អាជ្ញាធរ បញ្ជូនក្រុម «ស្ត្រីក្លាហាន» ៣នាក់ទៅឃុំខ្លួននៅពន្ធនាគារព្រៃស ខណៈបង្ខំឲ្យសកម្មជន ៨នាក់ទៀត ចុះកិច្ចសន្យាឈប់តវ៉ា

ដោយ៖ អាស៊ីសេរី
2020.12.30

អាជ្ញាធរ បញ្ជូនក្រុម «ស្ត្រីក្លាហាន» ៣នាក់ទៅឃុំខ្លួននៅពន្ធនាគារព្រៃស ខណៈបង្ខំឲ្យសកម្មជន ៨នាក់ទៀត ចុះកិច្ចសន្យាឈប់តវ៉ា

ទិដ្ឋភាពខាងមុខសាលាដំបូងរាជធានីភ្នំពេញ

រូប៖ ពលរដ្ឋ

ស្ដាប់ ឬទាញយកសំឡេង

អាជ្ញាធររបបក្រុងភ្នំពេញបានបញ្ជូនក្រុម «ស្ត្រីក្លាហាន» ដែលជាក្រុមសកម្មជនឈឺឆ្អាលសង្គម ៣នាក់ ទៅឃុំខ្លួននៅពន្ធនាគារព្រៃស នៅព្រឹកថ្ងៃទី៣០ ធ្នូ ខណៈសកម្មជន៨នាក់ទៀតបង្ខំឱ្យធ្វើកិច្ចសន្យាឈប់ចូលរួមតវ៉ានៅថ្ងៃក្រោយទៀត។ មន្ត្រីសង្គមស៊ីវិល យល់ថា រឿងនេះជាការរឹតត្បិតសិទ្ធិសេរីភាពសម្ដែងមតិរបស់ប្រជាពលរដ្ឋ។

សកម្មជនឈឺឆ្អាលសង្គមទាំងបីនាក់ដែលត្រូវសមត្ថកិច្ចបញ្ជូនទៅពន្ធនាគារព្រៃសនោះ រួមមាន២នាក់មកពីរាជធានីភ្នំពេញ គឺលោកស្រី ហុង អាន និង លោកស្រី សាន ស្រីនៀត និងម្នាក់ទៀត គឺលោកស្រី ប៉ៃ រ៉េន មកពីខេត្តឧត្ដរមានជ័យ។ អ្នកទាំងបីត្រូវបានសមត្ថកិច្ចចាប់ខ្លួនកាលពីថ្ងៃទី២៨ និង២៩។ តុលាការបានចោទប្រកាន់អ្នកទាំងបីពីបទញុះញង់ឱ្យប្រព្រឹត្តិបទឧក្រិដ្ឋជាអាទិ៍។

កូនប្រុសរបស់លោកស្រី ហុង អាន គឺលោក ហេង ឆាយ ថា ការចាប់ខ្លួននេះ ជារឿងអយុត្តិធម៌មិនអាចទទួលយកបានឡើយ។ លោកបញ្ជាក់ថា ម្ដាយរបស់លោកជាមនុស្សស្លូតត្រង់ និងមិនបានប្រព្រឹត្តិខុសច្បាប់អ្វីឡើយ៖ «ខ្ញុំទទួលយកអត់បានទេបង ព្រោះដោយសារគាត់ថាញុះញង់អីចឹង គឺអត់ត្រូវទេ នេះគ្រាន់តែគាត់ទៅបញ្ចេញមតិ។ ខ្ញុំទាមទារឱ្យគេដោះលែងម្ដាយខ្ញុំព្រោះដោយសារគាត់អត់បានប្រព្រឹត្តណាមួយដែលខុសពីច្បាប់ គ្រាន់តែគាត់ចូលរួមសម្ដែងមតិ»។

ជាមួយគ្នានេះ ប៉ូលិសក្រុងភ្នំពេញបានចាប់ខ្លួនសកម្មជនគណបក្សសង្គ្រោះជាតិចំនួន៨នាក់ទៀតបញ្ជូនទៅសាកសួរកាលពីថ្ងៃទី២៩ ធ្នូ។

អ្នកនាំពាក្យស្នងការនគរបាលរាជធានីភ្នំពេញ លោក សាន សុខសីហា ប្រាប់ អាស៊ីសេរី ថា សកម្មជនទាំង៨នោះ អ្នកមកពីខេត្តត្បូងឃ្មុំ២នាក់ ខេត្តឧត្ដរមានជ័យ៥នាក់ និងម្នាក់ទៀតគឺលោកស្រី សុខ បូលីម៉ា នៅរាជធានីភ្នំពេញ។ លោកឱ្យដឹងថា ប៉ូលិសក្រុងភ្នំពេញបានបញ្ជូនពួកគេត្រឡប់ទៅខេត្តកំណើតរបស់ពួកគេរៀងៗខ្លួនអស់ហើយ ចំណែកលោកស្រី សុខ បូលីម៉ា សមត្ថកិច្ចបន្តនីតិវិធីនៅស្នងការនគរបាលរាជធានីភ្នំពេញរហូតមកទល់ម៉ោង៣រសៀលថ្ងៃទី៣០ ធ្នូ មិនទាន់ចប់នៅឡើយ។ លោកបញ្ជាក់ថា ពួកគេចូលរួមតវ៉ាមិនបានសុំច្បាប់ពីអាជ្ញាធរ ដូច្នេះសមត្ថកិច្ចនាំខ្លួនពួកគេយកមកអប់រំ រួចឱ្យធ្វើកិច្ចសន្យាឈប់ការតវ៉ានៅថ្ងៃក្រោយទៀត៖ «គឺការធ្វើការជួបជុំអីមួយគឺស្នើសុំឱ្យធ្វើលិខិតត្រឹមត្រូវ មានឈ្មោះត្រឹមមកពីណាត្រឹមត្រូវ ដើម្បីងាយស្រួលតាមដាន។ បើសិនជាពេលហ្នឹងមានបញ្ហា គឺអ្នកហ្នឹងអ្នកទទួលខុសត្រូវ។ ដល់ពេលអីចេះវាអត់ដឹងថាប្រភពថាគាត់មកពីណាខ្លះ។ អីចឹង បើគាត់មកបង្កបញ្ហាផ្សេងមកនេះ គឺ យើងត្រូវហៅសាកសួរដើម្បីឱ្យដឹង។ បាទ!អាហ្នឹងជាក់ស្ដែងវាតែប៉ុណ្ណឹង ដូចជាអត់មានអីទេ គ្រាន់តែបន្តសួរនាំខ្លះ ហើយធ្វើកិច្ចសន្យាអប់រំ»។

នាយករងអង្គការលីកាដូ (Licadho) ទទួលបន្ទុកផ្នែកសិទ្ធិមនុស្ស លោក អំ សំអាត យល់ថា រឿងនេះបានប៉ះពាល់យ៉ាងខ្លាំងដល់ការសម្ដែងមតិរបស់ប្រជាពលរដ្ឋដែលមានចែងនៅក្នុងរដ្ឋធម្មនុញ្ញ។ មន្ត្រីសង្គមស៊ីវិលរូបនេះ និយាយថា បើទោះបីជាមិនបានសុំច្បាប់អនុញ្ញាតក៏ដោយ ពលរដ្ឋមានសិទ្ធិជួបជុំតវ៉ា ដោយសន្តិវិធី និង រួចផុតពីការប្រើអំពើហិង្សានានា។ លោក បន្ថែមថា ការធ្វើបែបនេះ គឺដើរចាកឆ្ងាយពីគន្លងប្រជាធិបតេយ្យ ហើយអាចនឹងរងការរិះគន់ពីសហគមន៍អន្តរជាតិមកលើកម្ពុជា៖ «ស្ថានភាពនយោបាយវានៅធូរស្រាល ខ្ញុំឃើញថាការជួបជុំ ការប្រមូលផ្ដុំអីអត់ដូចសព្វថ្ងៃទេ។ អីចឹងបើយើងមើល មកឥឡូវនេះវិញ គឺដោយសារតែបញ្ហាហ្នឹង ដោយសារស្ថានភាពនយោបាយផង និងបញ្ហាជំងឺកូវីដ-១៩ផងដែរ។ ប៉ុន្តែបើសិនទិដ្ឋភាពទូទៅយើងឃើញថា យូរឆ្នាំនៅមុខតុលាការហ្នឹង វាអ្នកតវ៉ាជាច្រើនដែរមិនដែលមានការតវ៉ារឹតបន្តឹងដូចពេលនេះទេ»។

ការចាប់ខ្លួនសកម្មជនឈឺឆ្អាលសង្គម និងសកម្មជនគណបក្សប្រឆាំងនេះធ្វើឡើងប្រមាណ១សប្ដាហ៍នៅមុនថ្ងៃកំណត់វិលចូលស្រុកវិញជាលើកទី២របស់ថ្នាក់ដឹកនាំគណបក្សសង្គ្រោះជាតិ ដែលបានភៀសខ្លួននៅក្រៅប្រទេស ដើម្បីចូលរួមដំណើរការក្ដីតាមការកោះហៅរបស់តុលាការ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។

អត្ថបទពេញនិយម

RFA

ក្រសួងមហាផ្ទៃបញ្ជាក់ថា កូនមន្ត្រីជាន់ខ្ពស់ ដែលបើកឡានបុកមនុស្សស្លាប់ពីរនាក់ នៅអូស្ត្រាលីនោះ គឺឈ្មោះ ឌឿន ឧត្ដមសេនីយ៍

អត្ថបទពេញនិយម

នយោបាយ

តុលាការចោទប្រកាន់ពលករខ្មែរដែលបញ្ជូនពីម៉ាឡេស៊ី ពីបទញុះញង់ និងឃុំខ្លួននៅពន្ធនាគារ