នោះ​ទេ​។ លោក​ចាត់​ទុក​​របាយការណ៍​នេះ ឆ្លុះបញ្ចាំង​ទិដ្ឋភាព​សង្គមជាតិ​ជាក់ស្ដែង ដែល​ចង់​ឃើញ ស្ថាប័ន​ពាក់ព័ន្ធ​ត្រូវ​កែទម្រង់​ប្រព័ន្ធ​តុលាការ​ឡើងវិញ ដើម្បី​សង្គ្រោះ​ប្រជាធិបតេយ្យ និង​នីតិរដ្ឋ​នៅ​កម្ពុជា។ លោក​សង្កេត​ឃើញ​ថា មហាជន​ទូទៅ​បាន​ចាត់​ទុក ប្រព័ន្ធ​តុលាការ មិន​ទាន់​មាន​ភាព​ឯករាជ​អព្យាក្រឹត្យ​ទេ ដោយសារតែ​មន្ត្រី​តុលាការ និង​អយ្យការ​ទាំងអស់ នៅ​មិនទាន់​បំពេញ​ការពារ​បម្រើ​ផលប្រយោជន៍​ពលរដ្ឋ និង​ការពារ​សិទ្ធិ​សេរីភាព ត្រឹមត្រូវ​តាម​ក្របខ័ណ្ឌ​ច្បាប់​នៅឡើយ​ទេ​។ លើស​ពី​នេះ មន្ត្រី​តុលាការ​ទាំងអស់ នៅ​មិនទាន់​គាស់ អគតិ​ទាំង​៤​បានទេ គឺ​លម្អៀង​ដោយ​ខ្លាច លម្អៀង​ដោយ​ស្អប់ លម្អៀង​ដោយ​ស្រឡាញ់ និង​លម្អៀង​ដោយ​អាណិត​។ ទន្ទឹម​នឹង​នេះ នៅ​គ្រា​ដែល​ពលរដ្ឋ​ដាក់ពាក្យ​ប្តឹង​ទៅ​តុលាការ នៅ​តែ​មាន​ភាព​ស្មុគស្មាញ​ច្រើន​៖ «តុលាការ មិនមែន​តែ​មតិ​អង្គការ​សង្គម​ស៊ីវិល​យើង​ទេ មតិ​ពលរដ្ឋ​ក្តី មតិ​សហគមន៍​អន្តរជាតិ​ក្តី របាយការណ៍​ដែល​បាន​ចេញ​ផ្សាយ​មួយ​ចំនួន ក៏បាន​លើកឡើង អំពី​ឯករាជ​របស់​តុលាការ​កម្ពុជា គឺ​គេ​មើល​ឃើញ​ជាក់ស្ដែង​ថា មិន​ទាន់​មាន​ភាព​ឯករាជ អព្យាក្រឹត្យ​ទេ ដោយសារតែ អ្នក​ទាំងអស់​នោះ មិន​ទាន់​បាន​បំពេញ​តួនាទី​ខ្លួន ល្អ​ប្រសើរ​ឡើយ ដោយ​ការពារ​ផល​ប្រយោជន៍ សិទ្ធិ​សេរីភាព​ពលរដ្ឋ ស្របតាម​ច្បាប់​ជាតិ និង​អន្តរជាតិ​ហ្នឹង យើង​កម្រ​ឃើញ​មាន ក្នុង​ការពារ​ប្រយោជន៍​ពួកគាត់​ណាស់»

របាយការណ៍​បន្ត​ថា តុលាការឋិត​ក្រោម​ការ​បង្គាប់បញ្ជា​របស់​គណបក្ស​កាន់អំណាច ដែល​នាំ​ឱ្យ​សង្គមជាតិ​បែកបាក់​ជាតិ បែងចែក​វណ្ណៈ ពុករលួយ និង បង្កើត​វប្បធម៌​និទ្ទណ្ឌភាព និង​ដើរ​បញ្ច្រាស ពី​គោល​នយោបាយ កាត់បន្ថយ​ភាព​ក្រីក្រ​របស់​រដ្ឋាភិបាល។ លើស​ពី​នេះ មន្ត្រី​ភាគច្រើន​ក្នុង​ស្ថាប័ន​តុលាការ និង​អយ្យការ បាន​យក​តួនាទី រកស៊ី ដើម្បី​ផលប្រយោជន៍​ផ្ទាល់ខ្លួន និង​កាត់​ក្តី​លម្អៀង​ទៅ​រក​បុគ្គល​មាន​ធនធាន​ច្រើន។

រដ្ឋធម្មនុញ្ញ មាត្រា ១២៨ និង ១៣០ ចែងថា អំណាចតុលាការ​ជា​អំណាច​ឯករាជ្យ ធានា​រក្សា​អនាគតិ និង​ការពារ​សិទ្ធិ សេរីភាព​ពលរដ្ឋ​។ គ្មាន​មាន​ស្ថាប័ន​ណាមួយ ដែល​ឋិត​ក្រោម​អំណាច​នីតិប្បញ្ញត្តិ និង​នីតិប្រតិបត្តិ ឬ​រដ្ឋាភិបាល អាច​ទទួល​អំណាច​ពី​តុលាការ​បាន​នោះ​ទេ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល